Je, Una Roho ya Kujitolea?

¹ Uthamini kwa yale ambayo Yesu Kristo alitimizia wanadamu bila ubinafsi wapaswa kutuchochea sisi sote tutumie uwezo wetu mbalimbali, nishati zetu, na nguvu zetu katika njia ya kujitolea. Maandiko husihi: “Mtoe miili yenu iwe dhabihu iliyo hai, takatifu, yenye kukubalika kwa Mungu, utumishi mtakatifu.” (Rom. 12:1) Kujichunguza pindi kwa pindi kutakusaidia uone kama unaonyesha roho ya aina hiyo kikamili kadiri hali zako za kibinafsi ziruhusuvyo.

² Katika Kufuatilia Ujuzi wa Biblia: Je, umetenga wakati kwa ajili ya usomaji wa Biblia na funzo la kibinafsi la kawaida? Je, wewe hufuata ratiba hiyo? Je, ni kawaida yako kutayarisha vizuri mikutano ya kutaniko? Ikiwa wewe ni kichwa cha familia, je, una funzo la Biblia la kawaida pamoja na watu nyumbani mwako? Huenda kufanya mambo hayo kukahitaji kutoa wakati unaotumiwa kutazama televisheni au kutumia kompyuta au mambo mengine. Hata hivyo, kujitolea huko ni kwa kadiri ndogo, ukijua kwamba wakati unaotumia kujifunza Neno la Mungu utakusaidia kupata uhai udumuo milele!—Yn. 17:3.

³ Katika Kuzoeza Watoto Wako: Wakati bora wa kuanza kujifunza kujitolea ni wakati wa utotoni. Fundisha watoto wako kwamba ijapokuwa kuna wakati wa kucheza, lazima pia kuwepo wakati wa kufanya kazi na wa utendaji wa kitheokrasi. (Efe. 6:4) Wape kazi zifaazo za kufanya nyumbani. Weka ratiba ya kawaida ya kwenda katika huduma pamoja nao. Kazia mafundisho yako kwa mfano wako bora.

⁴ Katika Utendaji wa Kutaniko: Kutaniko huimarishwa wakati kila mtu anapojitolea kutimiza mambo kwa faida ya wote. (Ebr. 13:16) Je, inawezekana utumie wakati zaidi katika kazi ya kuhubiri Ufalme na kufanya wanafunzi? Je, unaweza kujitolea kusaidia wagonjwa au wazee-wazee, labda kwa usafiri kwenda mikutanoni?

⁵ Kabla hajatoa dhabihu yake bora ya uhai wake wa kibinadamu, Yesu alishauri wanafunzi wake wakaze macho yao kwenye masilahi ya Ufalme, wakifanya kila kitu kingine maishani kuwa cha pili. (Mt. 6:33) Kufuatia roho hiyo ya kujitolea kutatuletea furaha kubwa zaidi tuendeleapo kumtumikia Yehova kwa shangwe.