Kampeni ya Pekee ya Trakti Kuanzia Oktoba 20 Hadi Novemba 16!
1 Kuanzia Jumatatu, Oktoba 20, na kuendelea kwa majuma manne kamili, tutashiriki katika kampeni ya pekee ya kusambaza trakti mpya yenye kichwa Je, Ungependa Kujua Ukweli? Tunatumaini kwamba kampeni hii ya pekee ya ulimwenguni pote itawachochea watu kupendezwa na chanzo pekee cha kweli.—Yoh. 17:17.
2 Trakti hiyo inajibu kwa ufupi na waziwazi maswali sita muhimu ya Biblia: “Je, kweli Mungu anatujali?” “Je, vita na kuteseka kutakwisha?” “Ni nini kinachotupata tunapokufa?” “Je, kuna tumaini lolote kwa wafu?” “Nisali kwa njia gani ili Mungu anisikilize?” na “Nifanye nini ili nipate furaha maishani?” Dini zinazodai kuwa za Kikristo zimeshindwa kabisa kujibu maswali hayo kwa njia yenye kuridhisha. Hata watu wengi ambao si Wakristo wamejiuliza maswali hayo, lakini huenda hawajui kwamba Biblia inajibu maswali hayo waziwazi. Kwa hiyo, tunatazamia kwamba ujumbe wa trakti hiyo utawavutia watu wengi sana.
3 Isambazeni Katika Eneo Lenu Lote: Jitahidini kusambaza trakti hiyo katika nyumba nyingi iwezekanavyo katika eneo lenu. Ikiwa mna eneo kubwa, wazee wanaweza kuwahimiza mwache trakti katika nyumba zote ambazo hazina watu katika ziara ya kwanza. Msisahau kuwapa majirani, watu wa ukoo, wafanyakazi au wanashule wenzenu, na watu wengine mnaozungumza nao kwa ukawaida. Unaweza kupanga kufanya upainia msaidizi mwezi wa Oktoba au Novemba. Je, una mtoto au mwanafunzi wa Biblia ambaye anafanya maendeleo mazuri ya kiroho na huenda akastahili kujiunga nasi katika kampeni hii akiwa mhubiri ambaye hajabatizwa? Ikiwa ndivyo, wajulishe wazee.
4 Mambo ya Kusema: Ili uweze kuwapa watu wengi ujumbe huo, zungumza kwa ufupi tu. Waulize wenye nyumba swali moja kati ya maswali sita yaliyo juu ya trakti hiyo kisha uwaonyeshe fungu linalojibu swali hilo katika trakti. Kwa njia hiyo, wahubiri wote wataweza kutoa trakti kupatana na mahitaji ya watu kwenye eneo. Mtu akipendezwa, andika jina lake halafu umtembelee tena. Siku ya Jumamosi na Jumapili, trakti hiyo inaweza kutolewa pamoja na magazeti ya sasa. Baada ya kampeni kumalizika Novemba 16, tutatoa kitabu Biblia Inafundisha. Trakti zozote zinazobaki zitatumiwa kama trakti nyinginezo zilizopo.
5 Anzisha Funzo la Biblia: Trakti hiyo imekusudiwa hasa kutusaidia kuanzisha mafunzo ya Biblia. Unapomrudia mtu aliyependezwa, unaweza kumuuliza ni kweli gani ya Biblia iliyomtia moyo au kumfariji? Mwonyeshe ukurasa wa nyuma ambao unataja mpango wa kujifunza Biblia, kisha umpe kitabu Biblia Inafundisha. Ikiwezekana, zungumzia kwa ufupi fungu moja au mawili katika sura ambayo inazungumzia habari aliyochagua.
6 Yehova anatafuta watu ambao watamwabudu “kwa roho na kweli.” (Yoh. 4:23) Sote na tushiriki katika kampeni hiyo ya pekee ya kuwasaidia watu wajue ukweli!