“Ninasimama Imara! Ninasimama Imara! Ninasimama Imara!”
1 Maneno hayo ya Mkristo mwaminifu aliyeokoka yale Mauaji Makubwa yanaonyesha azimio la yale maelfu ya Mashahidi—walio hai na wale ambao wamekufa—waliokuwa imara katika imani zao ujapokuwa ukatili wa Wanazi. (Efe. 6:11, 13) Hadithi yao yenye kusisimua ya uhodari na ushindi inaelezwa katika ile vidio yenye kuchochea moyo, iliyo na kichwa La fermeté des Témoins de Jéhovah face à la persécution nazie. Wote katika kutaniko wanahimizwa waitazame na kushiriki maoni na hisia-moyo zao pamoja na wengine.
2 Acheni maulizo haya yachochee kufikiri kwenu: (1) Ni kwa sababu gani mbalimbali Mashahidi wa Yehova walichukua msimamo wenye ujasiri dhidi ya Wanazi? (2a) Ni mabishano gani yaliyokuwako kuhusu namna fulani ya kusalimiana, na kwa nini? (2b) Hilo lilikuwa na uvutano gani juu ya familia za Mashahidi? (3) Ni Mashahidi wangapi waliotumwa kwenye kambi za mateso, walitambuliwaje huko, na Gestapo iliwatendeaje? (4) Ni nini ambacho ndugu zetu hawakutaka kulipa ili kuwekwa huru? (5a) Jinsi gani na wakati gani Mashahidi wa Yehova walisema waziwazi kuhusu ukatili wa utawala wa Hitla? (5b) Hitla aliitikiaje? (6) Umoja wa watu wa Yehova ulionekanaje kuwa wenye kuokoa uhai kwao na kwa wengine, kimwili na kiroho? (7) Ni wimbo gani wa Ufalme ulioandikwa katika kambi ya mateso? (8) Ni mifano gani ya wanaume, wanawake, na vijana waaminifu inayokuchochea ulinde uaminifu wako kwa Yehova, hata hali iweje? (Ona pia kitabu-mwaka 1999, kurasa za 144-7.) (9) Ukiwa Shahidi wa Yehova, vidio hii inakufanya uhisi namna gani kuhusu kutokuwa sehemu ya ulimwengu?
3 Ule mfano wenye kufaa wa Mashahidi wanaozungumziwa katika vidio Fermeté unaweza kusaidia vijana, hata wale wasio Mashahidi, kukabiliana na maswala ya maana kama vile kutovumilia watu wenye maoni tofauti na yao, mkazo wa wengine, na dhamiri. Ikiwa wewe ni kijana unayehudhuria shule ya sekondari, je, unaweza kuwapa walimu wako nafasi ya kutumia habari hiyo darasani? Labda unaweza kuwatolea nakala ya vidio hiyo na kuieleza kuwa historia isiyojulikana sana au filamu yenye kutegemezwa na maandishi, ikiwa na fundisho la kiadili.
4 Vidio Fermeté ni chombo bora ili kuonyesha jinsi mafundisho ya kimungu yanavyotupatia nguvu ya kiroho ya kumpendeza Mungu kwa kubaki imara kwa ajili ya yale yaliyo sawa. (1 Kor. 16:13) Shiriki vidio hiyo pamoja na wale wote wanaopendezwa na kweli.