Kuboresha Ustadi Wetu Katika Huduma—Kuwazoeza Wapya

Kwa Nini Ni Muhimu: Wanafunzi wapya wa Yesu wanapaswa kushika “mambo yote” ambayo aliamuru, na hilo linatia ndani kuwafundisha wengine kweli. (Mt. 28:19, 20) Wanafunzi wengi wapya tayari wamestahili kujiunga na Shule ya Huduma ya Kitheokrasi na huenda wamewahubiria isivyo rasmi marafiki au watu wao wa ukoo. Hata hivyo, wanapoendelea kuthamini zaidi mambo wanayojifunza na kujua kwamba Yehova anataka watu wote wasikie habari njema, huenda wakaonyesha tamaa yao ya kushiriki katika huduma ya shambani. (Rom. 10:13, 14) Wanafunzi wanapostahili kuwa wahubiri ambao hawajabatizwa, wanahitaji kuzoezwa vizuri ili wawe na ujasiri zaidi katika hatua hii muhimu ya maendeleo yao ya kiroho.—Luka 6:40.

Jinsi ya Kufanya Hivyo:

Msaidie mhubiri mpya kupata machapisho anayohitaji kwa ajili ya kazi ya kuhubiri na kufundisha. Mwonyeshe jinsi unavyopanga machapisho katika mkoba wako wa utumishi, na umweleze kusudi la kila chapisho unalobeba.
Chagueni pamoja pendekezo la utumishi kutoka kwenye Huduma Yetu ya Ufalme na mfanye mazoezi ya jinsi ya kulitumia. Mtie moyo atumie maneno yake. Fanyeni mazoezi mkitumia vikao vinavyofaa eneo lenu ambavyo vimeorodheshwa katika kitabu Shule ya Huduma, ukurasa wa 82. Mweleze umuhimu wa kuvalia na kujipamba kwa kiasi.—2 Kor. 6:3, 4.
Endelea kumzoeza. Mwonyeshe kadi ya ramani ya eneo, na umfundishe jinsi ya kutumia rekodi ya nyumba kwa nyumba. Mwonyeshe jinsi ya kujaza fomu hiyo anapokutana na mtu anayependezwa. Mfundishe jinsi ya kutumia Tovuti ya jw.org katika huduma na kijitabu Good News for People of All Nations. Msaidie ajue jinsi ya kuendeleza upendezi wa wale anaowahubiria.—1 Kor. 3:6.
Uwe mwenye subira, na umpongeze. (Met. 25:11) Mwekee mfano mzuri. Bidii yako na upendezi unaomwonyesha utakuwa na matokeo mazuri hata baada ya miaka mingi kupita.

Jaribu Kutumia Dokezo Hili kwa Mwezi Mzima:

Ikiwa unajifunza na mwanafunzi ambaye amekuwa mhubiri, mwalike ahubiri nawe katika utumishi wa nyumba kwa nyumba, na uandamane naye unapofanya ziara ya kurudia au unapoongoza funzo la Biblia. Ikiwa hujifunzi na mhubiri mpya, mwalike mhubiri ambaye hana uzoefu sana katika huduma, ahubiri pamoja nawe.