“Kuwafundisha . . . Yote Niliyowaamuru Ninyi”
1 Kufanya wanafunzi hutia ndani kufundisha. Kabla mtu hajawa mwanafunzi wa Kristo, ni lazima afundishwe “kuyashika yote” ambayo Yesu aliamuru. (Mt. 28:19, 20) Njia bora zaidi ya kutimiza hilo ni kupitia funzo la Biblia nyumbani.
2 Si rahisi nyakati zote kuanzisha mafunzo ya Biblia. Ikiwa unaona vigumu kupata funzo la Biblia, usivunjike moyo. Kufanikiwa kuanzisha mafunzo ya Biblia huhitaji kuazimia na tamaa ya kweli ya kuwapa wengine kweli.—Gal. 6:9.
3 Kusitawisha Kupendezwa: Huenda mazungumzo yenu ya mwanzoni yakatokeza kupendezwa kidogo tu. Ikitegemea hali, trakti, broshua, au magazeti yaweza kuachwa na mwenye nyumba. Unaweza kutumia mojawapo ya hizo ili uanzishe funzo la Biblia nyumbani. Ikiwa mwenye nyumba anaonyesha kupendezwa zaidi na ujumbe, unaweza kumwelekeza kwenye kichapo kingine kinachofaa katika ziara ya baadaye.
4 Kutayarisha ndio ufunguo wa mafanikio. Kwa nini usichague kimbele Andiko lililonukuliwa katika trakti, broshua, au gazeti unalopanga kutumia kwenye ziara yako ya kurudia? Kwa njia hiyo utaweza kuunganisha maelezo kutoka kwa kichapo pamoja na mazungumzo yako. Unaweza hata kusoma fungu moja au mawili moja kwa moja kutoka kwa kichapo hicho.
5 Unaweza kusema hivi:
◼ “Tumekuwa tukizungumzia habari fulani kuhusu unabii wenye kutokeza ambao unatimizwa sasa.” Soma Mathayo 24:3, kisha unganisha picha na maelezo kwenye ukurasa 24 wa broshua “Tazama!” Mfikio uo huo waweza kutumiwa unapotoa trakti Je! Ulimwengu Huu Utaokoka?
6 Baada ya kutambua kupendezwa kwa kweli, kwapaswa kufuatiliwe bila kukawia. Jaribu kurudi katika muda wa juma moja ili mwenye nyumba aweze kukumbuka vizuri mazungumzo ya wakati uliopita. Kila wakati unapozuru, pitia mafungu machache kutoka kwa kichapo ulichoacha. Kisha, katika wakati ufaao, unaweza kuonyesha kitabu Kuishi Milele, ukiendelea na utaratibu uo huo.
7 Leo bado kuna kazi nyingi ya kufanya katika mavuno makubwa yaliyotabiriwa na Yesu. (Mt. 9:37, 38) Kadiri tuendeleavyo kufundisha wale wenye mioyo minyofu, tuna uhakikishio wa Yesu wenye kuimarisha kwamba yeye ‘yupo pamoja nasi sikuzote hadi mwisho wa mfumo wa mambo.’