Waambie Unawapenda

Ong-Li ni Shahidi wa Yehova nchini Bulgaria. Alimsaidia mwanamke fulani kijana anayeitwa Zlatka kujifunza Biblia, lakini mume wake hakushiriki funzo hilo. Ong-Li anasimulia hivi: “Tulipozungumzia mambo yanayohusu familia, nilikazia umuhimu wa kuwaambia wenzi wetu wa ndoa na watoto kwamba tunawapenda. Zlatka aliniangalia kwa huzuni; alisema kwamba hajawahi kumwambia mume wake au binti yake mwenye umri wa miaka tisa kwamba anawapenda!”

Zlatka alieleza hivi, “Niko tayari kuwafanyia chochote, lakini siwezi kusema maneno hayo.” Kisha akaongezea, “Mama yangu hajawahi kuniambia ananipenda, naye nyanya (bibi) yangu hakuwahi kumwambia mama yangu kwamba anampenda.” Ong-Li alimwonyesha Zlatka kwamba Yesu alimsikia Yehova akimwambia kwamba anampenda. (Mathayo 3:​17) Alimtia moyo Zlatka asali kwa Yehova kuhusu jambo hilo na kujiwekea lengo la kumwambia mume wake na binti yake kwamba anawapenda.

Ong-Li anasema hivi: “Siku mbili baadaye, Zlatka aliniambia kwa msisimuko kwamba alikuwa amemwomba Yehova amsaidie. Mume wake aliporudi nyumbani alimwambia alikuwa amejifunza katika funzo lake la Biblia kwamba ni muhimu sana kwa mke kumheshimu na kumpenda mume wake. Kisha, baada ya kutua kidogo, akamwambia kwamba anampenda sana. Binti yake aliporudi nyumbani, Zlatka alimkumbatia na kumwambia kwamba anampenda! Zlatka aliniambia hivi: ‘Sasa ninajihisi nimetulia. Miaka hii yote nimefungia hisia zangu, lakini kwa msaada wa Yehova, hatimaye nimefaulu kuwaambia watu wa familia yangu kwamba ninawapenda.’”

Ong-Li anaendelea kusimulia hivi: “Juma moja baadaye, nilikutana na mume wa Zlatka naye akaniambia hivi: ‘Watu wengi wameniambia kwamba sipaswi kumruhusu Zlatka ajifunze Biblia pamoja nawe, lakini hakuna shaka kwamba kujifunza Biblia kunaisaidia sana familia yetu. Sasa tuna uhusiano mchangamfu zaidi na wenye furaha zaidi.’”