Tumieni Muda Mwingi Pamoja

Katika visa vingi waume na wake wameona kwamba wanashindwa kuwasiliana hata ikiwa wapo pamoja. Kwa nini hilo hutokea?

• Pamoja lakini mbali—kwa nini?

• Unachoweza kufanya

• Wenzi fulani wa ndoa wanasema nini

• Mwongozo wa mazungumzo

Pamoja lakini mbali—kwa nini?

• Uchovu

  “Tunapopata wakati wa kuzungumza, ama mume wangu amechoka sana au mimi nimechoka sana. Ninapochoka, mara nyingi mimi hukasirishwa na mambo madogo. Ni afadhali kutazama TV.”—Anna.

• Kukengeushwa na mtandao

  “Mitandao ya kijamii na burudani kwenye mtandao inaweza kuchukua muda mwingi. Unaweza kutumia saa nyingi humo, na hujazungumza na mwenzi wako hata kidogo. Ni kana kwamba hata hamko kwenye chumba kimoja.”—Katherine.

• Mapendezi tofauti

  “Baada ya mume wangu kurudi nyumbani kutoka kazini, mara nyingi anatumia muda mwingi kufanya mambo anayopenda. Ni kweli anahitaji kuwa na muda wa kuwa peke yake akifanya anachopenda kwa kufikiria jinsi anavyofanya kazi kwa bidii. Lakini ninatamani tungetumia muda mwingi zaidi pamoja.”—Jane.

• Kazi

  “Teknolojia imefanya iwe vigumu kutofautisha kati ya kazi na muda wa familia. Mara nyingi, ninajikuta nikijibu barua-pepe na jumbe kutoka kazini wakati ambapo ningekuwa nikitumia muda huo na mke wangu.”—Mark.

Unachoweza kufanya

• Uone muda wa kuwa pamoja kuwa wa lazima, si kwa sababu huna jambo lingine la kufanya.

  Kanuni ya Biblia: “Mhakikishe mambo muhimu zaidi.”—Wafilipi 1:10.

  Jambo la kufikiria: Je, matendo yako yanaonyesha kwamba unaona ndoa yako kuwa muhimu zaidi kuliko kazi au vitu unavyofurahia kufanya? Je, unampa mwenzi wako muda na uangalifu wakati tu huna jambo lingine la kufanya?

  Dokezo: Usisubiri nafasi zijitokeze. Fanya mipango kwa ukawaida ya kutumia muda ukiwa peke yako na mwenzi wako bila vikengeusha fikira.

  “Ninafurahi sana mume wangu anapopanga tufanye mambo fulani sisi wawili tu. Hilo hunifanya nijihisi kuwa wa pekee, na linanihakikishia kwamba anapenda kuwa pamoja nami. Hilo hunifanya nimpende hata zaidi.”—Anna.

• Jifunze kupuuza vifaa vyako vya kielektroni kwa muda fulani.

  Kanuni ya Biblia: “Kuna wakati uliowekwa wa kila jambo.”—Mhubiri 3:1.

  Jambo la kufikiria: Ni mara ngapi ujumbe unaingia ambao unakukengeusha na kukuzuia kumkazia mwenzi wako wa ndoa fikira?

  Dokezo: Jaribuni kula angalau mlo mmoja kila siku pamoja—na mwache simu zenu katika chumba tofauti. Wakati wa mlo hutoa nafasi nzuri za kuzungumzia mambo yaliyotokea siku hiyo.

• Inapowezekana, fanyeni ununuzi au kazi za nyumbani pamoja.

  Kanuni ya Biblia: “Wawili ni afadhali kuliko mmoja kwa sababu wanapata faida kubwa zaidi kwa kazi yao ngumu.”—Mhubiri 4:9, maelezo ya chini.

  Jambo la kufikiria: Ni mara nyingi kadiri gani wewe na mwenzi wako mnaenda sehemu tofauti ili kufanya ununuzi?

  Dokezo: Fanyeni mambo pamoja, hata ikiwa kazi yenyewe haihitaji watu wawili.

  “Kwa nini msijaribu kutumia pindi za kununua vyakula dukani au sokoni, kuosha vyombo, kukunja nguo, au kushughulikia bustani kuwa nafasi za kutumia muda pamoja?”—Nina.

• Uwe na matarajio halisi

  Kanuni ya Biblia: “Usawaziko wenu na ujulikane kwa watu wote.”—Wafilipi 4:5.

  Jambo la kufikiria: Unaweza kuonyeshaje usawaziko kuhusu mambo unayotarajia kutoka kwa mwenzi wako?

  Dokezo: Zungumzeni pamoja ili kuelewa mambo ambayo nyote wawili mnahitaji. Fanyeni uamuzi kuhusu jinsi nyote wawili mnavyoweza kutumia wakati kwa njia itakayowafurahisha nyote.

  “Mume wangu ana nguvu nyingi, lakini mimi sina nguvu sana kwa sababu ya afya yangu. Mara nyingi mimi humsihi mume wangu aende nje akajifurahishe, nami nitakaa nyumbani hadi atakaporudi. Ninabaki nyumbani ili kupumzika kwa kuwa ninahitaji kufanya hivyo, huku yeye akipata mazoezi anayohitaji. Sote wawili tunajihisi vizuri kwa sababu tumefanya jambo ambalo tulihitaji sana.”—Daniela.

Mwongozo wa mazungumzo

Kwanza, kila mmoja wenu anaweza kufikiria maswali yafuatayo akiwa peke yake. Kisha zungumzieni majibu yenu pamoja.

• Ungesema kwamba wewe na mwenzi wako mnatumia muda wa kutosha pamoja sasa hivi?

• Unaweza kumpongeza mwenzi wako kwa njia gani kuhusu jitihada zake za kutumia muda pamoja nawe?

• Ungependa mwenzi wako afanye maendeleo gani?

• Wewe hukengeushwa mara nyingi kadiri gani na vifaa vya kielektroni hivi kwamba unakosa kumkazia mwenzi wako fikira kikamili anapozungumza nawe?

• Unaweza kuonyeshaje usawaziko kuhusu kile unachotazamia kutoka kwa mwenzi wako?

• Kila mmoja wenu anaweza kufanya mabadiliko gani juma hili ili mtumie muda mwingi zaidi pamoja bila kukengeushwa?