Kuboresha Ustadi Wetu Katika Huduma—Jinsi ya Kumjibu Mtu Anayekataa Mazungumzo

Kwa Nini ni Muhimu: Wazia kwamba unajua kutakuwa na msiba wa asili. Watu watakufa ikiwa hawatakimbilia mahali salama. Unaenda kwa jirani yako kumpa tahadhari, lakini yeye anakatisha mazungumzo akisema ana shughuli nyingi. Kwa kweli, hutaacha kumsaidia! Watu wengi katika eneo letu wanatupinga, kwa kuwa hawatambui thamani ya ujumbe wetu wenye kuokoa uhai. Tunapowatembelea, huenda wakati huo wakawa na shughuli nyingi. (Mt. 24:37-39) Au labda wana maoni yasiyofaa kwa sababu wamesikia uvumi au maneno yasiyo ya kweli. (Mt. 11:18, 19) Huenda wakadhani kwamba hatuna tofauti na dini nyingine. (2 Pet. 2:1, 2) Ikiwa mwanzoni mwenye nyumba hapendezwi na ujumbe wetu, tusikate tamaa haraka.

Jinsi ya Kufanya Hivyo:

Kabla hujaanza kuhubiri nyumba kwa nyumba, tua kidogo na ufikirie jinsi utakavyomjibu mtu anayekataa mazungumzo.
Ikiwa mwenye nyumba analeta kipingamizi fulani, jaribu kuendeleza mazungumzo kwa utulivu. Unaweza kufanya hivyo kwa kumpongeza. Kwa mfano, akisema kwamba ana dini yake, unaweza kumjibu hivi: “Nilikuwa natumaini kukutana na mtu kama wewe anayependa mambo ya kiroho.” Nyakati nyingine tukiheshimu maoni au hali za mwenye nyumba, tutaweza kuendeleza mazungumzo. Kwa mfano, akisema ana shughuli nyingi, unaweza kusema: “Ninaelewa. Lakini kabla sijaondoka, ningependa kukuachia chapisho hili.” Ikiwa mwenye nyumba anasema hapendezwi, unaweza kumuuliza hivi: “Je, unamaanisha kwamba hupendi Biblia, au hupendezwi na dini kwa ujumla? ”
Tumia busara. Kumbuka kwamba Yehova hawalazimishi watu kusikiliza. (Kum. 30:19) Kila mtu anawajibika kwa Yehova. (Gal. 6:5) Ikiwa anaendelea kukataa mazungumzo, ni bora kuondoka. Tukiheshimu maoni yake, huenda ikawa rahisi kwa mhubiri mwingine kumtolea ushahidi wakati ujao.—1 Pet. 3:15.

Jaribu Dokezo Hili Kwa Mwezi Mzima:

Unapokutana na mtu anayekataa mazungumzo, baada ya kuondoka, zungumza na mwandamani wako jinsi ungeweza kumjibu kwa njia bora zaidi.