Afya Na Furaha—Waweza Kuwa Nazo?

MUDA wote ambao wanaume na wanawake wasio wakamilifu wamekuwako, wametamani afya na furaha. Ingawa kwa hakika ni mbili za zile tamaa za kibindamu zilizo kubwa zaidi ya zote, zimethibitika kutoweza kupatikana.

Wanadamu wamefikiria sana, na kutoa mashauri mengi juu ya utafutaji-tafutaji huo. Dkt. Dennis Jaffe alionelea hivi: “Leo, ufunguo wa kupata afya na kupona kunakodumu mara nyingi wategemea mwenendo wako mwenyewe.” Abraham Lincoln alieleza wakati mmoja hivi: “Watu huelekea kuwa wenye furaha kwa kadiri wanavyoamua kuwa hivyo.” Je! unakubali? Unatamani furaha kwa kadiri gani? Ni kwa kadiri gani kuipata kwategemea kuwa na afya nzuri?

Watu wametafuta furaha kila mahali, wakifuata miongozo mingi sana. Wamechunguza falsafa, saikolojia, na metafizikia (falsafa ya asili ya uhai, kweli na maarifa). Katika kutafuta-tafuata kwao furaha, wengine wamechunguza sayansi, sanaa, na muziki. Hata hivyo hakuna shaka kwamba sehemu iliyo kubwa ya furaha ya kweli inahusiana na kuwa na afya nzuri. Tangazo moja la kibiashara lenye kupendwa na wengi katika televisheni lilisema: “Kama una afya yako, una karibu kila kitu.”

Wakifuatia njia hiyo, watu wengi wamechunguza maelezo mbalimbali ya afya, yanayokubaliwa na yasiyokubaliwa. Karibu kila maktaba ya umma inaonyesha uwezekano mbalimbali wa utaratibu wa ulaji na namna za utibabu zisizo na mwisho. “Vitabu vingi vimeandikwa juu ya afya, kuanzia zamani za kale,” akaeleza Dkt. Paul Dudley White, mwenye ustadi wa moyo ajulikanaye sana. Kimojawapo kilicho bora zaidi kilikuwa Regiment of Helthe kilichoandikwa karibu miaka elfu iliyopita.”

Yajapokuwa mambo hayo yote, kutafuta-tafuta afya na furaha kumekuwa kwenye kutamausha kwa wanadamu walio wengi. Je! hilo lakushangaza, ukifikiria jinsi ustaarabu wetu umedhaniwa kuwa umefanya maendeleo? Kwa wazi, sayansi haijakomesha ugonjwa, kuzeeka, na kifo.

Lakini je, ingekushangaza zaidi kujua kwamba bado hatuna njia ya kupima furaha na hatuna ufafanusi mzuri wa kujua ilivyo? Katika hotuba iliyozungumzia “Mawazo Juu ya Furaha,” Pierre Teilhard de Chardin (Pieri Teyard di Sharda) alikata shauri hivi: “Kwa karne nyingi hiyo imekuwa habari ya vitabu vingi, uchunguzi mwingi, majaribio mengi ya watu mmoja mmoja na ya vikundi vya watu, kwa mfululizo; na, kwa kusikitisha, haijawezekana hata kidogo kufikia kauli moja. Kwa wengi wetu, tokeo ni kwamba, mkataa wa pekee unaofaa wenye kupatikana kutokana na mazungumzo hayo yote ni kwamba ni bure kuendelea na utafutaji-tafutaji huo.

Je! hivyo ndivyo unavyohisi juu ya furaha? Jiulize maswali ya kibinafsi lakini yenye kufuatia haki. Je! wewe ni mwenye furaha kwa kweli? Au, je, furaha ya kweli yaweza kupatikana mbinguni tu? Je! kuna tazamio lolote la hakika kwamba tunaweza kuwa na afya na furaha, na hata kuwa nazo hapa hapa duniani?