Je, Kucheza Kamari Ni Dhambi?

Jibu la Biblia

Ingawa Biblia haizungumzi kwa undani kuhusu kucheza kamari, tunapochunguza kanuni za Biblia tunaweza kuelewa kwamba Mungu huona kucheza kamari kuwa ni dhambi.​—Waefeso 5:​17.a

• Kucheza kamari kunaongozwa na pupa, na Mungu anachukia pupa. (1 Wakorintho 6:​9, 10; Waefeso 5:​3, 5) Watu wanaocheza kamari wanatazamia kupata pesa wengine wanapopoteza, lakini Biblia inashutumu kutamani mali za wengine.​—Kutoka 20:17; Waroma 7:7; 13:​9, 10.

• Kucheza kamari, hata kwa ajili ya pesa kidogo, kunaweza kuchochea tamaa mbaya ya pesa.​—1 Timotheo 6:​9, 10.

• Mara nyingi wacheza kamari hutegemea ushirikina au bahati. Hata hivyo, Mungu huona imani kama hizo kuwa aina ya ibada ya sanamu, ambayo haipatani na ibada yake.​—Isaya 65:11.

• Badala ya kuchochea tamaa ya kupata kitu bila kutia jitihada, Biblia inatutia moyo tufanye kazi kwa bidii. (Mhubiri 2:​24; Waefeso 4:​28) Wale wanaofuata ushauri wa Biblia wanaweza ‘kula chakula ambacho wao wenyewe wamefanyia kazi.’​—2 Wathesalonike 3:​10, 12.

• Kucheza kamari kunaweza kuchochea roho isiyofaa ya mashindano, jambo ambalo Biblia inashutumu.​—Wagalatia 5:​26.