Unaweza Kushiriki Katika Huduma Siku ya Jumapili?
1. Tunaweza kujifunza nini kutokana na jinsi Paulo na wenzake walivyotenda jijini Filipi?
1 Ilikuwa Sabato, siku ambayo Wayahudi wengi jijini Filipi walipumzika. Paulo na wenzake walikuwa wakitembelea jiji hilo wakati wa mojawapo ya safari zao za umishonari. Hakuna mtu angewashutumu ikiwa wangeacha kazi yao ya kuhubiri siku hiyo na kupumzika kwa kuwa walistahili pumziko pia. Lakini, walijua kwamba Wayahudi walikusanyika nje ya jiji hilo ili kusali, hivyo, wakatumia fursa hiyo kuwahubiria. Haikosi Paulo na wenzake walifurahi sana Lidia alipowasikiliza, naye na watu wote wa nyumbani mwake wakabatizwa! (Mdo. 16:13-15) Kwa kuwa watu wengi leo hupumzika Jumapili, kwa nini usitumie muda fulani wa siku hiyo kuwahubiria?
2. Watu wa Yehova wameshinda hali gani ngumu ili waweze kuhubiri siku ya Jumapili bila kusumbuliwa?
2 Pambano la Kuhubiri Siku ya Jumapili: Mnamo 1927, watu wa Yehova walitiwa moyo kutumia muda fulani katika huduma kila Jumapili. Jambo hilo likatokeza upinzani mara moja. Wengi wao walikamatwa nchini Marekani kwa kutoheshimu sheria za Sabato ya Jumapili, kuvuruga amani, na kuuza bila leseni. Hata hivyo, watu wa Yehova hawakuacha kuhubiri. Katika miaka ya 1930, walipangwa katika “kampeni za vikundi,” ambamo wahubiri wa makutaniko ya karibu-karibu waliungana ili wahubiri kikamili eneo fulani. Katika pindi fulani, wahubiri walipokamatwa, walikuwa wengi sana hivi kwamba wenye mamlaka wakashindwa kuwazuia kuhubiri. Je, unathamini kikweli jinsi ndugu hao walivyojidhabihu ili tuweze kuhubiri siku ya Jumapili bila kusumbuliwa?
3. Kwa nini Jumapili ni siku nzuri ya kushiriki katika huduma?
3 Siku Nzuri ya Kuhubiri: Watu wengi hawaendi kazini siku ya Jumapili. Mara nyingi huwa wanastarehe. Huenda baadhi ya watu wanaoenda kanisani wakawa tayari kuzungumzia mambo ya Mungu siku hiyo. Ikiwa tuna mikutano siku ya Jumapili, tayari tumevalia vizuri kwa ajili ya huduma, hivyo basi, kwa nini usipange kwenda katika utumishi wa shambani kabla au baada ya mikutano? Ikihitajika, unaweza kubeba chakula chepesi.
4. Tunaweza kupata shangwe gani tukitumia muda fulani katika huduma siku ya Jumapili?
4 Tukitumia muda fulani katika huduma siku ya Jumapili, bado tutakuwa na wakati tunaohitaji ili kupumzika. Nasi tutapumzika tukiwa na uradhi kwamba tumeshiriki katika utumishi mtakatifu. (Met. 19:23) Huenda hata tukawa na shangwe ya kumpata mtu aliye kama Lidia!