Kutanguliza Habaris Njema—Kwa Kutumia Trakti kwa Matokeo
1 Waekati wa “Tumaini Katika Yehova” Mkusanyiko wa Wilaya wa 1987, trakti mpya nne zilitolewa. Zina vichwa Sababu kwa Nini Wewe Unaweza Kutumaini Biblia, Mashahidi wa Yehova Wanaamini Nini?, Uzima Katika Ulimwengu Mpya Wenye Amani, na Kuna Tumaini Gani kwa Wapendwa Waliokufa? Je! wewe umekuwa ukitumia shambani trakti hizo kwa matokeo?
2 Wahubiri wengi huacha trakti kwenye milango kusipokuwapo mtu nyumbani. Na huwapa watu wenye shughuli mno wasiweze kusikiliza wakati ziara inapofanywa. Wengine hukuta kwamba wakitumia trakti kujitanguliza wenyewe kwenye mlango, inawasaidia kusisimua kupendezwa kwa mwenye nyumba. Wengine hupendelea kuzitoa kama zawadi ya bure kwenye ziara ambazo hakuna fasihi inayoangushwa lakini ambapo kupendezwa fulani kumeonyeshwa.
WAKATI NA JINSI YA KUZITUMIA
3 Kwa kuwa mwenye kubadilikana na kuwa chonjo kuona fursa, waweza kukuta pindi nyingi za kutoa trakti. Mathalani, trakti zaweza kuwa msaada wakati wa kutolea watu wa ukoo ushahidi. Unaweza kutumia trakti unapokuwa kwenye likizo, unaponunua dukani na kusafiri, shuleni, au mahali ulipoajiriwa kazi. Je! unaweka trakti karibu, labda ndani ya mfuko wako wa koti au shati, pochi, au mkoba? Kuwa na trakti nyakati zote kwaweza kukutia moyo utoe ushahidi wa vivi hivi. Mbona usitafute wasaa kwa ajili ya kutoa trakti?
4 Bila kujali wasaa wenyewe, unaweza kutumia trakti kutoa ushahidi wenye matokeo zaidi. Ingawa ujumbe uliomo ni mfupi, yale ambayo zinasema ni yenye usadikishi na yanaungwa mkono na hoja za Kimaandiko. Trakti hizo zina picha zenye rangi zinazovutia na zaweza kuwa zana za kutimiza mema mengi katika huduma. Kaa chonjo kuzitoa kwa watu kila mahali.
KATIKA HUDUMA YA SHAMBANI
5 Je! umepata kutumia kwa manufaa vichwa vya trakti vyenye kuamsha kufikiri ili kusitawisha kupendezwa katika ujumbe wa Ufalme unapofanya kazi ya nyumba kwa nyumba? Wahubiri fulani hukazia kichwa cha trakti mara moja katika utangulizi wao. Mbona wewe mwenyewe usijaribu mfikio huo? Huenda ukasema: “Jambo. Nafurahi kukukuta nyumbani. Nimejitolea nishiriki kujulisha ujumbe wa maana sana. Unapatikana ndani ya trakti hii Uzima Katika Ulimwengu Mpya Wenye Amani. Hii ni nakala yako. Hakuna malipo. [Mpe mwenye nyumba, na uelekeze fikira kwenye jalada.] Si wewe ungependa kuishi katika mazingira yenye amani hivi?” Kisha mastakimu zikiruhusu, endelea na Kichwa cha Mazungumzo, na uunganishe na toleo kwa ajili ya mwezi.
6 Ikitegemea wewe unaishi wapi, huenda ukaona kuna manufaa kusema ujumbe wako unatoka katika Biblia. Trakti Sababu kwa Nini Wewe Unaweza Kuitumaini Biblia yaweza kuwa na matokeo sana katika eneo lenu. Mathalani, huenda ukasema: “Leo tunaachia majirani wetu ujumbe wa bure wa Biblia. Hii ni nakala yako. [Mpe mwenye nyumba.] Angalia kwamba habari hii inahusu Biblia. Je! wewe unafikiri watu wamepoteza uhakika katika Biblia leo? [Ruhusu jibu.] Trakti hii itakusaidia uone ni kwa nini tunaweza kutumaini yale ambayo Biblia inasema.” Endelea na Kichwa cha Mazungumzo, ukionyesha baraka ambazo Mungu ameweka akiba kwa ajili ya dunia.
7 Ugawanyaji wa trakti za Biblia umetahiniwa na wakati ukaonwa kuwa njia yenye matokeo ya kutangaza “habari njema.” (Mt. 24:14) Zinatimiza fungu la maana katika huduma yetu ya peupe na tunapotoa ushahidi wa vivi hivi. Acheni tutumie kwa matokeo trakti zetu maridadi ili tutoe ushahidi mzuri na kwa njia hiyo kusaidia wengine wajifunze juu ya Ufalme wa Mungu.