Sisi Ni Marafiki Kama Chanda na Pete
TRACY ni mbwa-msasi mweusi aina ya Labrador mwenye umri wa miaka kumi ambaye huniongoza. Kwa sababu yake mimi naweza kufanya mambo kama kawaida. Yeye pia huniandalia uandamani na faraja. Basi si ajabu kwamba nimekuja kumpenda sana na kwamba sisi ni marafiki wasioachana.
Nyakati nyingine, bila kukusudia, wanadamu hushindwa kwa njia ambayo Tracy hawezi kushindwa. Kwa mfano, siku moja nilikuwa nimemwacha Tracy nyumbani na nilikuwa natembea na rafiki fulani. Tulikuwa tunaongea kwa furaha nilipoanguka kwa ghafula. Rafiki yangu alikuwa amesahau kwamba nilikuwa kipofu akakosa kunionya juu ya mawe yaliyojengwa kando ya barabara. Jambo hilo halingalitendeka kama ningalikuwa na Tracy.
Pindi moja, Tracy aliniokoa uhai kabisa. Nilikuwa natembea barabarani wakati ambapo kwa ghafula lori lilianza kuacha njia likinielekea. Nilisikia injini yake lakini singeweza kuona linaelekea wapi. Tracy akaona na kuelewa kuna hatari na upesi akanivuta kwa usalama.
Kipofu, Lakini Naona
Nilizaliwa 1944 kusini ya Sweden na nimekuwa kipofu tangu kuzaliwa. Nilipelekwa shule ya bweni ya watoto vipofu, ambako nilijifunza kusoma na kuandika katika Braille. Muziki ukawa sehemu kubwa ya maisha yangu, hasa kucheza piano. Baada ya kuhitimu kutoka shule ya sekondari, niliendelea kujifunza lugha na muziki kwenye Chuo Kikuu cha Göteborg.
Hata hivyo, maisha yangu yalibadilika kabisa Mashahidi wa Yehova wawili walipokuja mlangoni pangu katika chuo kikuu. Punde si punde nilianza kuhudhuria mikutano ya Mashahidi na hata nikaanza kuwaeleza wengine kile nilichokuwa nikijifunza. Katika 1977, nilionyesha wakfu wangu kwa Yehova Mungu kwa ubatizo wa maji. Ingawa mimi ni kipofu kihalisi, kwa funzo la Neno la Mungu, nilikuwa nimepokea kitu chenye thamani sana—mwono wa kiroho.
Leo najiona kuwa bora sana kuliko wale ambao wanaweza kuona kihalisi lakini ni vipofu kiroho. (Linganisha Yohana 9:39-41.) Nafurahi kuwa na mwono mwangavu wa ulimwengu mpya wa Mungu ambamo, kulingana na ahadi yake, macho ya vipofu yataona—ndiyo, ambamo magonjwa yote ya kimwili yataponyeshwa na ambamo hata wafu watafufuliwa!—Zaburi 146:8; Isaya 35:5, 6; Matendo 24:15.
Ingawa mimi ni mseja na kipofu kihalisi, nikiwa na Tracy akiwa mwandamani wangu mwaminifu-mshikamanifu, naweza kufanya mambo vizuri. Ebu nieleze jinsi anavyonisaidia kuendeleza kazi yangu ya kimwili na kutimiza huduma yangu nikiwa mmoja wa Mashahidi wa Yehova. (Mathayo 24:14; Matendo 20:20; Waebrania 10:25) Lakini kwanza, nitaeleza kuhusu Tracy mwenyewe.
Achaguliwa kwa Mazoezi ya Kipekee
Tracy alipokuwa na umri wa miezi minane, alijaribiwa ili kuona kama angestahili kuwa mbwa awezaye kuongoza kipofu. Alithibitika kuwa mtulivu, rahisi kufundisha, na asiyeogopeshwa kwa urahisi na kelele kubwa za ghafula. Kisha akawekwa kuishi na familia fulani ili ajifunze jinsi maisha ya kawaida ya familia yalivyo. Baadaye, alipokuwa mkomavu vya kutosha, alipelekwa shule ya mazoezi ya mbwa wenye kuongoza vipofu.
Katika shule hiyo Tracy alijifunza kufanya kile kilichohitajika kwa mbwa mwenye kuongoza kipofu, yaani kumsaidia bwana wake wa wakati ujao kupata milango, ngazi, malango, na hata njia. Pia alijifunza jinsi ya kutembea kandokando za barabara zenye watu wengi na jinsi ya kuvuka barabara. Pia alifundishwa kusimama penye mawe yaliyojengwa kando za barabara, kutii taa za barabarani za kuongoza magari, na kuepuka vizuizi hatari. Baada ya muda wa miezi mitano ya mazoezi, alikuwa tayari kwa kazi. Huo ndio wakati nilipojulishwa Tracy.
Anachonifanyia Tracy
Kila asubuhi Tracy huniamsha ili nimlishe. Kisha tunakuwa tayari kwa kazi. Ofisi yangu ni karibu dakika 20 za kutembea kutoka kwangu. Bila shaka najua njia, lakini kazi ya Tracy ni kunisaidia kufika huko bila kugongana na magari, watu, nguzo za taa, au chochote kile. Tufikapo yeye hulala chini ya dawati langu. Kisha, wakati wa mapumziko ya mchana, mara nyingi sisi huenda kutembea.
Jioni, baada ya kurudi nyumbani kutoka kazini, sehemu bora zaidi ya siku yetu huanza. Huo ndio wakati Tracy huniongoza katika kuhubiri nyumba hadi nyumba na katika nyumba ambazo naongoza mafunzo ya Biblia. Watu wengi ni wenye urafiki kwake, wakimpapasa-papasa na kumkumbatia na nyakati nyingine kunipa chakula kitamu kwa ajili yake. Sisi pia huhudhuria mikutano ya Kikristo kila juma. Baada ya mikutano watoto hufurahia kumsalimu na kumkumbatia Tracy, jambo ambalo humfurahisha sana.
Natambua kwamba Tracy ni mbwa tu na kwamba siku fulani atakufa. Hilo lamaanisha kwamba hatimaye nitalazimika kupata mbwa mwingine wa kuniongoza. Lakini, kwa wakati huu, sisi ni timu na tunahitajiana. Tracy asipokuwa karibu, mimi hukosa uhakika, naye hupatwa na wasiwasi na kukosa utulivu wakati ambapo hawezi kuniongoza.
Uhitaji wa Uelewevu
Kwa kushangaza, nyakati nyingine watu hujaribu kututenganisha. Wao huona Tracy kama mbwa au mnyama rafiki wa kawaida tu na hawaelewi uhusiano wa ndani tulio nao. Watu hao wanahitaji kuelewa kwamba kwangu Tracy ni muhimu sana kama ambavyo kiti chenye magurudumu ni muhimu kwa mtu aliyepooza. Kututenganisha ni kama kuninyang’anya macho yangu.
Kadiri ambavyo wengine wanaelewa uhusiano uliopo kati yangu na Tracy, ndivyo na matatizo yawavyo machache zaidi. Kwa mfano, kiti chenye magurudumu hukubalika kwa urahisi lakini sivyo ilivyo na mbwa wangu wa kuniongoza. Watu wengine huogopa mbwa, au hawapendi tu mbwa.
Mambo yapatikanayo katika broshua fulani kuhusu mbwa wa kuongoza vipofu, inayochapishwa na Shirika la Sweden la Wenye Matatizo ya Kuona, ni yenye msaada sana. Hiyo inasema: “Mbwa wa kuongoza ni msaada wa kutembeza wasioweza kuona. Ndiyo, zaidi ya hiyo. Huyo ni msaada ulio hai. . . . Huyo ni rafiki asiyeweza kukutamausha.”
Kwa kweli, Tracy hutumikia kama macho yangu gizani, naye hunisaidia kuishi maisha ya kawaida kwa kadiri iwezekanavyo sasa. Lakini, nimesadiki kwamba karibuni, katika ulimwengu mpya ulioahidiwa wa Mungu, nitaweza kuona uumbaji wote ajabu wenye kutisha. Hivyo, nimeazimia sasa kudumisha mwono wangu wa kiroho.
Basi, kichwa cha Tracy kikiwa mapajani mwangu, sasa tuko tayari kusikiliza rekodi ya toleo la karibuni zaidi la gazeti la Mnara wa Mlinzi.—Kama ilivyosimuliwa na Anne-Marie Evaldsson.