Kuboresha Ustadi Wetu Katika Huduma—Kuhubiri Kupitia Simu ya Mlangoni

Kwa Nini Ni Muhimu: Si rahisi kuhubiri kupitia simu ya mlangoni. Tunaweza kufanya nini ili tudumishe bidii yetu kwa ajili ya kazi njema? Kumbuka kwamba njia hii inaweza kuwa njia pekee ya kuwahubiria watu fulani. (Rom. 10:14) Kuna mifano inayoonyesha kwamba inawezekana kutoa ushahidi kwa matokeo kupitia njia hii. (Ona Kitabu cha Mwaka—2011, uku. 65-66, na Kitabu cha Mwaka—2000, uku. 54, fu. 3.) Fikiria mapendekezo yafuatayo.

Jinsi ya Kufanya Hivyo:

Tayarisha na uandike utangulizi mfupi ili uweze kumsomea mwenye nyumba moja kwa moja kupitia simu ya mlangoni. Kufanya hivyo kutakusaidia uwe jasiri. Baada tu ya kuanzisha mazungumzo, eleza kusudi la kumtembelea. Tumia jina la mwenye nyumba ikiwa limeonyeshwa katika kitabu cha orodha ya simu. Malizia kwa kumuuliza ikiwa angependa kupokea (au umwachie mlangoni) trakti au gazeti litakalomsaidia apate habari zaidi.
Uwe na mtazamo unaofaa. Tabasamu na utoe ishara za mwili kana kwamba unazungumza na mwenye nyumba uso kwa uso.
Tulia na uzungumze kwa njia ya kawaida. Zungumza kwa njia inayoeleweka wazi na kwa sauti ya kutosha. Zungumza kwa mtiririko, lakini usizungumze haraka sana.
Tumia utambuzi. Katika majengo makubwa kunaweza kuwa na simu nyingi za mlangoni. Kwa hiyo, unaweza kuamua kuwahubiria kwanza wenye nyumba wachache na kuweka rekodi ili ujue umefikia wapi. Huenda wenye nyumba wakawa na wasiwasi ikiwa tutatumia wakati mwingi sana tukijaribu kumhubiria kila mmoja katika jengo hilo kupitia simu ya mlangoni.

Jaribu Dokezo Hili kwa Mwezi Mzima:

Katika ibada yenu ya familia fanyeni mazoezi ya kuhubiri kupitia simu ya mlangoni. Watu wawili wazungumze huku kila mmoja akiwa ameangalia upande tofauti.