Je, Ulimwengu Utakwisha Karibuni? Apokalipsi Ni Nini?
Unafikiria nini unaposikia neno “apokalipsi”? Huenda ukafikiria kuhusu janga la ulimwenguni pote, huenda janga litakaloangamiza viumbe wote duniani. Watu fulani wanaamini kwamba ulimwengu utapatwa na janga kama hilo hivi karibuni, hasa wanaposoma habari kuhusu ripoti kama hizi:
“Vita vya nyuklia vinaweza kutokea wakati wowote, iwe vitaanza kimakusudi, kimakosa, au kwa sababu tu ya kutoelewana.”—Bulletin of the Atomic Scientists.
“Katika miaka kumi ambayo imepita kumekuwa na vimbunga, mioto ya misitu, ukame, mabadiliko ya hali ya hewa yanayoathiri matumbawe, hali ya joto isiyo ya kawaida, na mafuriko duniani pote.”—National Geographic.
“Makundi ya nzige yanayovamia Afrika yamekuwa makubwa na yenye uharibifu zaidi kuliko wakati mwingine.”—The Associated Press.
Je, dunia itaangamizwa na apokalipsi? Biblia inasema nini?
Je, dunia yetu itaangamizwa?
Hapana. Neno la Mungu, Biblia linatuhakikishia kwamba dunia itadumu milele. (Mhubiri 1:4) Badala ya kuharibu dunia ambayo aliiumba, Mungu “[atawaharibu] wale wanaoiharibu dunia.”—Ufunuo 11:18.
Je, ulimwengu wetu utaangamizwa?
Kulingana na Biblia, neno “ulimwengu” ambao utaangamizwa unarejelea ulimwengu wa wanadamu ambao wanampuuza Mungu na kufuatia mambo yao wenyewe kwa sababu ya ubinafsi. Kama alivyofanya katika siku za Noa, Mungu ataangamiza “ulimwengu wa watu wasiomwogopa Mungu.”—2 Petro 2:5; 3:7.
Kama 1 Yohana 2:17 inavyosema, “ulimwengu unapitilia mbali na pia tamaa yake.” Mstari huu unaonyesha kwamba Mungu hataharibu tufe la dunia bali atawaharibu wale wanaoendelea kufuatia tamaa zao zisizompendeza Mungu.
Mwisho utakuja wakati gani?
Biblia haituambii siku hususa ambayo mwisho utakuja. (Mathayo 24:36) Hata hivyo, inaashiria kwamba mwisho uko karibu. Biblia inatabiri mambo yafuatayo:
Matukio kama vile vita, upungufu wa chakula, magonjwa ya kuenea, na matetemeko makubwa ya ardhi yangetokea “katika sehemu mbalimbali.”—Mathayo 24:3, 7, 14; Luka 21:10, 11; Ufunuo 6:1-8.
Watu kwa ujumla wangekuwa na ubinafsi kupita kiasi. Kwa mfano, wangekuwa “wenye kupenda pesa,” “wasio na shukrani,” na “wasiojizuia.”—2 Timotheo 3:1-5.
Watu wengi wanakubali kwamba tangu mwaka 1914, hali ulimwenguni zimebadilika na zinafanana na hali ambazo Biblia ilitabiri, kuonyesha kwamba mwisho uko karibu. Ili kupata habari zaidi, ona makala zenye vichwa “Mfuatano wa Matukio Katika Biblia Unaonyesha Nini Kuhusu Mwaka wa 1914?” na “Ni Nini Ishara ya ‘Siku za Mwisho’?”
Neno “apokalipsi” lina maana gani katika Biblia?
Neno la Kigiriki lililotafsiriwa “apokalipsi” katika Biblia linamaanisha “kufunua.” Mara nyingi neno hilo linatumika kumaanisha kufunua habari iliyokuwa imefichwa. Pia, Biblia inazungumzia kuhusu “ufunuo [au, apokalipsi] wa Bwana Yesu” ambao utafanyika, Yesu atakapofunuliwa kuwa ndiye mwenye uwezo wa kuondoa uovu wote duniani, na kuwathawabisha wale wanaomwabudu Mungu.—2 Wathesalonike 1:6, 7; 1 Petro 1:7, 13.
Kitabu cha mwisho katika Biblia kinaitwa A·po·kaʹly·psis, au Ufunuo, kwa sababu kinafunua matukio yatakayotokea wakati ujao. (Ufunuo 1:1) Kitabu hicho kina habari njema na ujumbe wenye tumaini. (Ufunuo 1:3) Kinaonyesha kwamba Yehova atamaliza ukosefu wote wa haki na kuifanya dunia iwe paradiso. Wakati huo wanadamu hawatahisi maumivu, hawatateseka au hata kufa. —Ufunuo 21:3, 4.
Je, ungependa kujifunza mengi zaidi kuhusu ahadi hizi nzuri za Biblia? Mashahidi wa Yehova wana programu ya kujifunza Biblia bila malipo na ambayo inaweza kukusaidia. Unaweza kuwasiliana nao ili wakusaidie.