Wimbo Asioweza Kuusahau

“NIKIWA shuleni niliimba wimbo wa dini wenye maneno, ‘Yehova mkuu aliyetawazwa katika utukufu wake.’ Mara nyingi nilijiuliza, ‘Huyu Yehova ni nani?’”

Maneno hayo ya Gwen Gooch, ambaye ni mmoja wa Mashahidi wa Yehova na ambaye simulizi lake la maisha lilichapishwa katika Mnara wa Mlinzi, lilifanya angalau msomaji mmoja ahisi namna hiyo.a Vera, kutoka Seattle, Washington, Marekani, akumbuka, “nilipatwa na jambo hilo hilo nikiwa katika shule ya sekondari.”

Baada ya kusikia wimbo fulani, Vera, kama ilivyokuwa na Gwen, alitaka sana kujua huyo Yehova angeweza kuwa nani. Vera aliridhika mnamo mwaka wa 1949 wakati ndugu yake alipomwambia kwa mara ya kwanza kuhusu Yehova, jina la kibinafsi la Mungu katika Biblia.

Vera amekuwa mmoja wa Mashahidi wa Yehova kwa muda upatao nusu karne sasa. Lakini hakusahau kamwe wimbo huo wa dini tangu wakati alipokuwa katika shule ya sekondari. “Kwa miaka mingi,” asema, “nimejaribu kutafuta chanzo chake.” Hatimaye, kwa msaada wa duka la muziki, alifanikiwa. Wimbo huo ulitungwa na Franz Schubert mwaka wa 1825. Kwa kweli maneno ya muziki huo humsifu Yehova. Kwa mfano, haya ni baadhi ya maneno hayo:

“Yehova ni mkuu, yule Bwana! kwa kuwa Mbingu na Dunia hutangaza uwezo wake wa ajabu. . . . Unausikia kwenye dhoruba isiyotulia, iliyochafuka, palipo na mngurumo wa kijito . . . Unausikia palipo na sauti za mwitu na misitu, unauona kwenye mhindi unaopeperuka wa rangi ya kidhahabu katika maua yanayonukia vizuri kwenye mpangilio maridadi, katika nyota zinazoijaza anga ya Mbingu ya rangi ya buluu . . . Uwezo wa Yehova ni wenye kutia hofu unavuma kwa mpigo wa radi na mng’ao wa umeme angani. Lakini kwa kiasi kikubwa sana moyo wako unaodunda ungali unatangaza uwezo wa Yehova, . . . Bwana Mungu wa milele. Mwadhimishe na utazamie mazuri na rehema. . . . Yehova ni mkuu, na Bwana!”

Vera asema: “Nyakati nyingine nimetumia maneno ya wimbo huo kuonyesha watu kwamba katika miaka ya 1800 kulikuwa na watu waliojua jina la Mungu na kumsifu pia.” Ukweli ni kwamba kutoka nyakati za mapema zaidi wanaume na wanawake wenye imani wamechochewa kumsifu Yehova kwa nyimbo. Ni jambo litakaloendelea milele, kwa kuwa hatutakosa kamwe sababu za kumsifu Muumba wa mbingu na dunia.

[Maelezo ya Chini]

[Picha katika ukurasa wa 25]

Vera