Kutoka kwa Wasomaji Wetu
Kusikiliza Ile makala “Je, Wewe Ni Msikilizaji Mwenye Hisia-Mwenzi?” (Desemba 8, 1994) ilikuwa tu nilichohitaji. Rafiki mmoja aliniambia mara kadhaa kwamba hafurahishwi ninaposema kwamba matatizo yake kwa kweli si mabaya sana na kuendelea kumpa shauri asiloliomba. Kwa kusema kweli, nilifikiri yeye alikuwa na mtazamo wenye makosa. Sasa naona kwamba mimi nilikosea!
S. H., Marekani
Nilikuwa nimengojea makala kama hii, lakini ilipita matazamio yangu. Mara nyingi mno, sisi hupuuza umuhimu wa kujua jinsi ya kusikiliza. Hata hivyo, wengi wetu wametamani kupata uangalifu huo wenyewe.
S. D., Italia
Nina umri wa miaka 18, na mara nyingi hujikuta nikiwa sijui la kusema katika hali fulani. Lakini baada ya kusoma makala hiyo yenye kupendeza, nahisi kwamba naweza kuwa msikilizaji mwenye hisia-mwenzi.
J. M., Australia
Ni vema kujua kwamba si lazima tutatue kila tatizo tunalosikia lakini kwamba mara nyingi kusikiliza kwatosha. Hasa huenda wale kati yetu watokao katika familia zilizo na kasoro wakahitaji kujifunza stadi za msingi za kuwasiliana. Asanteni kwa kuendelea kutumia Biblia ili kutufunza jinsi ya kuishi.
J. D., Marekani
Usanii Ulioboreshwa Nilifuatia somo la sanaa ya uwasilishaji, upambaji na uandishi katika shule. Wakati uleule, nilikuwa nikijifunza Biblia pamoja na Mashahidi wa Yehova. Lakini nilipoenda na Amkeni! shuleni, wanafunzi wenzangu walilalamika kuhusu ubuni walo—kwamba ‘hali ya rangi’ ilikuwa mbaya na kadhalika. Hata hivyo, katika miezi ya majuzi, ubuni umekuwa wenye kutokeza kikweli. Kwa kweli nayaonea fahari hayo magazeti!
N. I., Japani
Angahewa Lililoharibiwa Nimemaliza tu kusoma ile makala “Angahewa Letu Linapoharibiwa” na niliifurahia sana. (Desemba 22, 1994) Kwa hakika mna uwezo wa kipekee wa kuchagua habari zenye umaana ili kuandika kuzihusu. Ingawa hivyo, mara kadhaa mlitaja ongezeko la joto tufeni lakini hamkutoa ithibati. Waangalifu eh! Ikiwa kinyume cha hilo kitathibitika kuwa kweli siku moja, kutakuwa na adhabu ya kiuandishi mtakayolipa.
M. L., Marekani
Sisi hatukukubali nadharia ya ongezeko la joto tufeni bali tuliripoti tu uhakika wa kwamba wanasayansi kadhaa mashuhuri wanaamini kwamba hilo linatendeka. Iwe hiyo nadharia yenye kubishaniwa itahakikishwa kuwa kweli au kukataliwa kwa utafiti zaidi yabaki kuonekana.—Mhariri.
Safari za Matembezi ya Darasa Nilifurahishwa kusoma makala yenu “Vijana Huuliza . . . Je, Safari za Matembezi ya Darasa Zinafaa?” (Oktoba 22, 1994) Miaka mingi iliyopita darasa langu lilipanga safari ya juma moja. Baada ya kufikiria jambo hilo kwa sala, niliamua kutoenda. Darasa liliporudi nyumbani, nilipata kujua kwamba wanadarasa wenzangu kadhaa walikuwa wamejiingiza katika ukosefu wa adili katika ngono. Kwa kweli, safari hizo zaweza kuwa mtihani mgumu kwa kijana Mkristo.
J. S., Norway
Hiyo makala ilinisaidia kwelikweli kwa sababu nimepata kwenda katika safari kadhaa za utendaji wa nje. Maswali mliyowasilisha yanasaidia kijana kuchanganua hali. Asanteni kwa kunisaidia kuweka safari za darasa katika maoni yanayofaa.
M. R., Marekani
Hivi majuzi nilialikwa kushiriki katika safari ya matembezi ya darasa hadi mahali ambapo nimetamani sikuzote kuona. Niliamua kuacha safari hiyo, ingawa tayari nilikuwa nimenunua tikiti. Baadaye nilianza kuwaza kuhusu kile nilikuwa nimekosa. Lakini makala yenu iliwasili katika wakati ufaao. Baada ya kuisoma, nilikuwa na uhakika kwamba nilikuwa nimefanya uamuzi ulio sawa.
L. S. B., Brazili