Itumie Vizuri

1. Trakti Kujua Ukweli ni muhimu kwa kufanya nini?

¹ Trakti Je, Ungependa Kujua Ukweli? imekusudiwa kutusaidia kuanzisha mafunzo ya Biblia. Pia, ni kifaa kizuri tunachoweza kutumia kutawanya mbegu za Ufalme. (Mhu. 11:6) Yafuatayo ni madokezo ya kutusaidia kuitumia vizuri trakti hiyo.

2. Tunaweza kutumiaje trakti Kujua Ukweli kuanzisha mazungumzo?

² Kuanzisha Mazungumzo: Unaweza kumpa mwenye nyumba trakti, umwonyeshe maswali sita yaliyo kwenye trakti hiyo, kisha umuulize: “Umewahi kujiuliza lolote kati ya maswali haya?” Baada ya kupata jibu lake, tumia trakti hiyo kumwonyesha jibu la Biblia la swali moja kati ya maswali ambayo amekuonyesha, na usome andiko moja kati ya yale yaliyoonyeshwa. Soma au zungumzia kifupi ukurasa wa nyuma, kisha umwonyeshe kitabu Biblia Inafundisha. Hata asipokubali kitabu, amepokea trakti ambayo inaweza kufanya kweli itie mizizi katika moyo wake.—Mt. 13:23.

3. Ikiwa mwenye nyumba ana shughuli nyingi, tunaweza kufanya nini?

³ Mwenye Nyumba Akiwa na Shughuli Nyingi: Unaweza kusema: “Kwa kuwa una shughuli nyingi wakati huu, acha nikuachie trakti hii. Ina maswali sita muhimu ambayo wengi wetu tumeuliza na inatoa jibu la Biblia kwa kila moja ya maswali hayo. Nitakaporudi tena, nitapenda kujua maoni yako.”

4. Tunaweza kusema nini tunapotoa trakti hiyo barabarani?

⁴ Tunapohubiri Barabarani: Unaweza kusema: “Hujambo. Umewahi kujiuliza lolote la maswali haya? [Mruhusu ajibu.] Trakti hii inaonyesha majibu yaliyo wazi na yenye kuridhisha yanayopatikana katika Biblia.” Ikiwa mtu huyo hana haraka, unaweza kuzungumzia jibu moja kutoka kwenye trakti na hata umtolee kitabu Biblia Inafundisha.

5. Mara kwa mara tunaweza kutumiaje trakti Kujua Ukweli katika nyumba zisizo na watu?

⁵ Katika Nyumba Zisizo na Watu: Katika maeneo fulani, kwa kawaida wahubiri hutumia busara na kuacha machapisho katika nyumba zisizo na watu. Ikiwa hivyo ndivyo ilivyo katika kutaniko lenu, kwa nini msiache trakti Kujua Ukweli mara kwa mara? Utakaporudi unaweza kusema: “Tulipokuwa hapa wakati uliopita, hukuwa nyumbani, kwa hiyo tuliacha trakti hii mlangoni. Ungependa kujibiwa swali gani kati ya maswali haya?”

6. Ni nini kinachoifanya trakti Kujua Ukweli iwe kifaa bora cha kuhubiri?

⁶ Trakti Kujua Ukweli inaeleza kweli kwa njia rahisi na ya moja kwa moja. Huwavutia watu wa dini na tamaduni zote. Ni rahisi kuitoa; hata wachanga na wahubiri wapya wanaweza kuitoa wanapohubiri. Je, unaitumia katika kila pindi inayofaa?