Jitayarishe Kikamili kwa Ajili ya Ukumbusho

Ni shangwe na pendeleo kubwa kama nini kwa wafuasi wa Kristo kujitayarisha kikamili kwa ajili ya usiku ambao tunaadhimisha kifo cha Yesu Kristo! (Luka 22:19) Ni matayarisho gani yanayopaswa kufanywa kwa ajili ya Ukumbusho?

◼ Wakati na Mahali: Kila mtu anapaswa kuelewa kabisa saa na mahali hususa ambapo Ukumbusho utafanyiwa. Ikiwa makutaniko kadhaa yanatumia Jumba lilelile la Ufalme, ni muhimu kufika kwa wakati na kutoka kwa utaratibu, kwa sababu muda kati ya mikutano ni mfupi. Ni muhimu kuepuka kusongamana kwenye jumba, milangoni, barabarani nje ya jumba, au kwenye maegesho ya magari.

◼ Mialiko: Je, wahubiri wote wana mialiko yao, na je, wameisoma? Je, umefanya mazoezi ya jinsi ya kutoa mwaliko huo? Utampa nani mwaliko? Jitahidini kuwaachia watu mialiko yote.

◼ Usafiri: Watu fulani wanaopendezwa na vilevile baadhi ya ndugu na dada huenda wakahitaji msaada wa kusafiri au kusaidiwa kwa njia nyingine. Ni mipango gani ambayo imefanywa ili kutimiza mahitaji yao?

◼ Mkate na Divai: Hakikisha kwamba mkate na divai havipitishwi kabla ya jua kushuka. Mipango inapaswa kufanywa ili kuandaa mkate na divai kwa ajili ya watiwa-mafuta wagonjwa na watiwa-mafuta wasioweza kuhudhuria. Mkate na divai inayofaa inapaswa kuwekwa kwenye sahani na vikombe kabla ya mkutano kuanza.—Ona gazeti Mnara wa Mlinzi la Februari 15, 2003, ukurasa wa 14-15, fungu la 14, 17.

◼ Jumba la Ufalme: Jumba linapaswa kusafishwa kabisa mapema. Sahani, vikombe vya divai, meza, na kitambaa cha meza kinachofaa kinapaswa kuletwa na kupangwa kwenye jumba kabla ya mkutano. Ikiwa mahali tofauti panatumiwa kwa ajili ya Ukumbusho, hakikisha kwamba kuna mfumo wa sauti unaofaa ili wote wanaohudhuria waweze kumsikia msemaji vizuri. Wakaribishaji na wale watakaopitisha mkate na divai wanapaswa kuteuliwa na kuelezwa mapema juu ya majukumu yao, utaratibu unaofaa wa kufuatwa, na umuhimu wa kuwa nadhifu na kuvalia mavazi yenye kuheshimika.

Katika tukio hili muhimu sana, yaani, Ukumbusho wa kifo cha Yesu Kristo, tunataka kujitayarisha kikamili tukiwa mtu mmoja-mmoja na tukiwa kutaniko. Kwa kweli Yehova atawabariki sana wote wanaothamini kwa moyo mambo yote ambayo Yehova amewaandalia wanadamu kupitia dhabihu ya Mwana wake mpendwa, Yesu Kristo.