“Nilipambana Kama Simba”

LUIS, mtu wa ukoo wa Trujillo alikuwa mweka-hazina wa chama tawala cha Partido Dominicano (Chama cha Dominika). Hata hivyo, Luis alikichukia kikundi cha kisiasa cha Trujillo na mara kwa mara alijaribu kuacha kazi yake, lakini dikteta hakumruhusu.

Trujillo alipowaua kaka wawili wa Luis, Luis alijaribu mara mbili kumuua dikteta huyo. Hata hivyo, watu hawakujua kwamba Luis alihusika. Luis alienda kwa watu wanaowasiliana na pepo ili apate msaada wa kumuua mtu huyo, ambaye alisema: “Alitenda kama mnyama na kujiona yuko juu ya kila mtu.” Katika mojawapo ya nyumba za watu waliowasiliana na pepo aliona mezani kitabu “The Truth Shall Make You Free” na akaanza kukisoma. Luis alikipenda sana kitabu hicho hivi kwamba akaenda nacho nyumbani na akafikia mkataa kuwa hiyo ndiyo dini ya kweli aliyokuwa akitafuta.

Luis aliposafiri kwenda Ciudad Trujillo, alihudhuria mikutano ya Mashahidi wa Yehova na kuchukua vitabu na magazeti mengi. Alisoma machapisho hayo usiku kucha kisha akaomba afundishwe Biblia. Alipozidi kufanya maendeleo, Luis aliamua kujiuzulu katika serikali ya Trujillo. Dikteta alipojua hilo, alimpa cheo kikubwa cha kuwa balozi wa Dominika nchini Puerto Riko. Lakini Luis alikataa kazi hiyo ingawa alijua kwamba uamuzi wake ungefanya ateswe.

Luis alisema hivi: “Niliteswa kwa kila njia, na serikali iliniwekea mitego ya kila aina. Lakini niliazimia kuachana na maisha ya ulimwengu huu.” Luis akawa mhubiri jasiri wa habari njema hivi kwamba makasisi Wakatoliki katika eneo aliloishi wakaanza kumwita “mhubiri.” Oktoba 5, 1947, miezi sita baada kuhudhuria mikutano kwa mara ya kwanza, Luis alibatizwa.

Baada ya kubatizwa Luis alitafutwa, akafungwa gerezani katika seli ya upweke. Walijaribu kumkamata mara nyingi. Hata hivyo, kila mara alipokamatwa na kupelekwa mahakamani, alitumia fursa hiyo kutoa ushahidi. “Nilipambana kama simba ili kuitetea imani yangu,” alisema Luis, “na ninakumbuka mambo hayo kwa shangwe.”

Rekodi nzuri ya Luis ya kumtumikia Mungu kwa uaminifu ilitambuliwa katika jamii. Mwaka wa 1994, gazeti El Siglo la Dominika lilisema hivi kumhusu Luis: “Bw. Luis Eduardo Montás anatambuliwa huko San Cristobal kuwa mwenye kuchukua mambo kwa uzito. Alitumia vipawa vyake kuwasaidia watu, mwanaume mpole na mwenye huruma. Kila kitu kinachojulikana kumhusu katika historia ya San Cristobal kinahusiana na ujitoaji wake akiwa mwanaume Mkristo.”