Kampeni ya Ulimwenguni Pote ya Kutangazia Watu Mkusanyiko wa Wilaya “Ukombozi Unakaribia!”
Katika Kila Kutaniko Wahubiri Watagawa Kikaratasi cha Pekee cha Mwaliko
1 Kuanzia majira ya kuchipua (Machi mpaka Mei) ya mwaka wa 2006 katika inchi zilizo kaskazini mwa ikweta na kuendelea mpaka mwisho wa mfululizo wa mikusanyiko ya wilaya ulimwenguni pote, kutakuwa na kampeni ya ulimwenguni pote ya kutangazia watu kwa njia ya kikaratasi cha pekee cha mwaliko mikusanyiko ya wilaya itakayofanyika katika inchi karibu 155. Kampeni hiyo itatia ndani mikusanyiko ya pekee inayopangwa kufanywa katika Ujeremani, Jamhuri ya Cheki, na Pologne mnamo Julai na juma la kwanza la Agosti 2006.
2 Kwa kuwa tunaishi katika kipindi cha mwisho cha siku za mwisho, mikusanyiko inayokazia ahadi ya Mungu ya kukombolewa toka mfumo huu mbovu, inapaswa kuwa na uvutano mkubwa juu ya watu walio na mwelekeo unaofaa. Ujumbe huo unapaswa kuwachochea wafikirie yale yatakayotokea hivi karibuni. Ili kutolea watu wengi zaidi nafasi ya kusikiliza ujumbe wa kufariji na wenye tumaini, zaidi ya makutaniko 98,000 ya Mashahidi wa Yehova ulimwenguni pote yanahimizwa kushiriki kwa bidii katika kutangazia watu na kuwaalika kwenye mkusanyiko utakaofanywa mahali pao.
3 Makutaniko yatatolewa vikaratasi vya mwaliko vya kutosha ili kila mhubiri aweze kuwa na vikaratasi vya mwaliko kufikia kiasi cha 50. Vikaratasi vya ziada vinaweza kutumiwa na mapainia katika kutaniko. Katika kila kutaniko, kampeni itaanza majuma matatu kabla ya tarehe ya kuanza mkusanyiko. Hilo litasaidia kuwe na wakati wa kutosha ili kutembelea eneo lote la kutaniko.
4 Ikiwezekana, inapendekezwa kwamba kikaratasi cha mwaliko kitolewe kwa kila mwenye nyumba binafsi. Hata hivyo, ikiwa wengine hawakutwi nyumbani, kikaratasi cha mwaliko kinaweza kuachwa kwa busara chini ya mlango. Jitihada yenye bidii inapaswa kufanywa ili kugawa vikaratasi vyote vya mwaliko mnamo kipindi hicho cha majuma matatu.
5 Tuko hakika kwamba ushahidi mkubwa utatolewa kutokana na bidii yenye nguvu ya ulimwenguni pote ya kutangazia watu Mkusanyiko wa Wilaya “Ukombozi Unakaribia!” kama inavyoonyeshwa katika habari hii. Tunamwomba Yehova abariki sana jitihada zako za pekee unaposhiriki katika kampeni hii ya ulimwenguni pote.