Dumisha Maoni Yaliyosawazika Kuhusu Muziki

BIASHARA ya muziki leo inapata mabilioni ya dola. Wanamuziki maarufu na wafadhili wao wanachuma fedha nyingi. Lakini, ni jambo la hakika kwamba kukosa furaha, kifo cha mapema, na kujiua ni mambo yanayoashiria maisha ya wanamuziki fulani waliofanikiwa sana. Na imedhihirishwa vya kutosha kwamba aina fulani ya muziki hushusha heshima kiadili, kihisia-moyo, na kiroho na waweza kuongoza kwenye tabia ya kujitenga na watu na jeuri.

Hata hivyo, tunahitaji kuwa na maoni yaliyosawazika kuhusu muziki. Ingawa kuna mambo mengi mabaya na yanayodhuru katika aina hii ya sanaa, muziki wa aina fulani waweza kuboresha maisha ya mtu na kutokeza shangwe na kiasi fulani cha uradhi. Unaweza kutuchangamsha kihisia-moyo na kiroho. Fikiria mifano michache tu.

Zaburi 150 za Biblia ni kazi bora za fasihi—mashairi ya maneno, nyimbo takatifu, na sala. Leo zinasomwa kwa upendezi katika mamia ya lugha. Hata hivyo, Waebrania wa kale, hawakusoma tu zaburi hizo; waliziimba. Mara nyingi walifanya hivyo kwa kuambatana na muziki wenye kupendeza—njia kubwa sana ya kuhusianisha hekima ya Mungu wao Yehova, kama ionyeshwavyo katika maneno, na hisia-moyo ambazo waimbaji waliozoezwa wangeweza kuwasilisha kwa wasikilizaji wao. Yaonekana ubora na mtindo wa muziki wa Waebrania ulikuwa wa hali ya juu kuliko wa mataifa yaliyowazunguka na hivyo haukuwa wa msingi sana au hata wa kishenzi.

Baadaye, Wakristo wa karne ya kwanza waliimba zaburi na nyimbo nyingine takatifu ili kumsifu Mungu na kutuliza hisia-moyo zenye mkazo. Hivyo waliboresha maisha yao kwa raha inayoletwa na kusikiliza muziki. Na kwa kuimba nyimbo zinazotegemea Biblia, waliingiza ndani ya mioyo yao ujuzi wa Mungu, waliohitaji ili kuelekeza maisha yao.—Mathayo 26:30; Matendo 16:25.

Wagiriki wa kale waliamini kwamba muziki hukuza utu wa kibinadamu na kumfanya mwanamume au mwanamke akamilike zaidi. Katika ulimwengu huu wa karne ya 20 unaokazia elimu ya sayansi, uchumi, na mantiki, mara nyingi kukuzwa kwa hisia-moyo kupitia sanaa hupuuzwa.

Dumisha Usawaziko

Kusikiliza muziki mzuri kwaweza kunufaisha na kufurahisha. Lakini, mtu aweza kufurahi hata zaidi kwa kucheza ala ya muziki au kuimba akiwa na kikundi cha marafiki. Kufahamu muziki kwaweza kutokeza fursa kubwa sana ya upendezi halisi.

Bila shaka, kama ilivyo na vitu vingine vizuri maishani, kuna uhitaji wa kuwa na kiasi, uamuzi unaofaa, na uteuzi katika upande huu wa kujitumbuiza. Hiyo ni kweli si kuhusu tu aina ya muziki ulioteuliwa bali pia muda unaotumiwa kuusikiliza au kuucheza.

Ikiwa aina fulani ya muziki inaanza kuathiri hisia-moyo zako, matendo yako, na uhusiano wako, basi teua mtindo mwingine. Linda masikio yako ili kulinda hisia-moyo zako ili kulinda moyo na akili zako!

Hiyo ni kweli hasa kwa habari ya maneno ya wimbo. Huenda yakaanza kukuelekeza kulingana na mapendezi ya watu wasioshiriki maoni kama yako kuhusu maisha na maadili, ambao badala yake wanaendeleza mitindo ya maisha isiyomhofu Mungu na isiyo ya adili. Katika visa fulani hata kichwa cha wimbo chaweza kuamsha hisia mbaya.

Neno la Mungu, Biblia huonya kwa upole wale ambao wangempendeza ‘watoe miili yao iwe dhabihu iliyo hai, takatifu, yenye kukubalika kwa Mungu, utumishi mtakatifu pamoja na nguvu [zao] za kufikiri kuzuri.” (Waroma 12:1) Kwa wazi, hisia-moyo zetu ni sehemu ya ‘dhabihu [hiyo] iliyo hai.’ Kwa hiyo, tukipata kwamba kupitia uwezo wa muziki, hisia-moyo zetu zinaanza kupotosha uamuzi wetu unaofaa na kusababu na kuelekeza hatua zetu vibaya, basi tunahitaji kubadili mazoea yetu ya kusikiliza muziki. Kumbuka: Uvutano wa muziki waweza kuathiri moyo wako na akili zako—ama kwa wema ama kwa ubaya!

[Sanduku/Picha katika ukurasa wa 10]

Kuzidisha Uwezo wa Kujifunza

“Utafiti waonyesha kwamba kusikiliza muziki wenye upatano kwa ukawaida kwaweza kuzidisha uwezo wa mtoto wa kujifunza. Lakini katika nyumba nyingi, hawasikilizi muziki wowote kamwe.”—Audio, Machi 1999.