Watu Hujifunza Nini kwa Kukutazama?

1. Wanafunzi wa Yesu walijifunza nini kwa kumtazama?

¹ Yesu alisema hivi: “Chukueni nira yangu na mjifunze kutoka kwangu.” (Mt. 11:29) Ni wazi kwamba aliwafundisha wengine si kwa maneno tu bali pia kwa kuwawekea mfano mzuri. Wanafunzi walijifunza mengi kwa kumtazama Yesu. Alikuwa mpole, na mwenye fadhili na upendo. (Mt. 8:1-3; Marko 6:30-34) Alikuwa mnyenyekevu kikweli. (Yoh. 13:2-5) Wanafunzi walipoandamana na Yesu katika huduma, waliona kwamba alifanya kazi kwa bidii na aliwafundisha watu kweli za Biblia kwa ustadi. (Luka 8:1; 21:37, 38) Watu wanajifunza nini wanapotutazama katika huduma?

2. Eleza jinsi sura yetu nzuri na mwenendo wetu mzuri unavyoweza kufanya wenye nyumba wavutiwe na ujumbe wetu.

² Wenye Nyumba: Huenda wakavutiwa sana wanapoona mavazi yetu yenye kiasi, mwenendo wetu mzuri, na kwamba tunawajali watu kikweli. (2 Kor. 6:3; Flp. 1:27) Wao hutambua kwamba tunatumia Biblia sana. Wengine wao wanavutiwa kwa sababu tunasikiliza kwa heshima wanapoongea. Usisahau kamwe kwamba mfano wetu mzuri kuhusiana na mambo hayo unaweza kuwachochea watu wasikilize ujumbe wa Ufalme.

3. Tunaweza kuwa na uvutano mzuri juu ya ndugu zetu kwa njia gani?

³ Ndugu Zetu: Ndugu zetu pia wanaweza kunufaika. Tunapokuwa na bidii katika huduma, huenda wengine wakachochewa kuwa na bidii pia. Kama vile chuma inavyonolewa kwa chuma, huenda wahubiri wenzetu wakatiwa moyo kuboresha ustadi wao wa kuhubiri wanaposikiliza mazungumzo yetu yaliyotayarishwa vizuri. (Met. 27:17) Bidii yetu ya kuandika kwa usahihi maandishi kuwahusu watu wanaopendezwa na kuwarudia bila kukawia huenda ikawachochea wahubiri wenzetu kufanya vivyo hivyo. Tunapotimiza kwa ukamili huduma yetu tunakuwa na uvutano mzuri juu ya ndugu na dada zetu.—2 Tim. 4:5.

4. Kwa nini tunapaswa kujichunguza mara kwa mara ili kuona kama sisi ni mfano mzuri kwa wengine?

⁴ Mara kwa mara, inafaa uchunguze mazungumzo yako na mwenendo wako ili kuona kama wengine watanufaika kwa mfano wako. Tunapokuwa mfano mzuri kwa wengine tunamfurahisha Yehova na tunahisi kama mtume Paulo alivyohisi aliposema: “Iweni waigaji wangu, kama vile mimi nilivyo mwigaji wa Kristo.”—1 Kor. 11:1.