‘Uwe Tayari kwa Ajili ya Kila Kazi Njema’

¹ Yesu alipoanza kampeni mpya ya kuhubiri, alitumia muda fulani kuwatayarisha wanafunzi wake. (Mt. 10:5-14) Ingawa sisi sote tuna shughuli nyingi, kutumia hata dakika chache tu kujitayarisha kabla ya kwenda katika huduma ya nyumba kwa nyumba kutatusaidia kupata matokeo mazuri.—2 Kor. 9:6.

² Jinsi ya Kutayarisha: Kujitayarisha vizuri kunaanza na kujua habari zilizo katika vichapo ambavyo tunapanga kutumia. Pia, tunapaswa kufikiria watu katika eneo letu. Wanahangaikia nini? Wanaamini nini? Tunaweza kupata mambo ya kusema kwa kuchunguza Huduma Yetu ya Ufalme na kitabu Kutoa Sababu kwa Kutumia Maandiko.

³ Kusikiliza kwa makini maonyesho katika Mkutano wa Utumishi kutatusaidia pia. Tukiendelea kuzoea mahubiri yetu, hatutahitaji kuchukua muda mwingi kujitayarisha. Hata hivyo, kila mara kabla ya kwenda katika huduma, tukifikiria mambo ambayo tutasema na kuendelea kuboresha mahubiri yetu tutapata matokeo zaidi. Pia, tunapaswa kuchunguza mkoba wetu wa mahubiri ili kuhakikisha kwamba tuna vifaa vyote tunavyohitaji.

⁴ Ni nini kitakachotusaidia kukumbuka yale tutakayosema? Kujizoeza kwa sauti ni njia moja ya kutusaidia kukumbuka mambo tunayotaka kusema. Wengine hufurahia kuwa na vipindi vya kujizoeza wakati wa funzo lao la familia. Wengine huandika kwa ufupi mambo watakayosema, kisha wanayatupia jicho kabla tu ya kufika mlangoni.

⁵ Umuhimu wa Kujitayarisha: Kujitayarisha vizuri kunatuwezesha kupata ustadi zaidi na shangwe zaidi katika huduma. Kunatusaidia kuwa na utulivu mlangoni. Kunatuwezesha kumkazia fikira mwenye nyumba badala ya kuhangaikia tu mambo tutakayosema. Isitoshe, kufahamu habari zilizo katika vichapo ambavyo tutatumia kutatusaidia kuwa wachangamfu zaidi tunapovitoa.

⁶ Maandiko yanatuhimiza ‘tuwe tayari kwa ajili ya kila kazi njema.’ (Tito 3:1) Je, kweli kuna kazi njema zaidi kuliko kuhubiri habari njema? Tunapojitayarisha vizuri, tunaonyesha kwamba tunamheshimu mwenye nyumba anayekubali kusikiliza, na tunamheshimu Yehova, Mungu tunayemwakilisha.—Isa. 43:10.