Ulikuwa Painia wa Kawaida Hapo Awali?
1. Wahubiri wengi wamefurahia pendeleo gani, lakini wengine wamelazimika kufanya nini?
1 Kwa miaka mingi, maelfu ya wahubiri wamefurahia pendeleo la “kufundisha na kutangaza habari njema” wakiwa wahudumu wa wakati wote. (Mdo. 5:42) Hata hivyo, wengine wamelazimika kuacha kutumika kama mapainia kwa sababu tofauti-tofauti. Ikiwa ulikuwa painia wa kawaida hapo awali, je, umechanganua hali zako za sasa na kuona kama unaweza kuwa painia tena?
2. Kwa nini wahubiri ambao walikuwa mapainia hapo awali wanapaswa kuchanganua hali zao za sasa?
2 Hali Hubadilika: Huenda ikawa hali zilizokufanya uache utumishi wa painia hazipo tena. Kwa mfano, iwapo uliacha kuwa painia kwa sababu hukuweza kufikisha takwa la saa 90 kwa mwezi, je, sasa unaweza kuwa painia tena kwa kuwa takwa la saa limepunguzwa hadi 70? Labda huhitaji kufanya kazi ya kimwili kwa muda mwingi kama hapo awali, au majukumu ya familia yamepungua toka ulipoacha kuwa painia. Dada mmoja aliyeacha upainia kwa sababu za kiafya aliweza kupainia tena alipokuwa na umri wa miaka 89. Hakuwa amelazwa hospitalini kwa zaidi ya mwaka mmoja na hivyo alihisi kwamba afya yake ingemruhusu kuwa painia tena!
3. Watu wa familia wanaweza kushirikianaje ili kumsaidia mmoja wao awe painia?
3 Labda hukuwa painia hapo awali, lakini huenda kuna mtu wa familia yenu aliyeacha kuwa painia ili amtunze mtu mwingine wa familia kama vile mzazi mzee. (1 Tim. 5:4, 8) Ikiwa ndivyo ilivyo, je, wewe au wengine katika familia wanaweza kufanya mengi zaidi ili kumsaidia? Labda mnaweza kuzungumzia jambo hilo pamoja. (Met. 15:22) Watu wa familia wanaposhirikiana ili mmoja wao awe painia, wote wanaweza kuhisi kwamba wanashiriki kwa njia fulani katika utumishi huo.
4. Unaweza kufanya nini iwapo huwezi kurudia utumishi wa painia kwa sasa?
4 Usife moyo ikiwa hali zako sasa hazikuruhusu kuanza kuwa painia tena. Yehova anathamini utayari wako wa kufanya hivyo. (2 Kor. 8:12) Tumia stadi ambazo ulijifunza ulipokuwa painia katika utumishi wako wa sasa. Sali kuhusu tamaa yako, na uwe macho ili kuona kama utapata nafasi yoyote ya kurudia utumishi wa painia tena. (1 Yoh. 5:14) Huenda baada ya muda Yehova atafungua “mlango mkubwa unaoongoza kwenye utendaji,” ili uweze kufurahia kuwa painia wa kawaida tena!—1 Kor. 16:9.