Je, Waweza Kujiunga Tena na Kundi Hilo?
1 Kwa kipindi cha miaka mitano iliyopita, maelfu ya mapainia wa kawaida wameona kuwa ni lazima waache kundi la mapainia. Je, ulikuwa mmoja wao? Ikiwa ndivyo, bila shaka ulikuwa na sababu ya kuacha pendeleo hili. Labda lilikuwa jambo lisilotazamiwa au usiloweza kulidhibiti. Sababu hiyo bado ipo? Ikiwa afya, matatizo ya kifedha, au madaraka ya familia yalifanya iwe lazima kuacha, je, hali zako zimekuwa nafuu? Je, ungeweza kufanya marekebisho ambayo yatakuruhusu ufurahie baraka za kufanya upainia wa kawaida tena? Je, umefikiria juu ya kuurudia tena?
2 Kama ujuavyo, mpango mzuri na kuratibu kwa uangalifu kwahitajiwa ikiwa utafanikiwa ukiwa painia. Ijapokuwa kwa kawaida hakuna wakati mwingi wa tafrija, vipindi vifupi vya painia vya kupumzika mara nyingi huwa vyenye kuridhisha na kuthawabisha sana. (Mit. 19:17; Mdo. 20:35) Kwa kuwa mwenye shughuli nyingi katika utumishi, unalindwa na shawishi la mtindo wa maisha ya kujitafutia mambo yako mwenyewe, maisha ya raha-mstarehe yanayofuatiwa na ulimwengu. Yehova ameahidi kwamba atakutajirisha kiroho ukijidhabihu na kutanguliza masilahi ya Ufalme kwanza. Utakuwa na uhakika wa kuona shangwe na uradhi wa kweli kwa kuwa mwenye moyo kamili katika utumishi wa Yehova.—Mit. 10:22; Kol. 3:23, 24.
3 Je, huduma ya wakati wote wapaswa kuonwa kuwa pendeleo lipatikanalo kwa wachache tu walio wa pekee? La. Kwa kufikiria kiapo chetu cha wakfu, kila Mkristo apaswa kufikiria kwa uzito utumishi wa wakati wote isipokuwa hali zifanye isiwezekane.—Mk. 12:30.
4 Ikiwa afya yako na madaraka ya Kimaandiko kwa wazi hayakuruhusu upainie kwa sasa, unaweza kuwa na uhakika kwamba Yehova ajua na anaelewa. Atakuthawabisha kwa uaminifu wako kulingana na hali yako inavyoruhusu. (1 Kor. 4:2; 2 Kor. 8:12) Lakini, ikiwa, inaonekana kwamba unaweza kupainia tena, kwa nini usimwendee mwangalizi-msimamizi na uombe ombi la kujaza?
5 Je, Familia Yako Yaweza Kusaidia? Huenda uliacha kundi hilo kwa sababu ulihitaji kutunza wajibu wa familia. Je, yawezekana kwamba washiriki wengine wa familia sasa wako katika hali ya kutoa msaada ambao utakuwezesha kuingia tena katika kazi ya kupainia? Kwa watu fulani, wakiwa na msaada kidogo tu wa kutunza madaraka fulani, upainia waweza kurudiwa tena.
6 Ushirikiano mzuri na jitihada ndogo ya ziada kwa upande wa washiriki wengine wa familia waweza kufanya jambo hili liwezekane. Msaada waweza kutolewa wa aina ya kifedha au usafiri, pamoja na mipango ya kawaida ya kuhubiri pamoja katika utumishi. Yaelekea kuna njia nyinginezo wanazoweza kusaidia. Ikiwa hali hazikuruhusu kuchukua pendeleo hili la utumishi tena, labda msaada huo waweza kupewa mshiriki mwingine wa familia anayeweza kufanya hivyo.
7 Kwa nini msizungumzie jambo hili mkiwa familia? Matazamio yaweza kuwa mazuri mkiufanya kuwa mradi wa pamoja. Painia mwingine akiweza kuongezwa kwenye kundi hilo, nyumba nzima yaweza kuhisi ifaavyo kwamba inashiriki. Roho hiyo ya ukarimu haitaongeza ushahidi wa Ufalme tu bali pia itavuta familia kuwa karibu kiroho.—Lk. 6:38; Flp. 2:2-4.