Jinsi Index Yaweza Kuinufaisha Familia
1 Ikisema juu ya familia, 1 Timotheo 5:4 hutaarifu hivi: “Na wajifunze kuyatenda yaliyo wajibu [kujizoeza ujitoaji kimungu, NW] wao kwa jamaa zao wenyewe.” Kweli kweli, kuzoea ujitoaji kimungu katika shughuli zetu na washiriki wa familia ni jambo la kujifunza. Katika kufanya hivyo twahitaji mwongozo wa kimungu, kwa kuwa kutunza washiriki wa familia ni sehemu ya wajibu wetu wa Kikristo. Watch Tower Publications Index yaweza kutusaida tupate mwongozo katika hali tofauti-tofauti ambazo huzuka katika maisha ya familia.
2 Familia inatokea wakati mwanamume na mwanamke wanapofunga ndoa. (Mwa. 2:24) Je! wewe unafikiria ndoa kwa uzito? Chini ya kichwa “Ndoa,” utapata kichwa kidogo “kuteua mwenzi.” Marejezo yatakuelekeza kwenye shauri lenye kusaidia juu ya jitihada hii ambayo mara nyingine huwa ngumu. Index pia ina vichwa vidogo kwa “daraka la mume” na “daraka la mke,” kila kimoja kikiandaa marejezo kwa habari ambayo itanufaisha wale wanaotamani kufunga ndoa na wale ambao tayari wamefunga ndoa. Kwa kuongezea, vichwa vidogo kama vile “kuwasiliana,” “ukaribu katika,” na “amani” huelekeza kwenye habari ambayo yaweza kutajirisha ndoa. Wakati magumu yanapozuka, kile kichwa kidogo “matatizo katika” chaweza kukuelekeza kwenye shauri lenye mafanikio juu ya jinsi ya kuyatatua.
3 Watoto ni urithi kutoka kwa Yehova. (Zab. 127:3) Wazazi wanaweza kuleaje watoto wao “katika nidhamu na rekebisho la akilini la Yehova”? (Efe. 6:4, NW) Wenye umaana sana ni ule mwongozo ambao Yehova huandaa kupitia Neno Lake na jamii ya mtumwa mwaminifu. Wazazi wanahitaji ufahamu wa ndani ili kujua hisia na mahitaji ya watoto wao. Shauri lenye kusaidia na madokezo yaweza kupatikana kupitia vichwa vya Index “Watoto” na “Vijana.” Na namna gani kukaza kikiki sheria ya Yehova ndani ya mioyo yao michanga? Kile kichwa “Kuzoeza Mtoto” huongoza kwenye mazungumzo yenye ufahamu juu ya kila upande wa kulea watoto, kutia na jinsi ya kuwasaidia wasitawishe uhusiano wa kibinafsi pamoja na Yehova na kusitawisha tamaa kwa ajili ya kweli.—1 Pet. 2:2.
4 Mazungumzo ya Biblia ya familia yaliyotangulia kupangwa ni ya lazima kwa mafanikio ya familia. (Kum. 6:6-9; Isa. 54:13; Efe. 5:25, 26) Marejezo kwenye mawazo ili kuwa na mazungumzo ya familia yenye shangwe yaweza kupatikana chini ya kichwa “Familia.” Katika Index ya karibuni zaidi, kichwa cha habari “funzo la Biblia” kina vichwa vidogo vya habari kama vile “kulifanikisha,” “kulifanya liwe lenye shangwe,” na “kulifanya liwe lenye kupendeza.” Pia, kwa nini msizungumze mara kwa mara masimulizi ya maisha ya Mashahidi wa Yehova? Chini ya kichwa “Huduma ya Wakati Wote,” mtapewa rejezo kwenye masimulizi ya maisha yenye vichwa kama vile “Uchaguzi Ambao Sijapata Kusikitikia” na “Kupokea Maombi ya Moyo Wangu.” Bado masimulizi mengine kama hayo yameorodheshwa chini ya “Wamisionari.” Orodha kamili inapatikana chini ya “Masimulizi ya Maisha ya Mashahidi wa Yehova.”
5 Watch Tower Publications Index ni kifaa kizuri ajabu kwa ajili ya kukusanya shauri na mawazo kwa ajili ya maisha ya familia. Na kiwasaidie mpate furaha zaidi katika kutimiza madaraka yenu ndani ya familia.