Wachukueni Manabii Kuwa Kielelezo—Yoeli
1. Tunawezaje kuiga unyenyekevu wa Yoeli tunapohubiri?
1 Nabii Yoeli alikuwa nani? Anajitambulisha tu kwamba alikuwa “mwana wa Pethueli.” (Yoe. 1:1) Nabii huyo mnyenyekevu alikazia ujumbe wa Yehova na si jukumu lake mwenyewe akiwa mjumbe. Vivyo hivyo tunaposhiriki katika huduma yetu, badala ya kujitafutia sifa au umaarufu, tunaelekeza fikira za watu kwa Yehova na kwenye Biblia. (1 Kor. 9:16; 2 Kor. 3:5) Kwa kuongezea, ujumbe tunaotangaza hutuimarisha. Ni mambo gani yaliyo katika unabii wa Yoeli yanayoweza kutuchochea tuwe na tumaini na wenye bidii leo?
2. Kukaribia kwa siku ya Yehova kunapaswa kutuchochea tufanye nini?
2 “Siku ya Yehova Iko Karibu.” (Yoe. 1:15): Ingawa maneno hayo yaliandikwa maelfu ya miaka iliyopita, tunaishi katika kipindi cha mwisho cha utimizo wa maneno hayo. Hali za ulimwengu zinazozorota na upinzani na dhihaka ambazo tunakabili katika eneo letu ni uthibitisho ulio wazi kwamba tunaishi katika siku za mwisho za mfumo huu wa mambo. (2 Tim. 3:1-5; 2 Pet. 3:3, 4) Tunapofikiria kuhusu jinsi mwisho ulivyo karibu tuna kila sababu ya kutanguliza huduma maishani mwetu.—2 Pet. 3:11, 12.
3. Kwa nini huduma yetu ni muhimu sana hasa tunapokaribia dhiki kuu?
3 “Yehova Atakuwa Kimbilio kwa Watu Wake.” (Yoe. 3:16): Neno kutikiswa katika mstari huu linaweza tu kurejelea hukumu ya Yehova itakayotekelezwa katika dhiki kuu. Tunafarijiwa kujua kwamba Yehova atawakomboa watumishi wake waaminifu wakati huo. (Ufu. 7:9, 14) Tunapofanya kazi ya kuhubiri na kuona jinsi Yehova anavyotutegemeza na kutuimarisha, tunajenga imani yetu na uvumilivu utakaotusaidia katika dhiki kuu inayokuja.
4. Kwa nini tunaweza kuwa wenye shangwe na kutazamia wakati ujao tukiwa na uhakika?
4 Ingawa wengine husema kwamba ujumbe wa Yoeli unahuzunisha, ujumbe huo huwapa watu wa Mungu tumaini zuri ajabu la kukombolewa. (Yoe. 2:32) Basi na tutazamie wakati ujao tukiwa na uhakika na kutangaza kwa bidii habari njema ya Ufalme wa Mungu huku tukitii maneno ya Yoeli 2:23: “Furahini na mshangilie katika Yehova Mungu wenu.”