Shule ya huduma ya kitheokrasi mnano 2000

¹ Shule ya Huduma ya Kitheokrasi imeonekana kuwa baraka kubwa kwa watu wa Yehova. Kwa zaidi ya miaka 50 iliyopita, hiyo imesaidia mamilioni kusitawisha uwezo wao mbalimbali wakiwa wasemaji wa peupe na wafundishaji wa kweli za Biblia. (Zab. 145:10-12; Mt. 28:19, 20) Je! unaweza kuona jinsi shule hiyo ilivyokusaidia? Inaweza kuendelea kufanya hivyo mnamo 2000 ikiwa unaishiriki na kutumia kikamili mashauri ambayo hiyo hutoa.

² Maagizo kuhusu migawo na vichapo vitakavyotumiwa vinaorodheshwa kwenye ukurasa wa kwanza wa programu ya shule ya 2000. Wakati unaotolewa kwa kila sehemu, chanzo cha habari, jinsi habari inavyopaswa kutolewa, na mambo mengine madogo-madogo yanazungumziwa. Tafadhali chukueni wakati ili kusoma kwa uangalifu maagizo hayo na kuyatumia.

³ Usomaji wa Biblia wa kila juma: Kuna programu mbili tofauti kwa ajili ya usomaji wa Biblia wa kila juma ambazo zinaorodheshwa kwenye programu ya shule. Moja ni programu ya kawaida ya usomaji ambayo inachukua kurasa tano za Biblia. Mambo makuu ya Biblia huwa na msingi juu ya usomaji huo. Ile programu nyingine ya usomaji ni ya ziada na inachukua habari iliyo kubwa mara mbili kuliko ule usomaji mwingine. Kwa kufuata programu hiyo, utaweza kusoma Biblia nzima kwa muda wa miaka mitatu. Inaeleweka kwamba wengine wanaweza kutaka kusoma zaidi ya kile kilichopangwa kwenye programu hiyo ya ziada, na huenda wengine hawawezi kuifuata. Shangilieni katika kile mnachoweza kutimiza, badala ya kujilinganisha na wengine. (Gal. 6:4) Jambo la maana ni kusoma Neno la Mungu kila siku.—Zab. 1:1-3.

⁴ Ili kujiandikisha katika Shule ya Huduma ya Kitheokrasi, unapaswa kuzungumza na mwangalizi wa shule. Tafadhali chukua migawo yako kwa uzito, usikose kuitimiza bila sababu yenye kufaa. Thamini shule ile kuwa uandalizi kutoka kwa Yehova. Jitayarishe vizuri, fahamiana kikamili na habari iliyotolewa kuwa mgawo, na useme kutoka moyoni, ukifaidika hivyo na shule hiyo ya pekee.