Onyesha Unawajali Watu Kikweli —Kwa Kujitayarisha

¹ Kujitayarisha vizuri kwa ajili ya huduma huonyesha kwamba tunawajali wengine kikweli. Jinsi gani? Tukijitayarisha vizuri, hatutazingatia sana utangulizi wetu, bali tutamkazia fikira mwenye nyumba hata zaidi. Isitoshe, kujitayarisha hutusaidia tusiwe na wasiwasi na tuweze kuzungumza kutoka moyoni. Lakini tunaweza kutayarishaje utangulizi wenye matokeo?

² Tumia Utangulizi Unaofaa: Chagua utangulizi mmoja kati ya zile zinazoonyeshwa katika Huduma Yetu ya Ufalme ya Januari 2006 ambao unafaa eneo lenu, na uone jinsi unavyoweza kuutoa kwa maneno yako mwenyewe. Ubadili ufae eneo lenu. Kwa mfano, ikiwa wewe hukutana na watu wa dini au kabila fulani mara nyingi, fikiria jinsi utangulizi wako unavyoweza kuwapendeza. Kubadili utangulizi wako ili uwafae watu unaozungumza nao huonyesha kwamba unapendezwa nao kikweli.—1 Kor. 9:22.

³ Endelea kuboresha utangulizi wako. Kwa kuwa maneno unayotangulia kusema ni muhimu sana, unapaswa kuzingatia jinsi ambavyo watu wanaitikia utangulizi wako. Je, wanapendezwa na mambo unayosema? Je, wanajibu maswali unayouliza? Ikiwa hawajibu, badili utangulizi wako hadi upate ule wenye matokeo zaidi.

⁴ Jinsi Unavyoweza Kukumbuka: Watu wengi hushindwa kukumbuka utangulizi wanapofika mlangoni. Ikiwa una tatizo hilo, je, umejaribu kujizoeza kwa sauti utangulizi huo na mtu mwingine? Kufanya hivyo kutakusaidia kukumbuka mambo unayotaka kusema na kuyasema kwa njia inayoeleweka. Pia kutakutayarisha kushughulika na jinsi ambavyo wenye nyumba mbalimbali wanaitikia ujumbe wako.

⁵ Jambo lingine ambalo litakusaidia kukumbuka ni kuandika utangulizi mfupi kwenye karatasi na kuutupia jicho kabla tu ya kufika mlangoni. Wahubiri fulani huona kwamba kufanya hivyo huwasaidia kuondoa wasiwasi na kuwawezesha kuzungumza na watu. Kwa njia hizo, kujitayarisha vizuri kunaweza kutusaidia kuonyesha kwamba tunawajali wengine kikweli na hivyo kuboresha jinsi tunavyohubiri habari njema.