Wanaamini Nini?

MASHAHIDI WA YEHOVA huamini kwamba kuna Mungu Mweza Yote, Yehova, Muumba wa mbingu na dunia. Kuwako kwenyewe kwa maajabu yaliyofanywa kwa ufundi mkubwa katika ulimwengu wote mzima unaotuzunguka kwathibitisha kwa njia ya akili kwamba Muumba mwenye akili na uwezo mkuu aliuumba wote. Kama vile kazi za wanaume na wanawake zinavyoonyesha sifa zao, ndivyo na kazi za Yehova Mungu. Biblia hutuambia kwamba “sifa zake zisizoonekana zaonwa waziwazi tangu uumbaji wa ulimwengu na kuendelea, kwa sababu zafahamiwa kwa vitu vilivyofanywa.” Pia, bila sauti wala maneno, “mbingu zauhubiri utukufu wa Mungu.”—Waroma 1:20; Zaburi 19:1-4.

Watu hawafinyangi vyungu vya udongo wala kutengeneza televisheni na kompyuta bila kusudi fulani. Dunia na mimea na wanyama wake, ni vitu vya ajabu sana. Muundo wa mwili wa kibinadamu pamoja na trilioni zake za chembe, ni jambo tusiloweza kulielewa—hata ubongo tunaotumia kufikiri wastaajabisha kiasi cha kutoweza kuufahamu! Ikiwa wanadamu wana kusudi la kubuni vitu vyao ambavyo ni vidogo sana vikilinganishwa, bila shaka Yehova Mungu alikuwa na kusudi la kuumba viumbe vyake vya ajabu sana! Mithali 16:4 husema hivyo: “BWANA amefanya kila kitu kwa kusudi lake.”

Yehova aliifanya dunia kwa kusudi, kama alivyowaarifu wanadamu wawili wa kwanza: “Zaeni, mkaongezeke, mkaijaze nchi . . . , mkatawale samaki wa baharini, na ndege wa angani, na kila kiumbe chenye uhai kiendacho juu ya nchi.” (Mwanzo 1:28) Kwa sababu hawakutii, wanadamu hao wawili walishindwa kuijaza dunia familia zenye uadilifu ambazo zingeitunza kwa upendo dunia na mimea na wanyama walio duniani. Lakini kushindwa kwao hakumaanishi kusudi la Yehova limeshindwa. Maelfu ya miaka baadaye, iliandikwa hivi: “Mungu; ndiye aliyeiumba dunia na kuifanya . . . hakuiumba ukiwa.” “Aliiumba ili ikaliwe na watu.” Haitaharibiwa, bali “dunia hudumu daima.” (Isaya 45:18; Mhubiri 1:4) Kusudi la Yehova kwa dunia litatimizwa: “Shauri langu litasimama, nami nitatenda mapenzi yangu yote.”—Isaya 46:10.

Kwa hiyo, Mashahidi wa Yehova huamini kwamba dunia itadumu milele na kwamba watu wote, walio hai na wafu, watakaopatana na kusudi la Yehova kwa dunia iliyorembeshwa, yenye kukaliwa wanaweza kuishi milele juu yake. Wanadamu wote walirithi kutokamilika kutoka kwa Adamu na Hawa, na kwa sababu hiyo ni watenda dhambi. (Waroma 5:12) Biblia hutuambia hivi: “Mshahara ambao dhambi hulipa ni kifo.” “Walio hai wanajua ya kwamba watakufa; lakini wafu hawajui neno lo lote.” “Nafsi inayofanya zambi, itakufa.” (Waroma 6:23; Mhubiri 9:5; Ezekieli 18:4, 20, Zaire Swahili Bible) Basi wanaweza kuishije tena ili washiriki baraka za kidunia? Ni kupitia dhabihu ya ukombozi ya Kristo Yesu tu, maana alisema: “Mimi ndio ufufuo na uhai. Yeye ambaye hudhihirisha imani katika mimi, hata ingawa afa, atakuja kwenye uhai.” “Wote wale waliomo ndani ya makaburi ya ukumbusho watasikia sauti yake na kutoka.”—Yohana 5:28, 29; 11:25; Mathayo 20:28.

Hayo yatatokeaje? Yameelezwa katika “habari njema ya ufalme” ambayo Yesu alianza kutangaza alipokuwa hapa duniani. (Mathayo 4:17-23) Lakini leo Mashahidi wa Yehova wanazihubiri habari njema kwa njia ya pekee sana.

[Chati katika ukurasa wa 13]

WANAYOAMINI MASHAHIDI WA YEHOVA

Imani Sababu ya Kimaandiko

Kristo alikufa mtini, si msalabani Gal. 3:13; Mdo. 5:30

Waovu wataharibiwa milele Mt. 25:41-46; 2 The. 1:6-9

Tumaini la wafu ni ufufuo 1 Kor. 15:20-22; Yn. 5:28, 29; 11:25, 26

[Picha katika ukurasa wa 12]

DUNIA . . . iliyoumbwa na Yehova . . . itunzwe na mwanadamu . . . itakaliwa milele