Onyesha Kupendezwa Kibinafsi na Wengine—Kwa Kuwa Mwenye Kujitayarisha

¹ Kujitayarisha vizuri kwa ajili ya huduma kunatusaidia tuwe wenye kuonyesha kupendezwa kibinafsi na wengine. Namna gani? Tunapojitayarisha vizuri, hatufikirie sana utoaji wetu na kwa hiyo tunaweza kumsikiliza kwa uangalifu mwenye nyumba. Zaidi ya hilo, kunatusaidia kushinda wasiwasi na kunatuwezesha kusema kutoka moyoni. Jinsi gani, basi, tunaweza kutayarisha utoaji wenye matokeo?

² Tumia Utoaji Unaofaa: Chagua kutoka Huduma Yetu ya Ufalme ya Januari 2006 utoaji moja unaofaa eneo lenu kati ya utoaji mbalimbali unaopendekezwa, na ufikiri jinsi unavyoweza kusema kwa maneno yako mwenyewe. Patanisha utoaji wako na hali katika eneo lenu. Kwa mfano, ikiwa mara nyingi unakutana na watu wa dini fulani au malezi fulani ya kikabila, fikiria jinsi utoaji wako unavyoweza kuwavutia. Kupatanisha utoaji wako na hali ya watu unaozungumza nao kunaonyesha kwamba unapendezwa kibinafsi nao.—1 Kor. 9:22.

³ Unapoanza kutumia utoaji fulani, endelea kuuboresha. Kwa kuwa maneno ya utangulizi ni ya maana hasa, angalia jinsi watu wanavyoitikia utangulizi wako. Je, habari hiyo inawapendeza? Je, wanakujibu unapowauliza maulizo? Ikiwa sivyo, fanya marekebisho mpaka utakapopata utoaji wenye matokeo.

⁴ Misaada ya Kukumbusha: Wengi wana tatizo la kukumbuka utoaji waliotayarisha wanapokuwa mlangoni. Ikiwa una tatizo hilo, je, umejaribu kujizoeza habari mbalimbali kwa sauti kubwa mbele ya mtu mwingine? Hilo linaweza kukusaidia kuwa na mawazo yaliyo wazi akilini na kuyatolea watu kwa namna iliyo rahisi na yenye kupatana na akili. Hilo linaweza pia kukutayarisha ili ujue jinsi ya kushughulikia itikio mbalimbali la watu.

⁵ Msaada mwingine wa kukumbusha ni kuandika kwa kifupi maneno ya utoaji kwenye karatasi ndogo na kuyatupia jicho kabla tu ya kukaribia mlango. Wengine wanaona kwamba kikumbusho hicho kifupi kinawasaidia kuwa wenye kutulia zaidi na kuwa wenye uwezo zaidi wa kuzungumza na watu. Katika njia hizo, kujitayarisha vizuri kunaweza kutusaidia tuonyeshe kupendezwa kibinafsi na wengine na hivyo kufanya utoaji wetu wa habari njema uwe mzuri zaidi.