Je, Unalitumia Kikamili?

¹ “Ninatamani sana kulitumia katika utumishi!” Hivyo ndivyo alivyosema dada mmoja baada ya kusoma gazeti la Mnara wa Mlinzi la Januari 1, 2008. Je, umechunguza baadhi ya makala zilizo katika toleo la watu wote, na je, umefikiria jinsi unavyoweza kutumia makala hizo katika huduma ya shambani?

² “Tunayojifunza Kutoka kwa Yesu”: Huenda umeona kwamba makala hizo zinasaidia kuanzisha mafunzo ya Biblia. Ikiwa hujafanya hivyo, jaribu kumsomea mwenye nyumba kichwa cha makala hizo kisha umwonyeshe yale ambayo Yesu alisema kuhusiana na jambo hilo katika fungu la kwanza. Anapopendezwa, jitahidi kuendeleza mazungumzo kwa kutumia vichwa vidogo ambavyo vina maswali yenye kuchochea fikira. Mwombe mtu huyo aeleze maoni yake kuhusu swali fulani. Eleza kwa ufupi picha zozote zilizoonyeshwa, kisha uzungumzie fungu linalofuata. Unaweza kuzungumzia nusu ya makala katika ziara ya kwanza halafu uzungumzie nusu ya pili unaporudi. Uwe tayari kuanzisha funzo ukitumia kitabu Biblia Inafundisha.

³ “Siri ya Furaha ya Familia”: Makala hizo za mfululizo ambazo zinachapishwa mara moja baada ya kila miezi mitatu, zinakusudiwa kuwasaidia waume, wake, na wazazi waone jinsi wanavyoweza kutumia kanuni za Biblia kukabiliana na matatizo yanayovuruga amani ya familia. Unaweza pia kutumia makala hizo kuwasaidia watu wasio Mashahidi waone hekima iliyo katika Biblia.—2 Tim. 3:16, 17.

⁴ Makala za Vijana: Mfululizo wa makala zenye kichwa “Kwa Ajili ya Vijana Wetu” unawasaidia wasomaji kuchanganua masimulizi ya Biblia. Unaweza kutumia makala hizo kuwasaidia vijana unaowahubiria ili waone faida za kujifunza Neno la Mungu. (Zab. 119:9, 105) Unapozungumza na wazazi, unaweza kukazia mfululizo wa makala zenye kichwa “Wafundishe Watoto Wako,” ambazo zinachapishwa baada ya kila mwezi mmoja. Makala hizo zinaweza kuwasaidia watoto wadogo wajifunze mambo muhimu kutoka kwa watu wanaotajwa katika Biblia. Je, unajitahidi kusoma makala hizo pamoja na watoto wako?

⁵ Makala Nyingine: Kila mwezi, makala yenye kichwa “Wasomaji Wetu Wanauliza” inazungumzia swali fulani ambalo huenda watu wasio Mashahidi wakauliza. Unaweza kutumia makala hiyo unapowaachia watu magazeti nyumba kwa nyumba. Makala yenye kichwa “Barua Kutoka . . . ” ina ripoti zenye kuvutia sana za watu binafsi zinazoonyesha matatizo ambayo wamishonari na wahubiri wengine wanakabiliana nayo katika huduma yao. Makala hizo zinaweza kuwasaidia watu wanaopendezwa kuona kwamba habari njema inahubiriwa duniani pote, kulingana na utimizo wa ishara ya kuwapo kwa Kristo.—Mt. 24:3, 14.

⁶ Makala ya kila mwezi yenye kichwa “Mkaribie Mungu,” ambayo inategemea usomaji wa Biblia wa Shule ya Huduma ya Kitheokrasi, inaweza kuwachochea watu wanyoofu wajifunze mengi zaidi kumhusu Yehova. Mfululizo wenye kichwa “Igeni Imani Yao,” ambao unachapishwa mara nne kwa mwaka, unakusudiwa kuwasaidia watu waone masimulizi ya Biblia yakiwa halisi, na kuwasaidia wasomaji waone watu wanaozungumziwa katika Biblia, maamuzi yao, matatizo yao, na imani yao kuwa halisi kabisa.

⁷ Tunafurahi kama nini kupokea kila mwezi toleo la Mnara wa Mlinzi ambalo linakusudiwa kutumiwa katika utumishi! Na tujitahidi kuelewa vizuri kabisa habari zilizomo na kuzitumia kikamili katika huduma yetu.