Programu Mpya ya Kusanyiko la Mzunguko

Twajua kwamba Yehova Mungu anastahili upendo wetu na ujitoaji wetu usiohusisha wengine. Hata hivyo, ulimwengu hujaribu kutushawishi tuache kudumisha uhusiano wa karibu pamoja naye. (Yn. 17:14) Ili tuimarishe upendo wetu kwa Yehova na tupate nguvu ya kukinza mambo ya ulimwengu yanayohatarisha hali yetu ya kiroho, programu mpya ya kusanyiko la mzunguko ya mwaka wa utumishi wa 2001 itakuwa na kichwa “Mpende Mungu—Wala Si Vitu Vilivyo Katika Ulimwengu.”—1 Yoh. 2:15-17.

Kumpenda Yehova kwa kina hutusaidia tutoe ushahidi kumhusu. Ijapokuwa hivyo, utumishi wa shambani si rahisi kwa watu wa Mungu walio wengi. Katika sehemu “Kumpenda Mungu Hutuchochea Katika Huduma Yetu,” jifunze jinsi ambavyo wengi wameshinda haya na vizuizi vingine ili kushiriki kikamili katika kazi hii.

Viwango vyenye kudhoofika vya ulimwengu vinatuathirije? Vitendo ambavyo hapo awali vilionekana kuwa viovu sasa vyaitwa eti mwenendo wa kawaida. Hotuba “Wampendao Yehova Huchukia Lililo Ovu” na mfululizo wenye kichwa “Vitu vya Ulimwengu—Twavionaje?” utategemeza azimio letu la kukataa tamaa mbaya.

Shule ya Huduma ya Kitheokrasi na Mkutano wa Utumishi wa kigezo itatiwa ndani ya programu hiyo, na vilevile muhtasari wa Funzo la Mnara wa Mlinzi la juma hilo. Hotuba ya watu wote, “Jinsi Ambavyo Upendo na Imani Huushinda Ulimwengu,” itatutia moyo tumwige Yesu katika kukinza mikazo ya kilimwengu. (Yn. 16:33) Hakikisha umealika wanafunzi wako wa Biblia wahudhurie. Yeyote anayetaka kubatizwa anapaswa kumwambia mwangalizi-msimamizi upesi iwezekanavyo ili mipango ya lazima ifanywe.

Kwenye kusanyiko hili la mzunguko, uangalifu wetu utakaziwa kuhusu pale ambapo hasa upendo wetu wapaswa kuelekezwa ili tufurahie baraka tele za Yehova. Usikose sehemu yoyote ya kusanyiko hilo!