Utangulizi Unaweza Kutokeza Hali Tofauti

¹ Je! umekuwa ukitumia baadhi ya matangulizi yaliyodokezwa katika kitabu Kutoa Sababu au yale yaliyo katika matoleo ya Huduma ya Ufalme Yetu ya hivi karibuni? Wahubiri wengi wanaripoti kwamba wanafanikiwa zaidi katika huduma yao ya nyumba kwa nyumba kwa kutumia matangulizi hayo neno kwa neno kama yalivyo kwenye maandishi. Wengine wamepata kwamba kwa kuchukua wakati zaidi kidogo tu katika kutayarisha kwa ajili ya huduma ya shambani, wameweza kufanyiza matangulizi katika maneno yao wenyewe lakini yenye msingi wa madokezo yaliyochapishwa

² Jambo moja ni hakika, na hilo ni kwamba ikiwa una utangulizi wako akilini kabla ya kumfikia mtu na ujumbe wa Ufalme, utahisi kuwa umestarehe zaidi na mwenye uhakika zaidi. Maneno yako yataonyesha tamaa yako ya moyo mweupe ya kushiriki habari njema. Jambo la kwamba umejitayarisha vizuri hufanya huduma yako iwe yenye kufurahisha zaidi kwa sababu utapata matokeo bora zaidi. Jambo lenye umaana zaidi ni kwamba tufanye dhabihu yetu ya utumishi iwe bora zaidi kadiri tuwezavyo kutoa.—Ebr. 13:15; 1 Pet. 2:5.

³ Kwa hiyo chukua wakati kutayarisha. Fikiria ni watu wa aina gani unaoelekea kukutana nao katika eneo la kwenu. Mafadhaiko na mahangaiko yao ni nini? Ni matukio gani ya kisasa yanayoathiri maisha zao? Baada ya kufikiria majibu ya maswali hayo, angalia matangulizi yaliyodokezwa katika kurasa 9-15 za kitabu Kutoa Sababu au chagua utangulizi mmoja au zaidi katika Huduma ya Ufalme Yetu. Jihisi huru kubadilisha au kurekebisha maneno halisi ili uhisi umestarehe nayo. Jambo linalofuata lingekuwa kufanya mazoezi ya utangulizi wako pamoja na wahubiri wengine. Labda hilo litatia moyo wengine wafanyie maendeleo matangulizi yao pia. Kwa vyovyote, kwa hakika mtakuwa mkitiana moyo na kujengana katika kazi nzuri.

⁴ Wakati na jitihada unazotumia kutayarisha matangulizi yako ya shambani zitathawabishwa. Unaweza kubarikiwa kuwa na ushiriki wenye matokeo zaidi katika kazi yenye kusisimua ya kukusanya inayoendelea sasa.