Informasaun atu uza hamutuk livru Moris Kristaun no Haklaken
6-12 FEVEREIRU
Keʼe no hetan buat murak husi Bíblia
w07 15/1 p. 9 par. 8
Pontu importante husi livru Isaías—II
49:6—Oinsá mak Mesias bele sai nuʼudar “naroman ba nasaun sira” maski nia halaʼo serbisu haklaken ba ema Izraél deʼit? Ida-neʼe koʼalia kona-ba buat neʼebé akontese depois Jesus mate. Eskritura iha Isaías 49:6 refere ba Jesus nia dixípulu sira. (Apóstolu 13:46, 47) Ohin loron, ho ema-lubun boot nia ajuda, ema kristaun kose-mina sira serbí nuʼudar “naroman ba nasaun sira” hodi fó naroman ba ema hotu “iha mundu tomak”.—Mateus 24:14; 28:19, 20.
it-1-IN p. 502 par. 3-4
Soe-malu
Soe-malu simbóliku. Dala ruma, Bíblia temi relasaun kaben nian iha dalan neʼebé simbóliku. (Isaías [Yesaya] 54:1, 5, 6; 62:1-6) Bíblia mós temi kona-ba soe-malu ka haruka feen ba dook iha dalan simbóliku.—Jeremias (Yeremia) 3:8.
Rai-Judá nia ukun no sidade Jeruzalein monu no harahun tiha iha tinan 607 molok Kristu, no ema lori povu neʼe ba Babilónia nuʼudar dadur. Tinan barak antes neʼe, Jeová fó sai profesia kona-ba neʼe ba ema Izraél neʼebé atu sai dadur, hodi dehan: “Haʼu la fó surat soe-malu nian ba imi-nia inan bainhira haʼu haruka nia bá.” (Isaías [Yesaya] 50:1) Jeová hasai ema Izraél nia “inan”, ka organizasaun nasionál, ho razaun neʼebé loos. Neʼe laʼós tanba Jeová la kumpre ninia aliansa no hakarak atu soe malu, maibé neʼe tanba ema Izraél halo hahalok laloos hodi kontra hasoru aliansa Ukun-Fuan nian. Maibé ema Izraél balu arrepende an no halo orasaun atu Jeová hafoun fali ninia relasaun nuʼudar laʼen ba sira no sira-nia rai. Iha tinan 70 nia rohan neʼebé monu iha tinan 537 molok Kristu, Jeová husik ninia povu fila fali ba sira-nia rai tuir buat neʼebé nia promete ona, nia halo ida-neʼe hodi halo santu ninia naran.—Salmo (Mazmur) 137:1-9; haree mós KABEN.
13-19 FEVEREIRU
Keʼe no hetan buat murak husi Bíblia
w06 15/3 p. 11 par. 2
“Drama simbóliku” neʼebé folin boot ba ita
Sara “feto neʼebé livre”, no ninia oan Isaac reprezenta sé? Apóstolu Paulo hatudu katak Sara “feto neʼebé la bele iha oan” reprezenta Maromak nia feen, ninia organizasaun parte lalehan nian. Feto neʼe la bele iha oan, neʼe refere ba tempu antes Jesus mai mundu, feto neʼe la iha “oan” iha rai neʼebé hetan ona kose-mina ho espíritu santu. (Galásia 4:27; Isaías [Yesaya] 54:1-6) Maibé, iha loron Pentekostes tinan 33, Jeová fakar espíritu santu ba grupu mane no feto hodi hatudu katak sira moris fali nuʼudar feto lalehan nia oan. Oan sira husi organizasaun neʼe sai nuʼudar Maromak nia oan-hakiak no simu liman-rohan hamutuk ho Jesus Kristu iha aliansa foun. (Roma 8:15-17) Apóstolu Paulo, neʼebé sai nuʼudar oan ida, hakerek: “Jeruzalein lalehan nian mak livre, no nia mak ita-nia inan.”—Galásia 4:26.
Haburas haraik-an neʼebé loos
Ezemplu kapás kona-ba haraik-an
3 Maski Jeová mak boot no aas liu hotu, maibé “ninia matan hateke bá-mai iha rai hotu atu hatudu ninia forsa hodi ajuda sira neʼebé fó sira-nia laran tomak ba nia”. (2 Crônicas [Tawarikh] 16:9) No saida mak Jeová halo bainhira haree ema neʼebé laran-tun tanba hasoru terus no susar barak? Jeová “hela hamutuk” ho sira hodi uza ninia espíritu santu “atu fó forsa ba ema sira neʼebé kbiit-laek no atu fó forsa ba ema sira neʼebé hetan terus”. (Isaías [Yesaya] 57:15) Hodi nuneʼe, ninia ema sira bele hetan fali forsa no bele kontinua serbí nia ho kontente. Maromak haraik an duni!
20-26 FEVEREIRU
Keʼe no hetan buat murak husi Bíblia
Serbisu atu hafurak liután paraízu espirituál nian
14 Irmaun-irmán ho idade boot barak mak haree ona mudansa sira neʼebé akontese iha Jeová nia organizasaun parte rai nian. Balu sei hanoin-hetan katak uluk iha kongregasaun iha atan ida deʼit mak tau matan ba kongregasaun tomak, laʼós grupu katuas nian. Iha nasaun ida-idak, atan ba sukursál ida mak tau matan, laʼós Grupu Koordenadór. Uluk prezidente ba Watch Tower Society mak fó matadalan, laʼós Grupu Administradór husi Testemuña ba Jeová. Maski iha irmaun seluk neʼebé asiste sira, maibé iha kongregasaun ema ida mak halo desizaun. Hanesan neʼe mós iha sukursál sira no iha sede jerál. Maibé maizumenus husi tinan 1970, atu halo desizaun ruma, katuas sira iha grupu ida-idak mak halo, laʼós tan ema ida deʼit ona.
15 Tanbasá mak mudansa hanesan neʼe diʼak ba Maromak nia organizasaun? Tanba ita-nia komprende kona-ba eskritura sira sai klaru liután, tan neʼe mak halo mudansa sira-neʼe. Duké ema ida deʼit mak domina ka halo desizaun, agora organizasaun bele simu ideia husi grupu katuas sira, no neʼe lori rezultadu diʼak liu ba organizasaun tomak.—Éfeso 4:8; Provérbios (Amsal) 24:6.
16 Iha ita-nia tempu, ita mós haree ona mudansa balu iha ita-nia livru sira no dalan neʼebé ita fahe livru sira-neʼe. Ita gosta tebes fahe livru sira neʼebé haree kapás no bele ajuda ema neʼebé ita hasoru iha serbisu haklaken. Ita mós uza teknolojia atu fahe Bíblia nia mensajen ba ema seluk. Porezemplu, ita agora uza daudaun ita-nia sítiu jw.org, dalan haklaken neʼe haleno duni Jeová nia hanoin, tanba nia hakarak fó oportunidade ba ema hotu atu hatene lia-loos.
17 Ita mós hafolin mudansa kona-ba reuniaun sira hodi ita bele halaʼo Adorasaun Família nian no estuda mesak. Iha mós mudansa kona-ba programa ba reuniaun boot sira. Ita sempre dehan katak programa tinan ida-idak nian diʼak liu fali tinan kotuk. Ita mós haksolok tebes tanba ita bele simu treinu oioin husi eskola sira neʼebé ita-nia organizasaun fó ba ita, loos ka lae? Ita bele haree ho momoos katak mudansa sira-neʼe mai duni husi Jeová. Nuʼudar tempu liu daudaun, nia hafurak liután ninia organizasaun no paraízu espirituál nian.
w07 15/1 p. 11 par. 5
Pontu importante husi livru Isaías—II
Resposta ba pergunta kona-ba eskritura sira:
61:8, 9—Saida mak “aliansa ba nafatin”, no sé mak “bei-oan” neʼe? Neʼe mak aliansa foun neʼebé Jeová halo ho ema kristaun kose-mina sira. “Bei-oan” mak “bibi seluk”, katak ema rihun ba rihun neʼebé rona ba ema kose-mina nia mensajen.—João 10:16.
27 FEVEREIRU–5 MARSU
Keʼe no hetan buat murak husi Bíblia
w07 15/1 p. 11 par. 6
Pontu importante husi livru Isaías—II
63:5—Oinsá mak Maromak nia hirus fó apoia ba nia? Maromak bele kontrola ninia sentimentu, ninia hirus sempre tuir justisa. Ninia hirus fó apoia no mós book nia atu fó kastigu neʼebé tuir justisa.
Simu Jeová nia dixiplina atu hadiʼa ita-nia hahalok
OINSÁ BADAIN SANAN-RAI HALAʼO NINIA KBIIT
3 Kona-ba Jeová nia kbiit ba ema no nasaun sira, Isaías 64:8 hatete: “Oh, Jeová, Ita mak ami-nia Aman. Ami mak rai-mean, no Ita mak ami-nia Badain Sanan-Rai; no ami hotu Ita-nia liman mak halo.” Badain sanan-rai sira halo rai-mean sai fali sanan ka buat naran deʼit hodi tuir ninia hakarak. Rai-mean la bele halo buat ida. Nuneʼe mós ho relasaun entre Maromak no ema. Hanesan rai-mean neʼebé iha badain nia liman, ita mós la iha direitu atu kontra hasoru Jeová nia hakarak.—Jeremias (Yeremia) 18:1-5; lee Jeremias 18:6.
4 Ba nasaun Israel iha tempu uluk, Jeová hatudu ninia kbiit nuʼudar “Badain Sanan-Rai”. Maibé iha buat neʼebé la hanesan ho Jeová no ema neʼebé serbisu nuʼudar badain sanan-rai. Oinsá? Badain sanan-rai sira halo rai-mean sai fali buat naran deʼit tuir sira-nia hakarak. Maibé, ba Jeová, nia fó liberdade ba ema atu halo desizaun rasik. Nia la obriga ema atu halo tuir nia. Loos duni, ema mak tenke foti desizaun atu simu ka la simu Jeová nia dixiplina.—Lee Jeremias (Yeremia) 18:7-10.
5 Se ema ruma ulun-toos no lakohi simu Jeová nia matadalan, oinsá mak Jeová sei uza ninia kbiit nuʼudar Badain Sanan-Rai? Hanoin toʼok, kuandu badain sanan-rai ida la kontente ho sanan neʼebé nia halo, nia halo saida? Karik nia halo fali seluk, ka soe deʼit! Baibain, kuandu nia halo sanan neʼebé la diʼak, ida-neʼe tanba ninia sala. Maibé, ita-nia Badain Sanan-Rai Jeová nunka halo sala. (Deuteronômio [Ulangan] 32:4) Kuandu ema ida la simu Jeová nia matadalan, ema neʼe mak sala. Jeová bele halo mudansa kona-ba saida mak nia halo ba ema, neʼe depende oinsá sira simu ka la simu Ninia matadalan. Ema neʼebé simu Jeová nia matadalan, Jeová bele uza sira iha dalan neʼebé diʼak. Porezemplu, ema kristaun kose-mina sira sai hanesan “sanan laran-luak nian”, neʼebé ikusmai Maromak bele uza nuʼudar “sanan ba buat kmanek”. Maibé, ema neʼebé la halo tuir Jeová sei sai hanesan “sanan laran-nakali nian atu sobu rahun hotu”.—Roma 9:19-23.
ISAIAS
47 Oh Babilónia nia oan-feto virjen,
Tun mai no tuur iha rai-rahun.
Oh ema Kaldeia nia oan-feto,
Tuur iha rai neʼebé la iha kadunan,
Tanba ema sei la bolu tan ó nuʼudar feto neʼebé ema estima.
2 Foti fatuk deʼut nian no halo uut trigu.
Hasai tiha hena neʼebé taka ó-nia ulun.
Kolu tiha ó-nia saia, hatudu sai ó-nia kelen.
Hakur mota sira.
3 Haʼu sei hatudu sai ó-nia isin-tanan.
Haʼu sei hatudu sai ó-nia moe.
Haʼu sei selu fali ba ó, no la iha ema atu hanetik haʼu.
4 “Ida neʼebé sosa fali ita
Mak Maromak Santu ba Izraél.
Ninia naran mak Jeová, ukun-naʼin ba tropa lalehan nian.”
5 Oh ema Kaldeia nia oan-feto,
Tuur nonook iha neʼebá no tama ba nakukun laran;
Ema sei la bolu tan ó nuʼudar Liurai-Feto ba ema nia ukun sira.
6 Haʼu sai hirus ba haʼu-nia povu.
Haʼu hamoe haʼu-nia liman-rohan,
No haʼu entrega sira ba ó-nia liman.
Maibé ó la hatudu laran-sadiʼa ba sira.
Ó mós haruka sira neʼebé idade boot atu lori naha todan.
7 Ó dehan: “Haʼu sei sai Liurai-Feto ba nafatin.”
Ó la tau atensaun ba buat sira-neʼe;
Ó la hanoin kona-ba buat sira-neʼe nia rohan.
8 Agora rona ida-neʼe bá, ó neʼebé hadomi ksolok,
Neʼebé tuur ho hakmatek, no neʼebé hanoin iha ó-nia laran:
“Haʼu deʼit mak kmanek liu, la iha ema ida hanesan haʼu.
Haʼu sei la sai feto-faluk ida.
Haʼu sei nunka lakon haʼu-nia oan.”
9 Maibé iha loron ida nia laran, buat rua tuirmai neʼe sei akontese ba ó derrepente deʼit:
Ó sei lakon ó-nia oan no ó sei sai feto-faluk.
Susar sira-neʼe hotu sei kona duni ó
Tanba ó halo hahalok matan-dook nian barak no ó-nia ai-moruk fekit neʼebé barak.
10 Ó hafolin ó-nia hahalok aat.
Ó dehan: “La iha ema ida haree haʼu.”
Ó-nia matenek no koñesimentu lori ó laʼo sala dalan,
No ó hanoin iha ó-nia laran: “Haʼu deʼit mak kmanek liu, la iha ema ida hanesan haʼu.”
11 Maibé susar sei kona ó,
No ó-nia biru hotu mós sei la hapara ó-nia susar.
Terus sei kona ó; no ó la bele hasees an husi terus.
Susar sei kona ó derrepente deʼit; susar neʼebé ó seidauk hatene.
12 Entaun, uza ó-nia ai-moruk fekit nian bá no halo ó-nia hahalok matan-dook nian bá,
Neʼebé ó halo ona husi ó-nia tempu joven kedas.
Karik ó bele hetan buat diʼak husi ida-neʼe;
Karik ó bele halo ema hakfodak.
13 Ó sai kole ona hodi buka konsellu-naʼin barak.
Husik sira hamriik no salva ó,
Sira neʼebé adora lalehan, neʼebé hateke ba fitun sira,
Sira neʼebé fó sai matenek kona-ba fulan-foun sira
Kona-ba buat neʼebé atu akontese ba ó.
14 Haree bá! Sira mak hanesan duʼut-maran.
Ahi sei han sira.
Sira la bele salva sira-nia an husi ahi nia kbiit.
Neʼe laʼós ahi-klaak neʼebé ema uza atu halo manas sira-nia an,
No neʼe laʼós ahi neʼebé ema bele tuur besik hodi haneruk an.
15 Ó-nia ema matan-dook sira mós sei sai hanesan neʼe,
Katak sira neʼebé ó serbisu hamutuk husi ó-nia tempu joven.
Sira sei laʼo-lemo, sira ida-idak sei laʼo iha ninia dalan rasik.
No la iha ema ida atu salva ó.
48 Rona bá, oh umakain Jacob,
Imi neʼebé bolu imi-nia an hodi Izraél nia naran
No imi Judá nia bei-oan sira,
Imi neʼebé jura hodi Jeová nia naran
No neʼebé harohan ba Izraél nia Maromak,
Maski imi halo nuneʼe laʼós ho lia-loos no hahalok loos.
2 Tanba sira dehan katak sira hela iha sidade santu
No buka apoiu husi Izraél nia Maromak,
Neʼebé naran Jeová, ukun-naʼin ba tropa lalehan nian.
3 “Horiuluk kedas haʼu fó-hatene nanis kona-ba buat uluk nian.
Liafuan sira-neʼe sai husi haʼu-nia ibun rasik,
Haʼu mak fó sai buat sira-neʼe.
Haʼu kumpre buat sira-neʼe derrepente deʼit, no sira sai loos duni.
4 Tanba haʼu hatene katak imi ulun-toos tebes,
Imi-nia kakorok uat mak besi no imi-nia reen-toos mak riti,
5Horiuluk kedas haʼu fó sai ona buat neʼebé atu akontese.
Antes neʼe akontese, haʼu fó-hatene ona ba imi,
Atu nuneʼe imi la bele dehan: ‘Ami-nia estátua mak halo ida-neʼe;
Ami-nia estátua neʼebé bahat ona no estátua husi besi mak fó mandamentu neʼe.’
6 Imi rona no haree ona buat hotu neʼe.
Entaun, imi sei la fó sai neʼe ba ema seluk ka?
Husi agora ba oin haʼu fó sai buat foun ba imi,
Haʼu sei fó sai segredu sira neʼebé imi la hatene.
7 Haʼu foin kria buat sira-neʼe, laʼós husi tempu uluk kedas,
Buat neʼebé imi foin rona iha loron neʼe,
Atu nuneʼe imi la bele dehan: ‘Haree bá! Ami hatene ona buat sira-neʼe.’
8 Lae, imi seidauk rona, imi seidauk hatene,
No iha tempu uluk imi-nia tilun seidauk nakloke.
Tanba haʼu hatene katak imi laran-makerek tebes,
No imi sai ona ema sala-naʼin husi imi-nia inan nia kabun kedas.
9 Maibé tanba haʼu-nia naran mak haʼu sei tahan haʼu-nia hirus;
Tanba haʼu-nia glória mak haʼu sei kontrola an,
No haʼu sei la halakon imi.
10 Haree bá! Haʼu hamoos ona imi, maibé laʼós hanesan osan-mutin.
Haʼu husik imi hetan terus atu hamoos imi, hanesan hamoos besi iha fornu.
11 Tanba haʼu-nia naran rasik mak haʼu sei halo ida-neʼe,
No haʼu sei la husik buat ida hamoe haʼu.
Haʼu sei la fó haʼu-nia glória ba buat seluk.
12 Rona ba haʼu, oh Jacob, no Izraél, neʼebé haʼu hili ona.
Haʼu hanesan deʼit. Haʼu mak primeiru no haʼu mak ikus.
13 Ho haʼu-nia liman rasik mak haʼu tau rai nia hun,
No ho haʼu-nia liman-loos mak haʼu nahe lalehan.
Bainhira haʼu bolu sira, sira hamriik hamutuk.
14 Imi hotu halibur hamutuk bá no rona.
Iha sira-nia leet, sé mak fó sai buat sira-neʼe?
Maromak Jeová hadomi ona ema ida.
Ema neʼe sei kumpre Maromak nia hakarak hasoru Babilónia,
No ninia liman sei kontra hasoru ema Kaldeia.
15 Haʼu rasik koʼalia ona, no haʼu bolu ona nia.
Haʼu lori nia, no nia sei hetan susesu iha ninia dalan sira.
16 Hakbesik mai haʼu, no rona ida-neʼe.
Horiuluk kedas haʼu la koʼalia subasubar.
Iha tempu neʼebé liafuan sira-neʼe sai loos, haʼu iha neʼebá.”
Agora Jeová, Naʼi Ukun-Naʼin Boot Liu, haruka ona haʼu mai, no nia tau ninia espíritu ba haʼu.
17 Jeová, Ida neʼebé Sosa fali imi, Maromak neʼebé Santu ba Izraél, dehan nuneʼe:
“Haʼu, Jeová, mak imi-nia Maromak,
Haʼu hanorin imi kona-ba buat neʼebé diʼak liu ba imi,
No dirije imi iha dalan neʼebé imi tenke laʼo bá.
18 Haʼu hakarak atu imi rona ba haʼu-nia mandamentu sira!
Se imi halo nuneʼe, imi-nia dame sei sai hanesan mota ida
No imi-nia hahalok loos sei sai hanesan tasi nia laloran.
19 Imi-nia oan no bei-oan
Sei sai barak hanesan rai-henek.
Sira-nia naran sei nunka lakon husi haʼu-nia oin.”
20 Sai husi Babilónia!
Halai husi ema Kaldeia nia leet!
Fó sai kona-ba neʼe ho haklalak ksolok nian! Haklaken bá!
Fó-hatene ba ema hotu toʼo rai nia rohan.
Fó sai liafuan tuirmai neʼe: “Jeová sosa fali ona ninia atan Jacob.
21 Sira la sai hamrook bainhira nia lori sira liuhusi rai-maran.
Nia halo bee suli sai husi fatuk-boot atu sira bele hemu;
Nia fera fatuk no halo bee suli sai.”
22 Jeová dehan: “La iha dame ba ema aat sira.”
49 Oh imi illa sira, rona ba haʼu,
Oh imi nasaun sira neʼebé dook, rona didiʼak bá.
Jeová bolu ona haʼu antes haʼu moris.
Nia temi ona haʼu-nia naran bainhira haʼu sei iha haʼu-nia inan nia knotak.
2 Nia halo haʼu-nia nanál sai hanesan surik neʼebé kroʼat;
Nia proteje haʼu ho ninia liman.
Nia halo haʼu sai hanesan rama-oan neʼebé kroʼat.
Nia subar haʼu iha ninia rama fatin.
3 Nia dehan ba haʼu: “Oh Izraél, ó mak haʼu-nia atan,
Haʼu sei hatudu haʼu-nia kmanek liuhusi ó.”
4 Maibé haʼu dehan: “Haʼu serbisu saugati deʼit.
Haʼu uza hotu haʼu-nia forsa ba buat neʼebé la iha folin.
Maibé Jeová mak sei tesi lia ba haʼu,
No haʼu-nia Maromak mak sei fó kolen ba haʼu.”
5 Agora Jeová, Maromak neʼebé kria haʼu nuʼudar ninia atan bainhira haʼu sei iha knotak laran,
Nia haruka ona haʼu atu lori Jacob fila fali ba nia,
Atu nuneʼe Izraél bele halibur an fali ba nia.
Haʼu sei hetan glória iha Jeová nia oin,
No haʼu-nia Maromak sei sai haʼu-nia forsa.
6 No nia dehan: “Haʼu hili ona ó nuʼudar haʼu-nia atan Hodi harii fali Jacob nia suku sira
No lori fali Izraél nia ema restu neʼebé moris hela.
Liután neʼe, haʼu mós halo ó nuʼudar naroman ba nasaun sira,
Atu nuneʼe haʼu-nia salvasaun bele toʼo rai nia rohan hotu.”
7 Jeová, Maromak neʼebé Sosa Fali Izraél, Izraél nia Maromak neʼebé Santu, hatete ba ida neʼebé ema hakribi, ba ida neʼebé nasaun neʼe odi, ba ukun-naʼin sira-nia atan, hodi dehan:
“Liurai sira sei haree no hamriik,
No ulun-naʼin sira sei hakruʼuk an
Tanba sira hatudu respeitu ba Jeová, Maromak neʼebé laran-metin,
Maromak neʼebé Santu ba Izraél neʼebé hili ona ó.”
8 Jeová dehan nuneʼe:
“Haʼu sei hatán ba ó iha tempu neʼebé haʼu hatudu laran-diʼak,
No iha loron salvasaun nian haʼu sei ajuda ó;
Haʼu sei kontinua proteje ó atu halo ó nuʼudar aliansa ida ba povu neʼe,
Atu hadiʼa fali rai neʼe,
Atu halo sira hela fali iha sira-nia liman-rohan neʼebé uluk mamuk ona,
9 Hodi hatete ba ema dadur sira: ‘Sai mai!’
No hatete ba sira neʼebé iha nakukun laran: ‘Hatudu sai imi-nia an!’
Sira sei sai hanesan bibi neʼebé han besik dalan,
Sira sei han duʼut besik dalan hotu.
10 Sira sei la sai hamlaha, no la sai hamrook,
Rai-manas ka loron manas mós la kona sira.
Tanba Maromak sei hatudu laran-sadiʼa ba sira, nia sei dirije sira,
No lori sira besik bee-matan.
11 Haʼu sei halo haʼu-nia foho sira sai fali dalan,
No haʼu sei halo aas haʼu-nia dalan boot sira.
12 Haree bá! Sira sei mai husi fatin dook,
No haree bá! Sira mai husi parte norte no parte oeste,
No sira mai husi rai-Sinim.”
13 Oh lalehan, haklalak ho haksolok, oh rai, haksolok bá.
Husik foho sira sai kontente ho haklalak ksolok nian.
Tanba Jeová fó kmaan ona ba ninia povu,
No nia hatudu laran-sadiʼa ba ninia ema sira neʼebé hetan terus.
14 Maibé Siaun kontinua dehan:
“Jeová husik ona haʼu, no Jeová haluha ona haʼu.”
15 Inan ida bele haluha ninia oan neʼebé susu hela ka lae?
Inan ida sei la hatudu laran-sadiʼa ba ninia oan rasik ka lae?
Maski sira haluha, maibé haʼu sei nunka haluha ó.
16 Haree bá! Haʼu bahat ona ó-nia naran iha haʼu-nia liman laran.
Ó-nia moru sira sempre iha haʼu-nia oin.
17 Ó-nia oan-mane sira sei fila fali mai ho ansi.
Sira neʼebé harahun ó no halo aat ba ó sei husik ó.
18 Foti matan no hateke haleʼu bá.
Sira hotu halibur hamutuk ona.
Sira mai daudaun ba ó.
Jeová dehan: “Haʼu jura hodi haʼu-nia moris rasik,
Ó sei hafurak ó-nia an ho sira hotu hanesan buat murak,
No ó sei kesi sira ba ó-nia an hanesan noiva hafurak an.
19 Maski ó-nia fatin sira rahun no mamuk ona no ó-nia rai estraga ona,
Maibé agora ó-nia rai sei sai kloot liu ba sira neʼebé hela iha neʼebá,
No sira neʼebé tolan ó sei hela dook loos.
20 Ó-nia oan-mane sira neʼebé moris mai bainhira ó triste tanba lakon ó-nia oan sira seluk, ó sei rona oan-mane sira-neʼe koʼalia, hodi dehan:
‘Fatin neʼe kloot liu ba ami.
Halo luan tan atu ami bele hela iha neʼe.’
21 No ó sei hanoin iha ó-nia laran,
‘Sé mak sai aman ba oan sira-neʼe?
Tanba haʼu mak feto neʼebé lakon haʼu-nia oan no la bele iha oan,
Haʼu sai nuʼudar dadur no ema lori ona haʼu ba komarka.
Sé mak haboot oan sira-neʼe?
Haree bá! Ema husik haʼu mesak deʼit,
Entaun oan sira-neʼe mai husi neʼebé?
22 Jeová, Naʼi Ukun-Naʼin Boot Liu, dehan nuneʼe:
“Haree bá! Haʼu sei foti haʼu-nia liman ba nasaun sira,
No haʼu sei foti saʼe haʼu-nia sinál ba povu sira.
Sira sei lori fali ó-nia oan-mane sira iha sira-nia liman
No lori ó-nia oan-feto sira iha sira-nia kabaas.
23 Liurai sira sei tau matan ba ó,
No liurai nia oan-feto sira sei sai ó-nia atan-feto.
Sira sei hakneʼak ba ó ho oin ba rai
No lambe rai-rahun husi ó-nia ain,
Nuneʼe ó sei hatene duni katak haʼu mak Jeová;
Ema hotu neʼebé tau fiar ba haʼu sei la sai moe.”
24 Ema sira neʼebé mane asuwaʼin kaer ona bele sai livre fali ka lae?
Ema sira neʼebé ukun-naʼin aat kaer ona bele hetan salvasaun ka lae?
25 Maibé Jeová dehan nuneʼe:
“Maski asuwaʼin ida mak kaer ona sira, maibé sira sei sai livre,
Maski ukun-naʼin aat mak kaer sira, maibé sira sei hetan salvasaun.
Haʼu sei kontra sira neʼebé kontra ó,
No haʼu sei salva ó-nia oan sira.
26 Haʼu sei halo sira neʼebé hanehan ó atu han sira-nia isin rasik,
No sira sei hemu sira-nia raan rasik toʼo lanu, hanesan hemu tua-uvas midar.
Nuneʼe povu hotu sei hatene duni katak haʼu mak Jeová,
Haʼu mak ó-nia Salvadór no Maromak neʼebé Sosa Fali ó,
Jacob nia Maromak neʼebé Kbiit Boot.”
50 Jeová dehan nuneʼe:
“Haʼu la fó surat soe-malu nian ba imi-nia inan bainhira haʼu haruka nia bá. Haʼu faʼan imi laʼós tanba haʼu debe osan.
Haree bá! Haʼu faʼan imi tanba imi-nia sala rasik,
No haʼu haruka imi-nia inan sai tanba imi-nia sala rasik.
2 Entaun, tansá mak la iha ema ida bainhira haʼu mai?
Tansá mak ema ida la hatán bainhira haʼu bolu?
Haʼu-nia liman badak liu atu sosa fali imi ka?
Haʼu la iha kbiit atu salva imi ka?
Haree bá! Haʼu hamaran tasi ho haʼu-nia liafuan;
Haʼu halo mota sira sai fali rai-maran.
Ikan sira sai dodok tanba la iha bee,
No sira mate tanba hamrook.
3 Haʼu taka lalehan ho nakukun,
No haʼu halo lalehan hatais hena karón.”
4 Jeová, Naʼi Ukun-Naʼin Boot Liu, hanorin haʼu oinsá atu koʼalia,
Atu nuneʼe haʼu bele hatene oinsá atu hatán ho liafuan neʼebé loos ba ema neʼebé kole.
Nia fanu haʼu dadeer-dadeer;
Nia fanu haʼu no hanorin haʼu atu rona.
5 Jeová, Naʼi Ukun-Naʼin Boot Liu, loke ona haʼu-nia tilun.
No haʼu la kontra nia.
Haʼu la fila kotuk ba nia.
6 Haʼu see haʼu-nia kotuk ba sira neʼebé baku haʼu
No see haʼu-nia hasan ba sira neʼebé fokit sai haʼu-nia hasan-rahun.
Haʼu la subar haʼu-nia oin bainhira ema tafui ba haʼu no koʼalia atu hamoe haʼu.
7 Maibé Jeová, Naʼi Ukun-Naʼin Boot Liu, sei ajuda haʼu.
Tan neʼe mak haʼu sei la sente moe.
Tan neʼe mak haʼu sei hametin haʼu-nia an hanesan fatuk,
No haʼu hatene katak haʼu sei la sai moe.
8 Maromak fó sai katak haʼu iha hahalok loos no nia besik haʼu.
Sé mak bele duun haʼu?
Mai ita hamriik hodi kontra malu.
Sé mak iha kazu hasoru haʼu?
Husik nia hakbesik haʼu.
9 Haree bá! Jeová, Naʼi Ukun-Naʼin Boot Liu, sei ajuda haʼu.
Sé mak bele tesi lia katak haʼu sala?
Haree bá! Sira hotu sei sai hanesan hena neʼebé tuan ona.
Ular kiʼik sei han tiha sira.
10 Iha imi-nia leet, sé mak taʼuk ba Jeová
No rona ba ninia atan nia liafuan?
Sé mak laʼo ona iha nakukun laran no la haree naroman?
Husik nia tau fiar ba Jeová nia naran no sadere ba ninia Maromak.
11 “Haree bá! Imi hotu neʼebé halo lakan ahi
No halo ahi-funan semo,
Laʼo bá iha ahi neʼe nia naroman,
Laʼo iha ahi-funan nia leet neʼebé imi halo lakan ona.
Imi sei simu kastigu neʼe husi haʼu-nia liman:
Imi sei latan ho moras makaʼas.
51 “Imi sira neʼebé buka hahalok loos,
Imi neʼebé buka Jeová, rona ba haʼu.
Hateke ba fatuk neʼebé Maromak tesi sai imi
No ba kuak neʼebé Maromak keʼe sai imi.
2 Haree ba imi-nia aman Abraão
No haree ba Sara neʼebé tuur ahi ba imi.
Tanba bainhira haʼu bolu Abraão, nia mesak deʼit,
No haʼu haraik bensaun ba nia no halo nia sai barak.
3 Tanba Jeová sei fó kmaan ba Siaun.
Nia sei lori kmaan ba Siaun nia fatin sira neʼebé rahun ona,
No nia sei halo Siaun nia rai-fuik sira sai hanesan Eden
No ninia rai-maran sira sai hanesan Jeová nia jardín.
Siaun sei nakonu ho kontente no haksolok,
Nakonu ho liafuan agradese nian no knananuk.
4 Oh haʼu-nia povu, rona ba haʼu,
Oh haʼu-nia nasaun, see tilun ba haʼu.
Tanba ukun-fuan ida sei sai husi haʼu,
No haʼu sei halo haʼu-nia justisa sai nuʼudar naroman ba povu sira.
5 Haʼu-nia hahalok loos hakbesik daudaun.
Haʼu-nia salvasaun sei toʼo ba imi,
No haʼu-nia liman sei tesi lia ba povu sira.
Illa sira sei tau esperansa ba haʼu,
No sira sei hein ba haʼu-nia liman.
6 Foti matan hateke ba lalehan,
No mós hateke ba rai,
Tanba lalehan sei lakon hanesan suar;
Rai sei sai tuan hanesan hena,
No ema sira iha rai sei mate hanesan susuk.
Maibé haʼu-nia salvasaun sei hela ba nafatin,
No haʼu-nia hahalok loos sei nunka lakon.
7 Imi neʼebé hatene hahalok loos,
Imi neʼebé rai haʼu-nia ukun-fuan iha imi-nia laran, rona ba haʼu.
Keta taʼuk ba ema neʼebé koʼalia aat imi,
Keta nakdedar tanba sira-nia liafuan neʼebé hatún imi.
8 Tanba ular kiʼik sei han tiha sira hanesan han roupa;
No ular kiʼik sei tolan sira hanesan tolan kabas husi bibi-malae fulun.
Maibé haʼu-nia hahalok loos sei hela ba nafatin,
No haʼu-nia salvasaun sei hela ba jerasaun hotu.”
9 Oh Jeová!
Hadeer! Hadeer bá! Tau kbiit nuʼudar Ita-nia roupa.
Hadeer bá hanesan tempu uluk nian, hanesan iha jerasaun uluk nian.
Ita mak harahun tiha Rahab ba pedasuk, loos ka lae?
Ita mak sona borus animál boot iha tasi, loos ka lae?
10 Ita mak hamaran tasi neʼebé kleʼan, loos ka lae?
Ita mak halo tasi kleʼan sai nuʼudar dalan atu ema sira neʼebé Ita sosa fali ona bele laʼo liu, loos ka lae?
11 Ema sira neʼebé Jeová salva ona sei fila fali.
Sira sei mai iha Siaun ho haklalak ksolok nian,
No haksolok ba nafatin mak sei sai sira-nia koroa.
Sira sei hetan kontente no ksolok,
Triste no halerik sei dook husi sira.
12 “Haʼu mak Ida neʼebé fó kmaan ba imi.
Tansá mak ó sai taʼuk ba ema neʼebé sei mate?
Tansá mak ó sai taʼuk ba ema nia oan-mane neʼebé sei namlaek hanesan duʼut matak?
13 Tanbasá mak ó haluha Jeová, ó-nia Kriadór,
Ida neʼebé nahe lalehan hanesan hena no tau rai nia hun?
No loron tomak ó kontinua taʼuk ba hirus husi ema neʼebé hanehan ó,
Hanesan sira iha kbiit atu halakon ó.
Agora, ema sira-neʼe nia hirus iha neʼebé?
14 Lakleur tan ema dadur neʼebé sai bonko no kesi ho korrente sei sai livre;
Nia sei la mate no la tama ba rai-kuak,
No nia sei la falta ai-han.
15 Maibé haʼu mak Jeová, ó-nia Maromak,
Ida neʼebé dulas tasi no halo ninia laloran sira sai boot
Haʼu-nia naran mak Jeová, ukun-naʼin ba tropa lalehan nian.
16 Haʼu sei tau haʼu-nia liafuan ba ó-nia ibun,
No haʼu sei proteje ó ho haʼu-nia liman,
Atu harii lalehan no tau rai nia hun
No atu dehan ba Siaun: ‘Ó mak haʼu-nia povu.’
17 Oh Jeruzalein, hadeer! Hadeer bá! Hamriik bá,
Ó hemu ona husi kopu hirus nian iha Jeová nia liman.
Ó hemu ona husi kopu neʼe;
Ó halo mamuk ona kopu neʼebé halo ó sidi.
18 Ó-nia oan-mane sira neʼebé nia fó moris, la iha ida mak iha neʼebá atu dirije nia,
Husi ninia oan-mane hotu neʼebé nia haboot, la iha ida mak kaer metin ninia liman.
19 Buat rua neʼe sei kona ó.
Ema sei sobu ó no harahun ó. Hamlaha no surik sei haterus ó!
Sé mak hanoin ó?
Sé mak sei fó kmaan ba ó?
20 Ó-nia oan-mane sira sei dezmaia.
Sira sei latan iha dalan sikun hotu
Hanesan bibi fuik iha rede laran.
Jeová, ó-nia Maromak, nia hirus no kastigu fakar hotu ona ba sira.”
21 Entaun favór ida, rona ba ida-neʼe,
Oh feto neʼebé hetan susar no lanu, maski laʼós ho tua-uvas.
22 Ó-nia Naʼi Jeová, ó-nia Maromak neʼebé defende ninia povu dehan nuneʼe:
“Haree bá! Haʼu sei foti tiha husi ó-nia liman kopu neʼebé halo ó sidi,
Katak haʼu-nia kopu hirus nian;
Ó sei la hemu tan husi kopu neʼe.
23 Haʼu sei entrega kopu neʼe ba ema neʼebé hanehan ó,
Sira neʼebé uluk dehan ba ó: ‘Hakruʼuk bá atu nuneʼe ami bele laʼo iha ó-nia leten!’
Ó see ó-nia kotuk hanesan rai,
Hanesan dalan ba sira atu laʼo iha leten.”
52 Oh Siaun, hadeer! Hadeer bá! Tau kbiit nuʼudar ó-nia roupa!
Oh sidade santu Jeruzalein, hatais ó-nia roupa neʼebé furak liu!
Tanba ema neʼebé la hetan sirkunsizaun no la moos sei la tama fali ba ó.
2 Oh Jeruzalein, hamriik husi rai, liki sai tiha rai-rahun, no tuur iha fatin aas.
Oh Siaun nia oan-feto neʼebé nuʼudar dadur, kore korrente neʼebé iha ó-nia kakorok.
3 Tanba Jeová dehan nuneʼe:
“Haʼu la simu osan ida bainhira haʼu faʼan imi,
No haʼu sei sosa fali imi la ho osan.”
4 Tanba Jeová, Naʼi Ukun-Naʼin Boot Liu, dehan nuneʼe:
“Uluk haʼu-nia povu tun ba rai-Ejitu hodi hela iha neʼebá nuʼudar ema estranjeiru;
Tuirmai ema Asíria hanehan sira la ho razaun.”
5 Jeová dehan: “Entaun, haʼu tenke halo saida kona-ba neʼe?”
Jeová hatete: “Tanba sira foti haʼu-nia povu hodi la selu buat ida.
Sira neʼebé ukun haʼu-nia povu kontinua hakilar ho lian manán nian,
No loron tomak, sira kontinua la hatudu respeitu ba haʼu-nia naran.
6 Tan razaun neʼe mak haʼu-nia povu sei hatene haʼu-nia naran;
Tan razaun neʼe mak sira sei hatene iha loron neʼebá katak haʼu mak koʼalia ba sira.
Haree bá! Neʼe mak haʼu!”
7 Ema neʼebé lori liafuan diʼak iha foho leten, ninia ain mak furak duni,
Nia haklaken kona-ba dame,
Nia lori liafuan diʼak kona-ba buat neʼebé diʼak liu,
Nia haklaken kona-ba salvasaun,
Nia dehan ba Siaun: “Ó-nia Maromak sai ona Liurai!”
8 Rona bá! Ó-nia guarda sira hasai lian.
Ho lian ida deʼit sira haklalak ho ksolok,
Tanba sira sei haree ho momoos bainhira Jeová halibur fali Siaun.
9 Oh Jeruzalein nia fatin sira neʼebé rahun ona, sai kontente bá, no ho lian ida deʼit haklalak bá ho ksolok,
Tanba Jeová fó kmaan ona ba ninia povu; nia sosa fali ona Jeruzalein.
10 Jeová hatudu sai ona ninia liman neʼebé santu iha nasaun hotu nia oin;
Ema hotu iha mundu tomak sei haree oinsá ita-nia Maromak salva ita.
11 Imi neʼebé lori sasán sira husi Jeová nia uma,
Hasees an, hasees an bá, sai husi Babilónia, keta kona buat ida neʼebé la moos!
Sai husi sidade neʼe, halo imi-nia an moos nafatin.
12 Tanba imi sei laʼo sai la ho taʼuk,
No imi la presiza halai,
Tanba Jeová sei laʼo iha imi-nia oin,
No Maromak Izraél nian sei proteje imi iha kotuk.
13 Haree bá! Haʼu-nia atan sei hatudu hahalok matenek.
Haʼu sei foti aas nia,
Sin, haʼu sei foti aas nia no nia sei hetan respeitu boot.
14 Hanesan ema barak hateke ba nia ho hakfodak,
Tanba ema haree ninia oin aat liu fali ema sira seluk
No ninia kmanek boot mós sai aat liu fali ema seluk nian,
15 Nuneʼe mós nia sei halo nasaun barak hakfodak.
Liurai sira sei taka ibun iha ninia oin,
Tanba sira sei haree buat neʼebé ema seidauk fó sai ba sira
No sira sei hanoin didiʼak kona-ba buat neʼebé sira seidauk rona.
53 Sé mak tau fiar ba buat neʼebé ami fó sai?
No kona-ba Jeová nia liman, nia hatudu sai ona ba sé?
2 Nia sei moris hanesan ai-sanak lotuk iha ninia oin, hanesan ai-abut neʼebé moris iha rai-maran.
Nia la mai ho kmanek boot, no la iha glória;
No bainhira ami haree nia, ami lakohi atu hakbesik ba nia.
3 Ema hakribi nia no hasees an husi nia,
Nia mak mane neʼebé sei hatene kona-ba moras no komprende moras oioin.
Neʼe hanesan ninia oin subar husi ami.
Ema hakribi nia, no ami haree nia nuʼudar ema neʼebé la iha folin.
4 Tuir loloos nia rasik lori ami-nia moras,
No nia lori ami-nia terus no moras oioin.
Maibé ami haree nia hanesan ema neʼebé hetan moras, susar, no kastigu husi Maromak.
5 Ema sona borus nia tanba ami-nia hahalok aat;
Nia hetan terus boot tanba ami-nia sala sira.
Nia simu kastigu atu ami bele hetan dame,
No tanba ninia kanek sira mak ami hetan kura.
6 Ami hotu laʼo-lemo hanesan bibi-malae,
Ema ida-idak fila ba ninia dalan rasik,
No Jeová mak tau ami hotu nia sala iha mane neʼe nia leten.
7 Ema hanehan nia no nia husik ema haterus nia,
Maibé nia lakohi loke nia ibun.
Ema lori nia hanesan lori bibi-malae atu ba oho,
Hanesan bibi-malae neʼebé nonook bainhira ema atu koir nia fulun, Nia lakohi loke nia ibun.
8 Tanba ema tesi-lia neʼebé la loos ba nia no halakon nia moris;
Sé mak sei hanoin didiʼak kona-ba ninia jerasaun?
Tanba ema oho nia husi ema moris nia leet;
Tanba haʼu-nia povu sira-nia sala mak nia hetan baku.
9 Maski nia la halo sala ida
No la iha lia-bosok ida husi nia ibun,
Maibé bainhira nia mate, ema hakoi nia hamutuk ho ema aat sira,
No hamutuk ho ema riku sira.
10 Maibé Jeová mak hakarak atu nia hetan terus boot, no husik nia atu hetan moras.
Oh Maromak, se Ita entrega mane neʼe nia moris nuʼudar sakrifísiu sala nian,
Nia sei haree ninia bei-oan sira, no nia sei hanaruk ninia moris,
No liuhusi nia mak Jeová nia hakarak sei hetan susesu.
11 Tanba ninia neon-susar, nia sei haree no sai kontente.
Liuhusi ninia koñesimentu mak haʼu-nia atan neʼebé laran-loos,
Sei ajuda ema barak atu sai ema loos,
No nia sei lori sira-nia sala.
12 Tanba razaun neʼe mak haʼu sei fó nia parte ida hamutuk ho ema barak,
No nia sei fahe sasán neʼebé hadau husi inimigu ba asuwaʼin sira,
Tanba nia fó nia moris toʼo mate
No ema haree nia hanesan deʼit ho ema sala-naʼin sira;
Nia lori ema barak nia sala,
No nia ajuda ema sala-naʼin sira.
54 Jeová dehan: “Oh feto neʼebé la bele iha oan, haklalak bá ho haksolok!
Oh feto neʼebé nunka sente moras tuur-ahi nian, sai kontente bá no haklalak ho haksolok!
Tanba oan husi feto neʼebé nia laʼen soe hela sei sai barak
Liu fali oan husi feto neʼebé sei iha laʼen.
2 Halo luan tan ó-nia tenda.
Halo boot liután hena tenda nian iha ó-nia tenda kmanek.
Keta dada an, halo naruk tali sira
No halo metin pregu sira iha ó-nia tenda.
3 Tanba ó-nia fronteira sei halo luan tan ba sorin loos no sorin karuk.
Ó-nia oan sira sei foti nasaun sira nuʼudar sira-nian,
No sira sei hela iha sidade sira neʼebé mamuk ona.
4 Keta taʼuk, tanba buat neʼebé ó hein sei sai loos;
No keta sente moe, tanba ó-nia esperansa sei sai loos.
Tanba ó sei haluha ó-nia moe husi ó-nia tempu joven,
No ó sei la hanoin-hetan tan ó-nia moe husi tempu neʼebé ó sai feto-faluk.”
5 “Tanba ó-nia Kriadór Boot mak nuʼudar ó-nia laʼen,
Ninia naran mak Jeová, ukun-naʼin ba tropa lalehan nian,
No Maromak neʼebé Santu ba Izraél mak Sosa Fali ó.
Nia mak Maromak ba rai tomak.
6 Tanba Jeová bolu ona ó, uluk ó sai hanesan feen neʼebé ninia laʼen husik hela no sai triste tebes,
Hanesan feto neʼebé kaben iha nia tempu joven, maibé ikusmai ninia laʼen nega tiha”, neʼe mak ó-nia Maromak nia liafuan.
7 “Tanba haʼu husik ó ba tempu uitoan,
Maibé tanba haʼu-nia laran-sadiʼa neʼebé boot haʼu sei halibur fali ó.
8 Tanba haʼu-nia hirus makaʼas mak haʼu subar haʼu-nia oin husi ó ba tempu uitoan,
Maibé tanba haʼu-nia domin ho laran-metin neʼebé iha ba nafatin mak haʼu hatudu laran-sadiʼa ba ó”, neʼe mak liafuan husi Jeová, Ida neʼebé Sosa Fali ó.
9 “Ba haʼu, neʼe hanesan Noé nia tempu.
Hanesan haʼu jura ona iha Noé nia tempu katak bee sei la taka tan rai tomak,
Nuneʼe haʼu mós jura katak haʼu sei la sai hirus tan ba ó ka kastigu ó.
10 Maski foho sira bele hasai tiha
No foho-oan sira bele nakdoko,
Maibé haʼu sei la hasai haʼu-nia domin neʼebé laran-metin husi ó,
No haʼu-nia aliansa dame nian sei la nakdoko”, neʼe mak liafuan husi Jeová, Ida neʼebé hatudu laran-sadiʼa ba ó.
11 “Oh feto neʼebé hetan terus, neʼebé hasoru anin-boot, no la hetan kmaan,
Haʼu hada daudaun ó-nia fatuk sira ho simente
No tau ó-nia uma hun ho fatuk-safira.
12 Haʼu sei halo ó-nia moru leten hodi uza fatuk-rubi,
No halo ó-nia portaun hodi tau fatuk neʼebé nabilan,
No haʼu sei tau marka ba ó-nia baliza ho fatuk-murak oioin.
13 No Jeová sei hanorin ó-nia oan sira hotu,
No ó-nia oan sira-nia dame sei sai barak loos.
14 Haʼu sei harii metin ó ho hahalok loos.
No ó sei hela dook tebes husi ema neʼebé hanehan ó,
Ó sei la taʼuk buat ida no la iha buat ida mak bele halo ó nakdedar,
Tanba buat sira-neʼe sei la besik ba ó.
15 Se ema ruma mai ataka ó,
Neʼe laʼós tanba haʼu mak haruka.
Ó sei manán ema naran deʼit neʼebé ataka ó.”
16 “Haree bá! Haʼu rasik mak kria badain
Neʼebé huu ahi-klaak,
No ninia serbisu mak atu halo armas funu nian.
No mós haʼu rasik mak kria mane sira neʼebé oho ema seluk.
17 Armas naran deʼit neʼebé ema halo hodi kontra ó sei la hetan susesu,
No ema hotu nia nanál neʼebé koʼalia kontra ó hodi tesi lia bá ó, ó sei tesi lia fali ba sira.
Neʼe mak Jeová nia atan sira-nia liman-rohan,
No haʼu haree sira nuʼudar ema loos”, Jeová dehan.
55 Mai, imi hotu neʼebé hamrook, mai hemu bee!
Imi neʼebé la iha osan, mai, foti ai-han no han!
Sin, mai, sosa tua-uvas no susubeen la ho osan no la ho folin ida.
2 Tansá mak imi kontinua selu osan ba buat neʼebé laʼós ai-han,
No tansá mak imi gasta osan husi imi-nia kolen hodi sosa buat neʼebé la halo imi bosu?
Rona didiʼak ba haʼu, no han buat neʼebé diʼak,
No imi sei hetan ksolok boot tanba han ai-han neʼebé diʼak liu.
3 See tilun bá no mai besik haʼu.
Rona bá, no imi sei kontinua moris,
No haʼu sei halo duni aliansa rohan-laek nian ho imi.
Ho ida-neʼe haʼu hatudu domin ho laran-metin ba imi hanesan haʼu halo ona ba David, tuir haʼu-nia promesa ba David.
4 Haree bá! Haʼu foti nia nuʼudar sasin ba nasaun sira,
Nuʼudar ulun-naʼin no ukun-naʼin ba nasaun sira.
5 Haree bá! Ó sei bolu nasaun ida neʼebé ó la hatene,
No nasaun sira neʼebé ó la koñese sei halai ba ó
Tanba Jeová, ó-nia Maromak, Ida neʼebé Santu ba Izraél,
Sei fó glória ba ó.
6 Buka Jeová bainhira imi sei bele hetan nia.
Bolu nia tanba agora nia sei besik imi.
7 Ema aat sira tenke husik sira-nia dalan
No ema laran-aat tenke husik ninia hanoin aat sira;
Husik nia fila fali ba Jeová, neʼebé sei hatudu laran-sadiʼa ba nia,
Fila fali ba ita-nia Maromak, tanba Maromak sei fó perdua ho laran-luak.
8 Jeová dehan: “Tanba imi-nia hanoin la hanesan haʼu-nia hanoin,
No imi-nia dalan sira la hanesan haʼu-nia dalan sira.
9 Hanesan lalehan aas liu fali rai,
Nuneʼe mós haʼu-nia dalan sira aas liu fali imi-nia dalan sira
No haʼu-nia hanoin aas liu fali imi-nia hanoin.
10 Hanesan udan no jelu-rahun tun husi lalehan
No la fila fali ba ninia fatin, maibé tenke habokon rai hodi halo ai-horis sira moris no fó fuan,
Hodi fó fini ba ema neʼebé kari fini no ai-han ba ema neʼebé han,
11 Nuneʼe mós ho liafuan neʼebé sai husi haʼu-nia ibun.
Haʼu-nia liafuan sei la fila fali ba haʼu se neʼe seidauk fó rezultadu ida,
Maibé haʼu-nia liafuan sei sai loos duni tuir haʼu-nia hakarak,
No buat neʼebé haʼu halo sei hetan susesu duni tuir haʼu-nia liafuan.
12 Tanba imi sei laʼo sai husi rai neʼe ho haksolok,
No imi sei fila fali ba imi-nia rai ho dame.
Foho no foho-oan sira sei haklalak ho haksolok iha imi-nia oin,
No ai-hun sira hotu iha rai-luan sei basa-liman.
13 Ai-junipero mak sei moris duké ai-tarak barak,
No ai-murta mak sei moris duké duʼut tarak.
No neʼe sei lori naran-boot ba Jeová,
No sei sai nuʼudar sinál ba nafatin neʼebé sei nunka lakon.”
56 Jeová dehan nuneʼe:
“Kaer metin ba justisa, no halo hahalok loos,
Tanba lakleur tan haʼu sei salva imi
No haʼu sei hatudu sai haʼu-nia hahalok loos.
2 Ksolok ba ema neʼebé halo hahalok loos
No ema nia oan-mane neʼebé kaer metin ba justisa,
Ema neʼebé selebra loron Sábadu no la hafoʼer loron neʼe
No hanetik nia liman atu la halo buat neʼebé aat.
3 Ema estranjeiru neʼebé adora Jeová labele dehan:
‘Jeová sei haketak duni haʼu husi ninia povu.’
No ema neʼebé la bele iha oan keta dehan: ‘Haree bá! Haʼu mak ai-hun neʼebé maran.’
4 Tanba Jeová dehan nuneʼe: “Ba ema neʼebé la bele iha oan maibé selebra haʼu-nia loron Sábadu no halo tuir haʼu-nia hakarak no kaer metin ba haʼu-nia aliansa,
5 Haʼu sei fó monumentu ida no naran ida ba sira iha haʼu-nia uma laran no iha haʼu-nia moru laran,
Neʼe mak buat neʼebé diʼak liu fali oan-mane no oan-feto sira.
Haʼu sei fó sira naran neʼebé hela ba nafatin,
Naran neʼebé sei nunka lakon.
6 Kona-ba ema estranjeiru sira neʼebé adora no serbí Jeová,
No hadomi Jeová nia naran
No sai haʼu-nia atan,
Ema hotu neʼebé selebra loron Sábadu no la hafoʼer loron neʼe
No neʼebé kaer metin ba haʼu-nia aliansa,
7 Haʼu mós sei lori sira ba haʼu-nia foho santu
No halo sira kontente iha haʼu-nia uma orasaun.
Sira-nia sakrifísiu sunu nian neʼebé hasaʼe tomak no sira-nia sakrifísiu sira seluk, haʼu sei simu iha haʼu-nia altár.
Tanba haʼu-nia uma sei bolu nuʼudar uma orasaun nian ba povu hotu.”
8 Jeová, Naʼi Ukun-Naʼin Boot Liu, neʼebé halibur fali ema Izraél sira neʼebé namkari, dehan:
“Haʼu halibur ona ema, maibé haʼu sei halibur tan ema seluk atu ba hamutuk ho sira.”
9 Animál fuik hotu iha rai-luan,
No animál fuik hotu iha ai-laran, mai hodi han.
10 Ninia guarda sira matan-delek, no la iha ida mak haree.
Sira hotu hanesan asu neʼebé la loke ibun, no la bele hatenu.
Sira dada-iis no latan deʼit; sira gosta toba.
11 Sira mak hanesan asu neʼebé kaan-teen loos;
Sira nunka sai bosu.
Sira mak hanesan bibi-atan neʼebé la hatene buat ida.
Sira hotu laʼo tuir sira-nia dalan rasik;
Sira ida-idak buka atu manán buat ruma ho laran-makerek no dehan:
12 “Mai, mai ita foti tua-uvas,
No mai ita hemu toʼo lanu.
Loron aban sei hanesan ohin, maibé aban sei diʼak liu!”
57 Ema laran-loos mate ona,
Maibé la iha ema ida mak hanoin kona-ba neʼe.
Bainhira ema sira neʼebé laran-metin mate,
La iha ema ida mak hatene katak ema laran-loos sira mate ona
Tanba susar.
2 Ema laran-loos tama iha fatin hakmatek nian.
Ema hotu neʼebé hatudu hahalok loos, sira deskansa iha sira-nia kama.
3 “Maibé kona-ba imi, mai besik bá,
Imi mak feto matan-dook nia oan-mane sira,
Oan sira husi feto-aat no feen neʼebé halo sala-foʼer:
4 Imi goza sé?
Imi loke ibun luan no losu nanál ba sé?
Imi mak ema sala-naʼin nia oan,
No bosok-teen nia oan.
5 Imi iha hakarak seksuál nian neʼebé makaʼas iha ai-hun boot sira-nia leet,
Iha ai-hun buras hotu nia okos,
Imi oho imi-nia oan iha foho-leet sira,
Iha fatuk-boot sira-nia leet.
6 Ó hili ona fatuk kabeer iha foho-leet.
Sin, fatuk sira-neʼe mak ó-nia parte.
Ó fakar sai sakrifísiu hemu nian no fó prezente ba sira.
Haʼu tenke sai kontente ho buat sira-neʼe ka?
7 Ó tau ó-nia kama iha foho aas nia leten,
No ó saʼe ba neʼebá hodi hasaʼe sakrifísiu.
8 Ó tau sinál iha odamatan kotuk no iha odamatan riin atu hanoin fali ó-nia estátua sira.
Ó husik hela haʼu no hasai ó-nia roupa;
Ó saʼe bá neʼebá no halo luan ó-nia kama.
No ó halo aliansa ho sira.
Ó gosta toba iha sira-nia kama,
No ó hateke ba mane nia oin-lulik.
9 Ó tun ba Melek no lori ho mina
No lori mós mina-morin barak.
Ó haruka ó-nia atan sira atu laʼo dook,
Atu nuneʼe ikusmai ó tun ba rate hamutuk ho ó-nia hahalok.
10 Ó hakaʼas an iha dalan oioin,
Maibé ó la dehan: ‘Ne’e saugati deʼit!’
Ó hetan forsa foun.
Tan neʼe mak ó lakohi rende an.
11 Ó nakdedar no taʼuk ba sé
Toʼo halo ó komesa bosok?
Ó la hanoin-hetan haʼu.
Ó la hanoin kona-ba buat ida.
Haʼu kontinua nonook no la halo buat ida ba ó,
Tan neʼe mak ó la hamtaʼuk haʼu.
12 Haʼu sei hatudu sai ó-nia ‘hahalok loos’ no buat neʼebé ó halo,
No ó-nia hahalok sei la lori buat diʼak ba ó.
13 Bainhira ó halerik atu husu ajuda,
Ó-nia estátua sira neʼebé ó halibur ona sei la salva ó.
Anin sei lori lakon sira hotu,
No ema huu deʼit mós sei lori lakon sira,
Maibé ema sira neʼebé buka protesaun husi haʼu sei simu rai neʼe nuʼudar liman-rohan
No sei simu haʼu-nia foho santu nuʼudar sira-nian.
14 Ema ida sei dehan: ‘Imi tenke ateru dalan, ateru dalan bá! Prepara dalan bá!
Hasai tiha buat neʼebé halo sidi husi haʼu-nia povu nia dalan.’
15 Tanba Maromak neʼebé Aas Liu,
Neʼebé hela ba nafatin no neʼebé ninia naran mak santu dehan nuneʼe:
“Haʼu hela iha fatin aas no santu,
Maibé haʼu mós hela hamutuk ho ema sira neʼebé hetan terus no haraik-an,
Atu fó forsa ba ema sira neʼebé kbiit-laek
No atu fó forsa ba ema sira neʼebé hetan terus.
16 Tanba haʼu sei la kontra sira ba nafatin
Ka la sai hirus nafatin ba sira;
Tanba ema nia forsa bele sai fraku tan haʼu,
Nuneʼe mós ho kriatura neʼebé dada-iis neʼebé haʼu kria ona.
17 Haʼu sai hirus tanba ninia hahalok sala, nia buka atu manán buat ruma ho laran-makerek,
Entaun haʼu baku nia, haʼu subar haʼu-nia oin, no sai hirus ba nia.
Maibé nia kontinua laʼo hanesan ema kontradór, hodi tuir deʼit ninia laran.
18 Haʼu haree ona ninia dalan sira,
Maibé haʼu sei kura nia no dirije nia
No haʼu sei fó kmaan fali ba nia no ba ninia ema sira neʼebé triste.”
19 Jeová dehan: “Haʼu sei tau liafuan hahiʼi nian iha ema nia nanál.
Haʼu sei fó dame nafatin ba sira neʼebé hela dook no sira neʼebé hela besik,
No haʼu sei kura sira.”
20 “Maibé ema aat mak hanesan tasi neʼebé la hakmatek no la bele kalma,
No ninia laloran sira baku sai tiha duʼut tasi no tahu.”
21 Haʼu-nia Maromak dehan: “La iha dame ba ema aat sira.”
58 “Bolu ho lian makaʼas; keta dada an!
Hasai ó-nia lian hanesan dikur nia lian.
Fó sai ba haʼu-nia povu kona-ba sira-nia sala,
Fó sai ba umakain Jacob kona-ba sira-nia sala.
2 Loron-loron sira buka haʼu,
Ho ibun-tutun sira fó sai katak sira haksolok tanba hatene haʼu-nia dalan sira,
Hanesan sira mak nasaun neʼebé hatudu hahalok loos,
Neʼebé la husik sira-nia Maromak nia ukun-fuan.
Sira husu haʼu atu tesi-lia ho loloos,
Hanesan sira kontente atu hakbesik ba Maromak.
3 No agora sira husu haʼu: ‘Tansá mak Ita la haree bainhira ami jejún?
Tansá mak Ita la haree bainhira ami haraik ami-nia an?’
Tanba iha loron neʼebé imi jejún, imi buka imi-nia hakarak rasik,
No imi hanehan imi-nia serbisu-naʼin.
4 Imi remata imi-nia jejún ho haksesuk malu no baku malu,
No ho laran-aat mak imi baku ema ho imi-nia liman.
Imi labele jejún hanesan imi halo agora no hanoin katak haʼu rona imi-nia lian iha lalehan.
5 Jejún neʼebé haʼu hakarak imi atu halo mak hanesan neʼe ka?
Loron neʼe mak ba imi atu hatudu haraik-an ka?
Loron neʼe mak ba imi atu hakruʼuk an hanesan duʼut naruk ka?
Loron neʼe mak ba imi atu halo kama husi hena karón no ahi-kadesan ka?
Neʼe mak buat neʼebé imi bolu jejún no bolu nuʼudar loron neʼebé halo Jeová kontente ka?
6 Lae. Tuirmai neʼe mak jejún neʼebé haʼu hakarak:
Atu imi hasai tiha korrente neʼebé imi halo ho laran-aat,
Atu kore ema nia naha todan,
Atu husik livre sira neʼebé ema hanehan,
No atu halo tohar ba rua ai-lolon hotu neʼebé uza atu lori naha;
7 Atu imi fahe imi-nia paun ba ema neʼebé hamlaha,
Atu lori ema kiak no ema neʼebé la iha uma hodi tama ba imi-nia uma,
Atu fó roupa ba ema neʼebé isin-tanan bainhira imi haree nia,
No atu la fila kotuk ba imi-nia maluk rasik.
8 Ho ida-neʼe mak imi-nia naroman sei nabilan hanesan rai-hun mutin,
No imi-nia kanek sei sai diʼak lalais.
Imi-nia hahalok loos sei laʼo iha imi-nia oin,
No Jeová nia glória sei proteje imi iha imi-nia kotuk.
9 Tuirmai bainhira imi bolu, Jeová sei hatán;
Bainhira imi halerik hodi husu ajuda, nia sei dehan: ‘Haʼu mak neʼe!’
Se imi hasai tiha ai-lolon atu lori naha husi imi-nia leet
No para atu hatudu liman no koʼalia aat ema seluk,
10 Se imi fó buat neʼebé imi rasik gosta ba ema neʼebé hamlaha
No fó kmaan ba sira neʼebé hetan terus,
Entaun imi-nia naroman sei nabilan maski iha nakukun laran,
No imi-nia nakukun sei sai naroman hanesan meiudia.
11 Jeová sei nafatin dirije imi
No fó kmaan ba imi maski iha rai neʼebé maran;
Nia sei fó forsa fali ba imi-nia ruin sira,
No imi sei sai hanesan jardín neʼebé rega ho bee barak,
Hanesan bee-matan neʼebé sempre iha bee.
12 Imi sei harii fali sidade antigu neʼebé rahun ona tanba imi husu ba haʼu,
No imi sei harii fali uma hun neʼebé rahun ona ba jerasaun barak.
Ema sei bolu imi nuʼudar badain neʼebé hadiʼa fali moru sira neʼebé aat ona,
Badain neʼebé hadiʼa fali dalan boot no uma.
13 Se imi halaʼo haʼu-nia loron Sábadu no la fila kotuk hodi halo deʼit imi-nia hakarak iha haʼu-nia loron santu
No se imi bolu loron Sábadu nuʼudar loron ksolok boot nian, loron santu ba Jeová, loron neʼebé tenke hafolin,
No se imi hafolin loron neʼe duké buka imi-nia hakarak rasik no la koʼalia liafuan naranaran deʼit,
14 Entaun imi sei hetan ksolok boot tanba Jeová,
No haʼu sei halo imi domina rai nia fatin aas sira.
Haʼu sei halo imi han ai-han husi rai neʼebé nuʼudar imi-nia beiʼala Jacob nia liman-rohan,
Tanba Jeová rasik mak fó sai ida-neʼe.”
59 Haree bá! Jeová nia liman la badak toʼo la bele fó salvasaun,
No ninia tilun la diuk toʼo la bele rona.
2 Lae, maibé imi-nia sala rasik mak haketak imi husi imi-nia Maromak.
Imi-nia sala mak halo nia subar ninia oin husi imi,
No nia lakohi atu rona ba imi.
3 Tanba imi-nia liman sai foʼer ho ema nia raan
No imi-nia liman-fuan sai foʼer ho sala sira.
Imi-nia ibun koʼalia bosok, no imi-nia nanál koʼalia buat neʼebé la loos.
4 La iha ema ida mak hasai lian hodi defende hahalok loos,
No la iha ema ida mak bá tribunál atu koʼalia buat neʼebé loos.
Sira tau fiar ba buat neʼebé saugati no koʼalia buat neʼebé la iha folin.
Sira sai isin-rua ba problema no tuur ahi ba buat neʼebé hakanek ema.
5 Sira mak hanesan samea venenu neʼebé tolun,
No sira uza labadain nia knuuk atu soru hena.
Ema hotu neʼebé han sira-nia samea tolun neʼe sei mate,
No tolun neʼebé nakfera sei hamosu samea ida.
6 Hena neʼebé sira soru ho labadain nia knuuk la merese atu sai nuʼudar roupa,
No sira sei la taka sira-nia an ho buat neʼebé sira halo.
Sira-nia hahalok sira mak aat,
No hahalok violénsia mak iha sira-nia liman.
7 Sira halai atu halo hahalok aat,
No sira ansi atu fakar ema laran-moos nia raan.
Sira-nia hanoin sira mak atu halo aat ba ema;
Sira-nia dalan mak sempre halo aat malu no haterus malu.
8 Sira la hatene dalan dame nian,
No la iha justisa iha sira-nia dalan.
Sira halo kleʼuk sira-nia dalan sira;
No ema neʼebé laʼo iha laran sei la hatene dame.
9 Tan neʼe mak justisa dook husi ami,
No hahalok loos la toman ami.
Ami kontinua hein ba naroman, maibé haree bá! Iha deʼit nakukun;
Ami hein ba naroman, maibé ami nafatin laʼo iha nakukun.
10 Ami kontinua lamas moru hanesan ema matan-delek;
Ami lamas nafatin hanesan ema sira neʼebé matan-aat.
Ami sidi iha meiudia hanesan sidi iha kalan neʼebé nakukun;
Iha ema forte nia leet ami hanesan deʼit ema mate.
11 Ami hotu kontinua hasai lian hanesan ursu
No halo lian hanesan manu-pombu neʼebé triste.
Ami hein ba justisa, maibé saugati deʼit;
Ami hein ba salvasaun, maibé neʼe dook husi ami.
12 Tanba ami-nia hahalok kontra mak barak ona iha ita-nia oin;
Ami-nia sala ida-idak fó sasin hasoru ami.
Tanba ami hatene ho didiʼak ami-nia sala
No ami-nia hahalok kontra.
13 Ami halo sala no nega ona Jeová;
Ami fila kotuk ona ba ami-nia Maromak.
Ami koʼalia ona kona-ba oinsá atu haterus malu no kontra Maromak;
Ami hanoin lia-bosok iha ami-nia laran no koʼalia bosok ona.
14 Justisa hakiduk ona,
No hahalok loos hamriik dook deʼit;
Lia-loos sidi ona iha fatin públiku sidade nian,
No buat neʼebé loos la bele tama ba sidade.
15 Lia-loos lakon ona,
No ema ataka no naʼok husi sira neʼebé la halo hahalok aat.
Jeová haree ida-neʼe no nia la kontente,
Tanba iha neʼebá la iha justisa.
16 Nia haree katak la iha ema ida mak lolo liman,
No nia hakfodak katak ema ida la ajuda,
Tan neʼe ninia liman rasik mak lori salvasaun,
No ninia hahalok loos rasik mak fó kbiit ba nia.
17 Tuirmai nia tau hahalok loos nuʼudar ninia hatais funu nian
No tau kapasete salvasaun nian iha ninia ulun.
Nia tau roupa selu fali nian nuʼudar ninia hatais
No nia falun an ho hahalok laran-manas hanesan unuk ida.
18 Nia sei fó kolen ba sira tuir buat neʼebé sira halo ona,
Kolen mak neʼe: nia sei hirus no selu fali ba ninia inimigu sira.
No nia sei selu fali ba illa sira tuir buat neʼebé sira merese.
19 Husi loromonu, sira sei taʼuk ba Jeová nia naran
No husi lorosaʼe, sira sei taʼuk ba ninia glória,
Tanba nia sei mai hanesan mota neʼebé suli lalais no makaʼas,
Katak mota neʼebé Jeová nia espíritu mak lori mai.
20 “Maromak neʼebé Sosa Fali ninia povu sei mai toʼo Siaun,
Nia sei mai toʼo iha Jacob nia bei-oan sira neʼebé hasees an ona husi sala,” Jeová dehan.
21 “Kona-ba haʼu, neʼe mak haʼu-nia aliansa ho sira”, Jeová dehan. “Haʼu-nia espíritu neʼebé iha ó no haʼu-nia liafuan neʼebé haʼu tau ona iha ó-nia ibun, neʼe sei nunka hasai husi ó-nia ibun, husi ó-nia oan nia ibun, ka husi ó-nia bei-oan nia ibun, husi agora no ba nafatin” Jeová dehan.
60 “Oh feto, hamriik bá, fó naroman bá, tanba ó-nia naroman mosu ona.
Jeová nia glória mak fó naroman ba ó.
2 Tanba haree bá! Nakukun sei taka rai
No kalohan metan sei taka nasaun sira;
Maibé Jeová sei fó naroman ba ó,
No ninia glória sei tun ba ó.
3 Nasaun sira sei hakbesik ba ó-nia naroman
No liurai sira sei hakbesik ba ó-nia kmanek neʼebé nabilan.
4 Foti matan no hateke haleʼu ó-nia sorin!
Sira hotu halibur ona; sira mai toʼo ó.
Husi fatin dook mak ó-nia oan-mane sira kontinua mai,
No ema sei koʼus ó-nia oan-feto sira hodi lori sira mai.
5 Iha tempu neʼebá ó sei haree no sai kontente,
No ó-nia fuan tuku-tuku ho haksolok,
Tanba ó sei simu tasi nia rikusoin;
No nasaun nia rikusoin sei sai ó-nian.
6 Kuda-kamelu lubun sei taka ó-nia rai,
Sira mak kuda-kamelu oan husi Midián no Efa.
Ema hotu husi Sabá, sira sei mai;
Sira sei lori osan-mean no insensu mutin.
Sira sei fó hahiʼi ba Jeová iha ema nia oin.
7 Bibi-lubun husi Kedar sei halibur ba ó.
Bibi-malae aman husi Nebajot sei serbí ó.
Sira sei mai iha haʼu-nia altár no haʼu sei simu sira,
No haʼu sei hafurak haʼu-nia uma neʼebé kmanek.
8 Sé mak sira neʼebé semo mai hanesan kalohan?
Sira semo mai hanesan manu-pombu neʼebé semo ba sira-nia uma.
9 Illa sira sei tau esperansa ba haʼu;
Ró sira husi Tarsis mak halai iha oin,
Sira lori fila fali ó-nia oan sira husi fatin dook,
Hamutuk ho sira-nia osan-mutin no osan-mean,
Hodi fó hahiʼi bá Jeová, ó-nia Maromak, nia naran no fó hahiʼi ba Maromak neʼebé Santu ba Izraél,
Tanba nia sei fó glória ba ó.
10 Ema estranjeiru sei harii ó-nia moru sira,
No sira-nia liurai sei sai ó-nia serbisu-naʼin.
Maski haʼu baku ó tanba haʼu hirus,
Maibé haʼu sei hatudu laran-sadiʼa ba ó tanba haʼu-nia laran-diʼak.
11 Ó-nia portaun sei loke nafatin,
No sei la taka loron ka kalan,
Hodi ema bele lori nasaun sira-nia rikusoin ba ó,
No sira-nia liurai mak sei laʼo iha sira-nia oin.
12 Tanba nasaun sira no liurai sira neʼebé la serbí ó sei halakon tiha,
No nasaun sira sei lakon mohu.
13 Líbanu nia glória sei toʼo mai ó,
Ai-junipero, ai-freixu, no ai-sipreste sei mai hamutuk,
Atu hafurak haʼu-nia fatin santu;
Haʼu sei fó glória ba fatin neʼebé haʼu tula haʼu-nia ain.
14 Oan-mane sira husi ema neʼebé hanehan ó sei mai no hakruʼuk an iha ó-nia oin;
Ema hotu neʼebé la hatudu respeitu ba ó tenke hakruʼuk an iha ó-nia ain,
No sira tenke bolu ó nuʼudar Jeová nia sidade,
Siaun, fatin ba Maromak neʼebé Santu ba Izraél.
15 Maski ema odi ó no husik ó mesak toʼo la iha ema ida mak laʼo liu ó,
Maibé haʼu sei halo ó sai buat neʼebé ema gaba ba nafatin,
Hodi halo ema haksolok ba jerasaun hotu.
16 Nasaun sira no liurai sira sei fó buat hotu neʼebé imi presiza
Hanesan inan fó susu ba ninia oan;
Nuneʼe ó sei hatene duni katak haʼu, Jeová, mak ó-nia Salvadór,
No Jacob nia Maromak neʼebé Kbiit Boot mak Sosa Fali ó.
17 Haʼu sei lori mai osan-mean hodi troka riti, Haʼu sei lori mai osan-mutin hodi troka besi,
Haʼu sei lori mai riti hodi troka ai,
No besi hodi troka fatuk;
No haʼu sei foti dame nuʼudar ó-nia ulun-naʼin
No justisa nuʼudar ó-nia ulun-naʼin neʼebé fó knaar ba ó.
18 Ó sei la rona tan violénsia iha ó-nia rai,
Ema sei la estraga ka halakon buat ida iha ó-nia fronteira laran.
No ó sei bolu ó-nia moru sira nuʼudar Salvasaun no ó-nia portaun sira nuʼudar Glória.
19 No loro-matan sei la sai tan nuʼudar naroman ba ó iha loron,
No fulan sei la fó tan ninia naroman ba ó,
Tanba Jeová mak sei sai nuʼudar ó-nia naroman ba nafatin,
No ó-nia Maromak sei sai nuʼudar buat neʼebé halo ó furak.
20 Ó-nia loro-matan sei la tun tan,
No ó-nia fulan sei la lakon tan,
Tanba Jeová mak sei sai nuʼudar ó-nia naroman ba nafatin,
No ó-nia tempu triste nian sei remata.
21 No ó-nia povu hotu sei iha hahalok loos;
Sira sei foti rai neʼe nuʼudar sira-nian ba nafatin.
Sira mak ai-oan neʼebé haʼu kuda,
Serbisu neʼebé haʼu halo ho haʼu-nia liman, hodi hafurak liután haʼu.
22 Sira neʼebé uitoan sei sai rihun ida
No povu neʼebé kiʼik sei sai nasaun neʼebé forte.
Haʼu, Jeová, haʼu rasik mak sei halo sira sai barak lalais liu tuir ninia tempu.”
61 Jeová, Naʼi Ukun-Naʼin Boot Liu, fó ona ninia espíritu ba haʼu,
Tanba Jeová hili ona haʼu atu haklaken liafuan diʼak ba ema laran-maus.
Nia haruka haʼu atu kura ema neʼebé laran-kanek,
Atu fó sai liberdade ba ema dadur sira
No atu loke luan ema dadur nia matan,
2 Atu fó sai kona-ba tinan neʼebé Jeová hatudu ninia laran-diʼak
No fó sai loron neʼebé ita-nia Maromak sei fó kastigu,
Atu fó kmaan ba ema hotu neʼebé triste,
3 Atu tau matan ba sira neʼebé triste tanba Siaun,
Atu fó hena furak ba sira atu taka ulun duké ahi-kadesan,
No fó mina ksolok nian ba sira duké halerik,
No fó roupa hahiʼi nian ba sira duké laran-tun.
No ema sei bolu sira nuʼudar ai-hun boot hahalok loos nian,
Ai-hun sira neʼebé Jeová kuda atu fó glória ba nia.
4 Sira sei harii fali sidade antigu neʼebé rahun ona;
Sira sei harii fali fatin antigu nian neʼebé sai uut ona,
No sira sei hadiʼa fali sidade sira neʼebé aat ona,
Fatin sira neʼebé rahun ona husi jerasaun ba jerasaun.
5 “Ema husi rai seluk sei hamriik no tau matan ba imi-nia bibi-lubun,
No ema estranjeiru sei sai nuʼudar imi-nia toʼos-atan no atan neʼebé tau matan ba imi-nia toʼos-uvas.
6 Kona-ba imi, ema sei bolu imi nuʼudar Jeová nia amlulik;
Sira sei bolu imi nuʼudar ita-nia Maromak nia atan.
Imi sei han nasaun sira-nia rikusoin,
No imi sei gaba an kona-ba sira-nia glória.
7 Duké moe, haʼu-nia povu sei hetan bensaun ba dala rua,
Duké moe, sira sei haklalak ho ksolok tanba sira-nia liman-rohan.
Sin, sira sei hetan bensaun ba dala rua iha sira-nia rai.
Ksolok ba nafatin sei sai sira-nian.
8 Tanba haʼu, Jeová, hadomi justisa;
Haʼu odi naʼok no hahalok la loos.
Ho laran-metin haʼu sei fó duni sira-nia kolen,
No haʼu sei halo aliansa ba nafatin ho sira.
9 Nasaun sira sei hatene haʼu-nia povu nia bei-oan
No ema sei hatene haʼu-nia povu nia jerasaun.
Ema hotu neʼebé haree sira sei koñese sira,
Katak sira mak bei-oan neʼebé Jeová fó ona bensaun.”
10 Haʼu sei haksolok tebes tanba Jeová.
Ho haʼu-nia forsa tomak, haʼu sei haksolok tanba haʼu-nia Maromak.
Tanba nia tau unuk salvasaun nian ba haʼu;
Nia falun haʼu ho unuk hahalok loos nian,
Hanesan noivu neʼebé uza xapeu hanesan amlulik ida,
No hanesan noiva neʼebé hafurak nia an ho buat murak oioin.
11 Hanesan rai halo fini sira moris
No hanesan jardín halo moris fini neʼebé kuda iha laran,
Nuneʼe mak Jeová, Naʼi Ukun-Naʼin Boot Liu,
Sei halo buras hahalok loos no glória iha nasaun hotu nia oin.
62 Haʼu sei la nonook deʼit tanba haʼu hanoin Siaun,
No haʼu sei la tuur deʼit tanba haʼu hanoin Jeruzalein,
Toʼo ninia hahalok loos nabilan hanesan naroman
No ninia salvasaun lakan hanesan ahi-oan.
2 “Oh feto, nasaun sira sei haree ó-nia hahalok loos,
No liurai hotu sei haree ó-nia glória.
Ema sei bolu ó-nia naran foun,
Naran neʼe Jeová rasik mak sei fó ba ó.
3 Ó sei sai hanesan koroa furak iha Jeová nia liman,
No liurai nia xapeu iha ó-nia Maromak nia liman.
4 Ema sei la bolu tan ó nuʼudar feto neʼebé ninia laʼen husik hela,
No sira sei la bolu tan ó-nia rai nuʼudar rai neʼebé fuik.
Maibé ó-nia naran sei sai fali nuʼudar Feto neʼebé Halo Haʼu Haksolok,
No ó-nia rai nia naran sei sai fali nuʼudar Kaben-Naʼin.
Tanba Jeová sei sai kontente ho ó,
No ó-nia rai sei sai fali hanesan feto neʼebé kaben ona.
5 Hanesan mane joven ida kaben ho feto virjen,
Ó-nia povu sei kaben ho ó.
Hanesan noivu haksolok tanba noiva,
Ó-nia Maromak sei haksolok ba ó.
6 Oh Jeruzalein, haʼu tau ona guarda iha ó-nia moru leten.
Loron tomak no kalan tomak, sira la bele nonook nafatin.
Imi neʼebé hahiʼi Jeová,
Keta deskansa,
7 No keta husik nia deskansa toʼo nia hametin Jeruzalein,
Sin, toʼo nia halo rai tomak fó hahiʼi ba Jeruzalein.”
8 Jeová jura ona ho ninia liman-loos, ho ninia liman neʼebé forte, hodi dehan:
“Haʼu sei la fó tan ó-nia trigu nuʼudar ai-han ba ó-nia inimigu,
No ema estranjeiru sei la hemu tan ó-nia tua-uvas foun, neʼebé ó serbisu makaʼas atu halo.
9 Maibé sira neʼebé koʼa trigu sei han trigu no sira sei hahiʼi Jeová;
No sira neʼebé halo tua-uvas sei hemu tua-uvas iha haʼu-nia pátiu sira neʼebé santu.”
10 Laʼo bá, laʼo liuhusi portaun sira.
Hamoos dalan ba povu neʼe.
Imi tenke ateru dalan, ateru dalan boot neʼe.
Hasai tiha ninia fatuk sira.
Harii sinál ida ba povu sira.
11 Haree bá! Jeová fó ona avizu toʼo rai nia rohan:
“Hatete ba Siaun nia oan-feto:
‘Haree bá! Ó-nia salvasaun mai daudaun.
Haree bá! Nia lori kolen hamutuk ho nia,
Nia prontu atu selu ema nia kolen.’
12 Ema sei bolu povu sira-neʼe nuʼudar povu santu, povu neʼebé Jeová sosa fali ona,
No ó-nia naran sei sai nuʼudar Sidade neʼebé Ema Buka Tuir, Sidade neʼebé Maromak La Husik Hela.
63 Ida neʼebé mai daudaun husi Edom,
Neʼebé mai husi Bozra ho roupa neʼebé kór lakan,
Neʼebé hatais roupa furak,
No marxa mai ho kbiit boot, nia neʼe sé?
“Neʼe mak haʼu. Haʼu koʼalia hodi tuir buat neʼebé loos,
Haʼu iha kbiit boot atu fó salvasaun.”
2 Tansá mak Ita-nia roupa mean?
Tansá mak Ita-nia roupa hanesan deʼit ho sira neʼebé sama uvas-fuan?
3 “Haʼu mesak mak sama uvas-fuan iha fatin sama uvas nian.
La iha ema ida husi povu sira mak hamutuk ho haʼu.
Haʼu kontinua sama sira ho haʼu-nia hirus,
No haʼu kontinua sama sira ho haʼu-nia laran-nakali.
Sira-nia raan kona haʼu-nia roupa,
No haʼu-nia roupa hotu iha noda.
4 Haʼu deside ona loron atu selu fali,
No tinan neʼebé haʼu atu sosa fali haʼu-nia povu toʼo ona mai.
5 Haʼu hateke, maibé la iha ema ida atu ajuda haʼu; Haʼu la kontente tanba la iha ema ida apoia haʼu.
Entaun haʼu-nia liman rasik mak fó salvasaun ba haʼu,
No haʼu-nia laran-nakali mak apoia haʼu.
6 Haʼu sama povu sira ho haʼu-nia hirus,
Haʼu halo sira lanu ho haʼu-nia laran-nakali
No haʼu fakar sai sira-nia raan ba rai.”
7 Haʼu sei fó sai Jeová nia hahalok domin neʼebé laran-metin,
Jeová nia hahalok neʼebé merese atu hahiʼi,
Tanba buat hotu neʼebé Jeová halo ona ba ita,
Nia halo ona buat diʼak barak ba umakain Izraél,
Hodi tuir ninia laran-sadiʼa no ninia domin boot ho laran-metin.
8 Tanba nia dehan: “Sira mak haʼu-nia povu duni, oan-mane sira neʼebé sei laran-metin ba haʼu.”
Tan neʼe mak nia sai sira-nia Salvadór.
9 Durante sira-nia susar hotu, nia mós sente neon-susar.
No ninia atan rasik neʼebé lori ninia mensajen mak salva sira.
Ho ninia domin no laran-sadiʼa mak nia sosa fali sira,
No iha tempu neʼebá nia foti sira no lori sira loron-loron.
10 Maibé sira kontra no halo triste ninia espíritu santu.
Tan neʼe, nia sai fali sira-nia inimigu,
No nia luta hasoru sira.
11 No sira hanoin-hetan fali tempu uluk,
Sira hanoin fali ninia atan Moisés nia tempu, hodi dehan:
“Maromak neʼebé lori sira sai husi tasi hamutuk ho ninia povu nia bibi-atan sira, nia iha neʼebé?
Maromak neʼebé tau nia espíritu santu ba Moisés, nia iha neʼebé?
12 Maromak neʼebé fó Nia liman neʼebé forte ba Moisés nia liman-loos, nia iha neʼebé?
Maromak neʼebé fahe tasi iha sira-nia oin
Hodi halo ninia naran rasik hela ba nafatin, nia iha neʼebé?
13 Ida neʼebé halo sira laʼo liuhusi tasi neʼebé siʼak,
No halo sira laʼo liu no la sidi,
Hanesan kuda iha rai-luan, nia iha neʼebé?
14 Hanesan animál-hakiak sira laʼo tun ba rai-tetuk atu deskansa,
Jeová nia espíritu mós halo sira deskansa.”
Neʼe mak dalan neʼebé Ita dirije Ita-nia povu,
Atu halo naran-boot ba Ita-nia an rasik.
15 Favór ida, hateke tun husi lalehan no haree
Husi Ita-nia hela-fatin neʼebé aas, santu no kmanek.
Ita-nia laran-manas no Ita-nia kbiit iha neʼebé?
Ita-nia laran-diʼak neʼebé kleʼan no laran-sadiʼa neʼebé boot iha neʼebé?
Ita la hatudu buat sira-neʼe ba haʼu.
16 Tanba Ita mak ami-nia Aman;
Maski Abraão la hatene ami
No Izraél la koñese ami,
Maibé oh Jeová, Ita mak ami-nia Aman.
Ita mak Ida neʼebé Sosa Fali ami husi tempu uluk.
17 Oh Jeová, tansá mak Ita husik ami laʼo sees husi Ita-nia dalan sira?
Tansá mak Ita husik ami-nia laran sai toos, hodi nuneʼe ami la taʼuk Ita?
Fila fali mai hodi ajuda ami, tanba ami mak Ita-nia atan,
Ita-nia povu neʼebé nuʼudar Ita-nia liman-rohan.
18 Ita-nia povu neʼebé santu simu rai neʼe ba tempu badak deʼit.
Ami-nia inimigu sama ona Ita-nia fatin santu.
19 Tanba ba tempu kleur ona ami sai hanesan povu neʼebé Ita nunka ukun,
Hanesan povu neʼebé nunka lori Ita-nia naran.
64 Oh se karik Ita loke tiha lalehan no tun mai,
Hodi halo foho sira nakdoko iha Ita-nia oin,
2 Se karik Ita sunu sira hanesan ahi han ai-sanak neʼebé maran,
No ahi halo bee nakali,
Nuneʼe mak Ita-nia inimigu sira sei hatene Ita-nia naran,
No nasaun sira sei nakdedar iha Ita-nia oin!
3 Uluk Ita tun mai no foho sira nakdoko iha Ita-nia oin.
Ita halo buat kmanek oioin neʼebé ami la merese atu simu.
4 Husi uluk kedas la iha ema ida mak rona ka see tilun,
No ema seidauk haree Maromak ida, só Ita deʼit,
Ita apoia ema sira neʼebé hein nafatin ba Ita.
5 Ita mai hodi ajuda sira neʼebé gosta atu halo buat neʼebé diʼak,
Sira neʼebé hanoin-hetan Ita no laʼo tuir Ita-nia dalan sira.
Haree bá! Ita sai hirus, bainhira ami kontinua halo sala,
Ami halo sala ba tempu kleur.
Agora ami merese atu hetan salvasaun ka lae?
6 No ami hotu sai hanesan ema neʼebé la moos,
No ami-nia hahalok loos hotu sai hanesan hena menstruasaun nian.
Ami hotu sei sai namlaek hanesan ai-tahan,
No ami-nia sala sei lori lakon ami hanesan anin.
7 La iha ema ida mak bolu ba Ita-nia naran,
No la iha ema ida neʼebé hakaʼas an atu kaer metin ba Ita,
Tanba Ita subar ona Ita-nia oin husi ami,
No Ita halo ami sai fraku tanba ami-nia sala.
8 Maibé agora, oh Jeová, Ita mak ami-nia Aman. Ami mak rai-mean, no Ita mak ami-nia Badain Rai-Mean;
Ita halo ami hotu ho Ita-nia liman.
9 Oh Jeová, keta sai hirus makaʼas,
No keta hanoin-hetan ami-nia sala sira ba nafatin.
Favór ida, hateke ba ami, tanba ami hotu mak Ita-nia povu.
10 Ita-nia sidade santu sai ona rai-fuik.
Siaun sai ona rai-fuik,
Jeruzalein sai ona fatin mamuk.
11 Ahi han ona ami-nia templu santu neʼebé iha glória,
Fatin neʼebé ami-nia beiʼala sira hahiʼi Ita,
No buat hotu neʼebé ami hafolin rahun ona.
12 Oh Jeová, Ita haree ona buat sira-neʼe, Ita sei nafatin la halo buat ida ka?
Ita sei nafatin nonook deʼit no husik ami hetan terus makaʼas ka?
65 “Haʼu husik ema sira neʼebé la husu tuir haʼu atu buka haʼu;
Haʼu husik sira neʼebé la buka haʼu bele hetan haʼu.
Haʼu hatete ba nasaun neʼebé la bolu haʼu-nia naran, hodi dehan: ‘Haʼu mak neʼe, sin, haʼu mak neʼe!’
2 Loron tomak haʼu loke haʼu-nia liman ba povu neʼebé ulun-toos,
Ba sira neʼebé laʼo iha dalan neʼebé aat,
Hodi tuir deʼit sira-nia hanoin rasik;
3 Povu neʼebé la moe atu hakanek beibeik haʼu-nia laran,
Povu neʼebé hasaʼe sakrifísiu iha jardín sira no sunu sakrifísiu iha bloku nia leten hodi halo suar.
4 Sira tuur iha rate sira-nia leet,
Kalan tomak sira hela iha fatin subar,
Sira han naʼan-fahi,
No sira-nia sanan sira nakonu ho sopa neʼebé la moos.
5 Sira dehan: ‘Sees tiha; keta hakbesik haʼu,
Tanba haʼu santu liu ó.’
Sira-neʼe mak hanesan ahi-suar iha haʼu-nia inus, no sira kontinua halo haʼu hirus hanesan ahi neʼebé lakan loron tomak.
6 Haree bá! Ida-neʼe hakerek ona iha haʼu-nia oin;
Haʼu sei la hamriik nonook deʼit,
Maibé haʼu sei selu fali sira,
Haʼu sei selu fali sira ho folin neʼebé kompletu
7 Tanba sira-nia sala sira no mós tanba sira-nia beiʼala nia sala”, Jeová dehan.
“Tanba sira sunu sakrifísiu iha foho sira hodi halo suar
No sira hamoe haʼu iha foho-oan sira,
Ulukliu haʼu sei selu fali sira tuir buat neʼebé sira merese.”
8 Jeová dehan nuneʼe:
“Hanesan ema ida hetan uvas-fuan balu neʼebé bele halo tua-uvas foun
No dehan: ‘Keta halakon uvas-fuan sira-neʼe, tanba iha buat diʼak balu iha laran’,
Haʼu sei halo nuneʼe ba haʼu-nia atan sira;
Haʼu sei la halakon sira hotu.
9 Haʼu sei lori Jacob nia bei-oan sira
No Judá nia bei-oan sira atu simu haʼu-nia foho sira nuʼudar liman-rohan;
Sira neʼebé haʼu hili ona sei simu rai neʼe nuʼudar sira-nian,
No haʼu-nia atan sira sei hela iha neʼebá.
10 Saron sei sai fatin ba bibi sira atu han duʼut
No Foho-Leet Akor nian sei sai fatin deskansa ba karau sira.
Haʼu sei halo nuneʼe ba haʼu-nia povu neʼebé buka haʼu.
11 Maibé imi hamutuk ho sira neʼebé husik hela Jeová,
Imi haluha haʼu-nia foho santu,
Imi prepara meza ba maromak Sorte nian,
No fui tua-uvas neʼebé kahur ona iha kopu sira hodi hasaʼe ba maromak Destinu nian.
12 Entaun haʼu sei entrega imi ba surik nuʼudar imi-nia destinu,
No imi hotu sei hakruʼuk an hodi ema bele oho imi,
Tanba haʼu bolu imi, maibé imi la hatán,
Haʼu koʼalia, maibé imi la rona,
Imi kontinua halo buat neʼebé aat iha haʼu-nia oin,
No imi hili buat neʼebé halo haʼu la kontente.”
13 Tan neʼe, Jeová, Naʼi Ukun-Naʼin Boot Liu, dehan nuneʼe:
“Haree bá! Haʼu-nia atan sira sei han, maibé imi sei hamlaha.
Haree bá! Haʼu-nia atan sira sei hemu, maibé imi sei hamrook.
Haree bá! Haʼu-nia atan sira sei haksolok, maibé imi sei moe.
14 Haree bá! Haʼu-nia atan sira sei haklalak ho haksolok tanba laran-kontente,
Maibé imi sei tanis makaʼas tanba laran-moras
No imi sei halerik tanba laran-kanek.
15 Imi-nia naran deʼit mak sei hela, no haʼu-nia atan sira neʼebé haʼu hili ona sei temi imi-nia naran bainhira sira fó-malisan.
Jeová, Naʼi Ukun-Naʼin Boot Liu, sei oho imi ida-idak,
Maibé ninia atan sira, nia sei bolu ho naran seluk;
16 Atu nuneʼe ema hotu neʼebé buka bensaun ba ninia an rasik iha rai
Sei hetan bensaun husi Maromak lia-loos nian,
No ema hotu neʼebé halo juramentu ruma iha rai
Sei jura hodi Maromak lia-loos nian.
Tanba ema sei haluha terus uluk nian;
Buat sira-neʼe hotu sei subar tiha husi haʼu-nia oin.
17 Tanba haree bá! Haʼu sei kria lalehan foun no rai foun;
No ema sei la hanoin tan buat uluk nian,
No buat sira-neʼe sei la rai nafatin iha ema nia laran.
18 Tan neʼe, haksolok no kontente ba nafatin tanba buat neʼebé haʼu kria.
Haree bá! Haʼu kria Jeruzalein atu sai sidade neʼebé halo kontente
No ninia povu atu sai povu neʼebé lori ksolok.
19 No haʼu sei haksolok tanba Jeruzalein no kontente tanba haʼu-nia povu;
No ema sei la rona tan tanis no halerik tanba susar iha Jeruzalein.”
20 “Iha fatin neʼebá, sei la iha tan bebé neʼebé moris ba loron balu deʼit,
No la iha tan katuas neʼebé la kumpre ninia tinan sira.
Tanba ema ida neʼebé mate ho idade tinan atus ida, ema sei hanoin katak nia mak labarik deʼit,
No ema sala-naʼin sei mate tanba malisan, maski ho idade tinan atus ida.
21 Sira sei harii uma no hela iha laran,
No sira sei kuda uvas iha toʼos no han nia fuan.
22 Sira sei harii uma, laʼós ba ema seluk atu hela iha laran,
No sira sei kuda, laʼós ba ema seluk atu han.
Tanba haʼu-nia povu nia moris sei naruk hanesan ai-hun ida,
No sira neʼebé haʼu hili ona sei haksolok duni ho serbisu neʼebé sira halo ho sira-nia liman.
23 Sira-nia serbisu makaʼas sei la sai saugati deʼit,
No sira sei tuur ahi ba oan sira, no oan sira-neʼe sei la hetan susar,
Tanba sira no sira-nia bei-oan
Mak povu neʼebé Jeová fó ona bensaun,
24 Haʼu sei hatán antes sira bolu haʼu,
Haʼu sei rona bainhira sira koʼalia hela.
25 Asu-fuik no bibi-malae oan sei han hamutuk,
Leaun sei han duʼut-maran hanesan karau,
No samea sei han rai-rahun.
Sira sei la estraga no la halo aat iha haʼu-nia foho santu tomak”, Jeová dehan.
66 Jeová dehan nuneʼe:
“Lalehan mak haʼu-nia kadunan, no rai mak haʼu-nia fatin tula ain.
Entaun, imi bele harii uma ida ba haʼu iha neʼebé?
Fatin ba haʼu atu hela mak iha neʼebé?”
2 “Haʼu-nia liman rasik mak halo buat sira-neʼe hotu,
Hodi nuneʼe mak buat hotu iha”, Jeová dehan.
“Haʼu sei hateke ba ema neʼebé haraik an,
Ba ema neʼebé neon-susar no nakdedar ba haʼu-nia liafuan.
3 Ema neʼebé oho karau mak hanesan ema neʼebé oho ema.
Ema neʼebé hasaʼe sakrifísiu mak hanesan ema neʼebé halo tohar asu nia kakorok.
Ema neʼebé hasaʼe sakrifísiu, ninia prezente neʼe mak hanesan fahi nia raan!
Ema neʼebé fó insensu mutin mak hanesan ema neʼebé fó sai bensaun ho liafuan matan-dook nian.
Sira hili ona atu laʼo tuir sira-nia dalan,
No sira gosta buat neʼebé haʼu hakribi.
4 Tan neʼe, haʼu sei buka dalan oioin atu fó kastigu ba sira,
No buat neʼebé sira taʼuk, haʼu sei lori ba sira.
Tanba bainhira haʼu bolu, la iha ema ida hatán;
Bainhira haʼu koʼalia, la iha ema ida mak rona.
Sira kontinua halo buat neʼebé aat iha haʼu-nia oin,
No sira hili atu halo buat neʼebé haʼu la gosta.”
5 Imi hotu neʼebé nakdedar ba Jeová nia liafuan, rona ba ninia liafuan tuirmai neʼe:
“Imi-nia maun-alin odi imi no haketak an husi imi tanba haʼu-nia naran, hodi dehan: ‘Fó glória ba Jeová!’
Maibé haʼu sei mosu hodi fó ksolok ba imi,
No sira mak sei sai moe.”
6 Iha lian barullu iha sidade, lian husi templu!
Lian neʼe mosu tanba Jeová selu fali ba ninia inimigu sira tuir buat neʼebé sira merese.
7 Antes feto ida sente moras tuur-ahi nian, ninia oan moris ona.
Antes nia sente knotak moras, nia tuur ahi ona oan-mane ida.
8 Sé mak rona ona buat ida hanesan neʼe?
Sé mak haree ona ida-neʼe?
Rai ida bele mosu iha loron ida deʼit ka?
Nasaun ida bele moris iha tempu ida deʼit ka?
Maibé, bainhira Siaun sente moras tuur-ahi nian, nia tuur ahi kedas ba ninia oan-mane sira.
9 Jeová, ó-nia Maromak, husu: “Haʼu sei hanetik bebé neʼebé atu moris ona ka?
Haʼu sei halo inan ida neʼebé besik tuur ahi ona atu labele partu ka?”
10 Imi hotu neʼebé hadomi Jeruzalein, haksolok no sai kontente bá hamutuk ho sidade neʼe.
Imi hotu neʼebé tanis tanba Jeruzalein, haksolok bá hamutuk ho sidade neʼe,
11 Tanba Jeruzalein sei fó kmaan no tau matan ba imi, hanesan inan ida fó-susu ba ninia oan toʼo bosu.
Imi sei sai bosu no sai kontente tebes tanba sidade neʼe nia glória.
12 Tanba Jeová dehan nuneʼe:
“Haʼu sei halo dame sai hanesan mota ida
No nasaun sira-nia glória sai hanesan mota neʼebé suli makaʼas, hodi suli toʼo sidade neʼe.
Imi sei sai hanesan labarik ida neʼebé ninia inan koʼus no fó-susu
No nia tuur halimar iha ninia inan nia hitin.
13 Hanesan inan ida fó kmaan ba nia oan-mane,
Nuneʼe mós haʼu sei kontinua fó kmaan ba imi;
No imi sei hetan kmaan tanba Jeruzalein.
14 Imi sei haree loron neʼe, no imi-nia laran sei haksolok,
Imi-nia ruin sei sai hanesan duʼut matak neʼebé buras.
No Jeová nia atan sira sei hatene kona-ba ninia liman,
Maibé nia sei fó sala ba ninia inimigu sira.”
15 “Tanba Jeová sei mai hanesan ahi,
No ninia kuda-karreta sira mak hanesan anin-boot,
Atu selu fali ho ninia hirus makaʼas,
Atu fó kastigu ho ahi neʼebé lakan.
16 Tanba ho ahi mak Jeová sei tesi lia,
Sin, ho ninia surik mak nia kontra ema hotu;
No Jeová sei oho ema barak tebes.
17 Jeová dehan: “Sira neʼebé halo santu sira-nia an no hamoos an atubele tama ba jardín sira hodi tuir estátua neʼebé iha klaran, sira neʼebé han naʼan-fahi, laho no buat neʼebé haʼu hakribi, sira hotu sei mate hamutuk.
18 Tanba haʼu hatene sira-nia hahalok no sira-nia hanoin, haʼu sei mai hodi halibur ema husi nasaun hotu no língua hotu, no sira sei mai no haree haʼu-nia glória.”
19 “Haʼu sei tau sinál ida iha sira-nia leet, no haʼu sei haruka sira balu neʼebé halai sai ona hodi bá nasaun sira, katak bá Tarsis, Pul no Lud, no mós bá fatin neʼebé ema hana rama, bá Tubal, Javan, no bá illa sira neʼebé dook tebes; ema iha rai sira-neʼe seidauk rona kona-ba haʼu-nia hahalok ka haree haʼu-nia glória; no sira neʼebé halai sai ona sei fó sai haʼu-nia glória iha nasaun sira-nia leet.
20 Sira sei lori sai imi-nia maun-alin sira husi nasaun sira hotu nuʼudar prezente ba Jeová, imi-nia maun-alin hotu sei saʼe kuda, kuda-karreta, karrosa boot, kuda-burru, no kuda-kamelu neʼebé halai lalais, hodi mai iha haʼu-nia foho santu, Jeruzalein, hanesan bainhira povu Izraél lori sira-nia prezente iha sanan neʼebé moos hodi tama ba Jeová nia uma”,[transpose?] Jeová dehan.
21 Jeová dehan: “Haʼu mós sei foti sira balu atu sai amlulik no ema Levi.”
22 Jeová dehan: “Hanesan lalehan foun no rai foun neʼebé haʼu halo sei hela ba nafatin iha haʼu-nia oin, nuneʼe mós imi-nia bei-oan sira no imi-nia naran sei hela ba nafatin.”
23 Jeová dehan: “Husi fulan-foun ida toʼo fulan-foun tuirmai no husi loron Sábadu toʼo loron Sábadu,
Ema hotu sei tama mai hodi hakruʼuk an iha haʼu-nia oin.”
24 “No sira sei sai ba liʼur hodi hateke ba mate-isin husi ema sira neʼebé kontra hasoru haʼu;
Tanba ular-oan neʼebé han sira-nia isin sei la mate,
No ahi neʼebé han sira sei nunka mate,
No sira-nia mate-isin sei sai buat neʼebé ema hotu hakribi.”