Unganisha Trakti na Fasihi Nyinginezo
1 Kati ya magazeti yote yanayochapishwa leo, ni Mnara wa Mlinzi na Amkeni! tu yawezayo kuwasaidia wasomaji wenye moyo mweupe wapate kijia cha uhai wa milele. Unapozungumza na watu wakati wa Aprili na Mei, wengine wataonyesha kupendezwa kwa wazi na ujumbe wa Ufalme, na unaweza kuvuta uangalifu wao moja kwa moja kwenye magazeti ya karibuni au mojapo broshua za Sosaiti zenye rangi-rangi. Wengine huenda wakaonyesha kupendezwa kidogo mara ya kwanza. Katika hali kama hizo, unaweza kwanza kuzungumzia jambo moja au mawili katika trakti; halafu mwenye nyumba akionyesha kupendezwa zaidi, unganisha trakti na gazeti au broshua unayotoa.
2 Ungeweza kusema:
◼ “Watu wengi wangekubali kuwa katika ulimwengu wa leo, kuna matatizo mengi kuliko utatuzi. Je! ulijua kwamba mengi ya matatizo yetu magumu zaidi yalitabiriwa katika Biblia?” Halafu unaweza kufungua kurasa 4 na 5 za trakti Je! Ulimwengu Huu Utaokoka? na kuzungumzia baadhi ya matatizo hayo.
3 Ikiwa unatoa Mnara wa Mlinzi la Machi 1 na mwenye nyumba aonyesha kupendezwa na yale ambayo umesoma kutoka trakti, unaweza kuelekezea makala yenye kichwa “Je! Wewe Utatii Onyo la Mungu?” na ueleze mambo au sehemu nyingine ya ishara na wakati ujao utawaletea nini wale wanaotii onyo. Toa toleo na uhakikishe kupanga kurudi kwa wakati unaofaa ili kuzungumza jambo hilo zaidi.
4 Kundi lenu lipokeapo “Amkeni!” la Aprili 8 ungeweza kutumia utangulizi unaoonyeshwa kwenye fungu la 2 la makala hii na kisha kuongeza:
◼ “Wengi wanatilia shaka uwezo wa dini na siasa wa kutatua matatizo yetu, lakini wanajiuliza kama sayansi ina jibu.” Kisha soma jambo linalofaa katika makala “Je! Sayansi Yaweza Kutatua Matatizo ya Karne ya 21?” Yaelekea sana kwamba makala hii itawavutia vijana wengi, hasa wanafunzi.
5 Unapotoa broshua “Tazama!” unaweza kutumia mfikio tofauti:
◼ “Watu wengi hujiuliza ni nini linalotupata tunapokufa. Wengine husema sisi huenda ama mbinguni ama helo; wengine hawana uhakika. Jibu la Biblia ni lenye kushangaza na lenye kutia uhakika pia.” Kisha ungeweza kuonyesha na kuzungumzia sehemu za ile trakti Kuna Tumaini Gani kwa Wapendwa Waliokufa? Halafu ungeweza kukazia kurasa 16 na 17 katika broshua mwenye nyumba akionyesha kupendezwa na trakti.
6 Unapotoa ushahidi kwa trakti Uzima Katika Ulimwengu Mpya Wenye Amani, ungeweza kumwuliza mwenye nyumba maswali mawili yaliyo kwenye fungu la kwanza la trakti hiyo. Baada ya yeye kuitikia, elekeza uangalifu wake kwenye fungu la kwanza kwenye ukurasa wa 3. Hilo laonyesha njia utakayojia ulimwengu wenye amani. Mwenye nyumba akionyesha kupendezwa, tumia Mnara wa Mlinzi la Machi 1 kwa njia iliyopendekezwa kwenye fungu la 3 la makala hii.
7 Ikiwa wewe ni mhubiri mpya, bila shaka utathamini mfikio rahisi. Kwa nini usijipatie ugavi wa trakti Je! Ulimwengu Huu Utaokoka? na kufuata madokezo yaliyotolewa kwenye fungu la 2 lililo juu?
8 Tunaheshimiwa kupeleka habari ya wokovu kwenye makao ya watu. Katika jitihada yetu ya kutafuta ‘wanaostahili,’ acheni tutumie vizuri trakti zetu na kuziunganisha na fasihi nyinginezo wakati kupendezwa kunapopatikana.—Mt. 10:13.