WALELO

1 Lo ngɔndɔ ka 2 lushi 1 l’ɔnɔnyi wa 2 l’ɔkɔngɔ wa vɔ ntomba oma lo wodja w’Edjibito,+ Jehowa akasawola la Mɔsɛ l’oswe wa Sinayi+ lo luudu la dipɛma l’esanganelo.+ Nde akawotɛ ate: 2 “Adia lofulo+ l’olui w’otondo w’ase Isariyɛlɛ* onto l’onto lo ndjela nkumbo yawɔ, lo ndjela mvudu ya washɛwɔ, lo ndjela lofulo la nkombo y’apami tshɛ. 3 Wɛ la Arɔna nyayofundja nkombo ya wanɛ wele l’ɛnɔnyi oma lo 20 otsha la diko+ ndo wakoka nkamba olimu w’ɔsɔlayi l’Isariyɛlɛ lo ndjela elui awɔ.*

4 “Ɔsa pami 1 oma lo dioho la dioho ndo onto l’onto pombaka monga ɔtɛ wa luudu la she.+ 5 Nkombo y’apami wahomba kokimanyiya yɔ nyɛ: Oma lo dioho dia Rubɛna, Elizura+ ɔna Shedeurɛ. 6 Oma lo dioho dia Simɛyɔna, Shelumiyɛlɛ+ ɔna Zurishadai. 7 Oma lo dioho dia Juda, Nashɔna+ ɔna Aminadaba. 8 Oma lo dioho dia Isakara, Netanɛlɛ+ ɔna Zuara. 9 Oma lo dioho dia Zebuluna, Eliyabɛ+ ɔna Helɔna. 10 Oma le ana wa Yɔsɛfu: Oma lo dioho dia Efrayimɛ,+ Elishama ɔna Amihudɛ. Oma lo dioho dia Manase, Ngamaliyɛlɛ ɔna Pedazura. 11 Oma lo dioho dia Bɛnjamina, Abidana+ ɔna Ngidiyɔni. 12 Oma lo dioho dia Danɛ, Ahiyɛzɛrɛ+ ɔna Amishadai. 13 Oma lo dioho dia Ashɛrɛ, Pangiyɛlɛ+ ɔna Okarana. 14 Oma lo dioho dia Ngada, Eliyasafu+ ɔna Duɛlɛ. 15 Oma lo dioho dia Nafɛtali, Ahira+ ɔna Enana. 16 Wasɔ mbakɔsama oma l’olui w’ase Isariyɛlɛ. Vɔ mbele ewandji+ wa nkumbo ya waoho wa washɛwɔ, mbuta ate ɛtɛ wa nunu di’ase Isariyɛlɛ.”+

17 Ko Mɔsɛ nde la Arɔna wakɔshi apami akɔ wakashilama nkombo. 18 Lo ngɔndɔ ka 2 lushi 1, vɔ wakatshumanya olui w’anto tshɛ dia vɔ fundjama nkombo, onto l’onto lo lokombo lande, nkumbo kande ndo luudu la she, oma l’ɛnɔnyi 20 otsha la diko,+ 19 oko wakadjangɛ Jehowa Mɔsɛ. Ko nde akaafundja nkombo l’oswe wa Sinayi.+

20 Ana w’apami wa Rubɛna, mbuta ate tokanula ta ɔna Isariyɛlɛ l’enondo,+ wakafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 21 ko lofulo l’anto wakafundjama nkombo lo dioho dia Rubɛna laki nunu akumi anɛi la samalo la nkama tshanu (46 500).

22 Tokanula ta Simɛyɔna+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 23 ko lofulo l’anto wakafundjama nkombo lo dioho dia Simɛyɔna laki nunu akumi atanu la divwa la nkama shato (59 300).

24 Tokanula ta Ngada+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 25 ko lofulo l’anto wakafundjama nkombo lo dioho dia Ngada laki nunu akumi anɛi la tanu la nkama shamalo l’akumi atanu (45 650).

26 Tokanula ta Juda+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 27 ko lofulo l’anto wakafundjama nkombo lo dioho dia Juda laki nunu akumi esambele la nɛi la nkama shamalo (74 600).

28 Tokanula ta Isakara+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 29 ko lofulo l’anto wakafundjama nkombo lo dioho dia Isakara laki nunu akumi atanu la nɛi la nkama nyɛi (54 400).

30 Tokanula ta Zebuluna+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 31 ko lofulo l’anto wakafundjama nkombo lo dioho dia Zebuluna laki nunu akumi atanu l’esambele la nkama nyɛi (57 400).

32 Tokanula ta Yɔsɛfu lo tshimbo ya Efrayimɛ+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 33 ko lofulo l’anto wakafundjama nkombo lo dioho dia Efrayimɛ laki nunu akumi anɛi la nkama tshanu (40 500).

34 Tokanula ta Manase+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 35 ko lofulo l’anto wakafundjama nkombo lo dioho dia Manase laki nunu akumi asato la pende la nkama hiende (32 200).

36 Tokanula ta Bɛnjamina+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 37 ko lofulo l’anto wakafundjama nkombo lo dioho dia Bɛnjamina laki nunu akumi asato la tanu la nkama nyɛi (35 400).

38 Tokanula ta Danɛ+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 39 ko lofulo l’anto wakafundjama nkombo lo dioho dia Danɛ laki nunu akumi asamalo la pende la nkama esambele (62 700).

40 Tokanula ta Ashɛrɛ+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 41 ko lofulo l’anto wakafundjama nkombo lo dioho dia Ashɛrɛ laki nunu akumi anɛi l’ɔtɔi la nkama tshanu (41 500).

42 Tokanula ta Nafɛtali+ takafundjama nkombo onto l’onto lo lokombo lande, lo nkumbo kande ndo lo luudu la she. Apami tshɛ waki l’ɛnɔnyi oma lo 20 otsha la diko ndo wakakokaka nkamba olimu w’ɔsɔlayi wakadiema, 43 ko lofulo l’anto wakafundjama nkombo lo dioho dia Nafɛtali laki nunu akumi atanu la sato la nkama nyɛi (53 400).

44 Wasɔ mbakafundjama nkombo oma le Mɔsɛ nde la Arɔna kaamɛ la ewandji wa nkumbo 12 ya l’Isariyɛlɛ, onto l’onto lo ndjela luudu la she. 45 Ase Isariyɛlɛ tshɛ oma l’ɛnɔnyi 20 otsha la diko ndo wakakokaka nkamba olimu w’ɔsɔlayi wakafundjama nkombo onto l’onto lo ndjela luudu la she, 46 ko lofulo l’anto wakafundjama nkombo tshɛ tshɛ laki nunu nkama shamalo la sato la nkama tshanu l’akumi atanu (603 550).+

47 Koko ase Lɛwi+ kofundjama nkombo l’atei awɔ lo ndjela dioho dia washɛwɔ.+ 48 Ko Jehowa akatɛ Mɔsɛ ate: 49 “Onyake dioho dia Lɛwi mbahayakoke mfundja nkombo ndo tosanganyake lofulo lawɔ kaamɛ la ase Isariyɛlɛ+ akina. 50 Kosha ase Lɛwi ɔkɛndɛ wa tabɛrnaklɛ k’Ɔmɛnyi,+ wa diangɔ tshɛ diele lɔkɔ ndo wa kɛnɛ tshɛ kendana la tɔ.+ Vɔ mbayɛmbaka tabɛrnaklɛ la diangɔ diatɔ tshɛ+ ndo vɔ mbayokambaka lɔkɔ.+ Mpango kawɔ kayodingaka tabɛrnaklɛ.+ 51 Etena tshɛ kayohombaka tabɛrnaklɛ nsɛkɔ, ase Lɛwi mbahomba kikongola+ ndo naka etena ka memɛ tabɛrnaklɛ kambokoka, ase Lɛwi mbahomba kiemɛ. Onto tshɛ lele bu la lotshungɔ* layosukana pombaka ndjakema.+

52 “Ose Isariyɛlɛ tshɛ ayohombaka memɛ luudu lande la dipɛma lo mpango kakawawasha, onto l’onto lo ndjela olui awɔ+ wele la waoho 3 lo ndjela elui awɔ.* 53 Ase Lɛwi pombaka mbikaka mpango yawɔ l’otshimbedi wa tabɛrnaklɛ k’Ɔmɛnyi diaha dimi ndjomalɛ olui w’otondo w’ase Isariyɛlɛ.+ Ase Lɛwi pombaka monga l’ɔkɛndɛ wa nkokɛ* tabɛrnaklɛ k’Ɔmɛnyi.”+

54 Ase Isariyɛlɛ wakasale kɛnɛ tshɛ kakadjangɛ Jehowa Mɔsɛ. Vɔ wakasale kɛnɛ kakandawatɛ tshɛ lo tshɛ.

2 Jehowa akatɛ Mɔsɛ nde la Arɔna ate: 2 “Ase Isariyɛlɛ pombaka mbikaka mpango kawɔ lo dihole diakawasha+ olui awɔ wa waoho 3, onto l’onto sukana la djembetelo ya luudu la she. Vɔ pombaka mbidjasɛka mbɛlanɛ la luudu la dipɛma l’esanganelo, l’otshimbedi alɔ tshɛ.

3 “Olui wa waoho 3 walɔmbɔma oma le dioho dia Juda wayohangaka lo ɛstɛ lo ndjela elui* awɔ. Nashɔna+ ɔna Aminadaba kele owandji w’ana wa Juda. 4 Wanɛ wakafundjama nkombo l’olui ande w’asɔlayi wekɔ nunu akumi esambele la nɛi la nkama shamalo (74 600).+ 5 Dioho dia Isakara wayohangaka l’omamu ande. Netanɛlɛ+ ɔna Zuara kele owandji w’ana wa Isakara. 6 Wanɛ wakafundjama nkombo l’olui ande w’asɔlayi wekɔ nunu akumi atanu la nɛi la nkama nyɛi (54 400).+ 7 Oma laasɔ ko dioho dia Zebuluna. Eliyabɛ+ ɔna Helɔna kele owandji w’ana wa Zebuluna. 8 Wanɛ wakafundjama nkombo l’olui ande w’asɔlayi wekɔ nunu akumi atanu l’esambele la nkama nyɛi (57 400).+

9 “Wanɛ wakafundjama nkombo l’olui w’asɔlayi walɔmbɔma oma le dioho dia Juda wekɔ tshɛ tshɛ nunu lokama l’akumi enanɛi la samalo la nkama nyɛi (186 400). Vɔ mbayotshɔka ntondo.+

10 “Olui wa waoho 3 walɔmbɔma oma le dioho dia Rubɛna+ wayohangaka otsha lo sidɛ lo ndjela elui* awɔ. Elizura+ ɔna Shedeurɛ kele owandji w’ana wa Rubɛna. 11 Wanɛ wakafundjama nkombo l’olui ande w’asɔlayi wekɔ nunu akumi anɛi la samalo la nkama tshanu (46 500).+ 12 Dioho dia Simɛyɔna wayohangaka l’omamu ande. Shelumiyɛlɛ+ ɔna Zurishadai kele owandji w’ana wa Simɛyɔna. 13 Wanɛ wakafundjama nkombo l’olui ande w’asɔlayi wekɔ nunu akumi atanu la divwa la nkama shato (59 300).+ 14 Oma laasɔ ko dioho dia Ngada. Eliyasafu+ ɔna Ruɛlɛ* kele owandji w’ana wa Ngada. 15 Wanɛ wakafundjama nkombo l’olui ande w’asɔlayi wekɔ nunu akumi anɛi la tanu la nkama shamalo l’akumi atanu (45 650).+

16 “Wanɛ wakafundjama nkombo l’olui w’asɔlayi walɔmbɔma oma le dioho dia Rubɛna wekɔ tshɛ tshɛ nunu lokama l’akumi atanu l’ɔtɔi la nkama nyɛi l’akumi atanu (151 450). Vɔ mbayotshɔka lo dihole dia 2.+

17 “Etena tshɛ kayohombaka luudu la dipɛma l’esanganelo nsɛkɔ,+ mpango k’ase Lɛwi pombaka monga l’atei atei wa mpango nkina.

“Vɔ pombaka tatshɔka l’ɔnɔngɔ woho wadjasɛwɔ lo mpango,+ dioho la dioho lo dihole diawɔ, lo ndjela elui awɔ wa waoho 3.

18 “Olui wa waoho 3 walɔmbɔma oma le dioho dia Efrayimɛ wayohangaka otsha lo owɛstɛ lo ndjela elui* awɔ. Elishama+ ɔna Amihudɛ kele owandji w’ana wa Efrayimɛ. 19 Wanɛ wakafundjama nkombo l’olui ande w’asɔlayi wekɔ nunu akumi anɛi la nkama tshanu (40 500).+ 20 Dioho dia Manase+ mbayonga suke la nde. Ngamaliyɛlɛ+ ɔna Pedazura kele owandji w’ana wa Manase. 21 Wanɛ wakafundjama nkombo l’olui ande w’asɔlayi wekɔ nunu akumi asato la pende la nkama hiende (32 200).+ 22 Oma laasɔ ko dioho dia Bɛnjamina. Abidana+ ɔna Ngidiyɔni kele owandji w’ana wa Bɛnjamina. 23 Wanɛ wakafundjama nkombo l’olui ande w’asɔlayi wekɔ nunu akumi asato la tanu la nkama nyɛi (35 400).+

24 “Wanɛ wakafundjama nkombo l’olui w’asɔlayi walɔmbɔma oma le dioho dia Efrayimɛ wekɔ tshɛ tshɛ nunu lokama l’enanɛi la lokama (108 100). Vɔ mbayotshɔka lo dihole dia 3.+

25 “Olui wa waoho 3 walɔmbɔma oma le dioho dia Danɛ wayohangaka otsha lo nɔrdɛ lo ndjela elui* awɔ. Ahiyɛzɛrɛ+ ɔna Amishadai kele owandji w’ana wa Danɛ. 26 Wanɛ wakafundjama nkombo l’olui ande w’asɔlayi wekɔ nunu akumi asamalo la pende la nkama esambele (62 700).+ 27 Dioho dia Ashɛrɛ wayohangaka l’omamu ande. Pangiyɛlɛ+ ɔna Okarana kele owandji w’ana wa Ashɛrɛ. 28 Wanɛ wakafundjama nkombo l’olui ande w’asɔlayi wekɔ nunu akumi anɛi l’ɔtɔi la nkama tshanu (41 500).+ 29 Oma laasɔ ko dioho dia Nafɛtali. Ahira+ ɔna Enana kele owandji w’ana wa Nafɛtali. 30 Wanɛ wakafundjama nkombo l’olui ande w’asɔlayi wekɔ nunu akumi atanu la sato la nkama nyɛi (53 400).+

31 “Wanɛ wakafundjama nkombo l’olui w’asɔlayi walɔmbɔma oma le dioho dia Danɛ wekɔ tshɛ tshɛ nunu lokama l’akumi atanu l’esambele la nkama shamalo (157 600). Vɔ mbayotshɔka l’ekomelo+ lo ndjela elui awɔ wa waoho 3.”

32 Wasɔ mbele ase Isariyɛlɛ wakafundjama nkombo lo ndjela mvudu ya washɛwɔ. Lofulo la wanɛ wakafundjama nkombo l’olimu w’ɔsɔlayi laki tshɛ tshɛ nunu nkama shamalo la sato la nkama tshanu l’akumi atanu (603 550).+ 33 Koko ase Lɛwi kofundjama+ nkombo kaamɛ l’ase Isariyɛlɛ+ akina, oko wakadjangɛ Jehowa Mɔsɛ. 34 Ase Isariyɛlɛ wakasale kɛnɛ tshɛ kakadjangɛ Jehowa Mɔsɛ. Ngasɔ mbakawatahangaka lo ndjela elui+ awɔ wa waoho 3 ndo lo ndjela woho wakawatatshɔka,+ onto l’onto lo ndjela nkumbo kande ndo lo ndjela mvudu ya washɛwɔ.

3 Ɔnɛ mbele nkumbo ya lo ɔlɔndji* wa Arɔna nde la Mɔsɛ etena kakatɛkɛta Jehowa nde la Mɔsɛ lo Dikona dia Sinayi.+ 2 Nkombo y’ana w’apami w’Arɔna yɔ nyɛ: Nadaba kele enondo, ko Abihu,+ Eleazara+ la Itamara.+ 3 Ɔsɔ mbele nkombo y’ana w’apami w’Arɔna, ɛlɔmbɛdi wele akitami w’esɔ ndo wakalowɔma* dia nkamba oko ɛlɔmbɛdi.+ 4 Koko Nadaba nde la Abihu wakavu la ntondo ka Jehowa etena kakawalambola Jehowa+ olambo wakiwɔ komonga la lotshungɔ la nambola lam’akiwɔ l’oswe wa Sinayi, ndo vɔ kombota ndooko ɔna. Ko Eleazara+ nde la Itamara+ wakatetemala nkamba oko ɛlɔmbɛdi vɔ la shɛwɔ Arɔna.

5 Ko Jehowa akatɛ Mɔsɛ ate: 6 “Tondja dioho dia Lɛwi+ la ntondo kele emadiawɔ la ntondo ka ɔlɔmbɛdi Arɔna dia vɔ mbokambɛka.+ 7 Vɔ wayokotshaka ɛkɛndɛ awɔ wendana la nde ndo wendana la olui tshɛ w’ase Isariyɛlɛ la ntondo ka luudu la dipɛma l’esanganelo lo kambaka olimu awɔ wendana la tabɛrnaklɛ. 8 Vɔ mbahomba namaka diangɔ tshɛ+ diendana la luudu la dipɛma l’esanganelo ndo vɔ pombaka kotshaka ɛkɛndɛ awɔ wendana la ase Isariyɛlɛ lo kambaka elimu wendana la tabɛrnaklɛ.+ 9 Kosha Arɔna nde l’anande w’apami ase Lɛwi. Vɔ wekɔ akimɔmi wakakimɔma le nde oma l’atei w’ase Isariyɛlɛ.+ 10 Kahɛ Arɔna nde l’anande w’apami anya dia vɔ kambaka elimu+ awɔ w’ɔlɔmbɛdi, ndo onto tshɛ lele bu la lotshungɔ* layosukana pombaka ndjakema.”+

11 Jehowa akatetemala mbutɛ Mɔsɛ ate: 12 “Eenda, dimi lambɔsa ase Lɛwi oma l’atei w’ase Isariyɛlɛ lo dihole di’ana wa nondo* tshɛ w’ase Isariyɛlɛ.+ Ase Lɛwi wayonga wami. 13 Nɛ dia ɔna enondo tshɛ ekɔ lakimi.+ Dimi lakakidia ana wa nondo tshɛ w’anto ndo wa nyama+ wa l’Isariyɛlɛ lushi lakamadiake ana wa nondo tshɛ wa lo wodja w’Edjibito.+ Vɔ pombaka monga wami. Dimi kele Jehowa.”

14 Jehowa akatɛ Mɔsɛ nto l’oswe wa Sinayi+ ate: 15 “Fundja nkombo y’ana w’apami w’ase Lɛwi lo ndjela mvudu ya washɛwɔ ndo nkumbo yawɔ. Kofundja nkombo y’ana w’apami wele la ngɔndɔ 1 otsha la diko.”+ 16 Ko Mɔsɛ akaafundja nkombo lo ndjela kɛnɛ kakawotɛ Jehowa, oko wakandawodjangɛ. 17 Nkombo y’ana w’apami wa Lɛwi yɔ nyɛ: Ngɛrɛshɔna, Kɔhata ndo Merari.+

18 Nkombo y’ana w’apami wa Ngɛrɛshɔna lo ndjela nkumbo yawɔ yɔ nyɛ: Libini nde la Shimei.+

19 Ana w’apami wa Kɔhata lo ndjela nkumbo yawɔ vɔ anɛ: Amurama, Izɛhara, Hɛbɛrɔna ndo Uziyɛlɛ.+

20 Ana w’apami wa Merari lo ndjela nkumbo yawɔ vɔ anɛ: Mahili+ nde la Mushi.+

Wasɔ mbele nkumbo y’ase Lɛwi lo ndjela mvudu ya washɛwɔ.

21 Oma le Ngɛrɛshɔna mbakatombe nkumbo k’aseka Libini+ ndo nkumbo k’aseka Shimei. Wasɔ mbele nkumbo y’aseka Ngɛrɛshɔna. 22 Apami awɔ wele la ngɔndɔ 1 otsha la diko wakafundjama nkombo waki tshɛ tshɛ nunu esambele la nkama tshanu (7 500).+ 23 Nkumbo y’aseka Ngɛrɛshɔna wakahangaka l’ɔkɔngɔ wa tabɛrnaklɛ+ otsha lo owɛstɛ. 24 Eliyasafu ɔna Laɛlɛ kaki owandji wa nkumbo ya l’olui w’aseka Ngɛrɛshɔna. 25 Ɔkɛndɛ w’ana w’apami w’aseka Ngɛrɛshɔna+ lo luudu la dipɛma l’esanganelo aki wa kokɛka tabɛrnaklɛ la luudu la dipɛma,+ okombɔ+ alɔ, dihɔndɔ di’okombɔ+ dia la soko dia luudu la dipɛma l’esanganelo, 26 ahɔndɔ w’okombɔ+ wahanema lo lokombo, dihɔndɔ di’okombɔ+ dia la soko dia lokombo lodingi tabɛrnaklɛ la elambwelo, ɛkɔdi wa dipɛma ndo elimu tshɛ wendana la diangɔ sɔ.

27 Oma le Kɔhata mbakatombe nkumbo k’aseka Amurama, nkumbo k’aseka Izɛhara, nkumbo k’aseka Hɛbɛrɔna ndo nkumbo k’aseka Uziyɛlɛ. Wasɔ mbele nkumbo y’aseka Kɔhata.+ 28 Apami awɔ wele la ngɔndɔ 1 otsha la diko waki tshɛ tshɛ nunu enanɛi la nkama shamalo (8 600). Vɔ mbaki la ɔkɛndɛ wa namaka dihole di’ekila.+ 29 Nkumbo y’ana wa Kɔhata wakahangaka lo lɛkɛ la sidɛ la tabɛrnaklɛ.+ 30 Elizafana ɔna Uziyɛlɛ+ kaki owandji wa nkumbo ya l’olui w’aseka Kɔhata. 31 Ɔkɛndɛ awɔ aki wa namaka Ɔshɛtɛ,+ mɛsa,+ ekundji ka tala,+ dilambwelo,+ diangɔ+ dia lo dihole di’ekila diakawakambaka la diɔ olimu ndo dihɔndɔ di’okombɔ+ kaamɛ la elimu tshɛ wendana la diangɔ sɔ.+

32 Eleazara+ ɔna ɔlɔmbɛdi Arɔna kaki owandji w’ase Lɛwi. Nde kaki omendji wa wanɛ waki la ɛkɛndɛ lo dihole di’ekila.

33 Oma le Merari mbakatombe nkumbo k’aseka Mahili ndo nkumbo k’aseka Mushi. Wasɔ mbele nkumbo y’aseka Merari.+ 34 Apami awɔ wele la ngɔndɔ 1 otsha la diko wakafundjama nkombo waki tshɛ tshɛ nunu samalo la nkama hiende (6 200).+ 35 Zuriyɛlɛ ɔna Abihayilɛ kaki owandji wa nkumbo ya l’olui w’aseka Merari. Vɔ wakahangaka lo lɛkɛ la nɔrdɛ la tabɛrnaklɛ.+ 36 Ana w’apami waki Merari mbaki la ɔkɛndɛ wa namaka kadrɛma+ ya lo tabɛrnaklɛ, esembe+ atɔ, dikundji+ diatɔ, dikitshelo diadiɔ diele l’afuku, diangɔ diatɔ tshɛ+ ndo elimu tshɛ wendana la diangɔ sɔ,+ 37 mbidja ndo dikundji tshɛ dia lo lokombo ndo dikitshelo+ diadiɔ diele l’afuku, wekɔ wa lo luudu la dipɛma ndo ɛkɔdi wa dipɛma.

38 Mɔsɛ la Arɔna nde l’anande w’apami mbakahangaka la ntondo ka tabɛrnaklɛ otsha lo ɛstɛ, mbuta ate la ntondo ka luudu la dipɛma l’esanganelo lo ɛstɛ. Vɔ mbaki la ɔkɛndɛ wa namaka tɛmpɛlɔ k’ekila ndo ɔsɔ mbaki ɔkɛndɛ awɔ lo wahɔ w’ase Isariyɛlɛ. Onto tshɛ laki komonga la lotshungɔ* lakasukanaka akahombe ndjakema.+

39 Apami tshɛ w’ase Lɛwi oma lo ngɔndɔ 1 otsha la diko wele Mɔsɛ nde l’Arɔna wakaafundja nkombo lo ndjela nkumbo yawɔ lo ndjela kɛnɛ kakawatɛ Jehowa waki nunu akumi ahende la pende (22 000).

40 Oma laasɔ, Jehowa akatɛ Mɔsɛ ate: “Fundja ana wa nondo tshɛ w’apami w’ase Isariyɛlɛ nkombo oma lo ngɔndɔ 1 otsha la diko,+ adiawɔ ndo funda nkombo yawɔ. 41 Kɔmbɔsɛ ase Lɛwi lo dihole di’ana wa nondo tshɛ w’ase Isariyɛlɛ+ ndo kɔshi dongalonga di’ase Lɛwi lo dihole dia nyama tshɛ yotɔ ntondo l’atei wa dongalonga di’ase Isariyɛlɛ.+ Dimi kele Jehowa.” 42 Ko Mɔsɛ akafundja nkombo y’ana wa nondo tshɛ w’ase Isariyɛlɛ oko wakawodjangɛ Jehowa. 43 Lofulo l’ana wa nondo tshɛ w’apami oma lo ngɔndɔ 1 otsha la diko wakafundjama nkombo aki nunu akumi ahende la pende la nkama hiende l’akumi esambele l’asato (22 273).

44 Jehowa akatetemala mbutɛ Mɔsɛ ate: 45 “Ɔsa ase Lɛwi lo dihole di’ana wa nondo tshɛ w’ase Isariyɛlɛ ndo ɔsa dongalonga di’ase Lɛwi lo dihole dia dongalonga diawɔ. Ase Lɛwi pombaka monga wami. Dimi kele Jehowa. 46 Lo kɛnɛ kendana la oshinga w’etshungwelo+ w’ana wa nondo 273 w’ase Isariyɛlɛ wahema laadiko dia lofulo l’ase Lɛwi,+ 47 kɔshi tɔshɛkɛlɛ* 5 dikambo di’onto l’onto+ lo ndjela yɛdikɔ ya shɛkɛlɛ ya lo dihole di’ekila.* Shɛkɛlɛ 1 ekɔ la ngera*+ 20. 48 Kokimɔ falanga yakɔ le Arɔna nde l’anande w’apami oko oshinga w’etshungwelo dikambo dia wanɛ wahema laadiko lo ndjela lofulo lawɔ.” 49 Ko Mɔsɛ akɔshi falanga y’oshinga w’etshungwelo oma le wanɛ wakahema laadiko dia oshinga w’etshungwelo w’ase Lɛwi. 50 Nde akɔshi falanga oma le ana wa nondo w’ase Isariyɛlɛ, tɔshɛkɛlɛ kinunu la nkama shato l’akumi asamalo la totanu (1 365) lo ndjela yɛdikɔ ya shɛkɛlɛ ya lo dihole di’ekila. 51 Ko Mɔsɛ akasha Arɔna nde l’anande w’apami falanga y’oshinga w’etshungwelo oko wakate Jehowa, oko wakadjangɛ Jehowa Mɔsɛ.

4 Jehowa akatɛ Mɔsɛ nde l’Arɔna ate: 2 “Nyofundja nkombo y’ana w’apami wa Kɔhata+ oma l’atei w’ana w’apami wa Lɛwi lo ndjela nkumbo yawɔ ndo lo ndjela mvudu ya washɛwɔ, 3 wanɛ tshɛ wele la ɛnɔnyi+ oma lo 30+ polo 50 wele l’olui wa wanɛ wakalongola ɔkɛndɛ wa kambaka lo luudu la dipɛma l’esanganelo.+

4 “Ɔnɛ ele olimu w’ana w’apami wa Kɔhata lo luudu la dipɛma l’esanganelo.+ Ɔsɔ ekɔ ɛngɔ koleki ekila: 5 Arɔna nde l’anande w’apami wayɔtɔka l’etei etena kayonɛɛka ase Isariyɛlɛ oma lo dihole dimɔtshi otsha lo dikina ndo wayoholoyaka dihɔndɔ di’okombɔ+ ko vɔ nkomba ɔshɛtɛ+ w’Ɔmɛnyi wele lɔkɔ. 6 Vɔ wayofɛ okombɔ wa la ekoho ka nyama ka fɔkɛ laadiko diawɔ ndo nsandjola dihɔndɔ dia wolo dia bule laadiko diawɔ, ko vɔ ndjodja esembe+ wa mɛmba lɔkɔ.

7 “Kawosandjole ndo dihɔndɔ dia bule laadiko dia mɛsa wele la mapa wa lɛɛnya+ ndo kawokitsha alɔnga w’akale, akɔhɔ, alɔnga w’afuku ndo mbidika y’awomba yele la olambo wa lotɛ.+ Olambo wa mapa+ wakimɔma mbala la mbala pombaka monga lɔkɔ. 8 Kawofe dihɔndɔ dia beela k’efula laadiko diawɔ ndo kawokombe okombɔ wa la ekoho ka nyama ka fɔkɛ laadiko, ko vɔ mbidja esembe+ wa mɛmba lɔkɔ. 9 Oma laasɔ, kawɔshi dihɔndɔ dia bule, ko vɔ nkomba ekundji ka tala+ kaamɛ la atala+ atɔ, manu yatɔ, diangɔ dia mɛmbaka dja+ ndo diangɔ diatɔ tshɛ dia mbidjaka esɔ kakamba la wɔ dia mbidjaka lo atala. 10 Kawokiɔmbɛ la diangɔ diatɔ tshɛ la okombɔ wa la ekoho ka nyama ka fɔkɛ, ko vɔ mbidja osembe wa mɛmba lɔkɔ. 11 Ndo kawosandjole dihɔndɔ dia bule laadiko dia elambwelo ka paonyi,+ kawokombe okombɔ wa la ekoho ka nyama ka fɔkɛ laadiko diatɔ ndo kawodje esembe+ wa mɛmba lɔkɔ. 12 Oma laasɔ, kawɔshi diangɔ+ tshɛ di’olimu diatowokambaka la diɔ mbala la mbala lo dihole di’ekila ndo kawodidje lo dihɔndɔ dia bule ko vɔ nkomba okombɔ wa la ekoho ka nyama ka fɔkɛ, ko vɔ mbidja osembe wa mɛmba lɔkɔ.

13 “Kawonya otoko* oma lo elambwelo+ ko vɔ nsandjola dihɔndɔ di’ebelabela laadiko diatɔ. 14 Kawokitsha diangɔ tshɛ diatowokambaka la diɔ lo elambwelo laadiko diadiɔ: Diangɔ dia mɛmbaka dja, nsɔmɔ, mpawo, alɔnga w’afuku, diangɔ tshɛ diendana la elambwelo.+ Kawosandjole ndo okombɔ wele la ekoho ka nyama ka fɔkɛ laadiko diatɔ, ko vɔ mbidja esembe+ wa mɛmba lɔkɔ.

15 “Arɔna nde l’anande w’apami mbahomba nshidiya nkomba dihole di’ekila+ la diangɔ tshɛ dia lo dihole di’ekila etena kayowonɛɛka. Oma laasɔ, ana w’apami wa Kɔhata wayɔtɔ l’etei dia diɛmba,+ koko vɔ hawohombe nsakanya diangɔ dia lo dihole di’ekila, watokovɔ.+ Ɔsɔ mbele ɛkɛndɛ* w’ana w’apami wa Kɔhata wendana la luudu la dipɛma l’esanganelo.

16 “Eleazara+ ɔna ɔlɔmbɛdi Arɔna kele la ɔkɛndɛ wa mendaka esɔ ka tala,+ tshɔ y’opumu,+ olambo wa ntɔngɔ wa mbala la mbala ndo esɔ+ k’okitelo. Nde kahomba mendaka tabɛrnaklɛ k’otondo la diangɔ tshɛ diele lɔkɔ, mbidja ndo dihole di’ekila la diangɔ diadiɔ.”

17 Jehowa akatɛ Mɔsɛ nde l’Arɔna nto ate: 18 “Tanyetawɔke dia dioho dia nkumbo y’aseka Kɔhata+ nshishɔ oma l’atei w’ase Lɛwi. 19 Koko kanyowasale awui wayela anɛ dia vɔ ntshikala la lɔsɛnɔ ndo diaha vɔ mvɔ naka wambosukana la diangɔ+ dioleki ekila: Arɔna nde l’anande w’apami kawɔtɔ lɔkɔ kele kawoshake onto l’onto olimu ande ndo diangɔ diahombande mɛmba. 20 Vɔ hawohombe mbɔtɔ l’etei dia ndjɛna diangɔ di’ekila kaanga lo tshanda ya tshitshɛ, diaha vɔ mvɔ.”+

21 Oma laasɔ, Jehowa akatɛ Mɔsɛ ate: 22 “Kadia ana w’apami wa Ngɛrɛshɔna+ lo ndjela mvudu ya washɛwɔ ndo nkumbo yawɔ. 23 Kofundja nkombo ya wanɛ tshɛ wele la ɛnɔnyi oma lo 30 polo 50 wele l’olui wakalongola ɔkɛndɛ wa nkamba lo luudu la dipɛma l’esanganelo. 24 Ɔnɛ mbele diangɔ diayolamaka ndo diayɛmbaka+ nkumbo y’aseka Ngɛrɛshɔna: 25 Vɔ mbayɛmbaka ahɔndɔ w’apɛma wa lo tabɛrnaklɛ,+ luudu la dipɛma l’esanganelo, ekombɔ alɔ ndo okombɔ wele laadiko diawɔ+ wa la ekoho ka nyama ka fɔkɛ, dihɔndɔ di’okombɔ dia la soko dia luudu la dipɛma l’esanganelo,+ 26 ahɔndɔ w’okombɔ wahanema lo lokombo,+ dihɔndɔ di’okombɔ dia la soko dia lokombo+ lodingi tabɛrnaklɛ la elambwelo, ɛkɔdi awɔ w’apɛma ndo diangɔ dia lɔkɔ tshɛ diakamba la wɔ olimu. Ɔsɔ mbele ɔkɛndɛ awɔ. 27 Arɔna nde l’anande w’apami mbayendaka elimu tshɛ ndo ɛkɛndɛ tshɛ w’aseka Ngɛrɛshɔna.+ Kowasha eshikɔ ɛsɔ tshɛ oko ɔkɛndɛ awɔ. 28 Ɔsɔ kele olimu wayokambaka nkumbo y’aseka Ngɛrɛshɔna lo luudu la dipɛma l’esanganelo+ ndo vɔ wayokambaka elimu awɔ lo ɛlɔmbwɛlɔ ka Itamara+ ɔna ɔlɔmbɛdi Arɔna.

29 “Lo kɛnɛ kendana l’ana w’apami wa Merari,+ kowafundja nkombo lo ndjela nkumbo kawɔ ndo lo ndjela luudu la shɛwɔ. 30 Kofundja nkombo ya wanɛ wele la ɛnɔnyi oma lo 30 polo 50, wanɛ tshɛ wele l’olui wa wanɛ wele la ɔkɛndɛ wa kambaka lo luudu la dipɛma l’esanganelo. 31 Diangɔ diendana l’olimu awɔ wa lo luudu la dipɛma l’esanganelo diewɔ la ɔkɛndɛ wa mɛmbaka+ diɔ nɛ: Kadrɛma+ ya tabɛrnaklɛ, esembe atɔ,+ dikundji diatɔ,+ dikitshelo diadiɔ diele l’afuku,+ 32 dikundji+ dia lo lokombo, dikitshelo diadiɔ diele l’afuku,+ wekɔ ndo ɛkɔdi w’apɛma+ kaamɛ la diangɔ diadiɔ tshɛ ndo elimu tshɛ wendana la diangɔ sɔ. Kote onto l’onto lo lokombo lande ɛngɔ kende la ɔkɛndɛ wa mɛmbaka. 33 Ngasɔ mbayokambaka nkumbo y’ana w’apami wa Merari+ lo luudu la dipɛma l’esanganelo lo ɛlɔmbwɛlɔ ka Itamara ɔna ɔlɔmbɛdi+ Arɔna.”

34 Ko Mɔsɛ nde l’Arɔna kaamɛ l’ewandji+ w’olui w’anto wakafundja ana wa Kɔhata+ nkombo lo ndjela nkumbo yawɔ ndo lo ndjela luudu la shɛwɔ, 35 wanɛ tshɛ waki la ɛnɔnyi oma lo 30 polo 50 waki l’olui wa wanɛ wele la ɔkɛndɛ wa kambaka lo luudu la dipɛma l’esanganelo.+ 36 Lofulo la wanɛ wakafundjama nkombo lo ndjela nkumbo yawɔ aki tshɛ tshɛ nunu pende la nkama esambele l’akumi atanu (2 750).+ 37 Wasɔ mbakafundjama nkombo lo nkumbo y’aseka Kɔhata, wanɛ tshɛ wakakambaka lo luudu la dipɛma l’esanganelo. Mɔsɛ nde l’Arɔna wakaafundja nkombo lo ndjela didjango diakadjɛ Jehowa Mɔsɛ.+

38 Ana w’apami wa Ngɛrɛshɔna+ wakafundjama nkombo lo ndjela nkumbo yawɔ ndo lo ndjela luudu la shɛwɔ, 39 wanɛ tshɛ waki la ɛnɔnyi oma lo 30 polo 50 waki l’olui wa wanɛ waki la ɔkɛndɛ wa nkamba lo luudu la dipɛma l’esanganelo. 40 Lofulo la wanɛ wakafundjama nkombo lo ndjela nkumbo yawɔ ndo lo ndjela luudu la shɛwɔ aki tshɛ tshɛ nunu pende la nkama shamalo l’akumi asato (2 630).+ 41 Ɔsɔ mbaki ofundjelo wa nkombo ya lo nkumbo y’ana w’apami wa Ngɛrɛshɔna, wanɛ tshɛ wakakambaka lo luudu la dipɛma l’esanganelo. Mɔsɛ nde l’Arɔna mbakaafundja nkombo lo ndjela didjango dia Jehowa.+

42 Ana w’apami wa Merari wakafundjama nkombo lo ndjela nkumbo yawɔ ndo lo ndjela luudu la shɛwɔ, 43 wanɛ tshɛ waki la ɛnɔnyi oma lo 30 polo 50 waki l’olui wa wanɛ waki la ɔkɛndɛ wa nkamba lo luudu la dipɛma l’esanganelo.+ 44 Wanɛ wakafundjama nkombo lo ndjela nkumbo yawɔ waki tshɛ tshɛ nunu sato la nkama hiende (3 200).+ 45 Ɔsɔ mbaki ofundjelo wa nkombo ya lo nkumbo y’ana w’apami wa Merari, wanɛ wele Mɔsɛ nde l’Arɔna wakaafundja nkombo lo ndjela kɛnɛ kakadjanga Jehowa lo tshimbo ya Mɔsɛ.+

46 Mɔsɛ nde l’Arɔna kaamɛ l’ewandji wa l’Isariyɛlɛ wakafundja ase Lɛwi asɔ tshɛ nkombo lo ndjela nkumbo yawɔ ndo lo ndjela mvudu ya washɛwɔ. 47 Vɔ waki la ɛnɔnyi oma lo 30 polo 50 ndo vɔ tshɛ waki la ɔkɛndɛ wa nkamba lo luudu la dipɛma l’esanganelo+ ndo mɛmba diangɔ dia lɔkɔ. 48 Wanɛ wakafundjama nkombo waki tshɛ tshɛ nunu enanɛi la nkama tshanu l’akumi enanɛi (8 580).+ 49 Vɔ wakafundjama nkombo lo ndjela kɛnɛ kakadjanga Jehowa lo tshimbo ya Mɔsɛ, onto l’onto lo ndjela olimu wakawawosha ndo ɔkɛndɛ ande. Vɔ wakafundjama nkombo oko wakadjangɛ Jehowa Mɔsɛ.

5 Jehowa akatɛ Mɔsɛ nto ate: 2 “Djangɛ ase Isariyɛlɛ dia vɔ ntondja onto tshɛ lele la sudi l’andja wa mpango,+ onto tshɛ lele la ɛkɛlɛlɔ+ ndo onto tshɛ lamboyadja mindo lo nsakanya odo w’onto.*+ 3 Oyadi pami kana womoto nyu pombaka mbotondja l’andja wa mpango diaha nde ndjosambiya+ anto wele lo mpango wele dimi lekɔ lo mbidjasɛ l’atei awɔ.”+ 4 Ko ase Isariyɛlɛ wakasale ngasɔ ndo wakaatondja l’andja wa mpango. Ase Isariyɛlɛ wakasale kɛnɛ tshɛ kakatɛ Jehowa Mɔsɛ.

5 Jehowa akatetemala mbutɛ Mɔsɛ ate: 6 “Tɛ ase Isariyɛlɛ wate: ‘Naka pami kana womoto ambosala woho ɔmɔtshi wa pɛkato katosalaka onto ko amboshisha kɔlamelo le Jehowa, onto* ɔsɔ aya la onongo.+ 7 Nde* pombaka mbishola+ pɛkato kakandasale* ndo mfuta oshinga tshɛ w’onongo ande ko nde nkotsha ndo k’atanu ɔtɔi k’oshinga+ akɔ. Nde kasha ɔnɛ lakandasalɛ kɔlɔ diangɔ sɔ. 8 Ko naka onto lakandasalɛ kɔlɔ akavu, ko nde bu la owotɔ wa suke suke wakoka nongola oshinga akɔ, kete Jehowa kayolongola ndo vɔ wayonga waki ɔlɔmbɛdi, onyake ɔkɔkɔ w’omi w’ekombelo ka pɛkato wayondokomba pɛkato y’onto akɔ.+

9 “‘Woshasha tshɛ+ w’ekila w’oma le ase Isariyɛlɛ wakimɔma le ɔlɔmbɛdi wayongaka wande.+ 10 Diangɔ di’ekila diakimɔ onto tshɛ diayongaka diande. Kɛnɛ tshɛ kakimɔ onto le ɔlɔmbɛdi kayongaka kaki ɔlɔmbɛdi.’”

11 Jehowa akatɛ Mɔsɛ ate: 12 “Sawola l’ase Isariyɛlɛ kele tɛwɔ wate: ‘Naka womoto lotshukami ambotakɔ mboka ndo amboshisha kɔlamelo le omɛnde 13 ndo ambeyana+ la pami kekina ko omɛnde heyi ndo dui diakɔ hadeyami, koko nde akayadje mindo ko ndooko onto lakɛnyi ndo hawowondji tshu, kete kanyosale nganɛ: 14 Naka omɛnde ekɔ la kandjema ndo ɔfɔnya dia wadɛnde amboshisha kɔlamelo ko mɛtɛ wadɛnde akayadje mindo, kana naka nde ekɔ la kandjema ndo ɔfɔnya dia wadɛnde amboshisha kɔlamelo ko tete le wadɛnde hayadjisha mindo, 15 pami kakɔ pombaka mbela wadɛnde kaamɛ la olambo wa wadɛnde le ɔlɔmbɛdi, etenyi ka dikumi ka efa* wa shima k’asami. Nde hahombe mbidja esɔ kana tshɔ ya wɛma lɔkɔ, nɛ dia ɔsɔ ekɔ olambo wa ntɔngɔ wendana la kandjema, olambo wa ntɔngɔ wohola onongo.

16 “‘Ɔlɔmbɛdi ayotondja womoto akɔ la ntondo ko nde mbeemadia la ntondo ka Jehowa.+ 17 Ɔlɔmbɛdi ayɔsa ashi w’ekila lo ɛngɔ ka diwomba ndo ɔlɔmbɛdi ayɔsa yema ya ditshu di’oma l’odihe wa tabɛrnaklɛ ko nde mbidja lo ashi akɔ. 18 Ko ɔlɔmbɛdi ayemadia womoto akɔ la ntondo ka Jehowa, ayɛlɔla womoto akɔ divo ndo ayodja olambo wa ntɔngɔ lo awambo ande dia mboohola, mbuta ate olambo wa ntɔngɔ wendana la kandjema.+ Ɔlɔmbɛdi konge la ashi w’ololo wela mananu+ lo lonya lande.

19 “‘Oma laasɔ, ɔlɔmbɛdi ayotshibia womoto akɔ lo mbotɛ ate: “Naka ndooko pami kekina kakeyana la yɛ etena kakiyɛ l’ɛse ka lowandji l’omɛyɛ+ ndo naka wɛ kotakɔ mboka kana ndjadja mindo, kete ashi w’ololo wela mananu hawotonga la shɛngiya le yɛ. 20 Ko naka wɛ akatakɔ mboka etena keyɛ l’ɛse ka lowandji l’omɛyɛ lo ndjadja mindo ndo naka wɛ akeyana la pami kekina+ laadiko di’omɛyɛ . . .” 21 Ko ɔlɔmbɛdi ayotshibia womoto akɔ etshibelo kele la mananu ndo ɔlɔmbɛdi ayotɛ womoto akɔ ate: “Jehowa aketɛ ɛnyɛlɔ le anto akina etena kadjawɔ mananu ndo katshibawɔ. Naka wɛ akasale dui nɛ, Jehowa ongole* ɛhɛlɔhɛlɔ* kayɛ ndo asale dia dikundju diayɛ mbida. 22 Ashi anɛ wela mananu wayɔtɔ lo ɛsɔhi ayɛ dia dikundju diayɛ mbida ndo mongola* ɛhɛlɔhɛlɔ* kayɛ.” Womoto akɔ pombaka mbuta ate: “Aamɛɛ! Aamɛɛ!”*

23 “‘Oma laasɔ, ɔlɔmbɛdi pombaka mfunda mananu shɔ lo dibuku ko nde ndjidimola la ashi w’ololo. 24 Ko nde nɔsha womoto akɔ ashi w’ololo wela mananu ndo ashi wela mananu wayɔtɔ lo dikundju dia womoto akɔ ko wayowosha paa. 25 Oma laasɔ, ɔlɔmbɛdi kɔshi olambo wa ntɔngɔ wendana la kandjema+ oma l’awambo wa womoto akɔ, ko nde mbetshetsha olambo wa ntɔngɔ lɛnɛ la lɛnɛ la ntondo ka Jehowa ko nde ntɔla suke la elambwelo. 26 Ɔlɔmbɛdi ayɔsa diwambo di’olambo wa ntɔngɔ oko didjidji di’olambo w’otondo ko nde ndjitshumba lo elambwelo.+ L’ɔkɔngɔ wa laasɔ, nde ayɔnɔsha womoto akɔ ashi akɔ. 27 Lam’ayondɔɔnɔsha ashi, naka womoto akɔ akayadje mindo ndo akashisha kɔlamelo otsha le omɛnde, kete ashi wela mananu wayɔtɔ lo dikundju diande, ko wayonga ɛngɔ kasha paa ndo dikundju diande diayoda, ɛhɛlɔhɛlɔ* kande kayongɔ* ndo anto wayodimolaka womoto akɔ etena katshibawɔ. 28 Ko naka womoto akɔ kondjadja mindo ndo ekɔ pudipudi, kete nde hatolongola dilanya dia ngasɔ. Nde ayonga la akoka wa ntshɔ diemi ndo ayota.

29 “‘Ɔsɔ kele ɔlɛmbɛ wendana la kandjema+ naka womoto ambotakɔ mboka ndo amboyadja mindo etena kende l’ɛse ka lowandji l’omɛnde, 30 kana naka pami ambonga la kandjema ndo ambɔfɔnya dia wadɛnde amboshisha kɔlamelo. Nde pombaka memadia wadɛnde la ntondo ka Jehowa ndo ɔlɔmbɛdi pombaka ndjela awui tshɛ wendana la ɔlɛmbɛ ɔnɛ. 31 Pami hatonga la onongo, koko wadɛnde ayolongola dilanya l’ɔtɛ w’onongo ande.’”

6 Jehowa akatɛ Mɔsɛ nto ate: 2 “Sawola l’ase Isariyɛlɛ kele tɛwɔ wate: ‘Naka pami kana womoto ambotshika dɔkɔlɔkɔ dia laande dia nsɛna oko Okidiami*+ dikambo dia Jehowa, 3 nde pombaka mbewɔ ɔnwɛlɔ wa vinyɔ kana wanu akina wadjoya. Nde hahombe nnɔ wanu w’okayi w’oma lo vinyɔ kana wanu w’okayi tshɛ wadjoya.+ Nde hahombe nnɔ ɛnɔnɔ tshɛ kakasalema la elowa wa vinyɔ kana ndɛ elowa wa vinyɔ, oyadi w’eyoyo kana wamboma. 4 Nshi tshɛ yende Okidiami nde hahombe ndɛ ɛngɔ tshɛ k’oma l’ɔkɔdi wa vinyɔ, oyadi elowa wahatɛlɛ kana mposo.

5 “‘Nshi tshɛ yende lo dɔkɔlɔkɔ diande di’Okidiami, ɛrɛswara hawohombe mbeta lo ɔtɛ ande.+ Nde pombaka ntshikala ekila lo ntshika divo diande mbola polo lam’ayoshila nshi yakandakitshama laande dikambo dia Jehowa. 6 Nde hahombe nsukana l’onto* lambovɔ lo nshi yakandayanganya dikambo dia Jehowa. 7 Oyadi kaanga she kana nyango kana ɔnango kana kadiyɛnde kovwe, nde hahombe ndjadja mindo,+ nɛ dia djembetelo ya woho wende Okidiami wa Nzambi kande yekɔ l’ɔtɛ ande.

8 “‘Nde ekɔ ekila le Jehowa nshi tshɛ yende Okidiami. 9 Ko naka onto ɔmɔtshi ambovɔ la shashimoya suke la nde,+ ko nde ambodja divo diande diele djembetelo ya ndjanganya kande dikambo dia Nzambi mindo,* nde pombaka minya divo+ lushi layondoshikikɛ wɛdiamelo ande. Lushi la 7 kahombande dinya. 10 Lushi la 8, nde pombaka mbela benga 2 kana tokudumba 2 le ɔlɔmbɛdi la soko dia luudu la dipɛma l’esanganelo. 11 Ɔlɔmbɛdi ayɔlɔngɔsɔla mɔtshi oko olambo wa pɛkato ndo kina oko olambo wa lotshumba ndo ayokomba pɛkato+ kande kendana la odo w’onto.* Oma laasɔ, nde pombaka nkidia ɔtɛ ande lushi lakɔ. 12 Nde pombaka ndjanganya nto dikambo dia Jehowa lo nshi yende Okidiami, ndo nde pombaka mbela ɔsɔngɔ w’ɔkɔkɔ w’omi wele la ɔnɔnyi 1 oko olambo w’onongo. Koko nshi yambeta hayotadiema nɛ dia nde ambodja okidiamelo ande mindo.

13 “‘Ɔlɛmbɛ wendana la Okidiami vɔ ɔnɛ: Lam’ayondoshidiyaka nshi y’okidiamelo ande,+ wayowɔtɔla la soko dia luudu la dipɛma l’esanganelo. 14 Lɛkɔ kahombande tɔlɛ Jehowa elambo ɛnɛ: Ɔsɔngɔ w’ɔkɔkɔ w’omi wele la ɔnɔnyi 1 waha la ɛkɔmɔ oko olambo wa lotshumba,+ ɔkɔkɔ wa wadi waha la ɛkɔmɔ wele l’ɔnɔnyi 1 oko olambo wa pɛkato,+ ɔkɔkɔ w’omi waha la ɛkɔmɔ oko olambo w’osanga,+ 15 saka dia mapa w’ebolonga waha la wodoya wosalemi la ofushi wa dimɛna ndo wɔsɔhanyemi la esɔ, mapa wa tɔlɛwɛlɛwɛ waha la wodoya wokitshiwɔ esɔ ndo elambo awɔ wa ntɔngɔ+ kaamɛ la elambo awɔ wa lotɛ.+ 16 Ɔlɔmbɛdi kaye la diangɔ sɔ la ntondo ka Jehowa, ko nde nambola olambo ande wa pɛkato ndo olambo ande wa lotshumba. 17 Nde kalambole Jehowa ɔkɔkɔ w’omi kaamɛ la saka dia mapa waha la wodoya oko olambo w’osanga. Ɔlɔmbɛdi kalambole olambo awɔ wa ntɔngɔ+ ndo olambo awɔ wa lotɛ.

18 “‘Oma laasɔ, Okidiami pombaka minya divo dia l’ɔtɛ+ ande diakinde kominyaka* la soko dia luudu la dipɛma l’esanganelo, ko nde mbɔsa divo diande diakole lo nshi y’okidiamelo ande, ko nde didja lo dja yele l’ɛse k’olambo w’osanga. 19 Ɔlɔmbɛdi pombaka mbɔsa elemba ka lonya ka lokatɛ+ k’ɔkɔkɔ w’omi, mapa 1 w’obolonga waha la wodoya w’oma lo saka ndo mapa 1 wa djɛwɛlɛwɛ waha la wodoya, ko nde mbidja lo awambo w’Okidiami l’ɔkɔngɔ wa nde minya divo diele djembetelo y’okidiamelo ande. 20 Ko ɔlɔmbɛdi ayowaetshetsha lɛnɛ la lɛnɛ oko olambo wa letshetsha la ntondo ka Jehowa.+ Wayosha ɔlɔmbɛdi diangɔ sɔ kaamɛ la mapa w’olambo wa letshetsha ndo elemba ka woshasha+ oko ɛngɔ k’ekila. L’ɔkɔngɔ wa laasɔ mbakoka ɔnɛ laki Okidiami ndjɔnɔ wanu.

21 “‘Ɔlɛmbɛ wendana la Okidiami+ watshika dɔkɔlɔkɔ vɔ ɔnɛ: Naka nde ambotshika dɔkɔlɔkɔ ko nde ekɔ la akoka wa nambola Jehowa oleki kɛnɛ kalɔmbama le Okidiami, kete nde pombaka nkotsha dɔkɔlɔkɔ diande lo dikambo dia ɔlɛmbɛ wendana la okidiamelo ande.’”

22 Oma laasɔ, Jehowa akatɛ Mɔsɛ ate: 23 “Tɛ Arɔna nde l’anande w’apami wate: ‘Nganɛ mbahombanyu tshɔkɔlaka+ ase Isariyɛlɛ. Kanyowatɛke nyate:

24 “Jehowa anyɔtshɔkɔlɛ+ ndo anyolame.

25 Jehowa anyɔhɛtshɛ elungi kande+ ndo anyohomuya lokolo l’ɔlɔ.

26 Jehowa ɛdiya elungi kande otsha le nyu ndo anyosha wɔladi.”’+

27 Ko vɔ wayokambaka la lokombo lami l’atei w’ase Isariyɛlɛ+ dia dimi mbatshɔkɔla.”+

7 Lushi lakashidiya Mɔsɛ memɛ tabɛrnaklɛ,+ nde akakikite esɔ+ ndo akakikidia kaamɛ la dihomɔ tshɛ dia lɔkɔ, elambwelo ndo diangɔ+ tshɛ dia lɔkɔ. Lam’akandakite esɔ lo diangɔ+ sɔ ndo lam’akandadikidia, 2 ewandji w’ase Isariyɛlɛ,+ mbuta ate ɛtɛ wa mvudu ya washɛwɔ wakalambola elambo. Ewandji ɛsɔ wa waoho, wanɛ wakalɔmbɔlaka ofundjelo wa nkombo 3 wakela elambo awɔ ɛnɛ la ntondo ka Jehowa: Pusupusu 6 yofame ndo ngɔmbɛ yakawatongola 12, pusupusu 1 dikambo di’ewandji 2 ndo owandji la owandji ngɔmbɛ* ɔtɔi ɔtɔi. Vɔ wakela diangɔ sɔ la ntondo ka tabɛrnaklɛ. 4 Ko Jehowa akatɛ Mɔsɛ ate: 5 “Longola diangɔ di’oma le wɔ, nɛ dia nyayokambaka la diɔ l’olimu wa lo luudu la dipɛma l’esanganelo ndo wɛ pombaka disha ase Lɛwi, onto l’onto kɛnɛ kele ohomba lo ɛkɛndɛ ande.”

6 Ko Mɔsɛ akalongola pusupusu yakɔ la ngɔmbɛ yakɔ ndo akayisha ase Lɛwi. 7 Nde akasha ana wa Ngɛrɛshɔna pusupusu 2 la ngɔmbɛ yakawatongola 4 lo ndjela kɛnɛ kaki ohomba lo ɛkɛndɛ+ awɔ, 8 ndo nde akasha ana wa Merari pusupusu 4 la ngɔmbɛ yakawatongola 8 lo ndjela kɛnɛ kaki ohomba lo ɛkɛndɛ awɔ, lo ɛlɔmbwɛlɔ k’Itamara ɔna ɔlɔmbɛdi Arɔna.+ 9 Koko nde kombisha ana wa Kɔhata ndooko ɛngɔ, nɛ dia ɛkɛndɛ awɔ wakendanaka l’olimu wa lo dihole di’ekila+ ndo vɔ wakɛmbaka diangɔ di’ekila lo ahɛka+ awɔ.

10 Ɔnkɔnɛ, ewandji wakela elambo awɔ lo osapwelo*+ wa elambwelo lushi lakatakitama esɔ. Etena kakela ewandji elambo awɔ la ntondo ka elambwelo, 11 Jehowa akatɛ Mɔsɛ ate: “Owandji la owandji ayoyaka lushi lande dia ndjolambola elambo ande dikambo dia osapwelo wa elambwelo.”

12 Lushi la ntondo, Nashɔna+ ɔna Aminadaba wa lo dioho dia Juda akela elambo ande. 13 Elambo ande waki dɔnga dia dikale 1 dia mfɛsa diaki la wotsho wa tɔshɛkɛlɛ* 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.*+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 14 Nde akela dikɔhɔ* 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 15 Nde akela ɔsɔngɔ wa ngɔmbɛ 1, ɔkɔkɔ w’omi 1 ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 16 Nde akela ɔsɔngɔ wa mbudi k’omi dikambo di’olambo wa pɛkato.+ 17 Nde akela ndo ngɔmbɛ 2, ɛkɔkɔ 5, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Nashɔna ɔna Aminadaba.+

18 Lushi la 2, Netanɛlɛ+ ɔna Zuara, owandji wa dioho dia Isakara akela elambo. 19 Nde akela dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 20 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 21 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 22 Nde akela ɔsɔngɔ wa mbudi k’omi dikambo di’olambo wa pɛkato.+ 23 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Netanɛlɛ ɔna Zuara.

24 Lushi la 3, Eliyabɛ+ ɔna Helɔna, owandji wa dioho dia Zebuluna 25 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 26 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 27 Nde akela ɔsɔngɔ wa ngɔmbɛ, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 28 Nde akela ɔsɔngɔ wa mbudi k’omi dikambo di’olambo wa pɛkato.+ 29 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo waki Eliyabɛ+ ɔna Helɔna.

30 Lushi la 4, Elizura+ ɔna Shedeurɛ, owandji wa dioho dia Rubɛna 31 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 32 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 33 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 34 Nde akela ɔsɔngɔ wa mbudi k’omi dikambo di’olambo wa pɛkato.+ 35 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Elizura+ ɔna Shedeurɛ.

36 Lushi la 5, Shelumiyɛlɛ+ ɔna Zurishadai, owandji wa dioho dia Simɛyɔna 37 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 38 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 39 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 40 Nde akela ɔsɔngɔ wa mbudi k’omi dikambo di’olambo wa pɛkato.+ 41 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Shelumiyɛlɛ+ ɔna Zurishadai.

42 Lushi la 6, Eliyasafu+ ɔna Duɛlɛ, owandji wa dioho dia Ngada 43 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 44 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 45 Nde akela ɔsɔngɔ wa ngɔmbɛ, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 46 Nde akela ɔsɔngɔ wa mbudi k’omi dikambo di’olambo wa pɛkato.+ 47 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Eliyasafu+ ɔna Duɛlɛ.

48 Lushi la 7, Elishama+ ɔna Amihudɛ, owandji wa dioho dia Efrayimɛ 49 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 50 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 51 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 52 Nde akela ɔsɔngɔ wa mbudi k’omi dikambo di’olambo wa pɛkato.+ 53 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Elishama+ ɔna Amihudɛ.

54 Lushi la 8, Ngamaliyɛlɛ+ ɔna Pedazura, owandji wa dioho dia Manase 55 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 56 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 57 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 58 Nde akela ɔsɔngɔ wa mbudi k’omi dikambo di’olambo wa pɛkato.+ 59 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Ngamaliyɛlɛ+ ɔna Pedazura.

60 Lushi la divwa, Abidana+ ɔna Ngidiyɔni, owandji+ wa dioho dia Bɛnjamina 61 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 62 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 63 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 64 Nde akela ɔsɔngɔ wa mbudi k’omi dikambo di’olambo wa pɛkato.+ 65 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Abidana+ ɔna Ngidiyɔni.

66 Lushi la 10, Ahiyɛzɛrɛ+ ɔna Amishadai, owandji wa dioho dia Danɛ 67 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 68 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 69 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 70 Nde akela ɔsɔngɔ wa mbudi k’omi dikambo di’olambo+ wa pɛkato. 71 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Ahiyɛzɛrɛ+ ɔna Amishadai.

72 Lushi la 11, Pangiyɛlɛ+ ɔna Okarana, owandji wa dioho dia Ashɛrɛ 73 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 74 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 75 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 76 Nde akela ɔsɔngɔ wa mbudi k’omi dikambo di’olambo wa pɛkato.+ 77 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Pangiyɛlɛ+ ɔna Okarana.

78 Lushi la 12, Ahira+ ɔna Enana, owandji wa dioho dia Nafɛtali 79 akela elambo ande ɛnɛ: Dɔnga dia dikale 1 dia mfɛsa diaki la wotsho wa tɔshɛkɛlɛ 130 ndo dɔnga dia difuku 1 dia mfɛsa diaki la wotsho wa tɔshɛkɛlɛ 70 lo ndjela yɛdikɔ ya shɛkɛlɛ ya lo dihole di’ekila.+ Alɔnga akɔ 2 wakalole tɔɔ la ofushi wa dimɛna wɔsɔhanyemi la esɔ dikambo di’olambo wa ntɔngɔ.+ 80 Nde akela dikɔhɔ 1 dia paonyi diaki la wotsho wa tɔshɛkɛlɛ 10 ndo diakalole tɔɔ la tshɔ. 81 Nde akela ɔsɔngɔ wa ngɔmbɛ 1, ɔkɔkɔ 1 w’omi ndo ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba.+ 82 Nde akela ɔsɔngɔ wa mbudi k’omi dikambo di’olambo wa pɛkato.+ 83 Nde akela ndo ngɔmbɛ 2, ɛkɔkɔ 5 wa waomi, weombe wa mbudi 5 ndo ɛsɔngɔ 5 w’ɛkɔkɔ wa waomi wele la ɔnɔnyi ɔtɔi ɔtɔi dikambo di’olambo w’osanga.+ Ɔsɔ mbaki elambo wa Ahira+ ɔna Enana.

84 Elambo wendana la osapwelo wa elambwelo+ wakela ewandji w’ase Isariyɛlɛ lushi lakatakitama esɔ vɔ ɛnɛ: Alɔnga w’akale wa mfɛsa 12, alɔnga w’afuku wa mfɛsa 12 ndo akɔhɔ wa paonyi+ 12. 85 Dɔnga tshɛ dia dikale dia mfɛsa diaki la wotsho wa tɔshɛkɛlɛ 130 ndo dɔnga tshɛ dia difuku diaki la wotsho wa tɔshɛkɛlɛ 70. Diangɔ tshɛ tshɛ dia mfɛsa diaki la tɔshɛkɛlɛ nunu pende la nkama nyɛi (2 400) lo ndjela yɛdikɔ ya shɛkɛlɛ ya lo dihole di’ekila.+ 86 Akɔhɔ 12 wa paonyi wakalole tɔɔ la tshɔ, dikɔhɔ la dikɔhɔ diaki la wotsho wa tɔshɛkɛlɛ 10 lo ndjela yɛdikɔ ya shɛkɛlɛ ya lo dihole di’ekila. Akɔhɔ tshɛ tshɛ wa paonyi waki la tɔshɛkɛlɛ 120. 87 Nyama tshɛ tshɛ y’olambo wa lotshumba yaki ngɔmbɛ 12, ɛkɔkɔ wa waomi 12, ɛsɔngɔ w’ɛkɔkɔ wa waomi wele la ɔnɔnyi ɔtɔi ɔtɔi 12 kaamɛ la elambo awɔ wa ntɔngɔ ndo ɛsɔngɔ wa mbudi ya waomi 12 dikambo di’olambo wa pɛkato. 88 Nyama tshɛ tshɛ y’olambo w’osanga yaki ngɔmbɛ 24, ɛkɔkɔ wa waomi 60, weombe wa mbudi 60 ndo ɛsɔngɔ w’ɛkɔkɔ wa waomi wele la ɔnɔnyi ɔtɔi ɔtɔi 60. Ɔsɔ mbaki elambo wendana la osapwelo wa elambwelo+ l’ɔkɔngɔ wa tɔ kitama esɔ.+

89 Etena tshɛ kakɔtɔka Mɔsɛ lo luudu la dipɛma l’esanganelo dia tosawola la Nzambi,*+ nde akokaka dui diakatɛkɛtaka la nde diatomba oma laadiko di’ofidi+ w’ɔshɛtɛ w’Ɔmɛnyi. Lam’asa akɛruba+ 2 kakandasawolaka la Mɔsɛ.

8 Jehowa akatɛ Mɔsɛ ate: 2 “Sawola l’Arɔna kele tɛnde wate: ‘Etena kayoyɔhɛtshaka atala, atala akɔ 7 kawɛnyake osase lo dihole diele la ntondo k’ekundji ka tala.’”+ 3 Ko Arɔna akasale nganɛ: Nde akahɛtsha atala dia vɔ mɛnyaka osase lo dihole diele la ntondo k’ekundji ka tala,+ oko wakadjangɛ Jehowa Mɔsɛ. 4 Nganɛ kakasalema ekundji ka tala: Tɔ kakatshulama lotshula la paonyi, oma l’okendeka polo lo alɛmbɔlɛmbɔ atɔ, wakatshule lotshula.+ Ekundji ka tala kakasalema lo ndjela ɛnɛlɔ+ kakɛnya Jehowa Mɔsɛ.

5 Jehowa akatɛ Mɔsɛ nto ate: 6 “Ɔsa ase Lɛwi oma l’atei w’ase Isariyɛlɛ kele ɛdiawɔ.+ 7 Nganɛ kahombayɛ mbaɛdia: Kowamɔngɛ ashi wɛdia onto oma lo pɛkato ndo kawonya divo la wɛɔsa wa lo demba di’otondo la ɛrɛswara, kawosole ahɔndɔ awɔ ndo kawɔkɛ.+ 8 Oma laasɔ, kawɔshi ɔsɔngɔ wa ngɔmbɛ+ kaamɛ la olambo awɔ wa ntɔngɔ+ w’ofushi wa dimɛna wɔsɔhanyemi la esɔ ndo kɔshi ɔsɔngɔ okina wa ngɔmbɛ dikambo di’olambo wa pɛkato.+ 9 Koye l’ase Lɛwi la ntondo ka luudu la dipɛma l’esanganelo ndo kotshumanya olui w’otondo w’ase Isariyɛlɛ.+ 10 Lam’ayoyela ase Lɛwi la ntondo ka Jehowa, ase Isariyɛlɛ kawahɛ ase Lɛwi+ anya awɔ. 11 Ko Arɔna ayolambola* ase Lɛwi la ntondo ka Jehowa oko olambo wa letshetsha+ w’oma le ase Isariyɛlɛ, ko vɔ wayokambaka olimu wa Jehowa.+

12 “Oma laasɔ, ase Lɛwi wayahɛ anya awɔ l’ɛtɛ wa ngɔmbɛ.+ Ko wayolambola kɛmɔtshi oko olambo wa pɛkato ndo kekina oko olambo wa lotshumba le Jehowa dia nkomba pɛkato+ y’ase Lɛwi. 13 Kemadia ase Lɛwi la ntondo k’Arɔna nde l’anande w’apami, ko wɛ mbalambola* oko olambo wa letshetsha le Jehowa. 14 Kokakitole ase Lɛwi oma l’atei w’ase Isariyɛlɛ ndo ase Lɛwi wayonga wami.+ 15 L’ɔkɔngɔ wa laasɔ, ase Lɛwi wayɔtɔ dia ndjokamba olimu lo luudu la dipɛma l’esanganelo. Ngasɔ kahombayɛ mbaɛdia ndo mbalambola* oko olambo wa letshetsha. 16 Nɛ dia vɔ wekɔ akimɔmi wakakimɔma le mi oma l’atei w’ase Isariyɛlɛ. Lo dihole di’ana wa nondo* tshɛ w’ase Isariyɛlɛ,+ dimi layowaɔsa dia vɔ monga wami. 17 Nɛ dia ana wa nondo tshɛ w’ase Isariyɛlɛ wekɔ wami, oyadi w’anto kana wa nyama.+ Dimi lakaakidia dikambo diami lushi lakamadiake ana wa nondo tshɛ wa lo wodja w’Edjibito.+ 18 Dimi layɔsa ase Lɛwi lo dihole di’ana wa nondo tshɛ w’ase Isariyɛlɛ. 19 Dimi layosha Arɔna nde l’anande w’apami ase Lɛwi oko akimɔmi w’oma le ase Isariyɛlɛ dia vɔ kambaka lo wahɔ w’ase Isariyɛlɛ lo luudu la dipɛma l’esanganelo+ ndo dia vɔ kombaka pɛkato y’ase Isariyɛlɛ+ diaha mpokoso kɛmɔtshi komɛ ase Isariyɛlɛ l’ɔtɛ w’ɔnɛ ase Isariyɛlɛ wambosukana la dihole di’ekila.”

20 Mɔsɛ nde l’Arɔna ndo olui w’otondo w’ase Isariyɛlɛ wakasalɛ ase Lɛwi akambo asɔ. Ase Isariyɛlɛ wakasale kɛnɛ tshɛ kakadjangɛ Jehowa Mɔsɛ lo dikambo di’ase Lɛwi. 21 Ɔnkɔnɛ ase Lɛwi wakayaɛdia ndo wakasole ahɔndɔ+ awɔ, ko Arɔna akaalambola* oko olambo wa letshetsha la ntondo ka Jehowa.+ Oma laasɔ, Arɔna akasale ekombelo ka pɛkato yawɔ dia mbaɛdia.+ 22 L’ɔkɔngɔ wa laasɔ, ase Lɛwi wakatatɛ nkamba olimu lo luudu la dipɛma l’esanganelo la ntondo k’Arɔna nde l’anande w’apami. Vɔ wakasale oko wakadjangɛ Jehowa Mɔsɛ lo dikambo di’ase Lɛwi.

23 Ko Jehowa akatɛ Mɔsɛ ate: 24 “Ase Lɛwi kawosalake nganɛ: Pami kele la ɛnɔnyi 25 otsha la diko ayɔtɔka l’olui wa wanɛ wakamba olimu lo luudu la dipɛma l’esanganelo. 25 Koko ɔnɛ lambolekanya ɛnɔnyi 50 kamɔ oma l’olui w’anto wakamba ndo nde hahombe nkamba nto. 26 Nde koka kimanyiyaka anango wakotsha ɛkɛndɛ awɔ lo luudu la dipɛma l’esanganelo, koko nde hahombe nkamba olimu lɔkɔ. Kɛsɔ kahombayɛ nsala lo dikambo di’ase Lɛwi ndo dia ɛkɛndɛ awɔ.”+

9 Lo ngɔndɔ+ ka ntondo ka lo ɔnɔnyi wa 2 l’ɔkɔngɔ wa vɔ ntomba oma lo wodja w’Edjibito, Jehowa akatɛ Mɔsɛ l’oswe wa Sinayi ate: 2 “Ase Isariyɛlɛ kawɔlɔngɔsɔlake olambo w’Elekanelo+ l’etena kakashikikɛma.+ 3 Lo ngɔndɔ kakɔ nshi 14 la dikɔlɔ dia tosho ta shimba* mbahombanyu mbɔlɔngɔsɔlaka l’etena kakashikikɛma. Kanyɔɔlɔngɔsɔlake lo ndjela wadjango awɔ tshɛ ndo lo ndjela woho wokowosalemaka.”+

4 Ko Mɔsɛ akatɛ ase Isariyɛlɛ dia vɔ nɔngɔsɔla olambo w’Elekanelo. 5 Ɔnkɔnɛ, vɔ wakalɔngɔsɔla olambo w’Elekanelo lo ngɔndɔ ka ntondo nshi 14 la dikɔlɔ dia tosho ta shimba* l’oswe wa Sinayi. Ase Isariyɛlɛ wakasale kɛnɛ tshɛ kakadjangɛ Jehowa Mɔsɛ.

6 L’etena kɛsɔ, apami amɔtshi waki mindo lo woho wakawananda odo,*+ ko vɔ kokoka nɔngɔsɔla olambo w’Elekanelo lushi lɔsɔ. Ko apami asɔ wakatshu le Mɔsɛ nde l’Arɔna lushi lakɔ+ 7 ndo wakatowotɛ vate: “Onde hatokoke nambola Jehowa olambo kaamɛ l’ase Isariyɛlɛ+ l’etena kakashikikɛma kaanga mbeso mindo lo woho wambotonanda odo?”* 8 Ko Mɔsɛ akawatɛ ate: “Nyonkonge lanɛ, tokotombola Jehowa kɛnɛ kayondota lo dikambo dianyu.”+

9 Ko Jehowa akatɛ Mɔsɛ ate: 10 “Tɛ ase Isariyɛlɛ wate: ‘Oyadi kaanga onto ɔmɔtshi l’atei anyu kana lo nɔnga yayaye ayonga mindo lo woho wamondonanda odo*+ kana ayɛngɔla etale, nde pombaka nɔngɔsɔla olambo w’Elekanelo dikambo dia Jehowa. 11 Vɔ pombaka mbɔlɔngɔsɔla lo ngɔndɔ ka 2+ nshi 14 la dikɔlɔ dia tosho ta shimba.* Vɔ pombaka mbɔlɛ kaamɛ la mapa waha la wodoya ndo la akatshi w’ololo.+ 12 Vɔ hawohombe mbetɛ kaanga yema polo la pindju+ ndo hawohombe ntɛta weka w’olambo akɔ.+ Vɔ pombaka mbɔlɔngɔsɔla lo ndjela wadjango tshɛ wendana l’Elekanelo. 13 Ko naka onto ɔmɔtshi aki pudipudi kana komonga lo lɔkɛndɔ ko nde kombidja yimba dia nɔngɔsɔla olambo w’Elekanelo, onto* ɔsɔ pombaka ndjakema,+ nɛ dia nde konambola olambo wa Jehowa l’etena kakashikikɛma. Onto ɔsɔ ayolongola dilanya l’ɔtɛ wa pɛkato kande.

14 “‘Naka ɔngɛndangɛnda ɔmɔtshi mbidjasɛ kaamɛ la nyu, kete nde lawɔ pombaka nɔngɔsɔla olambo w’Elekanelo dikambo dia Jehowa.+ Nde pombaka nsala dikambo sɔ lo ndjela didjango diendana l’Elekanelo ndo woho wahombatɔ salema.+ Ɔlɛmbɛ akɔ waamɛ mbayokambemaka le nyu, oyadi le ɔngɛndangɛnda kana le akanga wa ngelo.’”+

15 Lushi lakawemɛ+ tabɛrnaklɛ, dinge diakakombe tabɛrnaklɛ, mbuta ate luudu la dipɛma l’Ɔmɛnyi. Koko la dikɔlɔ, ɛngɔ kɛmɔtshi kele oko dja kaki laadiko dia tabɛrnaklɛ polo la pindju.+ 16 Akambo wakatetemala salema nganɛ: Dinge diakakikombaka la yanyi ndo diakɛnamaka oko dja l’otsho.+ 17 Etena tshɛ kakamɔka dinge oma lo luudu la dipɛma, ase Isariyɛlɛ wakonɛɛka aha la ntshimbatshimba+ ndo lo dihole tshɛ diakemalaka dinge mbakahangaka+ ase Isariyɛlɛ. 18 Ase Isariyɛlɛ wakonɛɛka lo ndjela didjango dia Jehowa ndo wakahangaka+ lo ndjela didjango dia Jehowa. Vɔ wakatshikalaka lo mpango edja tshɛ kakatshikalaka dinge laadiko dia tabɛrnaklɛ. 19 Lam’akatshikalaka dinge laadiko dia tabɛrnaklɛ l’edja ka nshi efula, ase Isariyɛlɛ wakakitanyiyaka Jehowa ndo takawonɛɛka.+ 20 Lo tena dimɔtshi, dinge diakatshikalaka laadiko dia tabɛrnaklɛ nshi ngana tsho. Vɔ wakatshikalaka lo mpango lo ndjela didjango dia Jehowa ndo wakonɛɛka lo ndjela didjango dia Jehowa. 21 Lo tena dikina, dinge diakatshikalaka paka oma lo dikɔlɔ polo la pindju ndo etena kakadiamɔka la pindju, vɔ wakonɛɛka. Oyadi la yanyi kana l’otsho kakamɔka dinge, vɔ wakonɛɛka. + 22 Oyadi nshi 2, ngɔndɔ kana ndekana, edja tshɛ kakatshikalaka dinge laadiko dia tabɛrnaklɛ, ase Isariyɛlɛ wakatshikalaka lo mpango ndo takawonɛɛka. Koko etena kakadiamɔka, vɔ wakonɛɛka. 23 Vɔ wakahangaka lo ndjela didjango dia Jehowa ndo wakonɛɛka lo ndjela didjango dia Jehowa. Vɔ wakakotshaka ɔkɛndɛ awɔ otsha le Jehowa lo ndjela kɛnɛ kakawadjangɛ Jehowa lo tshimbo ya Mɔsɛ.

10 Oma laasɔ, Jehowa akatɛ Mɔsɛ ate: 2 “Sala amama 2.+ Kowatshule lotshula la mfɛsa kele kokambake la wɔ dia nsanganya olui w’anto ndo dia mbaewoya dia vɔ monɛɛ. 3 Etena kayodamaka amama akɔ 2, olui w’otondo pombaka nsangana la yɛ la soko dia luudu la dipɛma l’esanganelo.+ 4 Naka wamboda paka dimama 1, kete paka ewandji, ɛtɛ wa nunu di’ase Isariyɛlɛ mbayohombaka nsangana la yɛ.+

5 “Lam’ayoyodaka dimama la wendjo wotshikitanyi, wanɛ wohangi lo ɛstɛ+ pombaka monɛɛ. 6 Lam’ayoyodaka dimama la wendjo wotshikitanyi mbala ka 2, wanɛ wohangi lo sidɛ+ pombaka monɛɛ. Vɔ pombaka mbidaka dimama ngasɔ mbala tshɛ kayonɛɛka olui ɔmɔtshi l’atei awɔ.

7 “Ko naka dia nsanganya etshumanelo, wɛ pombaka mbida amama,+ koko aha la wendjo wotshikitanyi. 8 Ana w’apami w’Arɔna wele ɛlɔmbɛdi pombaka mbida amama ndo wodelo w’amama+ ayonga didjango dia pondjo lo nɔnga yanyu tshɛ.

9 “Naka wodja anyu wolanga ntshɔ lo ta dia tɔlɔsha otunyi anyu wanyosoya, nyu pombaka mbida ombeka wa ta la amama,+ ko Jehowa Nzambi kanyu ayonyohɔ ndo ayonyoshimbɛ oma le atunyi anyu.

10 “Ndo nto, lo waaso+ anyu w’ɔngɛnɔngɛnɔ, mbuta ate lo fɛtɛ+ yanyu ndo lo valelo yanyu ya ngɔndɔ, nyu pombaka mbida amama dikambo dia elambo anyu wa lotshumba+ ndo dikambo dia elambo anyu w’osanga.+ Vɔ wayonga oko diohwelo le nyu la ntondo ka Nzambi kanyu. Dimi kele Jehowa Nzambi kanyu.”+

11 Lo ngɔndɔ+ ka 2 nshi 20 lo ɔnɔnyi wa 2, dinge diakamɔ oma laadiko dia tabɛrnaklɛ+ k’Ɔmɛnyi. 12 Ko ase Isariyɛlɛ wakonɛɛ oma l’oswe wa Sinayi lo ndjela kɛnɛ kakashikikɛma dikambo dia wonelo+ awɔ ndo dinge diakatemalaka l’oswe wa Parana.+ 13 Ɔsɔ mbaki mbala ka ntondo kakawonɛɛ lo ndjela kɛnɛ kakadjanga Jehowa lo tshimbo ya Mɔsɛ.+

14 Ko olui wa waoho 3 walɔmbɔma oma le dioho dia Juda wakonɛɛ ntondo lo ndjela elui* awɔ. Nashɔna+ ɔna Aminadaba kaki owandji w’olui akɔ. 15 Netanɛlɛ+ ɔna Zuara kaki owandji w’olui wa dioho di’ana w’Isakara. 16 Eliyabɛ+ ɔna Helɔna kaki owandji w’olui wa dioho di’ana wa Zebuluna.

17 Etena kakawakongola tabɛrnaklɛ,+ ana w’apami wa Ngɛrɛshɔna+ ndo ana w’apami wa Merari+ wanɛ wakatɛmbaka tabɛrnaklɛ wakonɛɛ.

18 Oma laasɔ, olui wa waoho 3 walɔmbɔma oma le dioho dia Rubɛna wakonɛɛ lo ndjela elui* awɔ. Elizura+ ɔna Shedeurɛ kaki owandji w’olui akɔ. 19 Shelumiyɛlɛ+ ɔna Zurishadai kaki owandji w’olui wa dioho di’ana wa Simɛyɔna. 20 Eliyasafu+ ɔna Duɛlɛ kaki owandji w’olui wa dioho di’ana wa Ngada.

21 Oma laasɔ, aseka Kɔhata, wanɛ wakɛmbɛ diangɔ dia lo tɛmpɛlɔ k’ekila+ wakonɛɛ. Tabɛrnaklɛ kakahombe memɛma etena kakawakome.

22 Oma laasɔ, olui wa waoho 3 walɔmbɔma oma le dioho dia Efrayimɛ wakonɛɛ lo ndjela elui* awɔ. Elishama+ ɔna Amihudɛ kaki owandji w’olui akɔ. 23 Ngamaliyɛlɛ+ ɔna Pedazura kaki owandji w’olui wa dioho di’ana wa Manase. 24 Abidana+ ɔna Ngidiyɔni kaki owandji w’olui wa dioho di’ana wa Bɛnjamina.

25 Oma laasɔ, olui wa waoho 3 walɔmbɔma oma le dioho dia Danɛ wakonɛɛ lo ndjela elui* awɔ ndo vɔ mbaki l’ɔkɔngɔ w’elui tshɛ. Ahiyɛzɛrɛ+ ɔna Amishadai kaki owandji w’olui akɔ. 26 Pangiyɛlɛ+ ɔna Okarana kaki owandji w’olui wa dioho di’ana w’Ashɛrɛ. 27 Ahira+ ɔna Enana kaki owandji w’olui wa dioho di’ana wa Nafɛtali. 28 Ngasɔ mbakatonɛka ase Isariyɛlɛ l’ɔnɔngɔ ndo elui* awɔ wakatayelanaka etena kakawonɛɛka.+

29 Ko Mɔsɛ akatɛ Hɔbaba ɔna Ruɛlɛ,*+ okilo wa Mɔsɛ ose Midiyana ate: “Sho totatshu otsha lo dihole diakatotɛ Jehowa ate: ‘Dimi layonyoshadiɔ.’+ Yete totshu,+ tayokosalɛ ɔlɔlɔ, nɛ dia Jehowa akalake Isariyɛlɛ+ diangɔ di’ɛlɔlɔ.” 30 Koko nde akate ate: “Dimi hantotshɔ la nyu. Dimi layokalola otsha lo wodja ami ndo otsha le ewotɔ ami.” 31 Ko nde akate ate: “Lam’alangayɛ tototshikake, nɛ dia wɛ keya dimɛna lɛnɛ akokaso tohanga l’oswe ndo wɛ koka monga ɔnɔmbɔdi* aso. 32 Ndo naka wɛ ntshɔ kaamɛ la so,+ kete tayokosalɛ ɔlɔlɔ tshɛ wayotosalɛ Jehowa.”

33 Ko vɔ wakatatɛ la lɔkɛndɔ la nshi 3 oma lo dikona dia Jehowa+ ndo ɔshɛtɛ+ wa sheke wa Jehowa wakatatshɔka la ntondo kawɔ lo lɔkɛndɔ la nshi 3 dia nyanga dihole dia vɔ+ tomuya. 34 Dinge+ dia Jehowa diaki laadiko diawɔ la yanyi etena kakawonɛɛ.

35 Etena tshɛ kakawonɛɛka la Ɔshɛtɛ, Mɔsɛ akataka ate: “Jehowa le,+ onɛɛ, ndo atunyi ayɛ wahandjɔne. Wanɛ wakohetsha walawɔ oma la ntondo kayɛ.” 36 Ndo etena tshɛ kakawakitshaka ɔshɛtɛ, nde akataka ate: “Jehowa le, kalola l’atei wa nunu di’ase Isariyɛlɛ+ diaheyama mbadia.”*

11 L’etena kɛsɔ, anto wakatatɛ ngunanguna efula la ntondo ka Jehowa, wata dia vɔ kɔsɛnaka dimɛna. Lam’akoke Jehowa dui sɔ, nde akoke nkɛlɛ ka mamba, ko dja y’oma le Jehowa yakaholɔ ko yakatshumbe anto amɔtshi waki lo koma mɔtshi ya mpango. 2 Lam’akatatɛ anto ndelɛ Mɔsɛ, nde akasɛngasɛnga Jehowa,+ ko dja yakadimala. 3 Ɔnkɔnɛ, wakɔlɛ dihole sɔ ɔnɛ Tabɛra,* nɛ dia dja y’oma le Jehowa yakaatshumbe.+

4 Ko olui w’anto wakasɔhana*+ la wɔ wakakɛnɛmɔla dionga dia lokaki,+ ndo ase Isariyɛlɛ vɔ lawɔ wakatatɛ ndela nto, wata vate: “Ayotosha onatshi wa ndɛ?+ 5 Ande nse, kɔkɔmbrɛ, pastɛkɛ, atungudu w’akatshi, atungudu w’ekama ndo atungudu wa hayi+ wakatalɛka ɔlɛlɛ lo Edjibito lee! 6 Ko kakianɛ sho* tambomanɛ to. Ndooko ɛngɔ kekina kɛnaso paka mana+ nyɛ tsho.”

7 Mana+ yaki oko ntɔngɔ ya kɔriandɛ+ ndo yakafɔnaka la bɛdɛliumɛ.* 8 Anto wakahandjɔnɛka ndo wakayitɔngɔnaka ko ndjishisha lo ave w’ɔhɛlɔ wa l’anya kana ndjitɔ lo etole. Oma laasɔ, wakayikatɛka lo mpoke kana ndjisala mapa w’ebolonga.+ L’onyɔ, yɔ yaki oko okate wa mpɛ wodjiwɔ esɔ. 9 Mana yakakɔka+ lam’akakɔka loonge l’otsho lo mpango.

10 Mɔsɛ akoke anto walela lo nkumbo la nkumbo, onto l’onto la soko dia luudu lande la dipɛma. Ko Jehowa akomala efula+ ndo Mɔsɛ nde lawɔ kɔngɛnangɛna. 11 Ko Mɔsɛ akatɛ Jehowa ate: “Lande na kasoyayɛ okambi ayɛ? Lande na kahamahomwe lokolo l’ɔlɔ lo washo ayɛ ndo kamboyombahɛ wotsho w’anto anɛ tshɛ?+ 12 Onde dimi kakatshu diemi di’anto anɛ tshɛ? Onde dimi kakawaote, koyombutɛ wate: ‘Ɛmbawɔ lo dihɛlɔ oko watɛmbaka ɔndɛdi* ɔna laakalɔmɛ’ dia mbatɔla otsha lo wodja wakayatshibe dia mbisha watshɛwɔ?+ 13 Lende ayomotokondja onatshi wa mbisha anto anɛ tshɛ? Dikambo vɔ wekɔ lo ntetemala ndelɛmi, wata vate: ‘Otosha onatshi wa sho ndɛ!’ 14 Dimi bu la akoka wa mɛmba wotsho w’anto anɛ tshɛ dimɛ. Wotsho ɔsɔ wambondeka.+ 15 Naka nganɛ kayangayɛ salɛkami akambo, kete lam’alangayɛ ndeka dimɛna wɛ ndjakami kakiye.+ Ko naka lambohomɔ lokolo l’ɔlɔ lo washo ayɛ, tetawɔke dia dimi mɛna mpokoso nto.”

16 Jehowa akakadimola Mɔsɛ ate: “Sɔna apami 70 oma l’atei wa dikumanyi dia l’Isariyɛlɛ, apami wɔsayɛ oko* dikumanyi ndo ɛlɔmbɔdi w’anto+ kele yaka la wɔ lo luudu la dipɛma l’esanganelo ndo kawemale kaamɛ la yɛ laawɔ. 17 Dimi layoholɔ,+ ko layɔtɛkɛta la yɛ laawɔ.+ Layonya yema ya nyuma+ oma le yɛ, ko layowashatɔ ndo vɔ wayokokimanyiya dia mɛmba wotsho w’anto wahayakoke mɛmba wɛmɛ.+ 18 Kote wodja wate: ‘Nyoyakidia dikambo dia loyi,+ nɛ dia ndooko onyake nyayɔlɛ onatshi dikambo nyakalelɛ+ Jehowa ndo nyakate nyate: “Ayotosha onatshi wa sho ndɛ? Taki dimɛna l’Edjibito.”+ Ndooko onyake Jehowa ayonyosha onatshi, ko nyayɔlɛ.+ 19 Nyayɔlɛ, aha paka lushi 1 loto kana nshi 2 kana nshi 5 kana nshi 10 kana nshi 20 tsho, 20 koko ngɔndɔ k’otondo polo ndo onatshi akɔ wambotomba l’ɛhɛmbɛ anyu ndo waya ɛngɔ ka wɔnɔnyi le nyu,+ nɛ dia nyu nyakoke Jehowa lele l’atei anyu ɔkɔngɔ ndo nyakalele la ntondo kande nyate: “Lande na kakatatombe oma l’Edjibito?”’”+

21 Ko Mɔsɛ akate ate: “Anto wele la mi wekɔ apami wakɛndakɛnda l’ekolo nunu nkama shamalo (600 000),+ ko wɛ mbutaka wate: ‘Dimi layowasha onatshi efula wayowɔlɛ ngɔndɔ k’otondo!’ 22 Sho kodiakaka ɛkɔkɔ, mbudi la ngɔmbɛ tshɛ, onde ayowakoka? Kana oyadi sho kondaka nse tshɛ ya lo ndjale, onde ayowakoka?”

23 Ko Jehowa akatɛ Mɔsɛ ate: “Onde lonya la Jehowa lekɔ mondo?+ Wɛ ayanga mɛna kana kɛnɛ katami kayosalema kana bu.”

24 Oma laasɔ Mɔsɛ akatombe, ko akatotɛ wodja kɛnɛ kakawotɛ Jehowa. Nde akatshumanya apami 70 oma l’atei wa dikumanyi dia lo wodja ndo akawaemadia l’otshimbedi wa luudu la dipɛma.+ 25 Ko Jehowa akaholɔ lo dinge,+ akatɛkɛta la nde+ ndo akɔshi yema ya nyuma+ oma le nde, ko akakisha ɔmɔmɔ l’atei wa dikumanyi 70. Kam’akawalongola nyuma, vɔ wakatatɛ nsala akambo oko amvutshi.*+ Koko vɔ kondjotetemala nsala ngasɔ.

26 Koko apami 2 l’atei awɔ wakatshikala lo mpango. Nkombo yawɔ ko Ɛlɛdada nde la Medada. Nyuma kakawawahema nɛ dia vɔ waki l’atei wa wanɛ wele nkombo yawɔ yakafundama, koko vɔ kotshɔ otsha lo luudu la dipɛma. Ɔnkɔnɛ vɔ wakatatɛ nsala akambo lo mpango oko amvutshi. 27 Ko ɔlɔngɔ ɔmɔtshi akalawɔ ndo akatotɛ Mɔsɛ ate: “Ɛlɛdada nde la Medada wosala akambo lo mpango oko amvutshi!” 28 Ko Jashua+ ɔna Nuna, laki okambi wa Mɔsɛ oma ko dikɛnda akate ate: “Nkumɛmi Mɔsɛ le, shimbawɔ!”+ 29 Koko Mɔsɛ akawotɛ ate: “Onde wɛ oka kandjema lo dihole diami? Keema, dimi kombolaka dia anto waki Jehowa tshɛ monga amvutshi ndo dia Jehowa mbasha nyuma kande!” 30 L’ɔkɔngɔ diko, Mɔsɛ akakalola lo mpango kaamɛ la dikumanyi dia l’Isariyɛlɛ.

31 Ko lɔpɛpɛ l’oma le Jehowa lakapɛpɛ ndo lakatatɛ mbela tofudu ta toloho* oma lo ndjale ndo lakatikɔshaka lo mpango+ lo ɛtshi ka nkɛtɛ ka yɛdikɔ ya lɔkɛndɔ la lushi l’otondo lo wedi ɔnɛ ndo lɔkɛndɔ la lushi l’otondo lo wedi okina, l’otshimbedi w’otondo wa mpango ndo tɔ takahatana tanga di’oko kubita* 2 oma lo nkɛtɛ. 32 Ɔnkɔnɛ yanyi y’otondo la otsho w’otondo ndo la wedi a pindju, anto wakatɔngɔnaka toloho. Ndooko onto lakatɔngɔna l’ɛse ka hɔmɛra* 10 ndo vɔ wakatianɛka l’otshimbedi w’otondo wa mpango. 33 Koko etena kaki onatshi weke l’enyɔ awɔ, la ntondo ka vɔ ntɔma, Jehowa akomalɛ wodja nkɛlɛ k’efula ndo Jehowa akadiake anto la odiakelo w’efula.+

34 Ɔnkɔnɛ vɔ wakɔlɛ dihole sɔ ɔnɛ Kibɛrɔtɛ-Hatava,*+ nɛ dia wakakundɛ anto waki la lodjo l’efula+ laawɔ. 35 Anto wakonɛɛ oma la Kibɛrɔtɛ-Hatava otsha la Hazerɔtɛ ko wakatodjasɛ la Hazerɔtɛ.+

12 L’etena kɛsɔ, Miriyama nde l’Arɔna wakatatɛ ngunanguna lo dikambo dia Mɔsɛ, nɛ dia nde akatshuke ose Kusha, dikambo wadɛnde aki ose Kusha.+ 2 Vɔ wakataka vate: “Onde paka lo tshimbo ya Mɔsɛ tsho katɛkɛta Jehowa? Shi ndo lo tshimbo yaso+ katɛkɛtande?” Ko Jehowa akokaka.+ 3 Mɔsɛ aki onto lakaleke anto tshɛ+ wa la nkɛtɛ memakana.*

4 Mbala kakɔ ɔtɔi Jehowa akatɛ Mɔsɛ, Arɔna la Miriyama ate: “Nyotombe nyu akɔ 3 kele nyotshu otsha lo luudu la dipɛma l’esanganelo.” Ɔnkɔnɛ vɔ akɔ 3 wakatombe. 5 Ko Jehowa akaholɔ lo ekundji ka dinge+ ko akayemala la soko dia luudu la dipɛma ndo akelɛ Arɔna nde la Miriyama. Vɔ akɔ 2 wakasukana. 6 Ko nde akate ate: “Nyompokame lam’alanganyu. Otondonga omvutshi ɔmɔtshi wa Jehowa ekɔ l’atei anyu, tshike dimi lotoyaeyanya le nde lo ɛnɛlɔ+ ndo lotɔtɛkɛta la nde lo dɔ.+ 7 Koko aha ngasɔ mbediɔ lo dikambo di’okambi ami Mɔsɛ! Dimi lakawosha ɔkɛndɛ wa luudu lami+ l’otondo.* 8 Dimi sawolaka la nde+ elungi l’elungi* ndo hwe hwe aha la nkamba l’ɛtɛkɛta wa didjidji. Nde mɛnaka ɛnamelo ka Jehowa. Lande na kahanyoke wɔma ntɛkɛta kɔlɔ dikambo di’okambi ami Mɔsɛ?”

9 Ɔnkɔnɛ Jehowa akawaomalɛ nkɛlɛ k’efula ndo akamɔ oma lalewɔ. 10 Ko dinge diakamɔ oma laadiko dia luudu la dipɛma. Wɛnyi ko Miriyama aya la sudi ka wɛma oko loonge l’ekama.+ Arɔna akɛwɔ otsha le Miriyama ko akɛnyi dia nde aya la sudi.+ 11 Arɔna akatɛ Mɔsɛ mbala kakɔ ɔtɔi ate: “Nkumɛmi, lambokɔsɛngasɛnga lam’alangayɛ, todjake yimba lo pɛkato kɛnɛ kosadiso oko akanga wa dinginya. 12 Lam’alangayɛ, tetawɔke dia nde ntetemala monga oko ɔna lovwe l’otema lele demba diande diambɔtɛngɔtɛngɔ la mbotɔ!” 13 Mɔsɛ akalelɛ Jehowa ate: “Nzambi le, lambokɔsɛngasɛnga, lam’alangayɛ+ kɔnɔlande!”

14 Jehowa akakadimola Mɔsɛ ate: “Naka she mbotɛ nsɔyi l’elungi, shi nde ayoshama nsɔnyi l’edja ka nshi 7? Nyootondja l’andja wa mpango+ l’edja ka nshi 7 ndo l’ɔkɔngɔ wa laasɔ kakokande ndjokaloyama.” 15 Ko wakatondja Miriyama l’andja wa mpango l’edja ka nshi 7+ ndo wodja komonɛɛ oma lo mpango polo lam’akakaloyama Miriyama. 16 Oma laasɔ, wodja wakonɛɛ oma la Hazerɔtɛ+ ko wakatohanga l’oswe wa Parana.+

13 Jehowa akatɛ Mɔsɛ ate: 2 “Toma atɔpi dia vɔ tokemba* wodja wa Kanana wayangami mbisha ase Isariyɛlɛ. Kotome pami ɔtɔi ɔtɔi oma lo dioho dia watshɛnde, onto l’onto kayale owandji+ l’atei awɔ.”+

3 Ɔnkɔnɛ, Mɔsɛ akaatome oma l’oswe wa Parana+ lo ndjela kɛnɛ kakawotɛ Jehowa. Apami akɔ tshɛ waki ɛtɛ w’ase Isariyɛlɛ. 4 Nkombo yawɔ yɔ nyɛ: Oma lo dioho dia Rubɛna, Shamua ɔna Zakura. 5 Oma lo dioho dia Simɛyɔna, Shafata ɔna Hɔri. 6 Oma lo dioho dia Juda, Kalɛba+ ɔna Jefune. 7 Oma lo dioho dia Isakara, Ingala ɔna Yɔsɛfu. 8 Oma lo dioho dia Efrayimɛ, Hɔshɛya+ ɔna Nuna. 9 Oma lo dioho dia Bɛnjamina, Palati ɔna Rafu. 10 Oma lo dioho dia Zebuluna, Ngadiyɛlɛ ɔna Sodi. 11 Oma lo dioho dia Yɔsɛfu,+ lo dioho dia Manase,+ Ngadi ɔna Susi. 12 Oma lo dioho dia Danɛ, Ahimiyɛlɛ ɔna Ngɛmali. 13 Oma lo dioho dia Ashɛrɛ, Seturɛ ɔna Mikayɛlɛ. 14 Oma lo dioho dia Nafɛtali, Nabi ɔna Vɔfisi. 15 Oma lo dioho dia Ngada, Nguɛlɛ ɔna Maki. 16 Ɔsɔ mbele nkombo y’apami wakatome Mɔsɛ dia tokemba wodja. Mɔsɛ akɔlɛ Hɔshɛya ɔna Nuna ɔnɛ Jashua.*+

17 Etena kakaatome Mɔsɛ dia vɔ tokemba wodja wa Kanana, nde akawatɛ ate: “Nyotshu lɛkɔ ndo nyete oma la Nɛngɛbɛ polo lo lɛkɛ l’akona.+ 18 Kanyotende woho wele+ wodja akɔ, kana anto wadjasɛ lɔkɔ wekɔ akanga wa wolo kana ɛhɔdu, wekɔ yema tshitshɛ kana efula, 19 kana wodja wekɔ dimɛna kana kɔlɔ ndo kana esomba wadjasɛwɔ wekɔ hwe kana nyingama la mpele. 20 Ndo kanyotende kana nkɛtɛ yekɔ ɛtɛtɔ* kana shɛnga*+ ndo kana esongo wekɔ lɛkɔ kana bu. Nyu pombaka monga la dihonga+ ndo mbɔsa elowa ɛmɔtshi wa lo wodja akɔ.” Ɔsɔ aki nshi ya diɛla dia ntondo di’elowa.+

21 Ɔnkɔnɛ, vɔ wakatshu tokemba wodja ntatɛ oma l’oswe wa Zinɛ+ polo la Rɛhɔba+ suke la Lɛbɔ-Hamatɛ.*+ 22 Lam’akawete oma la Nɛngɛbɛ, vɔ wakatokoma polo la Hɛbɛrɔna+ lɛnɛ akadjasɛka Ahimana, Sheshai ndo Talamai,+ aseka Anakima.+ Hɛbɛrɔna akakama ɛnɔnyi 7 la ntondo ka Zɔana ka l’Edjibito. 23 Lam’akawakome l’Okidi wa Eshikɔlɛ,+ vɔ wakakɔndjɔla lotahe lele la sandji di’elowa wakahombe apami 2 mɛmba l’osembe kaamɛ la elowa ɛmɔtshi wa pɔmɛgranatɛ ndo wa fingo.+ 24 Vɔ wakɔlɛ dihole diakɔ ɔnɛ Okidi wa Eshikɔlɛ*+ l’ɔtɛ wa sandji di’elowa diakakɔndjɔla ase Isariyɛlɛ laawɔ.

25 L’ekomelo ka nshi 40,+ vɔ wakakalola oma la tokemba wodja. 26 Ɔnkɔnɛ, vɔ wakakalola le Mɔsɛ nde l’Arɔna ndo le olui w’otondo w’ase Isariyɛlɛ l’oswe wa Parana wele la Kadɛshɛ.+ Vɔ wakatɛ olui w’otondo kɛnɛ kakawɛnyi ndo wakawaɛnya elowa w’oma lo wodja akɔ. 27 Vɔ wakatɛ Mɔsɛ vate: “Takɔtɔ lo wodja wakayatotome ndo vɔ wekɔ mɛtɛ wodja wakɛlanɛ abɛlɛ la osanga+ ndo elowa+ w’oma lɛkɔ vɔ ɛnɛ. 28 Koko anto wodjashi lo wodja akɔ wekɔ anto wele la wolo efula ndo esomba wodingami la mpele wekɔ weke efula. Takatɛna ndo aseka Anakima lɛkɔ.+ 29 Ase Amalɛka+ mbidjasɛ lo wodja wa Nɛngɛbɛ+ ndo ase Hiti, ase Jɛbusɛ+ l’ase Amɔra+ mbidjasɛ lo lɛkɛ l’akona. Ase Kanana+ mbidjasɛ l’omamu wa ndjale+ ndo l’omamu wa Jɔrdana.”

30 Ko Kalɛba akayange dia mbɔladia anto etena kakawemala la ntondo ka Mɔsɛ lo mbuta ate: “Nyɛsɔ totshu mbala kakɔ ɔtɔi ndo aha la taamu tayɔsa wodja akɔ, nɛ dia sho kokaka mɛtɛ mbɔlɛndja.”+ 31 Koko apami wakatshu la nde wakate vate: “Hatokoke ntshɔ tɔlɔ l’anto asɔ dikambo vɔ toleka wolo.”+ 32 Ko vɔ wakatetemala nkɔmɔla+ ase Isariyɛlɛ alemba dikambo dia wodja wakawatshu tokemba, wata vate: “Wodja wakatatokemba wekɔ wodja washila anto wadjasɛ lɔkɔ oshiki ndo anto tshɛ wakatɛnyi lɛkɔ wekɔ akongote wa mamba.+ 33 Takatɛna waa Nefilimɛ lɛkɔ, ana w’Anaka+ wakatombe oma le* waa Nefilimɛ ndo takayaɛnyi oko akata la ntondo kawɔ ndo vɔ lawɔ wakatɔshi oko akata.”

14 Ko olui w’otondo w’anto wakasanganya awui awɔ, wakatetemala mbida ekoko ndo wakalele otsho ɔsɔ w’otondo.+ 2 Ase Isariyɛlɛ tshɛ wakatatɛ ngunɛngunɛ Mɔsɛ nde l’Arɔna+ ndo olui w’otondo wakatɛkɛta kɔlɔ lo dikambo diawɔ vate: “Otoleka dimɛna sho mvɔ lo wodja w’Edjibito kana l’oswe wa shɛnga ɔnɛ! 3 Lande na katatɔtɔlɛ Jehowa lo wodja ɔsɔ dia sho tovɔ la lokuwa la ta?+ Wadiɛso la anaso wayonga diangɔ dia dimbo.+ Shi ndeka dimɛna sho nkalola l’Edjibito?”+ 4 Vɔ wakakome polo lo mbutanɛ vate: “Nyɛsɔ tɔsɔnɛ owandji kele tokalole l’Edjibito!”+

5 Ko Mɔsɛ nde l’Arɔna wakayakɔsha ekukumadi la ntondo k’etshumanelo k’otondo k’ase Isariyɛlɛ kakasangana. 6 Jashua+ ɔna Nuna nde la Kalɛba+ ɔna Jefune waki l’atei wa wanɛ wakatshu tokemba wodja wakaatshatsha ahɔndɔ awɔ 7 ndo wakatɛ olui w’otondo w’ase Isariyɛlɛ vate: “Wodja wakatatokemba wekɔ wodja+ wa dimɛna efula. 8 Naka Jehowa tolangaka, kete ndooko onyake nde ayotɔtshiya lo wodja akɔ ndo ayotoshawɔ, wodja wakɛlanɛ abɛlɛ la osanga.+ 9 Koko hanyohombe tɔmbɔkwɛ Jehowa ndo hanyohombe mboka anto wa lo wodja+ akɔ wɔma, nɛ dia tayowashila oshiki.* Vɔ waya bu la ekokelo ndo Jehowa ekɔ kaamɛ la so.+ Tanyowaokake wɔma.”

10 Ko olui w’otondo wakayange mbaoka ave.+ Koko lotombo la Jehowa lakɛnama le ase Isariyɛlɛ+ tshɛ laadiko dia luudu la dipɛma l’esanganelo.

11 Ko Jehowa akatɛ Mɔsɛ ate: “Edja ndo etena kakɔna kayotona anto anɛ dia nɛmiyami+ ndo edja ndo etena kakɔna kayowotona monga la mbetawɔ le mi kaanga mbɛnawɔ ahindo tshɛ wasalami l’atei awɔ?+ 12 Layanga mbasoya la elando ndo mbatshanya etale, ko layoketɛ wodja woleki wɔnɛ woke ndo waaleki wolo.”+

13 Koko Mɔsɛ akatɛ Jehowa ate: “Ase Edjibito wakayatondja anto anɛ oma l’atei awɔ la wolo ayɛ wayoka+ dui sɔ, 14 ko wayodisanyɛ anto wodjashi lo wodja ɔnɛ. Vɔ lawɔ wakoke dia wɛ Jehowa ekɔ l’atei w’anto anɛ+ ndo akɛnama le wɔ okoko l’okoko.+ Wɛ kele Jehowa, dinge diayɛ diekɔ lo memala laadiko diawɔ ndo wɛ ekɔ lo tatshu la ntondo kawɔ la yanyi lo ekundji ka dinge ndo l’otsho+ lo ekundji ka dja. 15 Naka wɛ ndjaka anto anɛ tshɛ mbala kakɔ 1,* wedja wakoke lokumu layɛ wayota vate: 16 ‘Jehowa hongi la akoka wa nkonya anto anɛ lo wodja wakandatshibe dia mbasha, diakɔ diambondaadiaka l’oswe.’+ 17 Jehowa le, lam’alangayɛ, tokotshika dia wolo ayɛ mɛnama oko wakayalake lam’akayate wate: 18 ‘Jehowa hoke nkɛlɛ esadi ndo nde ndola tɔɔ la ngandji ka kɔlamelo,+ nde dimanyiyaka munga ndo pɛkato, koko lo weho akɔ tshɛ, nde hatshike onto lele la onongo aha la mbosha dilanya. Nde mbishaka ana dilanya l’ɔtɛ wa munga y’ambutshi awɔ polo lo lɔlɔnga la 3 ndo lɔlɔnga+ la 4.’ 19 Lam’alangayɛ, dimanyiya anto anɛ munga kawɔ l’ɔtɛ wa ngandji kayɛ k’efula ka kɔlamelo, oko wadimanyiyayɛ anto anɛ ntatɛ oma l’Edjibito polo wonya ɔnɛ.”+

20 Ko Jehowa akate ate: “Lambaadimanyiya lo ndjela kɛnɛ kotshiyɛ.+ 21 Koko lo wedi okina, lo mɛtɛ oko wemi la lɔsɛnɔ, nkɛtɛ k’otondo kayolola la lotombo la Jehowa.+ 22 Koko ndooko kaanga pami 1 l’atei wa wanɛ wakɛnyi lotombo lami ndo ahindo+ wakamasale l’Edjibito ndo l’oswe ko wekɔ lo ntetemala mbidjami l’ohemba+ mbala nyɛ 10 ndo wahakitanyiya dui diami+ 23 kayɔtɔ lo wodja wakamatshibe dia mbisha washɛwɔ. Ndooko kaanga onto 1 l’atei wa wanɛ wele bu la dilɛmiɛlɔ le mi layɛna wodja akɔ.+ 24 Koko lam’ele okambi ami Kalɛba+ ekɔ la ekanelo kotshikitanyi ndo ekɔ lo ntetemala ndjelami l’otema ɔtɔi, lo mɛtɛ dimi layowɔtshiya lo wodja wakandatshu ndo tokanula tande wayodjasɛ lo wodja akɔ.+ 25 Lam’ele ase Amalɛka ndo ase Kanana+ mbidjasɛ l’okidi, nyu pombaka nkalola loyi ko nyu ntshɔ otsha l’oswe lo mboka kele l’omamu wa Ndjale ka Beela.”+

26 Ko Jehowa akatɛ Mɔsɛ nde l’Arɔna ate: 27 “Edja ndo kaande ayotetemala olui w’anto wa kɔlɔ ɔnɛ ngunɛngunɛmi?+ Lamboka kɛnɛ kangunɛngunɛ+ ase Isariyɛlɛ. 28 Tɛwɔ wate: ‘Jehowa kata ate: “Lo mɛtɛ oko wemi la lɔsɛnɔ, layonyosalɛ paka woho wakamanyoki nyatɛkɛta!+ 29 Edo anyu wayokalema+ l’oswe ɔnɛ, ɛɛ, lofulo tshɛ l’apami anyu wele l’ɛnɔnyi oma lo 20 otsha la diko wakafundjama nkombo, wanɛ tshɛ wakangunɛngunɛ+ l’atei anyu, 30 ndooko onto l’atei anyu layɔtɔ lo wodja wakamatshibe* dia nyodjashiya lɔkɔ,+ onyake Kalɛba ɔna Jefune nde la Jashua ɔna Nuna.+

31 “‘“Dimi layɔtɔla ananyu wakanyatshi dia wayonga diangɔ dia dimbo+ lɛkɔ, ko vɔ wayeya wodja wakanyɔnyɔla.+ 32 Koko edo anyu wayokalema l’oswe ɔnɛ. 33 Ananyu wayonga alami wa dongalonga l’oswe l’edja k’ɛnɔnyi 40+ ndo wayolongola dilanya lo woho wakinyu komonga la kɔlamelo* polo lam’ayokalema odo w’onto l’ekomelo l’oswe ɔnɛ.+ 34 Lo ndjela lofulo la nshi yakanyakembe wodja, mbuta ate nshi 40,+ lushi 1 ekɔ ɔnɔnyi 1 mbayonyolongola dilanya l’ɔtɛ wa munga kanyu l’edja k’ɛnɔnyi 40,+ ko nyu nyayeya kɛnɛ kalembetshiya ndɔshana la mi.*

35 “‘“Dimi Jehowa kambɔtɛkɛta. Nganɛ kayomosalɛ olui w’otondo w’anto wa kɔlɔ, wanɛ tshɛ wakasangana dia ndɔshana la mi: L’oswe ɔnɛ mbayowokoma ewo ndo lanɛ mbayowovɔ.+ 36 Apami wakatome Mɔsɛ dia tokemba wodja ndo wakakonya olui w’otondo dia mbongunɛngunɛ etena kakawayosha alapɔlɔ wa kɔlɔ lo dikambo dia wodja akɔ,+ 37 eelo, apami tshɛ wakayota awui wa kɔlɔ lo dikambo dia wodja akɔ wayɔkɔmama ndo wayovɔ la ntondo ka Jehowa.+ 38 Koko Jashua ɔna Nuna nde la Kalɛba ɔna Jefune, wanɛ waki l’atei wa wanɛ wakatshu tokemba wodja wayotetemala nsɛna.”’”+

39 Lam’akatɛ Mɔsɛ ase Isariyɛlɛ tshɛ ɛtɛkɛta ɛsɔ, anto wakalele efula. 40 Ndo nto, vɔ waketɔ la pindju ka pɛɛ ndo wakalange mbidɛ otsha lo shɔdi ya dikona, wata vate: “Tekɔ suke dia ntshɔ lo dihole diakatolake Jehowa, nɛ dia takasale pɛkato.”+ 41 Koko Mɔsɛ akate ate: “Lande na kɔnyɔlanyu didjango dia Jehowa? Hanyototondoya. 42 Tanyotshɔke dikambo Jehowa bu l’atei anyu ndo atunyi+ anyu wayotonyɔlɛndja. 43 Nɛ dia ase Amalɛka ndo ase Kanana wekɔ lɛkɔ dia nyɔlɔsha+ ndo wayonyodiaka la lokuwa la ta. Lam’ele nyamboka Jehowa ɔkɔngɔ, Jehowa hatonga kaamɛ la nyu.”+

44 Ko vɔ wakadɛ otsha lo lɛkɛ l’akona+ la lotamanya tshɛ, koko ɔshɛtɛ wa sheke wa Jehowa ndo Mɔsɛ komimɔ oma lo mpango.+ 45 Ko ase Amalɛka ndo ase Kanana wakadjasɛka l’akona wakaholɔ, wakaalɔsha ndo wakawatshanya polo la Horima.+

15 Jehowa akatɛ Mɔsɛ nto ate: 2 “Sawola l’ase Isariyɛlɛ kele tɛwɔ wate: ‘Lam’ayonyokoma lo wodja wayangami nyosha dia nyu todjasɛ lɔkɔ,+ 3 ko nyambolanga nambola ngɔmbɛ, ɔkɔkɔ kana mbudi oko olambo watshumbama lo dja dikambo dia Jehowa, oyadi olambo wa lotshumba+ kana olambo dia nkotsha dɔkɔlɔkɔ dia laande diakatshike onto kana woshasha wa la lolango+ kana olambo wakimɔma lo fɛtɛ+ yanyu yasalema lo eleko l’eleko dia ntondja opumu wa dimɛna* le Jehowa,+ 4 onto lela olambo ande pombaka mbela ndo olambo wa ntɔngɔ w’ofushi+ wa dimɛna, etenyi ka dikumi ka efa* nsanganya la k’anɛi ɔtɔi ka hina* k’esɔ le Jehowa. 5 Kelake ndo wanu oko olambo wa lotɛ, k’anɛi ɔtɔi ka hina kaamɛ la olambo wa lotshumba+ kana olambo w’ɔsɔngɔ tshɛ w’ɔkɔkɔ w’omi. 6 Kana lo dikambo di’ɔkɔkɔ w’omi, kelake ndo olambo wa ntɔngɔ, tenyi pende dia dikumi dia yɛdikɔ ya efa w’ofushi wa dimɛna wɔsɔhanyemi la k’asato ɔtɔi ka hina k’esɔ. 7 Kelake ndo wanu oko olambo wa lotɛ, k’asato ɔtɔi ka hina dia monga opumu wa dimɛna* le Jehowa.

8 “‘Ko naka wɛ ambolanga nambola ngɔmbɛ k’omi oko olambo wa lotshumba+ kana olambo wakimɔma dia nkotsha dɔkɔlɔkɔ dia laande+ kana olambo w’osanga dikambo dia Jehowa,+ 9 kelake ndo olambo wa ntɔngɔ,+ tenyi sato dia dikumi dia yɛdikɔ ya efa w’ofushi wa dimɛna wɔsɔhanyemi la k’ahende ɔtɔi ka hina k’esɔ kaamɛ la ngɔmbɛ k’omi. 10 Kelake ndo wanu oko olambo wa lotɛ,+ k’ahende ɔtɔi ka hina oko olambo watshumbama lo dja wele l’opumu wa dimɛna* le Jehowa. 11 Kɛsɔ kahomba salemaka dikambo dia ngɔmbɛ tshɛ kana di’ɔkɔkɔ w’omi tshɛ kana di’ɔsɔngɔ tshɛ w’ɔkɔkɔ w’omi kana dia mbudi tshɛ. 12 Oyadi lofulo la nyama lalambolayɛ, kɛsɔ kahomba salemaka dikambo dia nyama la nyama, lo ndjela lofulo layɔ. 13 Ngasɔ kahomba ose Isariyɛlɛ tshɛ la lootɔ kimɔka olambo watshumbama lo dja wele l’opumu wa dimɛna* le Jehowa.

14 “‘Naka ɔngɛndangɛnda wodjashi l’atei anyu kana ɔnɛ loye l’atei anyu l’edja ka ngɔndɔ efula ambolanga nkimɔ olambo watshumbama lo dja wele l’opumu wa dimɛna* le Jehowa, kete nde pombaka salaka woho wasalanyu.+ 15 Nyu wanɛ wele lo etshumanelo ndo ɔngɛndangɛnda wele l’atei anyu nyayoyelaka didjango diakɔ 1. Ɔsɔ ayonga didjango dia pondjo lo nɔnga yanyu tshɛ. Le Jehowa,+ nyu l’ɔngɛndangɛnda nyekɔ woho ɔtɔi. 16 Ɔlɛmbɛ akɔ waamɛ ndo yɛdikɔ yakɔ yaamɛ mbayokambemaka le nyu ndo le ɔngɛndangɛnda wodjashi l’atei anyu.’”

17 Jehowa akatɛ Mɔsɛ ate: 18 “Sawola l’ase Isariyɛlɛ kele tɛwɔ wate: ‘Lam’ayonyokoma lo wodja watamanyɔtɔlɛ 19 ndo lam’ayonyɔlɛka diangɔ* dia lo wodja akɔ,+ kanyokimɔke woshasha dikambo dia Jehowa. 20 Kanyokimɔke mapa w’ebolonga oko woshasha w’oma l’ɔlɔnga+ wa ntɔngɔ yanyu. Oko woshasha w’oma lo dihole di’esuswelo mbahombanyu kimɔka woshasha akɔ. 21 Kanyokimɔke ntɔngɔ mɔtshi y’oma l’ɛlɔnga anyu oko woshasha dikambo dia Jehowa lo nɔnga yanyu tshɛ.

22 “‘Naka nyambosala munga ndo hanyokitanyiyisha wadjango asɔ tshɛ wakatɛ Jehowa Mɔsɛ, 23 mbuta ate kɛnɛ tshɛ kakanyodjangɛ Jehowa lo tshimbo ya Mɔsɛ oma ko lushi lakadjanga Jehowa polo lo nɔnga yanyu, 24 ndo naka munga k’aha la okonda kakasalema ndo aha la olui w’otondo w’ase Isariyɛlɛ mbeya, kete olui w’otondo pombaka nambola ɔsɔngɔ wa ngɔmbɛ oko olambo wa lotshumba wele l’opumu wa dimɛna* le Jehowa kaamɛ l’olambo awɔ wa ntɔngɔ ndo olambo awɔ wa lotɛ lo ndjela woho wokosalemaka+ ndo ɔsɔngɔ wa mbudi oko olambo wa pɛkato.+ 25 Ɔlɔmbɛdi ayokomba pɛkato k’olui w’otondo w’ase Isariyɛlɛ, ko vɔ wayodimanyiyama,+ nɛ dia ɔsɔ aki munga ndo vɔ wakela olambo awɔ watshumbama lo dja dikambo dia Jehowa ndo olambo awɔ wa pɛkato la ntondo ka Jehowa dikambo dia munga kawɔ. 26 Olui w’otondo w’ase Isariyɛlɛ ndo ɔngɛndangɛnda wodjashi l’atei awɔ wayodimanyiyama, nɛ dia ɔsɔ aki munga ka wodja w’otondo.

27 “‘Naka onto* ɔmɔtshi ambosala pɛkato aha la okonda, nde pombaka mbela mbudi ka wadi kele la ɔnɔnyi 1 dikambo di’olambo wa pɛkato.+ 28 Ko ɔlɔmbɛdi ayokomba pɛkato k’onto* akɔ lakasale munga lo nsala pɛkato la ntondo ka Jehowa aha la okonda, dia nde nkomba pɛkato kakɔ, ko nde ayodimanyiyama.+ 29 Ɔlɛmbɛ akɔ waamɛ kayokambemaka le ase Isariyɛlɛ wa lootɔ ndo le ɔngɛndangɛnda wodjashi l’atei anyu naka onto ambosala dui dimɔtshi aha la okonda.+

30 “‘Koko onto* lasala pɛkato la okonda,+ oyadi ose Isariyɛlɛ la lootɔ kana ɔngɛndangɛnda kende, nde ambɔtɛnga Jehowa ndo nde pombaka ndjakema. 31 Lam’ele nde ambɔnyɔla ɔtɛkɛta wa Jehowa ndo ambosekola didjango diande, onto* ɔsɔ pombaka ndjakema ndooko onyake.+ Nde pombaka nongola dilanya l’ɔtɛ wa munga kande.’”+

32 Lam’aki ase Isariyɛlɛ l’oswe, vɔ wakɛnyi pami kɛmɔtshi ana nkunyi lushi la Sabato.+ 33 Wanɛ wakootane ana nkunyi wakawela le Mɔsɛ nde l’Arɔna kaamɛ l’olui w’otondo w’ase Isariyɛlɛ. 34 Vɔ wakawodje lo lokanu,+ nɛ dia ndooko ɔlɛmbɛ wakashikikɛka kɛnɛ kakawahombe mbosalɛ.

35 Jehowa akayotɛ Mɔsɛ ate: “Pami kakɔ pombaka ndjakema ndooko onyake+ ndo olui w’otondo w’ase Isariyɛlɛ pombaka mbooka ave l’andja wa mpango.”+ 36 Ko olui w’otondo wakootondja l’andja wa mpango wakawooke ave, ko nde akavu, oko wakadjangɛ Jehowa Mɔsɛ.

37 Jehowa akatɛ Mɔsɛ ate: 38 “Sawola l’ase Isariyɛlɛ kele tɛwɔ dia vɔ pombaka mbidjaka tofufɔ lo ehembo w’ahɔndɔ awɔ lo nɔnga yawɔ tshɛ ndo vɔ pombaka mbidjaka ɔkɔdi wa bule la diko dia tofufɔ ta lo ehembo akɔ.+ 39 ‘Nyu pombaka monga la tofufɔ tɔsɔ lo ahɔndɔ dia nyu tiɛnaka ndo mbohɔka wadjango tshɛ waki Jehowa ndo nyu mbakitanyiya.+ Hanyohombe ndjela etema anyu ndo washo anyu hita wanyokonya lo kinumba ka lo nyuma.*+ 40 Dui sɔ diayonyoholaka ko nyayokitanyiyaka wadjango ami tshɛ ndo nyayongaka ekila le Nzambi+ kanyu. 41 Dimi kele Jehowa Nzambi kanyu lakanyotondja oma lo wodja w’Edjibito dia dimi monga Nzambi+ kanyu. Dimi kele Jehowa Nzambi kanyu.’”+

16 Oma laasɔ, Kɔra+ ɔna Izɛhara+ ɔna Kɔhata+ ɔna Lɛwi+ akasangana kaamɛ la Datana nde l’Abirama, ana wa Eliyabɛ+ ndo Ɔnɛ ɔna Pelɛtɛ ɔna Rubɛna.+ 2 Vɔ wakasangana l’apami akina 250 w’ase Isariyɛlɛ, ewandji w’olui wa wanɛ wakasɔnama l’etshumanelo, apami wa lokumu dia ndɔshana la Mɔsɛ. 3 Ko vɔ wakasangana kaamɛ dia ndɔshana+ la Mɔsɛ nde l’Arɔna ndo wakate vate: “Tambonyohekɔ! Olui w’otondo wekɔ ekila+ vɔ tshɛ ndo Jehowa ekɔ l’atei awɔ.+ Lande na kayadiyanyu laadiko dia etshumanelo ka Jehowa?”

4 Lam’akoke Mɔsɛ ngasɔ, mbala kakɔ ɔtɔi nde akayakɔsha ekukumadi. 5 Oma laasɔ, nde akatɛ Kɔra la wanɛ tshɛ wakoosukɛka ate: “La pindju, Jehowa ayɛnya ɔnɛ lele lande,+ ɔnɛ lele ekila ndo ɔnɛ lahomba sukanaka la nde.+ Onto tshɛ layondɔsɔna+ kayosukanaka la nde. 6 Nyosale nganɛ: Kɔra wɛ la wanɛ tshɛ wakosukɛ+ kanyɔshi diangɔ dia mɛmbaka dja,+ 7 kanyodje dja lɔkɔ ndo kanyodje tshɔ laadiko diayɔ ko nyu mbela la ntondo ka Jehowa loyi, ko pami kayɔsɔnama+ oma le Jehowa kele ekila. Nyu ana w’apami wa Lɛwi+ nyambotamba olelo!”

8 Oma laasɔ, Mɔsɛ akatɛ Kɔra ate: “Nyu ana w’apami wa Lɛwi, nyompokame yema lam’alanganyu. 9 Onde nyu fɔnyaka dia ekɔ dikambo dia tshitshɛ dia Nzambi k’Isariyɛlɛ nyokakitola oma l’olui w’ase Isariyɛlɛ+ ndo nyosha lotshungɔ la nyu sukanaka la nde dia nkamba olimu lo tabɛrnaklɛ kaki Jehowa ndo dia memalaka la ntondo k’olui w’ase Isariyɛlɛ dia mbakambɛ,+ 10 ndo nde nyosukanya suke la nde kaamɛ la anangɛnyu tshɛ, ana w’apami wa Lɛwi? Onde nyolanga mamamala ndo la olimu w’ɔlɔmbɛdi?+ 11 Diakɔ diambonyosangana wɛ la wanɛ tshɛ wakosukɛ dia ndɔshana la Jehowa. Arɔna eende katonyoongunɛngunɛ?”+

12 L’ɔkɔngɔ wa laasɔ, Mɔsɛ akatome dui dia vɔ telɛ Datana nde l’Abirama,+ ana wa Eliyabɛ, koko vɔ wakate vate: “Sho hatotoya! 13 Onde wɛ fɔnyaka dia ekɔ yana ya dikambo lo woho wakayatotondja oma lo wodja wakɛlanɛ abɛlɛ la osanga dia ndjotodiaka l’oswe ɔnɛ?+ Onde wɛ olanga ndjaetɛ owandji aso* lo akambo tshɛ? 14 Lo mɛtɛ wɛ hatela lo wodja wakɛlanɛ abɛlɛ la osanga+ ndo wɛ hatosha bɛtshi dia nkɛtɛ ndo dikambɔ dia vinyɔ oko etenyi k’okitɔ. Onde wate kundole washo w’apami anɛ? Sho hatotoya!”

15 Ko Mɔsɛ akoke nkɛlɛ ka mamba ndo akatɛ Jehowa ate: “Tendake elambo awɔ wa ntɔngɔ. Dimi kɔmbɔsa kaanga mponda kawɔ 1 ndo dimi kosalɛ kaanga onto 1 l’atei awɔ+ kɔlɔ.”

16 Oma laasɔ, Mɔsɛ akatɛ Kɔra ate: “Koye wɛ la wanɛ tshɛ wakosukɛ loyi la ntondo ka Jehowa. Koye wɛ la wɔ kaamɛ l’Arɔna. 17 Onto l’onto kɔshi ɛngɔ kande ka mɛmbaka dja, kadje tshɔ lɔkɔ ndo onto l’onto kemale la ɛngɔ kande ka mɛmbaka dja la ntondo ka Jehowa, mbuta ate diangɔ 250 dia mɛmbaka dja ndo wɛ l’Arɔna onto l’onto la ɛngɔ kande ka mɛmbaka dja.” 18 Ko onto l’onto l’atei awɔ akɔshi ɛngɔ kande ka mɛmbaka dja, akadje dja la tshɔ lɔkɔ ndo wakemala la soko dia luudu la dipɛma l’esanganelo kaamɛ la Mɔsɛ nde l’Arɔna. 19 Lam’akatshumanya Kɔra wanɛ wakoosukɛka+ dia ndɔshana la wɔ la soko dia luudu la dipɛma l’esanganelo, lotombo la Jehowa lakɛnama le olui w’otondo w’ase Isariyɛlɛ.+

20 Oma laasɔ, Jehowa akatɛ Mɔsɛ nde l’Arɔna ate: 21 “Nyomɔ oma l’atei w’olui w’anto ɔnɛ kele mbashile oshiki kakiye.”+ 22 Ko vɔ wakayakɔsha ekukumadi ndo wakate vate: “Nzambi le, Nzambi ka lɔsɛnɔ laki anto tshɛ*+ le, onde pɛkato k’onto 1 kayokokonya dia wɛ momalɛ olui w’otondo w’ase Isariyɛlɛ?”+

23 Oma laasɔ, Jehowa akatɛ Mɔsɛ ate: 24 “Sawola l’olui w’ase Isariyɛlɛ kele tɛwɔ wate: ‘Nyomɔ suke la mvudu y’apɛma ya Kɔra, Datana ndo Abirama!’”+

25 Oma laasɔ, Mɔsɛ akemala ko akatshu otsha le Datana nde l’Abirama, ndo dikumanyi+ dia l’Isariyɛlɛ wakatshu kaamɛ la nde. 26 Nde akatɛ olui w’ase Isariyɛlɛ ate: “Lam’alanganyu, nyomɔ suke la mvudu y’apɛma y’anto wa kɔlɔ anɛ ndo tanyonandake kaanga ɛngɔ kawɔ 1 diaha nyu ndjolanyema l’ɔtɛ wa pɛkato kawɔ.” 27 Mbala kakɔ ɔtɔi, vɔ wakamɔ suke la mvudu y’apɛma ya Kɔra, Datana ndo Abirama lo wedi akɔ tshɛ, ko Datana nde l’Abirama wakatombe ko wakemala l’asoko wa mvudu yawɔ y’apɛma kaamɛ la wadiɛwɔ, anawɔ w’apami ndo anawɔ wa totshitshɛ.

28 Oma laasɔ, Mɔsɛ akate ate: “Oma lo dikambo nɛ mbayonyeya dia Jehowa kakantome dia ndjosala akambo anɛ tshɛ, koko aha lo lolango lami hita: 29 Naka anto anɛ wambovɔ woho wa nyɔi katovɔka anto tshɛ ndo naka dilanya diawɔ diambonga woho wa dilanya diatolongolaka anto tshɛ, kete Jehowa kotomami.+ 30 Ko naka Jehowa ambosala dui dimɔtshi dia diambo le wɔ, ko nkɛtɛ yambasɛ onyɔ ndo yambaamɛna kaamɛ la diangɔ diawɔ tshɛ ndo wambotshɔ lo Diombo* wasɛna, kete nyayeya mɛtɛ dia apami anɛ wambɔnyɔla Jehowa.”

31 Kam’akandashidiya mbuta ɛtɛkɛta ɛsɔ, nkɛtɛ yakatɛ palala+ l’ɛse kawɔ. 32 Ko nkɛtɛ yakasɛ onyɔ ayɔ ko yakaamɛnɛ vɔ la ase nkumbo yawɔ ndo anto tshɛ wa Kɔra+ ndo diangɔ diawɔ tshɛ. 33 Ɔnkɔnɛ, vɔ l’anto awɔ tshɛ wakatshu lo Diombo* wasɛna ndo nkɛtɛ yakaakukumɛ, ko vɔ wakanyɛma oma l’atei w’etshumanelo.+ 34 Ase Isariyɛlɛ tshɛ waki suke la wɔ wakalawɔ watade ekoko, nɛ dia wakate vate: “Tekɔ la wɔma wa nkɛtɛ ndjotɔmɛna!” 35 Ko dja yakaholɔ oma le Jehowa+ ndo yakatshumbe apami 250 wakalambolaka tshɔ.+

36 Oma laasɔ, Jehowa akatɛ Mɔsɛ ate: 37 “Tɛ Eleazara ɔna ɔlɔmbɛdi Arɔna dia nde minya diangɔ dia mɛmbaka dja+ oma lo dja, nɛ dia yɔ yekɔ ekila. Tɛnde nto dia nde mpandjola dja lo tshalola. 38 Diangɔ dia mɛmbaka dja diaki apami wakashisha nsɛnɔ yawɔ l’ɔtɛ wakawasale pɛkato* pombaka tshulama oko pase dia mbolo dia tɔlɛwɛlɛwɛ kele matadiɔ lo elambwelo,+ dikambo vɔ wakayiela la ntondo ka Jehowa ndo yɔ yakayala ekila. Yɔ pombaka monga oko djembetelo le ase Isariyɛlɛ.”+ 39 Ko ɔlɔmbɛdi Eleazara akɔshi diangɔ dia nkonga dia mɛmbaka dja diakela wanɛ wakatshumbama, ko vɔ wakaditshule dia dimata lo elambwelo, 40 oko wakawotɛ Jehowa lo tshimbo ya Mɔsɛ. Ɔsɔ aki tshondo ya diohwelo le ase Isariyɛlɛ dia ndooko onto lele bu la lotshungɔ* ndo lele bu ɔna Arɔna lahomba nsukana dia totshumba tshɔ la ntondo ka Jehowa+ diaha onto ɔmɔtshi ndjonga oko Kɔra nde la wanɛ wakoosukɛka.+

41 La wedi a pindju wa lushi lɔsɔ, olui w’otondo w’ase Isariyɛlɛ wakatatɛ ngunɛngunɛ Mɔsɛ nde l’Arɔna,+ wata vate: “Nyu 2 nyambodiakisha anto waki Jehowa.” 42 Lam’akatshumana olui w’anto kaamɛ dia ndɔshana la Mɔsɛ nde l’Arɔna, vɔ wakakadimɔ otsha lo luudu la dipɛma l’esanganelo, ko wakɛnyi dinge diambolikomba ndo lotombo la Jehowa lakatatɛ mɛnama.+

43 Mɔsɛ nde l’Arɔna wakatshu la ntondo ka luudu la dipɛma l’esanganelo,+ 44 ko Jehowa akatɛ Mɔsɛ ate: 45 “Nyomɔ oma l’atei w’olui w’anto ɔnɛ kele mbashile oshiki kakiye.”+ Ko vɔ wakayakɔsha ekukumadi.+ 46 Oma laasɔ, Mɔsɛ akatɛ Arɔna ate: “Ɔsa ɛngɔ ka mɛmbaka dja kele dja dja y’oma lo elambwelo+ lɔkɔ ndo dja tshɔ lɔkɔ kele tshɔka yema esadi le olui w’ase Isariyɛlɛ ndo tokombe pɛkato yawɔ,+ nɛ dia Jehowa amboka nkɛlɛ. Mpokoso kambotatɛ!” 47 Ko Arɔna akɔshi ɛngɔ kakɔ ka mɛmbaka dja aha la ntshimbatshimba oko wakate Mɔsɛ ndo akalawɔ otsha l’atei w’etshumanelo, ɛnyinde ko mpokoso kakatate l’atei w’anto. Ɔnkɔnɛ nde akadje tshɔ lo lohoso ndo akatatɛ nkomba pɛkato ya wodja. 48 Nde akatetemala memala lam’asa edo l’anto wasɛna, ko l’edjedja ka wonya, sui diakɔ diakashile. 49 Wanɛ wakavu la sui sɔ waki anto nunu dikumi la nɛi la nkama esambele (14 700), aha la mbidja wanɛ wakavu l’ɔtɛ wa Kɔra. 50 L’ekomelo, lam’akakalola Arɔna otsha le Mɔsɛ la soko dia luudu la dipɛma l’esanganelo ko sui diakɔ diamboshila.

17 Ko Jehowa akatɛ Mɔsɛ ate: 2 “Sawola l’ase Isariyɛlɛ kele ɔsa danga ɔtɔi ɔtɔi oma le onto l’onto lele owandji wa luudu la she, oma le ewandji wa luudu la luudu la shɛwɔ,+ tshɛ tshɛ alanga 12. Funda lokombo la onto l’onto lo danga diande. 3 Kofunde lokombo l’Arɔna lo danga diaki Lɛwi, nɛ dia ekɔ danga 1 dikambo dia owandji l’owandji wa luudu la she. 4 Kokitsha alanga akɔ lo luudu la dipɛma l’esanganelo la ntondo k’ɔshɛtɛ w’Ɔmɛnyi,+ lɛnɛ atomɛnamaka le nyu+ mbala la mbala. 5 Danga di’onto layomɔsɔna+ kayɔmɔnga, ko dimi layokomiya engunungunu w’ase Isariyɛlɛ wangunɛngunɛwɔ+ ndo wanyongunɛngunɛwɔ.”+

6 Mɔsɛ akasawola l’ase Isariyɛlɛ, ko ewandji awɔ tshɛ wakakimɔ alanga awɔ, danga ɔtɔi ɔtɔi oma le owandji l’owandji wa lo luudu la she, tshɛ tshɛ alanga 12. Ndo danga dia Arɔna diaki l’atei awɔ. 7 Ko Mɔsɛ akakitsha alanga akɔ la ntondo ka Jehowa lo luudu la dipɛma l’Ɔmɛnyi.

8 La wedi a pindju, lam’akɔtɔ Mɔsɛ lo luudu la dipɛma l’Ɔmɛnyi, danga dia Arɔna diaki dikambo dia dioho dia Lɛwi diakamɔngɛ, diakatondja sɔngusɔngu, diakatondja alɛmbɔlɛmbɔ ndo diakatɔ elowa w’amandɛ wambɛla. 9 Ko Mɔsɛ akatondja alanga akɔ tshɛ oma la ntondo ka Jehowa otsha le ase Isariyɛlɛ tshɛ. Vɔ wakawaende ko onto l’onto akɔshi danga diande.

10 Oma laasɔ, Jehowa akatɛ Mɔsɛ ate: “Kaloya danga+ dia Arɔna la ntondo k’ɔshɛtɛ w’Ɔmɛnyi dia diɔ namema oko djembetelo+ le ana wele la yimba y’ɔtɔmbɔkwɛlɔ,+ dia vɔ ntshika ngunɛngunɛmi ndo diaha vɔ mvɔ.” 11 Aha la ntshimbatshimba, Mɔsɛ akasale kɛnɛ kakawodjangɛ Jehowa. Nde akasale kɛnɛ kakawawodjangɛ tshɛ lo tshɛ.

12 Oma laasɔ, ase Isariyɛlɛ wakatɛ Mɔsɛ vate: “Wonya ɔnɛ sho tayanga mvɔ ndo ndooko onyake tayoshila oshiki, sho tshɛ tayoshila oshiki! 13 Onto tshɛ layosukana kaanga nsukana la tabɛrnaklɛ kaki Jehowa ayovɔ!+ Onde tayokomɛ paka lo mvɔka ngasɔ oto?”+

18 Oma laasɔ, Jehowa akatɛ Arɔna ate: “Wayoyokoya la yɛ wɛ l’anayɛ w’apami ndo l’ase luudu la shɔ wele kaamɛ la yɛ l’ɔtɛ wɔnyɔma ɛlɛmbɛ wendana la tɛmpɛlɔ k’ekila+ ndo wayoyokoya la yɛ wɛ l’anayɛ w’apami wele kaamɛ la yɛ l’ɔtɛ wɔnyɔma ɛlɛmbɛ wendana l’olimu anyu w’ɔlɔmbɛdi.+ 2 Ndo nto, sukanya ananyɔ wa lo dioho dia Lɛwi, dioho dia watshɛyɛ dia vɔ monga kaamɛ la yɛ ndo kokimanyiyaka wɛ+ l’anayɛ w’apami la ntondo ka luudu la dipɛma l’Ɔmɛnyi.+ 3 Vɔ pombaka kotshaka ɛkɛndɛ awɔ otsha le yɛ ndo wendana la luudu la dipɛma l’otondo.+ Koko vɔ hawohombe nsukana la diangɔ dia lo dihole di’ekila kana elambwelo diaha vɔ kana wɛ mvɔ.+ 4 Vɔ wayonga kaamɛ la yɛ ndo wayokotshaka ɛkɛndɛ awɔ wendana la luudu la dipɛma l’esanganelo ndo elimu tshɛ wa lo luudu la dipɛma, ndo ndooko onto lele bu la lotshungɔ* lahomba nsukana la nyu.+ 5 Nyu pombaka kotshaka ɔkɛndɛ anyu wendana la dihole di’ekila+ ndo la elambwelo+ diaha dimi momalɛ+ ase Isariyɛlɛ nto. 6 Dimi lambɔsa anangɛnyu, mbuta ate ase Lɛwi l’atei w’ase Isariyɛlɛ oko woshasha dikambo dianyu.+ Vɔ wambokimɔma le Jehowa dia kambaka olimu lo luudu la dipɛma l’esanganelo.+ 7 Wɛ l’anayɛ w’apami mbele la ɔkɛndɛ w’elimu anyu w’ɔlɔmbɛdi lo kɛnɛ kendana la elambwelo ndo diangɔ diele la wedi wa dihɔndɔ di’okombɔ.+ Nyu mbahomba kambaka olimu lɔkɔ.+ Dimi lambonyosha olimu w’ɔlɔmbɛdi oko woshasha. Ɔnkɔnɛ, onto tshɛ lele bu la lotshungɔ* layosukana laawɔ pombaka ndjakema.”+

8 Jehowa akatɛ Arɔna nto ate: “Dimi lambokosha ɔkɛndɛ wa mendaka weshasha wakimɔma dikambo diami.+ Dimi lambokosha wɛ l’anayɛ w’apami etenyi kɛmɔtshi ka diangɔ tshɛ di’ekila diakimɔ ase Isariyɛlɛ oko woshasha. Tɔ kayongaka etenyi kayɛ pondjo pondjo.+ 9 Diangɔ di’oma lo diangɔ dioleki ekila di’olambo wa lotshumba diayongaka diayɛ diɔ nɛ: Olambo tshɛ wayowokimɔka, mbidja ndo elambo awɔ wa ntɔngɔ+ la elambo awɔ wa pɛkato+ ndo elambo w’onongo+ welawɔ le mi. Ɔsɔ ekɔ ɛngɔ koleki ekila le yɛ ndo le anayɛ w’apami. 10 Lo dihole dioleki ekila kahombayɛ ndɛka diangɔ sɔ.+ Pami tshɛ kokaka dilɛ. Ɔsɔ ayonga ɛngɔ k’ekila le yɛ.+ 11 Ndo diangɔ nɛ diekɔ diayɛ: Weshasha wakimɔwɔ+ kaamɛ l’elambo tshɛ wa letshetsha+ w’ase Isariyɛlɛ. Dimi lambokoshadiɔ wɛ l’anayɛ w’apami l’anayɛ wa wamato. Diɔ diayongaka dianyu+ pondjo pondjo. Onto tshɛ la lo luudu layɛ lele pudipudi kokaka dilɛ.+

12 “Dimi lambokosha+ esɔ tshɛ koleki dimɛna, wanu tshɛ w’eyoyo woleki amɛna ndo ntɔngɔ tshɛ yoleki amɛna kaamɛ la ɛlɔnga+ wakimɔwɔ le Jehowa. 13 Ɛlɔnga wa diangɔ tshɛ di’oma lo dikambɔ diawɔ wakimɔwɔ le Jehowa wayongaka wayɛ.+ Onto tshɛ la lo luudu layɛ lele pudipudi kokaka dilɛ.

14 “Ɛngɔ tshɛ kakakimɔma* kele l’Isariyɛlɛ kayonga kayɛ.+

15 “Ana wa nondo tshɛ w’anto kana wa nyama*+ wayowokimɔka le Jehowa pombaka monga wayɛ. Koko wɛ pombaka ntshungola ana wa nondo w’anto.+ Wɛ pombaka ntshungola+ ndo ana wa nondo wa nyama yele mindo. 16 Wɛ pombaka ntshungola nyama kakɔ la oshinga w’etshungwelo kam’akotshatɔ ngɔndɔ 1 otsha la diko la oshinga atɔ wakashikikɛma wa tɔshɛkɛlɛ* 5 ta mfɛsa lo ndjela yɛdikɔ ya shɛkɛlɛ+ ya lo dihole di’ekila* yele la ngera* 20. 17 Onyake ɔna enondo la ngɔmbɛ kana l’ɔkɔkɔ w’omi kana la mbudi kahayahombe ntshungola.+ Diangɔ sɔ diekɔ ekila. Kɔmɔngɛ dikila diawɔ lo elambwelo+ ndo kɔshi wata awɔ ko wɛ ntshumba lo dja oko olambo wa lotshumba lo dja wele l’opumu wa dimɛna* le Jehowa.+ 18 Emunyi ayɔ wayonga wayɛ. Vɔ pombaka monga wayɛ+ oko ntolo k’olambo wa letshetsha ndo oko elemba ka lokolo l’omi. 19 Dimi lambokosha wɛ l’anayɛ w’apami la anayɛ wa wamato weshasha w’ekila tshɛ wakimɔ ase Isariyɛlɛ le Jehowa.+ Vɔ wayongaka+ wayɛ pondjo pondjo. Ɔsɔ ekɔ sheke ya pondjo ya lɛɛhɔ* lam’asa Jehowa nde la yɛ ndo la tokanula tayɛ.”

20 Jehowa akatɛ Arɔna ate: “Wɛ hatonga la etenyi k’okitɔ ndo wɛ hatonga la ɛtshi ka nkɛtɛ lo wodja w’Isariyɛlɛ. Dimi kele yema yayɛ+ ndo etenyi kayɛ k’okitɔ l’atei w’ase Isariyɛlɛ.+

21 “Dimi lambosha ana w’apami waki Lɛwi etenyi tshɛ ka dikumi+ ka l’Isariyɛlɛ oko etenyi k’okitɔ l’ɔtɛ w’olimu wakambawɔ, olimu wa lo luudu la dipɛma l’esanganelo. 22 Ase Isariyɛlɛ hawotosukanaka nto lo luudu la dipɛma l’esanganelo. Naka vɔ nsala dui sɔ, kete wayosala pɛkato ndo wayovɔ. 23 Ase Lɛwi vɔamɛ wayokambaka olimu wa lo luudu la dipɛma l’esanganelo ndo vɔ mbayolongolaka dilanya l’ɔtɛ wa munga yawɔ.+ Ɔsɔ ekɔ didjango dia pondjo lo nɔnga yanyu tshɛ dia vɔ hawohombe nkondja etenyi k’okitɔ l’atei w’ase Isariyɛlɛ.+ 24 Nɛ dia dimi lambosha ase Lɛwi etenyi ka dikumi kakimɔ ase Isariyɛlɛ dikambo dia Jehowa oko etenyi kawɔ k’okitɔ. Diakɔ diakamate nte: ‘Vɔ hawohombe nkondja etenyi k’okitɔ+ l’atei w’ase Isariyɛlɛ.’”

25 Oma laasɔ, Jehowa akatɛ Mɔsɛ ate: 26 “Tɛ ase Lɛwi wate: ‘Nyayolongolaka etenyi ka dikumi kakamanyosha oma le ase Isariyɛlɛ oko etenyi kanyu k’okitɔ+ ndo nyu pombaka kimɔka etenyi ka dikumi oma lo etenyi kakɔ ka dikumi oko woshasha anyu le Jehowa.+ 27 Tɔ kayɔsamaka oko woshasha anyu wate kana oko ntɔngɔ y’oma lo dihole di’esuswelo+ kana oko diangɔ di’efula di’oma lo diamula dia vinyɔ kana di’esɔ. 28 Ngasɔ mbayonyoshaka Jehowa ndo nyu lawɔ tenyi tshɛ dia dikumi dialongolanyu oma le ase Isariyɛlɛ ndo oma lɔkɔ mbahombanyu kimɔka woshasha wa Jehowa le ɔlɔmbɛdi Arɔna. 29 Woho tshɛ wa woshasha wayonyokimɔka le Jehowa pombaka monga diangɔ dioleki amɛna di’oma lo weshasha wakawanyosha+ oko ɛngɔ k’ekila.’

30 “Kowate wate: ‘Lam’ayonyokimɔka diangɔ dioleki amɛna di’oma lɔkɔ, diɔ diayɔsamaka le ase Lɛwi oko diangɔ di’oma lo dihole di’esuswelo ndo oko diangɔ di’oma lo diamula dia vinyɔ kana di’esɔ. 31 Nyu l’ase mvudu yanyu mbeyaka dilɛ lo dihole diakɔna tshɛ, nɛ dia ɔsɔ ekɔ difuto dianyu l’ɔtɛ w’olimu wakambanyu lo luudu la dipɛma l’esanganelo.+ 32 Hanyotonga la onongo wa pɛkato lo dikambo sɔ edja tshɛ kayonyokimɔka diangɔ dioleki amɛna di’oma lɔkɔ ndo hanyohombe nsuwola ekila ka diangɔ di’ekila di’ase Isariyɛlɛ diaha nyu mvɔ.’”+

19 Jehowa akatɛ Mɔsɛ nde l’Arɔna nto ate: 2 “Jehowa ambodja ɔlɛmbɛ ɔnɛ ate: ‘Tɛ ase Isariyɛlɛ dia vɔ koyangɛ ngɔmbɛ ka wadi ka beela kaha la ɛkɔmɔ, kaha la diwadi+ ndo kahatakelekamaka osembe. 3 Kokisha ɔlɔmbɛdi Eleazara ndo nde ayotomba la tɔ l’andja wa mpango ko wayotokidiaka la ntondo kande. 4 Oma laasɔ, ɔlɔmbɛdi Eleazara ayɔsa yema ya dikila diatɔ la lohita lande ko nde mɔnga dikila diatɔ mbala 7 otsha la soko dia luudu la dipɛma l’esanganelo.+ 5 L’ɔkɔngɔ wa laasɔ, kawotshumbe ngɔmbɛ kakɔ lo washo ande. Kawotshumbe+ ndo lokoho latɔ, emunyi atɔ, dikila diatɔ kaamɛ ndo tumi yatɔ. 6 Ɔlɔmbɛdi kɔshi tshenyi ya shongo y’olondo, diyo dia izɔpɛ+ ndo dihɔndɔ dia beela k’efula ko nde mbidja lo dja yatshumbama ngɔmbɛ. 7 Oma laasɔ, ɔlɔmbɛdi kasole ahɔndɔ ande ndo kɔkɛ, l’ɔkɔngɔ diko kakokande ndjoya lo mpango. Koko ɔlɔmbɛdi ayonga mindo polo la dikɔlɔ.

8 “‘Ɔnɛ latshumba ngɔmbɛ pombaka nsola ahɔndɔ ande ndo mbɔka. Nde ayonga mindo polo la dikɔlɔ.

9 “‘Onto lele pudipudi katshumanya otoko wa ngɔmbɛ+ kakɔ ko nde tokitsha l’andja wa mpango lo dihole dia pudipudi. Olui w’ase Isariyɛlɛ pombaka nama otoko akɔ dia ndjɔlɔngɔsɔla ashi wayokambemaka lo wɛdiamelo.+ Ɔsɔ ekɔ olambo wa pɛkato. 10 Ɔnɛ latshumanya otoko wa ngɔmbɛ kasole ahɔndɔ ande. Nde ayonga mindo polo la dikɔlɔ.

“‘Ɔsɔ ayonga didjango dia pondjo le ase Isariyɛlɛ ndo le ɔngɛndangɛnda wodjashi l’atei awɔ.+ 11 Onto tshɛ lananda odo w’onto* ayonga mindo l’edja ka nshi 7.+ 12 Onto la ngasɔ pombaka ndjaɛdia la ashi wa wɛdiamelo lushi la 3, ko nde ayonga pudipudi lushi la 7. Ko naka nde hayaɛdisha lushi la 3, nde hatonga pudipudi lushi la 7. 13 Onto tshɛ layonanda odo w’onto* ko nde hayaɛdisha ambodja tabɛrnaklɛ+ ka Jehowa mindo ndo onto* ɔsɔ pombaka ndjakema.+ Lam’ele hawɔɔmɔngi ashi wa wɛdiamelo,+ nde ayotetemala monga mindo. Mindo yande yayotshikala le nde.

14 “‘Ɔlɛmbɛ ɔnɛ kayokambaka la nyu etena kavɔ onto lo luudu la dipɛma: Onto tshɛ lɔtɔ lo luudu lakɔ la dipɛma ndo onto tshɛ lakashidi mbɔtɔ lo luudu lakɔ la dipɛma ayonga mindo l’edja ka nshi 7. 15 Ɛngɔ tshɛ ka hwe kahafame ofidi kele lɔkɔ kayonga mindo.+ 16 Onto tshɛ lele l’oswe lasakanya onto lodiakiwɔ la lokuwa kana odo kana weka w’onto kana diombo ayonga mindo l’edja ka nshi 7.+ 17 Vɔ pombaka mbɔsa yema y’otoko w’olambo wa pɛkato wakatshumbama dikambo di’onto lele mindo ko vɔ mpongola ashi lo otoko akɔ wele lo ɛngɔ kɛmɔtshi. 18 Oma laasɔ, onto lele pudipudi+ kɔshi diyo dia izɔpɛ+ ko nde ditambiya lo ashi akɔ ko nde mɔnga ashi akɔ lo luudu la dipɛma ndo lo diangɔ tshɛ diombawɔ diangɔ ndo le anto* waki laawɔ ndo le onto tshɛ lakananda weka kana odo w’onto lakadiakema kana odo w’onto lovwe ovɔvɔ kana diombo. 19 Onto lele pudipudi ayɔmɔnga onto lele mindo ashi akɔ lushi la 3 ndo lushi la 7, ko nde ayowɛdia lushi la 7.+ Oma laasɔ, onto akɔ pombaka nsola ahɔndɔ ande ndo mbɔka, ko nde ayonga pudipudi la dikɔlɔ.

20 “‘Koko onto lele mindo ndo lahatoyaɛdia, onto* ɔsɔ pombaka minyɛma* oma lo etshumanelo,+ nɛ dia nde ambodja tɛmpɛlɔ k’ekila kaki Jehowa mindo. Lam’ele nde kombitamɛ ashi wa wɛdiamelo, nde ekɔ mindo.

21 “‘Ɔnɛ ayonga didjango dia pondjo le wɔ: Onto lamɔngana ashi wa wɛdiamelo+ pombaka nsola ahɔndɔ ande ndo onto lananda ashi wa wɛdiamelo ayonga mindo polo la dikɔlɔ. 22 Naka onto lele mindo ambonanda ɛngɔ kɛmɔtshi, tɔ kayonga mindo ndo onto* lakinanda ayonga mindo polo la dikɔlɔ.’”+

20 Lo ngɔndɔ ka ntondo, olui w’otondo w’ase Isariyɛlɛ wakakome l’oswe wa Zinɛ, ko anto wakadjasɛ la Kadɛshɛ.+ Lɛkɔ mbakavu Miriyama+ ndo mbakandakundɛma.

2 Ashi w’anto nnɔ komonga laawɔ, ko vɔ wakatshumana+ dia tɔmbɔkwɛ Mɔsɛ nde l’Arɔna. 3 Anto wakadjɛ Mɔsɛ+ londjo vate: “Yanga ototovɔ etena kakavu anangɛso la ntondo ka Jehowa! 4 Lande na kamboyela etshumanelo kaki Jehowa l’oswe ɔnɛ dia sho la dongalonga diaso ndjovɔ l’oswe ɔnɛ?+ 5 Lande na kakayatotondja oma l’Edjibito dia tela lo dihole dia kɔlɔ nɛ?+ Lanɛ ndooko dihole dia monɛ diononɛ, fingo, vinyɔ ndo elowa wa pɔmɛgranatɛ, ndo ashi wa nnɔ bu.”+ 6 Ko Mɔsɛ nde l’Arɔna wakamɔ oma la ntondo k’etshumanelo ko wakatshu la soko dia luudu la dipɛma l’esanganelo ndo wakayakɔsha ekukumadi, ko lotombo la Jehowa lakɛnama le wɔ.+

7 Oma laasɔ, Jehowa akatɛ Mɔsɛ ate: 8 “Ɔsa danga kele wɛ la ɔnanyɔ Arɔna nyote olui w’ase Isariyɛlɛ dia ntshumana kele nyote dive lo washo w’anto tshɛ dia diɔ ntondja ashi. Nyayowatondjɛ ashi oma lo dive diakɔ ko nyu mbisha anto tshɛ la dongalonga diawɔ ashi wa nnɔ.”+

9 Ko Mɔsɛ akɔshi danga oma la ntondo ka Jehowa+ oko wakandawodjangɛ. 10 Oma laasɔ, Mɔsɛ nde l’Arɔna wakatshumanya etshumanelo k’otondo la ntondo ka dive, ko Mɔsɛ akawatɛ ate: “Nyu atɔmbɔki le, nyohokame! Onde tonyotondje ashi oma lo dive nɛ?”+ 11 Ko Mɔsɛ akawedia lonya lande ndo akakɔmɔla danga diande lo dive mbala 2, ko ashi wakatatɛ ntomba oma lɔkɔ ko olui w’ase Isariyɛlɛ kaamɛ la dongalonga diawɔ wakanɔ.+

12 L’ɔkɔngɔ diko, Jehowa akatɛ Mɔsɛ nde l’Arɔna ate: “Lam’ele hanyongi la mbetawɔ le mi ndo hanyonkidisha la ntondo k’ase Isariyɛlɛ, nyu hanyotɔtshiya etshumanelo kɛnɛ lo wodja wayomowasha.”+ 13 Ɔsɔ ekɔ ashi wa Meriba,*+ lɛnɛ akadjɛ ase Isariyɛlɛ Jehowa londjo, ko nde akayakidia l’atei awɔ.

14 Oma laasɔ, Mɔsɛ akatome akɛndji oma la Kadɛshɛ otsha le nkumekanga ka Ɛdɔmɛ+ dia towotɛ ɔnɛ: “Isariyɛlɛ+ w’ɔnanyɔ kata ate: ‘Wɛ mbeyaka dimɛna paa tshɛ yambotɛna. 15 Washɛso wakatshu l’Edjibito ko sho takatodjasɛ l’Edjibito+ ɛnɔnyi*+ efula. Ase Edjibito wakatɔhɛnyahɛnya efula sho la washɛso.+ 16 Sho takayolelɛka Jehowa,+ ko nde akatooke ndo akatome ondjelo,+ ko ondjelo akatotondja oma l’Edjibito. Wonya ɔnɛ sho tekɔ la Kadɛshɛ, osomba wele lo olelo w’ɛtshi kayɛ ka nkɛtɛ. 17 Lam’alangayɛ, ototshike tete lo wodja ayɛ. Hatoteta lo dikambɔ diayɛ kana lo ekambɔ kayɛ ka vinyɔ kaanga 1 ndo hatotɔnɔ ashi w’oma lo ɛtɛkɔ kayɛ kaanga 1. Tayeta lo Otadimbo wa Nkumekanga aha la mbɛtɔla lo lonya l’omi kana la lɔmɔsɔ polo lam’ayotolekana ɛtshi kayɛ ka nkɛtɛ.’”+

18 Koko Ɛdɔmɛ akawotɛ ate: “Wɛ hakoke mbeta lo ɛtshi kaso ka nkɛtɛ. Naka wɛ mbeta, dimi layoya la lokuwa la ta dia ndjokɔlɔsha.” 19 Ko ase Isariyɛlɛ wakawotɛ vate: “Sho tayeta lo mboka ka woke ndo naka sho kana dongalonga diaso nnɔ ashi ayɛ, kete tayofuta.+ Sho ndooko l’ohomba w’ɛngɔ kekina laadiko dia mbeta tsho l’ekolo.”+ 20 Koko nde akate ate: “Hanyokoke mbeta.”+ Ko nkumekanga ka Ɛdɔmɛ akaye l’anto efula ndo l’asɔlayi* wa wolo dia ndjohomana la wɔ. 21 Ɔnkɔnɛ Ɛdɔmɛ akatone dia Isariyɛlɛ mbeta lo ɛtshi kande ka nkɛtɛ, ko Isariyɛlɛ akete lo mboka kekina.+

22 Olui w’otondo w’ase Isariyɛlɛ wakamɔ oma la Kadɛshɛ ko wakatokoma lo dikona dia Hɔra.+ 23 Ko Jehowa akatɛ Mɔsɛ nde l’Arɔna lo dikona dia Hɔra lo olelo wa wodja wa Ɛdɔmɛ ate: 24 “Arɔna ayoyela watshɛnde.*+ Nde hatɔtɔ lo wodja wayomosha ase Isariyɛlɛ, nɛ dia nyu 2 nyakɔnyɔla didjango diami lo dikambo dia ashi wa Meriba.+ 25 Ɔsa Arɔna nde la ɔnande Eleazara kele dɛ la wɔ lo dikona dia Hɔra. 26 Kotokolole Arɔna ahɔndɔ+ ande w’ɔlɔmbɛdi kele kotɔlɔtsha ɔnande Eleazara.+ Arɔna ayovɔ lɛkɔ.”*

27 Ko Mɔsɛ akasale kɛnɛ kakawodjangɛ Jehowa ndo vɔ wakadɛ lo dikona dia Hɔra lo washo w’ase Isariyɛlɛ tshɛ. 28 Ko Mɔsɛ akakolola Arɔna ahɔndɔ ande w’ɔlɔmbɛdi ko akalɔtsha ɔnande Eleazara. L’ɔkɔngɔ wa laasɔ, Arɔna akavu laawɔ lo shɔdi ya dikona.+ Ko Mɔsɛ nde la Eleazara wakaholɔ oma lo dikona. 29 Lam’akɛnyi olui w’otondo w’ase Isariyɛlɛ dia Arɔna ambovɔ, nkumbo k’otondo k’Isariyɛlɛ wakalele Arɔna l’edja ka nshi 30.+

21 Lam’akoke nkumekanga ka Arada+ laki ose Kanana lakadjasɛka la Nɛngɛbɛ dia ase Isariyɛlɛ wekɔ lo ndjaye lo mboka k’otsha lo Atarima, nde akalɔsha ase Isariyɛlɛ ndo akande amɔtshi mfumbe. 2 Ko ase Isariyɛlɛ wakatshike dɔkɔlɔkɔ nɛ la ntondo ka Jehowa: “Naka wɛ nkimɔ anto anɛ l’anya aso, kete ndooko onyake tayolanya esomba awɔ.” 3 Ɔnkɔnɛ, Jehowa akokɛ ase Isariyɛlɛ ko nde akakimɔ ase Kanana l’anya awɔ. Vɔ wakaalanya ndo wakalanya esomba awɔ. Ko wakɔlɛ dihole sɔ ɔnɛ Horima.*+

4 Lam’akawatatetemalaka la lɔkɛndɔ lawɔ oma lo Dikona dia Hɔra+ lo mboka k’otsha lo Ndjale ka Beela la oyango wa tshimbɛ wodja wa Ɛdɔmɛ,+ anto* wakakɔmɔ la lɔkɛndɔ. 5 Anto wakatɛkɛtaka kɔlɔ dikambo dia Nzambi ndo dia Mɔsɛ,+ wata vate: “Lande na kakanyatotondja oma l’Edjibito dia sho ndjovɔ l’oswe? Sho ndooko la ɛngɔ ka ndɛ kana ashi+ wa nnɔ ndo sho* tambohetsha* mapa+ w’anyanya ɛnɛ.” 6 Ɔnkɔnɛ Jehowa akaatomɛ eloyi wa lɔlɛngɔ,* ko vɔ wakalumataka anto ko ase Isariyɛlɛ efula wakavu.+

7 Ko anto wakaye le Mɔsɛ ko wakayowotɛ vate: “Sho tambosala pɛkato lo ntɛkɛta kɔlɔ dikambo dia Jehowa ndo dikambo diayɛ.+ Otɔlɔmbɛ Jehowa dia nde tonyɛ eloyi.” Ko Mɔsɛ akalɔmbɛ Jehowa lo wahɔ wa wodja.+ 8 Oma laasɔ, Jehowa akatɛ Mɔsɛ ate: “Sala efanelo k’oloyi wa lɔlɛngɔ* kele hanɛwɔ lo ekundji. Naka onto ɔmɔtshi ambolumatama oloyi, nde pombaka menda oloyi akɔ wa losala dia nde ntshikala la lɔsɛnɔ.” 9 Aha la ntshimbatshimba Mɔsɛ akasale oloyi wa nkonga+ ndo akoohanɛ lo ekundji.+ Etena tshɛ kakalumatamaka onto oloyi ko nde menda oloyi akɔ wa nkonga, nde akatshikalaka la lɔsɛnɔ.+

10 L’ɔkɔngɔ wa laasɔ, ase Isariyɛlɛ wakonɛɛ ko wakatohanga la Obota.+ 11 Oma laasɔ, vɔ wakonɛɛ oma la Obota ko wakatohanga la Iyɛ-Abarima,+ l’oswe wakɛlanɛ la Mɔaba, lo ɛstɛ. 12 Vɔ wakonɛɛ oma lɛkɔ ko wakatohanga l’Okidi wa Zɛrɛdɛ.+ 13 Vɔ wakonɛɛ oma lɛkɔ ko wakatohanga lo ɛtshi ka nkɛtɛ ka Aranɔna+ kele l’oswe watshɔ polo l’olelo w’ase Amɔra, nɛ dia Aranɔna kele olelo w’ase Mɔaba, lam’asa Mɔaba l’ase Amɔra. 14 Diakɔ diata dibuku dia Ata wa Jehowa dia “Vahɛba ka la Sufa ndo ekidi w’Aranɔna, 15 ndo oholola* w’ekidi watshɔ otsha lɛnɛ adjasɛ Arɛ polo l’olelo w’ase Mɔaba.”

16 Oma laasɔ, vɔ wakonɛɛ otsha la Bɛrɛ.* Ɔsɔ kele ɛtɛkɔ kakatɛ Jehowa Mɔsɛ ate: “Tshumanya anto kele mbasha ashi.”

17 L’etena kɛsɔ ase Isariyɛlɛ wakembe osambo ɔnɛ vate:

“Ɛtɛkɔ le, tondja ashi! Nyokiembe!*

18 Ɛtɛkɔ kakatshime ewandji, kakatshime ɛlɔhɛ,

La danga dia nkumekanga, la alanga awɔ hita.”

Oma laasɔ, vɔ wakonɛɛ oma l’oswe ko wakatshu otsha la Matana. 19 Vɔ wakonɛɛ oma la Matana otsha la Nahaliyɛlɛ ndo oma la Nahaliyɛlɛ otsha la Bamɔta.+ 20 Vɔ wakonɛɛ oma la Bamɔta ko wakatshu otsha l’okidi wele lo ɛtshi ka nkɛtɛ* k’ase Mɔaba+ lo shɔdi ya Pisinga+ kɛlane la Jeshimɔna.*+

21 Ko ase Isariyɛlɛ wakatomɛ Sihɔna nkumekanga k’ase Amɔra akɛndji dia towotɛ ɔnɛ:+ 22 “Ototshike tete lo wodja ayɛ. Sho hatotɔtɔ lo ekambɔ kana lo ekambɔ ka vinyɔ. Hatotɔnɔ ashi w’oma lo ɛtɛkɔ kayɛ kaanga 1. Tayeta lo Otadimbo wa Nkumekanga polo lam’ayotolekana ɛtshi kayɛ ka nkɛtɛ.”+ 23 Koko Sihɔna kombetawɔ di’ase Isariyɛlɛ mbeta lo ɛtshi kande ka nkɛtɛ. Sihɔna akasanganya anto ande tshɛ ko wakatshu dia tɔlɔsha ase Isariyɛlɛ l’oswe ndo wakakome la Jahaza ko wakatatɛ ndɔ l’ase Isariyɛlɛ.+ 24 Ko ase Isariyɛlɛ wakɔɔlɛndja la lokuwa la ta+ ndo wakɔshi wodja ande,+ ntatɛ oma la Aranɔna+ polo la Jabɔka,+ suke la ase Amɔna, nɛ dia Jazɛrɛ+ aki l’olelo w’ɛtshi ka nkɛtɛ k’ase Amɔna.+

25 Ɔnkɔnɛ, ase Isariyɛlɛ wakɔshi esomba ɛsɔ tshɛ ko wakadjasɛ lo esomba tshɛ w’ase Amɔra,+ la Hɛshibɔna ndo lo tosombasomba tshɛ tendɛ le wɔ.* 26 Nɛ dia Hɛshibɔna aki osomba wa Sihɔna nkumekanga k’ase Amɔra, ɔnɛ lakalɔ la nkumekanga ka Mɔaba ko nde mbɔhɔtɔla wodja ande w’otondo, ntatɛ oma lɛnɛ akinde polo la Aranɔna. 27 Diakɔ diakayotombaka yokedi ya lɔsɔkɔ nyɛ:

“Nyoye la Hɛshibɔna.

Osomba wa Sihɔna wahikame ndo washikimale nge.

28 Nɛ dia dja yakatombe oma la Hɛshibɔna, loombe oma lo shombasomba ya Sihɔna.

Yɔ yakatshumbe Arɛ ka la Mɔaba, yakatshumbe nkumi ya lo ahole wa la diko wa Aranɔna.

29 Mananu le yɛ, wɛ Mɔaba! Nyu aseka Kɛmɔshɛ+ le, nyayolanyema!

Nde ambetɛ anande w’apami ase dawo ndo anande wa wamato mfumbe ya Sihɔna nkumekanga k’ase Amɔra.

31 Ko ase Isariyɛlɛ wakadjasɛ lo wodja w’ase Amɔra. 32 Oma laasɔ, Mɔsɛ akatome apami amɔtshi dia tokemba Jazɛrɛ.+ Vɔ wakaahɔtɔla tosombasomba tendɛ le yɔ* ndo wakatshanya ase Amɔra waki laawɔ. 33 L’ɔkɔngɔ wa laasɔ, vɔ wakakadimɔ ko wakatshu lo Mboka k’otsha la Bashana. Ko Onga+ nkumekanga ka Bashana akaye la anto ande tshɛ dia ndjohomana la wɔ dia ndjaalɔsha la Ɛdɛrɛi.+ 34 Ko Jehowa akatɛ Mɔsɛ ate: “Towokake wɔma,+ nɛ dia dimi layowokimɔ nde la anto ande tshɛ la wodja ande lo anya ayɛ.+ Wɛ ayowosalɛ kɛnɛ kakayasalɛ Sihɔna nkumekanga k’ase Amɔra kakadjasɛka la Hɛshibɔna.”+ 35 Ɔnkɔnɛ, vɔ wakatetemala mbadiaka nde l’anande w’apami ndo anto ande tshɛ, polo lam’akashile anto ande tshɛ.+ Ko vɔ wakɔshi wodja ande.+

22 Oma laasɔ, ase Isariyɛlɛ wakonɛɛ ko wakatohanga lo laandja l’oswe wa Mɔaba la wedi wa Jɔrdana oma la Jeriko.+ 2 L’etena kɛsɔ, Balaka+ ɔna Zipɔrɛ akɛnyi kɛnɛ tshɛ kakasalɛ ase Isariyɛlɛ ase Amɔra, 3 ko ase Mɔaba wakoke ase Isariyɛlɛ wɔma efula, nɛ dia vɔ waki efula ka mamba. Lo mɛtɛ, ase Mɔaba wakasake lokomba la wɔma l’ɔtɛ w’ase Isariyɛlɛ.+ 4 Ko ase Mɔaba wakatɛ dikumanyi di’ase Midiyana+ vate: “Olui w’anto ɔnɛ wayanga ndɛ kɛnɛ tshɛ kotodingi oko watɔlɛka ngɔmbɛ adiyo l’oswe.”

L’etena kɛsɔ, Balaka ɔna Zipɔrɛ kaki nkumekanga ka Mɔaba. 5 Nde akatome akɛndji le Balama ɔna Beɔrɛ laki la Pɛtɔrɛ,+ l’omamu w’Ɔkɛdi w’Efaratɛ lo wodja ande wa lootɔ. Nde akawete, ata ate: “Anto amɔtshi wamboya oma l’Edjibito. Vɔ wambololanɛ tɔɔ tɔɔ laadiko* dia nkɛtɛ*+ ndo wambodjasɛ mbɛlanɛ la mi. 6 Ɔnkɔnɛ lam’alangayɛ, yaka yombidje anto anɛ mananu,+ nɛ dia vɔ ndekami wolo. Ondo ngasɔ mbakokami mbalɛndja ndo mbatshanya oma lo wodja ɔnɛ. Nɛ dia dimi mbeyaka dimɛna dia ɔnɛ latshɔkɔlayɛ tshɔkwamaka ndo ɔnɛ ladjayɛ mananu mbidjamaka mananu.”

7 Dikumanyi di’ase Mɔaba la dikumanyi di’ase Midiyana wakɔshi wɔɔtokonda wa diendja ko wakatshu otsha le Balama+ ndo wakatowotɛ losango l’oma le Balaka. 8 Ko nde akawatɛ ate: “Nyolale lanɛ kele kandjonyote kɛnɛ tshɛ kayombutɛ Jehowa.” Ko ewandji w’ase Mɔaba wakatshikala kaamɛ la Balama.

9 Ko Nzambi akaye le Balama ndo akawombola ate:+ “Apami akɔna wele kaamɛ la yɛ anɛ?” 10 Balama akatɛ Nzambi ka mɛtɛ ate: “Balaka ɔna Zipɔrɛ nkumekanga ka Mɔaba kontome dui ɔnɛ: 11 ‘Anto wayaye oma l’Edjibito wambololanɛ tɔɔ tɔɔ laadiko* dia la nkɛtɛ.* Ɔnkɔnɛ, yaka yombidjewɔ mananu.+ Ondo dimi kokaka ndɔ la wɔ ndo mbatshanya.’” 12 Koko Nzambi akatɛ Balama ate: “Totshɔke kaamɛ la wɔ. Wɛ hahombe mbidja anto asɔ mananu, nɛ dia vɔ wambɔtshɔkwama.”+

13 Balama aketɔ la pindju ko akatɛ ewandji w’oma le Balaka ate: “Nyokalole lo wodja anyu, nɛ dia Jehowa ambotona dia dimi ntshɔ kaamɛ la nyu.” 14 Ko ewandji w’ase Mɔaba wakonɛɛ ndo wakakalola otsha le Balaka ko wakatowotɛ vate: “Balama ambotona ndja la so.”

15 Koko Balaka akatome ewandji ekina woleki wa ntondo efula ndo nɛmɔ. 16 Vɔ wakatshu le Balama ko wakatowotɛ vate: “Balaka ɔna Zipɔrɛ kata ate: ‘Lam’alangayɛ, tetawɔke dia dikambo dimɔtshi koshimba dia wɛ ndja le mi, 17 nɛ dia dimi layokosha kɛnɛmɔ k’efula ndo layosala kɛnɛ tshɛ kayoyɔnɔmba. Ɔnkɔnɛ lam’alangayɛ, yaka kele yombidje anto anɛ mananu.’” 18 Koko Balama akakadimola ekambi wa Balaka ate: “Oyadi kaanga Balaka kombishaka luudu lande loludi tɔɔ la mfɛsa ndo la paonyi, dimi hantokoka ntamba didjango dia Jehowa Nzambi kami, oyadi dia tshitshɛ kana dia woke.+ 19 Koko lam’alanganyu, nyolale lanɛ ndo nyu lawɔ otsho ɔnɛ kele mende kɛnɛ kayombutɛ+ Jehowa.”

20 Ko Nzambi akaye le Balama l’otsho ko akawotɛ ate: “Naka anto anɛ wamboya ndjokɔsa, tshɔka kaamɛ la wɔ. Koko wɛ ayota paka kɛnɛ kayomokotɛ.”+ 21 Oma laasɔ, Balama aketɔ la pindju ko akakitsha edee lo mponda* kande ko akatshu kaamɛ la ewandji wa la Mɔaba.+

22 Koko Nzambi akomala woho w’anyanya lam’akandɛnyi dia nde otatshu. Ko ondjelo wa Jehowa akemala lo mboka dia mboshimba. Balama akahema lo mponda kande ndo ekambi ande 2 waki kaamɛ la nde. 23 Lam’akɛnyi mponda ondjelo wa Jehowa emadi lo mboka la lokuwa la ta lo lonya lande, tɔ kakayange dia mbɛtɔla l’adiyo. Koko Balama akatatɛ nkɔmɔla mponda dia kikaloya lo mboka. 24 Oma laasɔ, ondjelo wa Jehowa akatemala lo vioka ya tshitshɛ lam’asa dikambɔ 2 dia vinyɔ diaki la ehele k’ave wedi ɔnɛ ndo ehele k’ave wedi okina. 25 Lam’akɛnyi mponda ondjelo wa Jehowa, tɔ kakamamema lo ehele ndo kakahoke lokolo laki Balama lo ehele, ko Balama akatatɛ kikɔmɔla nto.

26 Ko ondjelo wa Jehowa akatshu yema nto ko akatemala lo dihole dia mpika lam’aki ndooko woho wa nsekesɔ lo lonya l’omi kana la lɔmɔsɔ. 27 Lam’akɛnyi mponda ondjelo wa Jehowa, tɔ kakakusama, Balama ahemi laadiko diatɔ. Ko Balama akomala ndo akakɔmɔla mponda kakɔ danga diande. 28 Ɔnkɔnɛ, Jehowa akasale dia mponda ntɛkɛta*+ ko tɔ kakatɛ Balama ɔnɛ: “Kakɔna kamomokosalɛ dia wɛ kɔmɔlami mbala 3 y’etondo nganɛ?”+ 29 Balama akakadimola mponda kakɔ ate: “Dikambo wɛ ambɔmɔnyɔla. Otondongaka laki la lokuwa lo lonya lami, tshike lakakodiaki.” 30 Ko mponda kakatɛ Balama ɔnɛ: “Shi dimi lekɔ mponda kayɛ kokoyahemaka lɔsɛnɔ layɛ l’otondo polo ndo ɛlɔ? Onde lambokosalɛka nganɛ lushi lɔmɔtshi?” Nde akakadimola ate: “Ndooko!” 31 Oma laasɔ, Jehowa akadihola washo wa Balama,+ ko nde akɛnyi ondjelo wa Jehowa emadi lo mboka la lokuwa la ta lo lonya lande. Mbala kakɔ ɔtɔi nde akakusama ndo akakɔlɛ elungi kande.

32 Oma laasɔ, ondjelo wa Jehowa akawotɛ ate: “Lande na kamboyɔkɔmɔla mponda kayɛ mbala 3 y’etondo nganɛ? Dimi kakaye ndjokoshimba, nɛ dia kɛnɛ kayangayɛ nsala hɔtɔnɛ la lolango lami.+ 33 Mponda kakamɛnyi ko tɔ kakalangi mbɛtɔla dihole dikina mbala 3.+ Kakɔna kototomba otondonga tɔ hambɛtɔlɛ? Tshike wonya ɔnɛ lakashidi kodiaka ko dimi ntshika mponda la lɔsɛnɔ.” 34 Ko Balama akatɛ ondjelo wa Jehowa ate: “Dimi lakasadi pɛkato, nɛ dia hambeyi nte wɛ kakemadi lo mboka dia mpomana la mi. Ko naka ekɔ kɔlɔ lo washo ayɛ, dimi layanga nkalola.” 35 Koko ondjelo wa Jehowa akatɛ Balama ate: “Tshɔka kaamɛ la wɔ, koko kotote paka kɛnɛ kayomokotɛ.” Ko Balama akatetemala la lɔkɛndɔ lande kaamɛ la ewandji w’oma le Balaka.

36 Lam’akoke Balaka dia Balama oyaye, mbala kakɔ ɔtɔi nde akatshu dia tohomana la nde l’osomba wa Mɔaba wele l’omamu wa Aranɔna, l’olelo w’ɛtshi kakɔ ka nkɛtɛ. 37 Balaka akatɛ Balama ate: “Shi dimi lakakotomɛ akɛndji? Lande na kakiyɛ kondja? Onde wɛ akafɔnyaka dia dimi bu la akoka wa kosha kɛnɛmɔ k’efula?”+ 38 Ko Balama akakadimola Balaka ate: “Toko dimi ɔnɛ lamboya. Ko onde dimi koka mbuta dikambo dimɔtshi? Kɛnɛ kayodja Nzambi l’onyɔ+ ami keto kayomota.”

39 Ɔnkɔnɛ, Balama akatshu nde la Balaka ko wakakome la Kiriatɛ-Huzɔta. 40 Balaka akalambola ngɔmbɛ la ɛkɔkɔ ndo akatomɛ Balama nde la ewandji waki kaamɛ la nde yema. 41 La wedi a pindju, Balaka akɔshi Balama ko akadɛ la nde la Bamɔta-Baala* dia nde tɛna anto akɔ tshɛ oma lɛkɔ.+

23 Oma laasɔ, Balama akatɛ Balaka ate: “Ɔnɔngɔsɔlɛ dilambwelo 7+ ndo ngɔmbɛ 7 kaamɛ la ɛkɔkɔ 7 wa waomi.” 2 Mbala kakɔ ɔtɔi Balaka akasale kɛnɛ kakate Balama. Balaka nde la Balama wakalambola ngɔmbɛ 1 la ɔkɔkɔ 1 lo elambwelo la elambwelo.+ 3 Ko Balama akatɛ Balaka ate: “Emala lanɛ suke la olambo ayɛ wa lotshumba kele dimi tokotshɔ. Ondo Jehowa ayosawola la mi. Dimi layoyokotɛ kɛnɛ tshɛ kayondombutɛ.” Ɔnkɔnɛ nde akadɛ lo shɔdi ya dikona.

4 Etena kakasawola Nzambi nde la Balama, Balama+ akawotɛ ate: “Dimi lakalɔngɔsɔdi dilambwelo 7 ndo lakalambodi ngɔmbɛ 1 la ɔkɔkɔ 1 lo elambwelo la elambwelo.” 5 Jehowa akadje awui l’onyɔ wa Balama+ ndo akate ate: “Kalola le Balaka kele towote ngasɔ.” 6 Ɔnkɔnɛ, nde akakalola ko akɛnyi Balaka nde l’ewandji tshɛ wa Mɔaba wemadi suke la olambo ande wa lotshumba. 7 Ko nde akate ɛtɛkɛta wa yokedi ɛnɛ ate:+

‘Yaka yombidje Jakɔbɔ mananu.

Ɛɛ, yaka yɔtɛkɛtɛ kɔlɔ dikambo di’Isariyɛlɛ.’+

 8 Ngande wakokami mbidja mananu le wanɛ wele Nzambi hawadji mananu?

Ndo ngande wakokami ntɛkɛta kɔlɔ dikambo dia wanɛ wele Jehowa hatɛkɛtshi kɔlɔ?+

11 Ko Balaka akatɛ Balama ate: “Lande na kamboyonsalɛ nganɛ? Dimi lakakelɛ dia wɛ ndjodja atunyi ami mananu, ko wɛ hasadi ndooko dikambo, koko ambaatshɔkɔla.”+ 12 Nde akakadimola ate: “Onde dimi halahombe ntɛkɛta kɛnɛ tshɛ kadja Jehowa l’onyɔ ami?”+

13 Ko Balaka akawotɛ ate: “Lam’alangayɛ, yete totshu lo dihole dikina diakokayɛ mbaɛna. Wɛ ayowaɛna paka yema tsho, wɛ hatowaɛna vɔ tshɛ. Tombidjewɔ mananu lɛkɔ.”+ 14 Ɔnkɔnɛ, nde akatshu la nde l’oswe wa Zɔfima lo shɔdi ya Pisinga,+ ko akatɔlɔngɔsɔla dilambwelo 7 ndo akalambola ngɔmbɛ 1 la ɔkɔkɔ 1 lo elambwelo la elambwelo.+ 15 Ko Balama akatɛ Balaka ate: “Emala lanɛ suke la olambo ayɛ wa lotshumba, kele dimi tokotosawola la Nde lengo.” 16 Jehowa akasawola la Balama, akadje awui l’onyɔ+ ande ndo akate ate: “Kalola le Balaka kele towote ngasɔ.” 17 Ko nde akaye le nde ko akootane awokonga suke la olambo ande wa lotshumba ndo ewandji w’ase Mɔaba wele kaamɛ la nde. Balaka akawombola ate: “Jehowa ate na?” 18 Ko nde akate ɛtɛkɛta wa yokedi ɛnɛ ate:+

“Balaka le, emala ndo hokamɛ.

Ɔna Zipɔrɛ le, ompokame.

Naka nde ambɔtɛkɛta, onde nde hatokotsha?+

22 Nzambi ekɔ lo ndjaatondja oma l’Edjibito.+

Nde ekɔ oko nseke ya ndjate le wɔ.+

L’etena kɛnɛ, nganɛ mbakokadiɔ mbutama dikambo dia Jakɔbɔ la Isariyɛlɛ:

‘Enda kɛnɛ kambosala Nzambi!’

25 Ko Balaka akatɛ Balama ate: “Naka lo wedi ɔmɔtshi wɛ hakoke mbadja mananu, kete lo wedi okina wɛ hahombe mbatshɔkɔla.” 26 Balama akakadimola Balaka ate: “Dimi kokotɛ nte: ‘Kɛnɛ tshɛ kayombutɛ Jehowa kayomosala’?”+

27 Balaka akatɛ Balama ate: “Lam’alangayɛ, etawɔ dia dimi ntshɔ la yɛ lo dihole dikina. Ondo Nzambi ka mɛtɛ ayotetawɔ dia wɛ mbidjɛmiwɔ mananu lɛkɔ.”+ 28 Ko Balaka akatshu la Balama lo shɔdi ya Pɛɔrɛ kɛlane la Jeshimɔna.*+ 29 L’ɔkɔngɔ wa laasɔ, Balama akatɛ Balaka ate: “Ɔnɔngɔsɔlɛ dilambwelo 7 ndo ngɔmbɛ 7 la ɛkɔkɔ 7 wa waomi.”+ 30 Ko Balaka akasale kɛnɛ kakawotɛ Balama ndo nde akalambola ngɔmbɛ 1 la ɔkɔkɔ 1 lo elambwelo la elambwelo.

24 Lam’akɛnyi Balama dia Jehowa nangaka* ntshɔkɔla ase Isariyɛlɛ, nde kotshɔ dihole dikina nto dia tosala diendja,+ koko nde akakadimola elungi kande otsha l’oswe. 2 Lam’akonyiya Balama washo ndo lam’akandɛnyi ase Isariyɛlɛ wohangi lo ndjela waoho awɔ,+ nyuma ka Nzambi kakaye le nde.+ 3 Ko nde akate ɛtɛkɛta wa yokedi ɛnɛ ate:+

10 Ko Balaka akomalɛ Balama nkɛlɛ k’efula. Balaka akade lokambo la lɔsɔkɔ tshɛ ko akatɛ Balama ate: “Dimi lakakelɛ dia wɛ ndjodja atunyi ami mananu, ko wɛ hasadi ndooko dikambo,+ koko ambaatshɔkɔla mbala 3 y’etondo. 11 Kalola esadi otsha lakayɛ. Dimi lakalangaka kosha kɛnɛmɔ k’efula,+ koko Jehowa ambokodimatɔ.”

12 Balama akakadimola Balaka ate: “Onde dimi kombutɛ akɛndji wakayatome nte: 13 ‘Oyadi kaanga Balaka kombishaka luudu lande loludi tɔɔ la mfɛsa ndo la paonyi, dimi hantokoka ntamba didjango dia Jehowa la lolango lami,* oyadi dia dimɛna kana dia kɔlɔ! Kɛnɛ kayombutɛ Jehowa keto kayomokotɛ’?+ 14 Wonya ɔnɛ, dimi lotatshu otsha le anto ami. Yaka takote kɛnɛ kayosalɛ anto anɛ wodja ayɛ lo nshi yayaye.”* 15 Ko nde akate ɛtɛkɛta wa yokedi ɛnɛ ate:+

20 Lam’akandɛnyi Amalɛka, nde akatetemala la ɛtɛkɛta ande wa yokedi, ata ate:

21  Lam’akandɛnyi ase Kenɛ,+ nde akatetemala la ɛtɛkɛta ande wa yokedi, ata ate:

“Edjaselo kanyu kokamɛ oko kefu kele laadiko dia dive.

22 Koko onto ɔmɔtshi ayotshumba Kaina.*

Nshi ngana yambotshikala la ntondo k’ase Asuriya nyɔtɔla lo mfumbe?”

23 Ko nde akatetemala la ɛtɛkɛta ande wa yokedi, ata ate:

“Ande mananu! Akɔna ayoshimbamɛ lam’ayosala Nzambi dui sɔ?

Koko ndo nde lawɔ ayoyolanyema.”

25 Oma laasɔ, Balama+ akonɛɛ ko akakalola lo dihole diande. Balaka nde lawɔ akatshu lo mboka kande.

25 Lam’akadjasɛka ase Isariyɛlɛ la Shitimɛ,+ anto wakayotatɛ nsala awui wa mindo wa dieyanelo vɔ la wamato w’ase Mɔaba.+ 2 Wamato akɔ wakelɛka anto asɔ dia vɔ tolambola tozambizambi+ tawɔ elambo, ko anto wakatatɛ ndɛ ndo nkusamɛ tozambizambi tawɔ.+ 3 Ɔnkɔnɛ, ase Isariyɛlɛ wakayatambiya lo ɔtɛmwɛlɔ wa* Baala ka Pɛɔrɛ.+ Ko Jehowa akomalɛ ase Isariyɛlɛ. 4 Ko Jehowa akatɛ Mɔsɛ ate: “Ɔsa ewandji* tshɛ w’anto anɛ kele hanɛwɔ la ntondo ka Jehowa lo washo w’anto tshɛ,* kele nkɛlɛ kadɔdɔ ka Jehowa kokande ase Isariyɛlɛ katute.” 5 Ko Mɔsɛ akatɛ toshushi ta l’Isariyɛlɛ ate:+ “Onto tshɛ l’atei anyu pombaka ndjaka anto ande wakayatambiya lo ɔtɛmwɛlɔ wa* Baala ka Pɛɔrɛ.”+

6 Koko l’etena kɛsɔ, ose Isariyɛlɛ ɔmɔtshi akaye la womoto+ ɔmɔtshi l’ose Midiyana le anango lo washo wa Mɔsɛ ndo lo washo w’olui w’otondo w’ase Isariyɛlɛ, etena kakawalelaka la soko dia luudu la dipɛma l’esanganelo. 7 Lam’akɛnyi Finehasi+ ɔna Eleazara ɔna ɔlɔmbɛdi Arɔna dui sɔ, mbala kakɔ ɔtɔi nde akatombe oma l’olui w’anto ko akɔshi dikɔnga lo lonya lande. 8 Ko nde akayele pami kakɔ k’ose Isariyɛlɛ lo luudu la dipɛma ko akawakediɔ vɔ akɔ 2, oma le pami k’ose Isariyɛlɛ polo lo tenyi dia demba dia diwutshi dia womoto akɔ. Ko sui diaki le ase Isariyɛlɛ diakakomɛ.+ 9 Wanɛ wakavu la sui sɔ waki anto nunu akumi ahende la nɛi (24 000).+

10 Oma laasɔ, Jehowa akatɛ Mɔsɛ ate: 11 “Finehasi+ ɔna Eleazara ɔna ɔlɔmbɛdi Arɔna ambonya nkɛlɛ kami oma le ase Isariyɛlɛ, nɛ dia nde hetawe dia kaanga onto 1 l’atei anyu+ nsɛmanɛ la mi. Diakɔ diahamashidi ase Isariyɛlɛ oshiki nɛ dia dimi pikaka dia mamemami+ paka dimɛ oto. 12 Ɔnkɔnɛ ta wate: ‘Dimi lambodja sheke ya wɔladi kaamɛ la nde. 13 Ɔsɔ ayonga sheke ya pondjo dia nde la tokanula tande+ kambaka olimu w’ɔlɔmbɛdi pondjo pondjo, nɛ dia nde hetawe dia kaanga onto 1 nsɛmanɛ la Nzambi kande+ ndo nde ambokomba pɛkato y’ase Isariyɛlɛ.’”

14 Lokombo la pami k’ose Isariyɛlɛ kakadiakema kaamɛ la womoto l’ose Midiyana ko Zimiri ɔna Salu, owandji wa nkumbo kɛmɔtshi ka lo dioho dia Simɛyɔna. 15 Lokombo la womoto l’ose Midiyana lakadiakema ko Kozibi, ɔna Zura+ laki owandji wa waoho wa lo nkumbo kɛmɔtshi ka la Midiyana.+

16 L’ɔkɔngɔ diko, Jehowa akatɛ Mɔsɛ ate: 17 “Nyɔlɔsha ase Midiyana ndo nyaadiake,+ 18 nɛ dia vɔ wakanyela mpokoso lo nyokesa dia nyu nsala pɛkato lo kɛnɛ kendana la Pɛɔrɛ+ ndo lo tshimbo ya Kozibi, ɔna owandji ɔmɔtshi wa la Midiyana, lakadiakema+ lushi laki sui diendana la Pɛɔrɛ.”+

26 L’ɔkɔngɔ wa sui sɔ,+ Jehowa akatɛ Mɔsɛ nde l’Eleazara ɔna ɔlɔmbɛdi Arɔna ate: 2 “Nyofundja nkombo y’olui w’otondo w’ase Isariyɛlɛ, wanɛ wele la ɛnɔnyi oma lo 20 otsha la diko lo ndjela mvudu ya washɛwɔ, ndo nyadia wanɛ tshɛ wakoka nkamba olimu w’ɔsɔlayi lo Isariyɛlɛ.”+ 3 Ko Mɔsɛ nde l’ɔlɔmbɛdi Eleazara+ wakasawola la wɔ lo laandja l’oswe wa Mɔaba+ l’omamu wa Jɔrdana suke la Jeriko+ vate: 4 “Nyofundja nkombo ya wanɛ wele la ɛnɔnyi oma lo 20 otsha la diko, oko wakadjangɛ Jehowa Mɔsɛ.”+

Ana w’apami wa Isariyɛlɛ wakatombe oma lo wodja w’Edjibito vɔ anɛ: 5 Rubɛna+ kaki ɔna Isariyɛlɛ l’enondo. Ana w’apami+ wa Rubɛna vɔ anɛ: Oma le Hanɔka, nkumbo k’aseka Hanɔka; oma le Palu, nkumbo k’aseka Palu; 6 oma le Hɛzɛrɔna, nkumbo k’aseka Hɛzɛrɔna ndo oma le Karami, nkumbo k’aseka Karami. 7 Ɔsɔ mbele nkumbo y’aseka Rubɛna ndo anto awɔ wakafundjama nkombo waki nunu akumi anɛi la sato la nkama esambele l’akumi asato (43 730).+

8 Palu akote Eliyabɛ. 9 Ana w’apami wa Eliyabɛ vɔ anɛ: Nɛmuɛlɛ, Datana ndo Abirama. Datana kɛsɔ nde l’Abirama mbakasɔnama oma l’atei w’olui w’anto wakalɔshana la Mɔsɛ+ nde l’Arɔna l’ɔnɔngɔ w’olui+ wa Kɔra etena kakawalɔshana la Jehowa.+

10 Ko nkɛtɛ yakasɛ onyɔ ayɔ ndo yakaamɛnɛ. Koko Kɔra akavu kaamɛ la wanɛ wakoosukɛka etena kakatshumbama apami 250+ la dja. Ndo vɔ wakayala ɛnyɛlɔ kasha ɔhɛmwɛlɔ.+ 11 Koko ana w’apami wa Kɔra komvɔ.+

12 Ana w’apami wa Simɛyɔna+ lo ndjela nkumbo yawɔ vɔ anɛ: Oma le Nɛmuɛlɛ,* nkumbo k’aseka Nɛmuɛlɛ; oma le Jamina, nkumbo k’aseka Jamina; oma le Jakina, nkumbo k’aseka Jakina; 13 oma le Zera,* nkumbo k’aseka Zera ndo oma le Shaolo, nkumbo k’aseka Shaolo. 14 Ɔsɔ mbele nkumbo y’aseka Simɛyɔna: Anto nunu akumi ahende la pende la nkama hiende (22 200).+

15 Ana w’apami wa Ngada+ lo ndjela nkumbo yawɔ vɔ anɛ: Oma le Zefona,* nkumbo k’aseka Zefona; oma le Hangi, nkumbo k’aseka Hangi; oma le Shuni, nkumbo k’aseka Shuni; 16 oma le Ozini,* nkumbo k’aseka Ozini; oma le Eri, nkumbo k’aseka Eri; 17 oma le Arɔdɛ,* nkumbo k’aseka Arɔdɛ ndo oma le Arɛli, nkumbo k’aseka Arɛli. 18 Ɔsɔ mbele nkumbo y’ana w’apami wa Ngada ndo anto awɔ wakafundjama nkombo waki nunu akumi anɛi la nkama tshanu (40 500).+

19 Ana w’apami wa Juda+ vɔ anɛ: Ɛrɛ nde la Ɔnana.+ Koko Ɛrɛ nde la Ɔnana wakavu lo wodja wa Kanana.+ 20 Ana w’apami wa Juda lo ndjela nkumbo yawɔ vɔ anɛ: Oma le Shɛla, nkumbo k’aseka Shɛla;+ oma le Perɛzɛ,+ nkumbo k’aseka Perɛzɛ ndo oma le Zera,+ nkumbo k’aseka Zera. 21 Ana w’apami wa Perɛzɛ vɔ anɛ: Oma le Hɛzɛrɔna,+ nkumbo k’aseka Hɛzɛrɔna ndo oma le Hamula,+ nkumbo k’aseka Hamula. 22 Ɔsɔ mbele nkumbo ya Juda ndo anto awɔ wakafundjama nkombo waki nunu akumi esambele la samalo la nkama tshanu (76 500).+

23 Ana w’apami wa Isakara+ lo ndjela nkumbo yawɔ vɔ anɛ: Oma le Tola,+ nkumbo k’aseka Tola; oma le Puva, nkumbo k’aseka Puva; 24 oma le Jashubɛ,* nkumbo k’aseka Jashubɛ ndo oma le Shimirɔna, nkumbo k’aseka Shimirɔna. 25 Ɔsɔ mbele nkumbo y’aseka Isakara ndo anto awɔ wakafundjama nkombo waki nunu akumi asamalo la nɛi la nkama shato (64 300).+

26 Ana w’apami wa Zebuluna+ lo ndjela nkumbo yawɔ vɔ anɛ: Oma le Sɛrɛdɛ, nkumbo k’aseka Sɛrɛdɛ; oma le Elɔna, nkumbo k’aseka Elɔna ndo oma le Jahalɛlɛ, nkumbo k’aseka Jahalɛlɛ. 27 Ɔsɔ mbele nkumbo y’aseka Zebuluna ndo anto awɔ wakafundjama nkombo waki nunu akumi asamalo la nkama tshanu (60 500).+

28 Ana w’apami wa Yɔsɛfu+ lo ndjela nkumbo yawɔ vɔ anɛ: Manase nde la Efrayimɛ.+ 29 Ana w’apami wa Manase+ vɔ anɛ: Oma le Makiri, nkumbo k’aseka Makiri.+ Makiri akote Ngiliyadɛ+ ndo oma le Ngiliyadɛ, nkumbo k’aseka Ngiliyadɛ. 30 Ana w’apami wa Ngiliyadɛ vɔ anɛ: Oma le Iyɛzɛrɛ, nkumbo k’aseka Iyɛzɛrɛ; oma le Helɛkɛ, nkumbo k’aseka Helɛkɛ; 31 oma le Asiriyɛlɛ, nkumbo k’aseka Asiriyɛlɛ; oma le Shɛkɛmɛ, nkumbo k’aseka Shɛkɛmɛ; 32 oma le Shemida, nkumbo k’aseka Shemida ndo oma le Hefɛrɛ, nkumbo k’aseka Hefɛrɛ. 33 Zelɔfɛhadɛ ɔna Hefɛrɛ kombota ndooko ɔna pami. Nde akote paka ana wa wamato+ ndo nkombo y’ana wa wamato wa Zelɔfɛhadɛ+ yɔ nyɛ: Mahala, Nɔa, Hɔngɛla, Milika ndo Tiriza. 34 Ɔsɔ mbele nkumbo ya Manase ndo anto awɔ wakafundjama nkombo waki nunu akumi atanu la pende la nkama esambele (52 700).+

35 Ana w’apami wa Efrayimɛ+ lo ndjela nkumbo yawɔ vɔ anɛ: Oma le Shutela,+ nkumbo k’aseka Shutela; oma le Bɛkɛrɛ, nkumbo k’aseka Bɛkɛrɛ ndo oma le Tahana, nkumbo k’aseka Tahana. 36 Ana wa Shutela vɔ anɛ: Oma le Erana, nkumbo k’aseka Erana. 37 Ɔsɔ mbele nkumbo y’ana w’apami wa Efrayimɛ ndo anto awɔ wakafundjama nkombo waki nunu akumi asato la pende la nkama tshanu (32 500).+ Wasɔ mbele tokanula ta Yɔsɛfu lo ndjela nkumbo yawɔ.

38 Ana w’apami wa Bɛnjamina+ lo ndjela nkumbo yawɔ vɔ anɛ: Oma le Bɛla,+ nkumbo k’aseka Bɛla; oma le Ashibɛlɛ, nkumbo k’aseka Ashibɛlɛ; oma le Ahirama,* nkumbo k’aseka Ahirama; 39 oma le Shefufama,* nkumbo k’aseka Shufama ndo oma le Hufama,* nkumbo k’aseka Hufama. 40 Ana w’apami wa Bɛla vɔ anɛ: Arɛda nde la Namana.+ Oma le Arɛda, nkumbo k’aseka Arɛda ndo oma le Namana, nkumbo k’aseka Namana. 41 Ɔsɔ mbele tokanula ta Bɛnjamina lo ndjela nkumbo yawɔ ndo anto awɔ wakafundjama nkombo waki nunu akumi anɛi la tanu la nkama shamalo (45 600).+

42 Ana w’apami wa Danɛ+ lo ndjela nkumbo yawɔ vɔ anɛ: Oma le Shuhama,* nkumbo k’aseka Shuhama. Ɔsɔ mbele nkumbo y’aseka Danɛ lo ndjela nkumbo yawɔ. 43 Lo nkumbo tshɛ y’aseka Shuhama, anto awɔ wakafundjama nkombo waki nunu akumi asamalo la nɛi la nkama nyɛi (64 400).+

44 Ana w’apami wa Ashɛrɛ+ lo ndjela nkumbo yawɔ vɔ anɛ: Oma le Imɛna, nkumbo k’aseka Imɛna; oma le Ishivi, nkumbo k’aseka Ishivi ndo oma le Beriya, nkumbo k’aseka Beriya. 45 Ana w’apami wa Beriya vɔ anɛ: Oma le Hebɛrɛ, nkumbo k’aseka Hebɛrɛ ndo oma le Malakiyɛlɛ, nkumbo k’aseka Malakiyɛlɛ. 46 Lokombo l’ɔna Ashɛrɛ la womoto ko Sɛra. 47 Ɔsɔ mbele nkumbo y’ana wa Ashɛrɛ ndo anto awɔ wakafundjama nkombo waki nunu akumi atanu la sato la nkama nyɛi (53 400).+

48 Ana w’apami wa Nafɛtali+ lo ndjela nkumbo yawɔ vɔ anɛ: Oma le Jahazɛlɛ, nkumbo k’aseka Jahazɛlɛ; oma le Nguni, nkumbo k’aseka Nguni; 49 oma le Jezɛrɛ, nkumbo k’aseka Jezɛrɛ ndo oma le Shilɛmɛ, nkumbo k’aseka Shilɛmɛ. 50 Ɔsɔ mbele nkumbo y’aseka Nafɛtali lo ndjela nkumbo yawɔ ndo anto awɔ wakafundjama nkombo waki nunu akumi anɛi la tanu la nkama nyɛi (45 400).+

51 Lofulo l’ase Isariyɛlɛ wakafundjama nkombo laki tshɛ tshɛ nunu nkama shamalo l’ɔtɔi la nkama esambele l’akumi asato (601 730).+

52 L’ɔkɔngɔ wa laasɔ, Jehowa akatɛ Mɔsɛ ate: 53 “Kokahe anto asɔ bɛtshi dia nkɛtɛ oko etenyi kawɔ k’okitɔ lo ndjela nkombo yakafundjama.*+ 54 Le wanɛ wele efula, kowafudiye etenyi kawɔ k’okitɔ ndo wanɛ wele yema tshitshɛ kowakitshekitshe etenyi kawɔ k’okitɔ.+ Kokahanya etenyi tshɛ k’okitɔ lo ndjela lofulo l’anto wakafundjama nkombo. 55 Koko okahanyelo wa nkɛtɛ wayosalema lo eokelo k’owale.+ Vɔ wayolongola tenyi diawɔ di’okitɔ lo ndjela nkombo ya waoho wa washɛwɔ. 56 Etenyi tshɛ k’okitɔ kayoshikikɛma lo eokelo k’owale ndo kayokahanyema le wanɛ wele efula kana wanɛ wele yema tshitshɛ.”

57 Ase Lɛwi+ wakafundjama nkombo lo ndjela nkumbo yawɔ vɔ anɛ: Oma le Ngɛrɛshɔna, nkumbo k’aseka Ngɛrɛshɔna; oma le Kɔhata,+ nkumbo k’aseka Kɔhata ndo oma le Merari, nkumbo k’aseka Merari. 58 Nkumbo y’ase Lɛwi yɔ nyɛ: Nkumbo k’aseka Libini,+ nkumbo k’aseka Hɛbɛrɔna,+ nkumbo k’aseka Mahili,+ nkumbo k’aseka Mushi+ ndo nkumbo k’aseka Kɔra.+

Kɔhata akote Amurama.+ 59 Wadi aki Amurama lokombo lande Jɔkɛbɛdɛ,+ ɔna Lɛwi la womoto lakandote la wadɛnde l’Edjibito. Nde akayota la Amurama ana anɛ: Arɔna, Mɔsɛ la Miriyama+ wa kadiyɛwɔ. 60 Oma laasɔ, Arɔna akote Nadaba, Abihu, Eleazara ndo Itamara.+ 61 Koko Nadaba nde la Abihu wakavu la ntondo ka Jehowa+ l’ɔtɛ wakawalambola olambo wakiwɔ komonga la lotshungɔ la nambola.

62 Tshɛ tshɛ apami nunu akumi ahende la sato (23 000) waki oma lo ngɔndɔ 1 otsha la diko+ mbakafundjama nkombo. Vɔ kofundjama nkombo l’ɔnɔngɔ w’ase Isariyɛlɛ,+ nɛ dia vɔ komonga la etenyi k’okitɔ l’atei w’ase Isariyɛlɛ.+

63 Wasɔ mbakafundjama nkombo oma le Mɔsɛ nde l’ɔlɔmbɛdi Eleazara etena kakawafundja ase Isariyɛlɛ nkombo lo laandja l’oswe wa Mɔaba, l’omamu wa Jɔrdana suke la Jeriko. 64 Koko l’atei awɔ, ndooko onto lakafundjama lokombo oma le Mɔsɛ nde l’ɔlɔmbɛdi Arɔna etena kakadiema ase Isariyɛlɛ l’oswe wa Sinayi.+ 65 Nɛ dia Jehowa akate lo dikambo diawɔ ate: “Ndooko onyake vɔ wayovɔ l’oswe.”+ Ɔnkɔnɛ, ndooko pami ka l’atei awɔ kakatshikala, onyake Kalɛba ɔna Jefune la Jashua ɔna Nuna.+

27 Oma laasɔ, ana wa wamato wa Zelɔfɛhadɛ+ ɔna Hefɛrɛ, ɔna Ngiliyadɛ, ɔna Makiri, ɔna Manase wa lo nkumbo ya Manase ɔna Yɔsɛfu wakaye. Nkombo y’anande wa wamato yɔ nyɛ: Mahala, Nɔa, Hɔngɛla, Milika ndo Tiriza. 2 Vɔ wakemala la ntondo ka Mɔsɛ, ɔlɔmbɛdi Eleazara, ewandji+ ndo olui w’otondo w’ase Isariyɛlɛ la soko dia luudu la dipɛma l’esanganelo ko wakate vate: 3 “Shɛso akavu l’oswe wa shɛnga, koko nde komonga l’atei w’olui wa wanɛ wakatshumana kaamɛ dia ndɔshana la Jehowa, wanɛ wakasukɛka Kɔra,+ koko nde akavu l’ɔtɛ wa pɛkato kande hita ndo nde kombota ndooko ɔna pami. 4 Lande na kahomba lokombo la shɛso nshishɔ oma lo nkumbo kande l’ɔtɛ w’ɔnɛ nde kombota ɔna pami? Otosha etenyi k’okitɔ l’atei w’anango shɛso.” 5 Ko Mɔsɛ akɛmbɛ dikambo diawɔ la ntondo ka Jehowa.+

6 Oma laasɔ, Jehowa akatɛ Mɔsɛ ate: 7 “Ana wa wamato wa Zelɔfɛhadɛ wekɔ la shadiya. Sala tshɛ dia wɛ mbasha etenyi k’okitɔ oma l’atei w’anango shɛwɔ ndo mbasha etenyi k’okitɔ ka shɛwɔ.+ 8 Ndo nto, tɛ ase Isariyɛlɛ wate: ‘Naka pami kɛmɔtshi ambovɔ aha la mbota ɔna pami, nyu pombaka mbisha ɔnande la womoto etenyi kande k’okitɔ. 9 Ko naka nde ndooko l’ɔna womoto, kete kanyosha anango etenyi kande k’okitɔ. 10 Ko naka nde bu l’anango, kete kanyosha anango she etenyi kande k’okitɔ. 11 Ko naka she bu l’anango, kete kanyosha owotɔ ande ɔmɔtshi wa suke wa lo dikila etenyi kande k’okitɔ, ko tɔ kayonga kande. Yɛdikɔ shɔ yayoyala oko didjango le ase Isariyɛlɛ, oko wakadjangɛ Jehowa Mɔsɛ.’”

12 Oma laasɔ, Jehowa akatɛ Mɔsɛ ate: “Dɛ lo dikona dia Abarimɛ+ kele tende wodja wayangami mbisha ase Isariyɛlɛ.+ 13 Lam’ayoyɛna wodja akɔ,+ wɛ lawɔ ayoyela watshɛyɛ* oko wakayele ɔnanyɔ+ Arɔna watshɛnde, 14 nɛ dia lam’akambidjɛka olui w’ase Isariyɛlɛ londjo l’oswe wa Zinɛ, nyu kokitanyiya didjango diami ndo kokidiami la ntondo kawɔ lo tshimbo y’ashi.+ (Ɔsɔ ekɔ ashi wa Meriba+ wa la Kadɛshɛ+ l’oswe wa Zinɛ.)”+

15 Ko Mɔsɛ akatɛ Jehowa ate: 16 “Jehowa, Nzambi ka lomu l’anto tshɛ* le, sɔna onto ɔmɔtshi dia nde nɔmbɔla olui w’anto ɔnɛ, 17 ɔnɛ layowalɔmbɔlaka lo akambo tshɛ ndo lahombawɔ ndjelaka lo akambo tshɛ diaha olui w’anto waki Jehowa monga oko ɛkɔkɔ waha la olami.” 18 Ko Jehowa akatɛ Mɔsɛ ate: “Ɔsa Jashua ɔna Nuna, pami kele la nyuma kele ahɛnde anya.+ 19 Oma laasɔ, kowemadia la ntondo k’ɔlɔmbɛdi Eleazara ndo la ntondo k’olui w’otondo w’ase Isariyɛlɛ, ndo wɛ pombaka mbosha ɔkɛndɛ wa nɔmbɔla la ntondo kawɔ.+ 20 Kowosha yema ya lowandji* lele layɛ+ kele olui w’otondo w’ase Isariyɛlɛ kawookitanyiyake.+ 21 Nde kemale la ntondo k’ɔlɔmbɛdi Eleazara ko ɔlɔmbɛdi ayokamba la Urimɛ+ dia mimbola Jehowa yɛdikɔ yande lo dikambo diande. Ko vɔ wayotombaka ndo wayɔtɔka lo ndjela didjango diande, nde la ase Isariyɛlɛ tshɛ wele kaamɛ la nde ndo olui w’otondo.”

22 Ɔnkɔnɛ Mɔsɛ akasale oko wakawodjangɛ Jehowa. Nde akɔshi Jashua ko akawemadia la ntondo k’ɔlɔmbɛdi Eleazara ndo la ntondo k’olui w’otondo w’ase Isariyɛlɛ, 23 ko nde akawahɛ anya ndo akawosha ɔkɛndɛ+ wa nɔmbɔla, oko wakate Jehowa lo tshimbo ya Mɔsɛ.+

28 Oma laasɔ, Jehowa akatɛ Mɔsɛ ate: 2 “Djangɛ ase Isariyɛlɛ ndo tɛwɔ wate: ‘Nyu pombaka nsala tshɛ dia nambolami olambo ami, mapa ami. Elambo watshumbama lo dja wele l’opumu wa dimɛna* le mi pombaka nambɔmaka lo tena diakashikikɛma.’+

3 “Tɛwɔ wate: ‘Elambo watshumbama lo dja wayonyelaka le Jehowa vɔ ɛnɛ: Ɛsɔngɔ 2 w’ɛkɔkɔ wa waomi waha la ɛkɔmɔ wele la ɔnɔnyi ɔtɔi ɔtɔi lo lushi oko olambo wa lotshumba wa mbala la mbala.+ 4 Nyayolambolaka ɔsɔngɔ ɔmɔtshi w’ɔkɔkɔ la pindju ndo ɔsɔngɔ okina w’ɔkɔkɔ la dikɔlɔ dia tosho ta shimba,*+ 5 kaamɛ la etenyi ka dikumi ka efa* w’ofushi wa dimɛna wɔsɔhanyemi la k’anɛi ɔtɔi ka hina* k’esɔ k’ɔlivɛ wa lɔtɔ oko olambo wa ntɔngɔ.+ 6 Ɔsɔ ekɔ olambo wa lotshumba+ wa mbala la mbala wakashikikɛma lo Dikona dia Sinayi oko olambo wele l’opumu wa dimɛna,* olambo watshumbama lo dja lo dikambo dia Jehowa, 7 kaamɛ la olambo awɔ wa lotɛ, k’anɛi ɔtɔi ka hina dikambo dia ɔkɔkɔ l’ɔkɔkɔ.+ Kanyotɛke wanu lo dihole di’ekila oko olambo wa lotɛ dikambo dia Jehowa. 8 Kanyolambolake ɔsɔngɔ okina w’ɔkɔkɔ la dikɔlɔ dia tosho ta shimba.* Kanyoolambolake kaamɛ la olambo wa ntɔngɔ wele oko wa la pindju ndo olambo wa lotɛ wa woho akɔ waamɛ oko olambo watshumbama lo dja wele l’opumu wa dimɛna* le Jehowa.+

9 “‘Koko lushi la Sabato,+ olambo akɔ pombaka monga ɛsɔngɔ 2 w’ɛkɔkɔ wa waomi waha la ɛkɔmɔ wele la ɔnɔnyi ɔtɔi ɔtɔi ndo tenyi pende dia dikumi dia yɛdikɔ ya efa w’ofushi wa dimɛna wɔsɔhanyemi la esɔ oko olambo wa ntɔngɔ kaamɛ ndo olambo awɔ wa lotɛ. 10 Ɔsɔ kele olambo wa lotshumba wa Sabato kaamɛ la olambo wa lotshumba wa mbala la mbala ndo olambo awɔ wa lotɛ.+

11 “‘L’etatelo ka ngɔndɔ tshɛ,* kanyelake diangɔ nɛ le Jehowa oko olambo wa lotshumba: Ɛsɔngɔ 2 wa ngɔmbɛ, ɔkɔkɔ 1 w’omi ndo ɛsɔngɔ 7 w’ɛkɔkɔ wa waomi waha la ɛkɔmɔ wele la ɔnɔnyi ɔtɔi ɔtɔi,+ 12 ndo tenyi sato dia dikumi dia efa w’ofushi wa dimɛna wɔsɔhanyemi la esɔ oko olambo wa ntɔngɔ+ dikambo dia ngɔmbɛ la ngɔmbɛ ndo tenyi pende dia dikumi dia efa w’ofushi wa dimɛna wɔsɔhanyemi la esɔ oko olambo wa ntɔngɔ dikambo dia ɔkɔkɔ 1 w’omi,+ 13 kaamɛ la etenyi ka dikumi ka efa w’ofushi wa dimɛna wɔsɔhanyemi la esɔ oko olambo wa ntɔngɔ dikambo dia ɔsɔngɔ tshɛ w’ɔkɔkɔ w’omi oko olambo wa lotshumba wele l’opumu+ wa dimɛna,* olambo watshumbama lo dja dikambo dia Jehowa. 14 Elambo awɔ wa lotɛ pombaka monga k’ahende ɔtɔi ka hina ka wanu dikambo dia ngɔmbɛ 1,+ k’asato ɔtɔi ka hina dikambo dia ɔkɔkɔ w’omi+ ndo k’anɛi ɔtɔi ka hina dikambo di’ɔsɔngɔ w’ɔkɔkɔ w’omi.+ Ɔsɔ kele olambo wa lotshumba wa ngɔndɔ la ngɔndɔ wayonyolambolaka ngɔndɔ tshɛ ɔnɔnyi w’otondo. 15 Ndo nto, kanyolambolake Jehowa ɔsɔngɔ wa mbudi oko olambo wa pɛkato laadiko dia olambo wa lotshumba wa mbala la mbala kaamɛ l’olambo awɔ wa lotɛ.

16 “‘Ngɔndɔ ka ntondo nshi 14 ayongaka fɛtɛ k’Elekanelo+ dikambo dia Jehowa. 17 Ngɔndɔ kakɔ nshi 15 ayongaka difɛstɔ ndo nyayɔlɛka mapa waha la wodoya l’edja ka nshi 7.+ 18 Lushi la ntondo ayongaka losanganya l’ekila. Hanyohombe nkamba ndooko olimu wa wolo. 19 Kanyelake diangɔ nɛ oko olambo wa lotshumba, olambo watshumbama lo dja dikambo dia Jehowa: Ɛsɔngɔ 2 wa ngɔmbɛ, ɔkɔkɔ 1 w’omi ndo ɛsɔngɔ 7 w’ɛkɔkɔ wa waomi wele la ɔnɔnyi ɔtɔi ɔtɔi. Kanyolambolake nyama yaha la ɛkɔmɔ.+ 20 Kanyoyilambolake kaamɛ l’elambo wa ntɔngɔ w’ofushi wa dimɛna wɔsɔhanyemi la esɔ,+ tenyi sato dia dikumi dia efa dikambo dia ngɔmbɛ 1 ndo tenyi pende dia dikumi dia efa dikambo di’ɔkɔkɔ w’omi. 21 Kanyolambolake etenyi ka dikumi ka efa dikambo dia ɔsɔngɔ tshɛ w’ɔkɔkɔ w’omi wa lo ɛsɔngɔ akɔ 7 w’ɛkɔkɔ, 22 kaamɛ ndo mbudi 1 oko olambo wa pɛkato dia nkomba pɛkato yanyu. 23 Nyayolambolaka diangɔ sɔ laadiko dia olambo wa lotshumba wa la pindju wendana la olambo wa lotshumba wa mbala la mbala. 24 Kanyolambolake diangɔ sɔ woho akɔ waamɛ lushi tshɛ lo nshi yakɔ 7 oko mbo ya ndɛ,* olambo watshumbama lo dja wele l’opumu wa dimɛna* le Jehowa. Kanyoolambolake kaamɛ l’olambo wa lotshumba wa mbala la mbala ndo olambo awɔ wa lotɛ. 25 Lushi la 7, kanyosalake losanganya l’ekila.+ Hanyohombe nkamba ndooko olimu wa wolo.+

26 “‘Lushi l’ɔlɔnga,+ lam’ayonyelaka olambo wa ntɔngɔ y’eyoyo le Jehowa,+ kanyosalake losanganya l’ekila lo fɛtɛ yanyu ya mingu.+ Hanyohombe nkamba ndooko olimu wa wolo.+ 27 Kanyelake diangɔ nɛ oko olambo wa lotshumba wele l’opumu wa dimɛna* le Jehowa: Ɛsɔngɔ 2 wa ngɔmbɛ, ɔkɔkɔ 1 w’omi ndo ɛsɔngɔ 7 w’ɛkɔkɔ wa waomi wele la ɔnɔnyi ɔtɔi ɔtɔi,+ 28 ndo kanyelake diangɔ nɛ oko olambo awɔ wa ntɔngɔ w’ofushi wa dimɛna wɔsɔhanyemi l’esɔ: Tenyi sato dia dikumi dia efa dikambo dia ngɔmbɛ la ngɔmbɛ, tenyi pende dia dikumi dia efa dikambo di’ɔkɔkɔ 1 w’omi, 29 etenyi ka dikumi ka efa dikambo dia ɔsɔngɔ tshɛ w’ɔkɔkɔ w’omi wa lo ɛsɔngɔ akɔ 7 w’ɛkɔkɔ, 30 kaamɛ ndo ɔsɔngɔ wa mbudi dia nkomba pɛkato yanyu.+ 31 Kanyolambolake diangɔ sɔ laadiko dia olambo wa lotshumba wa mbala la mbala ndo olambo awɔ wa ntɔngɔ. Yɔ pombaka monga nyama yaha la ɛkɔmɔ+ kaamɛ la elambo ayɔ wa lotɛ.

29 “‘Lo ngɔndɔ ka 7 lushi 1, kanyosalake losanganya l’ekila. Hanyohombe nkamba ndooko olimu wa wolo.+ Ɔsɔ ekɔ lushi lahombanyu mbidaka amama.+ 2 Kanyolambolake diangɔ nɛ oko olambo wa lotshumba wele l’opumu wa dimɛna* le Jehowa: Ɔsɔngɔ 1 wa ngɔmbɛ, ɔkɔkɔ 1 w’omi ndo ɛsɔngɔ 7 w’ɛkɔkɔ wa waomi wele la ɔnɔnyi ɔtɔi ɔtɔi ndo waha la ɛkɔmɔ, 3 kaamɛ ndo olambo awɔ wa ntɔngɔ w’ofushi wa dimɛna wɔsɔhanyemi l’esɔ, tenyi sato dia dikumi dia yɛdikɔ ya efa dikambo dia ngɔmbɛ, tenyi pende dia dikumi dia efa dikambo di’ɔkɔkɔ w’omi, 4 ndo etenyi ka dikumi ka efa dikambo dia ɔsɔngɔ tshɛ w’ɔkɔkɔ w’omi wa lo ɛsɔngɔ akɔ 7 w’ɛkɔkɔ, 5 ndo ɔsɔngɔ wa mbudi k’omi oko olambo wa pɛkato dia nkomba pɛkato yanyu. 6 Nyayolambolaka diangɔ sɔ laadiko dia elambo wa lotshumba wa ngɔndɔ la ngɔndɔ la olambo awɔ wa ntɔngɔ+ ndo olambo wa lotshumba wa mbala la mbala la olambo awɔ wa ntɔngɔ+ kaamɛ la elambo awɔ wa lotɛ+ lo ndjela woho wokosalemaka, oko olambo watshumbama lo dja wele l’opumu wa dimɛna* le Jehowa.

7 “‘Lo ngɔndɔ kakɔ ka 7 nshi 10, kanyosalake losanganya l’ekila+ ndo kanyoyasoyake.* Hanyohombe nkamba ndooko olimu.+ 8 Kanyelake Jehowa diangɔ nɛ oko olambo wa lotshumba wele l’opumu wa dimɛna:* Ɔsɔngɔ wa ngɔmbɛ 1, ɔkɔkɔ 1 w’omi ndo ɛsɔngɔ 7 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ.+ 9 Kanyelake diangɔ nɛ oko olambo awɔ wa ntɔngɔ w’ofushi wa dimɛna wɔsɔhanyemi l’esɔ: Tenyi sato dia dikumi dia efa dikambo dia ngɔmbɛ, tenyi pende dia dikumi dia efa dikambo dia ɔkɔkɔ 1 w’omi, 10 etenyi ka dikumi ka efa dikambo dia ɔsɔngɔ tshɛ w’ɔkɔkɔ wa lo ɛsɔngɔ akɔ 7 w’ɛkɔkɔ, 11 kaamɛ ndo ɔsɔngɔ wa mbudi oko olambo wa pɛkato laadiko dia olambo wa pɛkato w’ekombelo ka pɛkato+ ndo olambo wa lotshumba wa mbala la mbala la olambo awɔ wa ntɔngɔ kaamɛ la elambo awɔ wa lotɛ.

12 “‘Lo ngɔndɔ ka 7 nshi 15, kanyosalake losanganya l’ekila. Hanyohombe nkamba ndooko olimu wa wolo ndo kanyosalake difɛstɔ dikambo dia Jehowa l’edja ka nshi 7.+ 13 Kanyelake diangɔ nɛ oko olambo wa lotshumba,+ olambo watshumbama lo dja wele l’opumu wa dimɛna* le Jehowa: Ɛsɔngɔ wa ngɔmbɛ 13, ɛkɔkɔ 2 wa waomi ndo ɛsɔngɔ 14 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ.+ 14 Kanyelake diangɔ nɛ oko olambo awɔ wa ntɔngɔ w’ofushi wa dimɛna wɔsɔhanyemi l’esɔ: Tenyi sato dia dikumi dia efa dikambo dia ngɔmbɛ la ngɔmbɛ ya lo ngɔmbɛ yakɔ 13, tenyi pende dia dikumi dia efa dikambo dia ɔkɔkɔ l’ɔkɔkɔ wa lo ɛkɔkɔ akɔ 2 wa waomi, 15 etenyi ka dikumi ka efa dikambo dia ɔsɔngɔ tshɛ w’ɔkɔkɔ w’omi wa lo ɛsɔngɔ akɔ 14 w’ɛkɔkɔ, 16 kaamɛ ndo ɔsɔngɔ wa mbudi oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ ndo olambo awɔ wa lotɛ.+

17 “‘Lushi la 2, ɛsɔngɔ 12 wa ngɔmbɛ, ɛkɔkɔ 2 wa waomi ndo ɛsɔngɔ 14 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ,+ 18 kaamɛ la olambo awɔ wa ntɔngɔ ndo elambo awɔ wa lotɛ dikambo dia ngɔmbɛ, ɛkɔkɔ wa waomi ndo ɛsɔngɔ w’ɛkɔkɔ wa waomi lo ndjela lofulo lawɔ ndo lo ndjela woho wokosalemaka, 19 mbidja ndo ɔsɔngɔ wa mbudi oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ kaamɛ ndo elambo awɔ wa lotɛ.+

20 “‘Lushi la 3, ngɔmbɛ 11, ɛkɔkɔ 2 wa waomi ndo ɛsɔngɔ 14 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ,+ 21 kaamɛ la olambo awɔ wa ntɔngɔ la elambo awɔ wa lotɛ dikambo dia ngɔmbɛ, ɛkɔkɔ wa waomi ndo ɛsɔngɔ w’ɛkɔkɔ wa waomi lo ndjela lofulo lawɔ ndo lo ndjela woho wokosalemaka, 22 kaamɛ ndo mbudi 1 oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ ndo olambo awɔ wa lotɛ.+

23 “‘Lushi la 4, ngɔmbɛ 10, ɛkɔkɔ 2 wa waomi, ndo ɛsɔngɔ 14 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ,+ 24 kaamɛ la olambo awɔ wa ntɔngɔ ndo elambo awɔ wa lotɛ dikambo dia ngɔmbɛ, ɛkɔkɔ wa waomi ndo ɛsɔngɔ w’ɛkɔkɔ wa waomi lo ndjela lofulo lawɔ ndo lo ndjela woho wokosalemaka, 25 kaamɛ ndo ɔsɔngɔ wa mbudi oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ ndo olambo awɔ wa lotɛ.+

26 “‘Lushi la 5, ngɔmbɛ 9, ɛkɔkɔ 2 wa waomi ndo ɛsɔngɔ 14 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ,+ 27 kaamɛ la olambo awɔ wa ntɔngɔ ndo elambo awɔ wa lotɛ dikambo dia ngɔmbɛ, ɛkɔkɔ wa waomi ndo ɛsɔngɔ w’ɛkɔkɔ wa waomi lo ndjela lofulo lawɔ ndo lo ndjela woho wokosalemaka, 28 kaamɛ ndo mbudi 1 oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ ndo olambo awɔ wa lotɛ.+

29 “‘Lushi la 6, ngɔmbɛ 8, ɛkɔkɔ 2 wa waomi ndo ɛsɔngɔ 14 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ,+ 30 kaamɛ la olambo awɔ wa ntɔngɔ ndo elambo awɔ wa lotɛ dikambo dia ngɔmbɛ, ɛkɔkɔ wa waomi ndo ɛsɔngɔ w’ɛkɔkɔ wa waomi lo ndjela lofulo lawɔ ndo lo ndjela woho wokosalemaka, 31 kaamɛ ndo mbudi 1 oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ ndo elambo awɔ wa lotɛ.+

32 “‘Lushi la 7, ngɔmbɛ 7, ɛkɔkɔ 2 wa waomi ndo ɛsɔngɔ 14 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ,+ 33 kaamɛ la olambo awɔ wa ntɔngɔ ndo elambo awɔ wa lotɛ dikambo dia ngɔmbɛ, ɛkɔkɔ wa waomi ndo ɛsɔngɔ w’ɛkɔkɔ wa waomi lo ndjela lofulo lawɔ ndo lo ndjela woho wokosalemaka, 34 kaamɛ ndo mbudi 1 oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ ndo olambo awɔ wa lotɛ.+

35 “‘Lushi la 8, nyayosalaka losanganya la laande. Hanyohombe nkamba ndooko olimu wa wolo.+ 36 Kanyelake diangɔ nɛ oko olambo wa lotshumba, olambo watshumbama lo dja wele l’opumu wa dimɛna* le Jehowa: Ngɔmbɛ 1, ɔkɔkɔ 1 w’omi ndo ɛsɔngɔ 7 w’ɛkɔkɔ wa waomi wele la ɔnɔnyi ɔtɔi ɔtɔi ndo yɔ tshɛ kayonge nyama yaha la ɛkɔmɔ,+ 37 kaamɛ la olambo awɔ wa ntɔngɔ ndo elambo awɔ wa lotɛ dikambo dia ngɔmbɛ, ɔkɔkɔ w’omi ndo ɛsɔngɔ w’ɛkɔkɔ wa waomi lo ndjela lofulo lawɔ ndo lo ndjela woho wokosalemaka, 38 kaamɛ ndo mbudi 1 oko olambo wa pɛkato laadiko dia olambo wa lotshumba wa mbala la mbala la olambo awɔ wa ntɔngɔ ndo olambo awɔ wa lotɛ.+

39 “‘Diangɔ sɔ mbayonyolambolaka Jehowa lo fɛtɛ yanyu ya lo eleko l’eleko+ laadiko dia elambo wakanyatshike alɔkɔlɔkɔ+ ndo weshasha anyu wa la lolango+ oko elambo anyu wa lotshumba+ ndo elambo anyu wa ntɔngɔ,+ elambo anyu wa lotɛ+ ndo elambo anyu w’osanga.’”+ 40 Mɔsɛ akatɛ ase Isariyɛlɛ awui tshɛ wakawodjangɛ Jehowa.

30 Oma laasɔ, Mɔsɛ akatɛ ewandji+ wa waoho wa l’Isariyɛlɛ ate: “Jehowa ambodjanga ate: 2 Naka pami kɛmɔtshi ambotshika dɔkɔlɔkɔ+ le Jehowa kana ambosala etshibelo+ ka ndjasekɛ* awui amɔtshi, nde pombaka nkotsha ɛtɛkɛta ande.+ Nde pombaka nsala kɛnɛ tshɛ kakandatshike dɔkɔlɔkɔ dia nsala.+

3 “Naka womoto ɔmɔtshi ambotshika dɔkɔlɔkɔ le Jehowa kana ambotshika dɔkɔlɔkɔ lo ntshiba dia ndjashimba awui amɔtshi etena kekende osekaseka ndo kakandadjashi lo luudu la she, 4 ko she amboka dɔkɔlɔkɔ diande kana etshibelo kande ko she hatonyi, kete nde pombaka nkotsha kɛnɛ tshɛ kakandatshike dɔkɔlɔkɔ ndo awui tshɛ wakandatshibe dia ndjasekɛ, nde pombaka mbakotsha. 5 Ko naka she ambooshimba lam’amondoka dɔkɔlɔkɔ diande ndo awui wamondoyashimba, kete nde hatohomba mbakotsha. Jehowa ayowodimanyiya nɛ dia she ambooshimba.+

6 “Ko naka nde ambotshukama la pami kɛmɔtshi ko nde pombaka nkotsha dɔkɔlɔkɔ diakandatshike kana daka diakandalake l’esasesase lo dikambo diande, 7 ko omɛnde amboka dikambo diakɔ ko nde hatonyi lushi lodiokinde, kete womoto akɔ pombaka nkotsha dɔkɔlɔkɔ diande kana awui wakandayashimbe. 8 Ko naka omɛnde ambooshimba lushi lamondoka dikambo diakɔ, nde kokaka mbitola dɔkɔlɔkɔ kana kɛnɛ kakalake womoto akɔ l’esasesase lo dikambo diande,+ ko Jehowa ayowodimanyiya.

9 “Ko naka wadi aki odo kana womoto lakadiake diwala la omɛnde ambotshika dɔkɔlɔkɔ, nde pombaka nkotsha kɛnɛ tshɛ kayondota lo dikambo diande.

10 “Ko naka womoto ambotshika dɔkɔlɔkɔ kana ambotshika dɔkɔlɔkɔ dia ndjasekɛ awui amɔtshi etena kende lo luudu l’omɛnde, 11 ko omɛnde amboka dikambo diakɔ ko hatonyi, womoto akɔ pombaka nkotsha alɔkɔlɔkɔ ande tshɛ kana kɛnɛ tshɛ kakandayashimbe. 12 Ko naka omɛnde ambotola alɔkɔlɔkɔ ande tshɛ lo tshɛ kana kɛnɛ kakandatshibe dia ndjashimba lushi lamondowaoka, kete nde hahombe mbakotsha.+ Omɛnde ambowatola ndo Jehowa ayowodimanyiya. 13 Lo kɛnɛ kendana la dɔkɔlɔkɔ tshɛ kana etshibelo tshɛ ka ndjashimba awui amɔtshi dia ndjasɛka,* omɛnde kahomba nshikikɛ dui sɔ kana omɛnde kahomba mbitola dui sɔ. 14 Ko naka omɛnde hatone lushi la lushi, kete nde amboshikikɛ alɔkɔlɔkɔ ande tshɛ kana awui tshɛ wakandatshike dɔkɔlɔkɔ dia ndjashimba. Omɛnde ambaashikikɛ nɛ dia nde hatonyi lushi lamondowaoka. 15 Ko naka nde amboyowatola l’ɔkɔngɔ, yema tshitshɛ l’ɔkɔngɔ wa lushi lakandawoke awatshika, nde ayɛmba onongo+ wa munga ka wadɛnde.

16 “Ɔsɔ mbele wadjango wakadjangɛ Jehowa Mɔsɛ lo kɛnɛ kendana la wadi l’omi ndo lo kɛnɛ kendana la ombutshi wa pami l’ɔnande la womoto laakadjashi lo luudu lande.”

31 Oma laasɔ, Jehowa akatɛ Mɔsɛ ate: 2 “Sɔmbɔya+ ase Midiyana+ kɛnɛ kakawasalɛ ase Isariyɛlɛ. L’ɔkɔngɔ wa laasɔ, wɛ ayoyela watshɛyɛ.”*+

3 Ɔnkɔnɛ Mɔsɛ akatɛ anto ate: “Nyosha apami wele l’atei anyu dihomɔ dia ta dia vɔ tɔlɔsha* ase Midiyana ndo tokotsha ɛsɔmbwɛlɔ ka Jehowa le ase Midiyana. 4 Kanyotome apami kinunu (1 000) oma lo dioho la dioho dia lo waoho tshɛ w’Isariyɛlɛ otsha lo ta.” 5 Ɔnkɔnɛ, apami nunu dikumi la pende (12 000) wakatshu la dihomɔ dia ta dia vɔ tɔlɔsha,* apami kinunu (1 000) oma lo dioho la dioho l’atei wa nunu di’ase Isariyɛlɛ.+

6 Ko Mɔsɛ akaatome otsha lo ta, apami kinunu (1 000) oma lo dioho la dioho kaamɛ la Finehasi+ ɔna ɔlɔmbɛdi Eleazara, ɔnɛ laki la diangɔ di’ekila ndo la amama+ wa ta lo lonya lande. 7 Vɔ wakalɔsha ase Midiyana oko wakadjangɛ Jehowa Mɔsɛ ndo wakadiake apami tshɛ. 8 Kaamɛ l’anto akina, vɔ wakadiake nkumi ya dikanga ya Midiyana, mbuta ate Evi, Rɛkɛmɛ, Zura, Hura ndo Rɛba, nkumi ya dikanga 5 ya Midiyana. Vɔ wakadiake ndo Balama+ ɔna Beɔrɛ la lokuwa la ta. 9 Koko ase Isariyɛlɛ wakaye la wamato ndo ana w’ase Midiyana wakawande mfumbe. Vɔ wakambe dongalonga diawɔ tshɛ, nyama yawɔ tshɛ ndo diangɔ diawɔ tshɛ. 10 Vɔ wakatshumbe esomba awɔ tshɛ wakawadjasɛka ndo mpango* yawɔ tshɛ la dja. 11 Vɔ wakaye la diangɔ dia dimbo tshɛ ndo kɛnɛ tshɛ kakawɔshi oyadi anto kana nyama. 12 Ko vɔ wakaye la mfumbe, la kɛnɛ kakawɔshi ndo diangɔ dia dimbo le Mɔsɛ nde l’ɔlɔmbɛdi Eleazara la olui w’otondo w’ase Isariyɛlɛ lo mpango kaki lo laandja l’oswe wa Mɔaba+ l’omamu wa Jɔrdana suke la Jeriko.

13 Ko Mɔsɛ nde l’ɔlɔmbɛdi Eleazara ndo ewandji tshɛ w’elui wakatshu dia tohomana la wɔ l’andja wa mpango. 14 Koko Mɔsɛ akomalɛ apami waki ɛnɔmbɔdi wa wanɛ wakatshu lo ta, ewandji wa nunu nunu ndo ewandji wa nkama nkama wakayayaka oma lo ta. 15 Ko Mɔsɛ akawatɛ ate: “Onde nyakatshiki wamato tshɛ la lɔsɛnɔ? 16 Vɔ mbele lo ndjela kɛnɛ kakawatɛ Balama wakatshutshuya ase Isariyɛlɛ diaha vɔ monga la kɔlamelo+ le Jehowa lo dikambo diendana la Pɛɔrɛ,+ ko sui diakakomɛ olui w’anto waki Jehowa.+ 17 Ɔnkɔnɛ, nyu pombaka ndjaka anawɔ w’apami tshɛ ndo nyu pombaka ndjaka womoto tshɛ lambeyanaka la pami. 18 Koko nyu mbeyaka ntshika ana wa wamato tshɛ weke akɛnda wahateyanaka l’apami+ la lɔsɛnɔ. 19 Ndo nyu pombaka ntshikala l’andja wa mpango l’edja ka nshi 7. Onto tshɛ la l’atei anyu lakadiake+ onto* ndo onto tshɛ lakasakanya odo pombaka ndjaɛdia lushi la 3 ndo lushi la 7, nyu pombaka ndjaɛdia+ nyu la mfumbe yanyu. 20 Kanyɛdia diangɔ dianyu nɛ oma lo pɛkato: Dihɔndɔ tshɛ, ɛngɔ tshɛ kakasalema la ekoho ka nyama, ɛngɔ tshɛ kakasalema la wɛɔsa wa mbudi ndo ɛngɔ tshɛ kakasalema la osongo.”

21 Ko ɔlɔmbɛdi Eleazara akatɛ andɔshi wa ta wakatshu lo ta ate: “Jehowa akadjangɛ Mɔsɛ didjango dia ɛlɛmbɛ nɛ ate: 22 ‘Paka paonyi, mfɛsa, nkonga, lowolo, etinɛ* ndo dive, 23 ɛngɔ tshɛ kahalongola la dja kahombanyu ntshumba lo dja ko tɔ kayonga pudipudi. Koko tɔ pombaka mbɛdiama+ nto lo kisola l’ashi. Ɛngɔ tshɛ kakoka nongola la dja nyu pombaka kisola l’ashi. 24 Nyu pombaka nsola ahɔndɔ anyu lushi la 7 ko nyayonga pudipudi. Oma laasɔ mbakokanyu ndjɔtɔ lo mpango.’”+

25 Oma laasɔ, Jehowa akatɛ Mɔsɛ ate: 26 “Adia diangɔ dia dimbo ndo lofulo la mfumbe, oyadi anto kana nyama. Sala dui sɔ wɛ la ɔlɔmbɛdi Eleazara ndo ewandji wa nkumbo w’olui w’otondo. 27 Kahanya diangɔ dia dimbo lo 2, etenyi kɛmɔtshi wɛ mbisha wanɛ wakatshu lo ta ndo etenyi kekina anto akina tshɛ wa l’olui w’ase Isariyɛlɛ.+ 28 Lo kɛnɛ kendana la kɛnɛ ka mbisha Jehowa, kɔshi anima* 1 oma lo anima 500 tshɛ w’oma le asɔlayi wakatshu lo ta, oyadi w’anto, ngɔmbɛ, mponda kana ɛkɔkɔ la mbudi. 29 Kokiɔshi oma lo etenyi ka diangɔ diawɔ ko wɛ kisha ɔlɔmbɛdi Eleazara oko woshasha+ wa Jehowa. 30 Oma lo etenyi k’ase Isariyɛlɛ, kɔshi anto, mponda, ɛkɔkɔ ndo weho tshɛ wa dongalonga ɔtɔi ɔtɔi oma lo 50 tshɛ, ko wɛ mbisha ase Lɛwi+ wanɛ wakotsha ɛkɛndɛ wendana la tabɛrnaklɛ+ ka Jehowa.”

31 Ɔnkɔnɛ, Mɔsɛ nde l’ɔlɔmbɛdi Eleazara wakasale kɛnɛ kakandjangɛ Jehowa Mɔsɛ. 32 Diangɔ diakawɔshi ndo diangɔ dia dimbo diakatshikala diakɔshi anto wakatshu lo ta diaki tshɛ tshɛ ɛkɔkɔ la mbudi nunu nkama shamalo l’akumi esambele la tanu (675 000), 33 ngɔmbɛ nunu akumi esambele la pende (72 000), 34 ndo mponda nunu akumi asamalo l’ɔtɔi (61 000). 35 Wamato waki wateyanaka l’apami+ waki tshɛ tshɛ wamato* nunu akumi asato la pende (32 000). 36 Etenyi kakawasha wanɛ wakatshu lo ta aki tshɛ tshɛ ɛkɔkɔ la mbudi nunu nkama shato l’akumi asato l’esambele la nkama tshanu (337 500). 37 Ɛkɔkɔ la mbudi yakawasha Jehowa aki tshɛ tshɛ 675. 38 Vɔ waki la ngɔmbɛ nunu akumi asato la samalo (36 000), ndo wakasha Jehowa 72. 39 Vɔ waki la mponda nunu akumi asato la nkama tshanu (30 500), ndo wakasha Jehowa 61. 40 Vɔ waki l’anto* nunu dikumi la samalo (16 000), ndo wakasha Jehowa anto* 32. 41 Oma laasɔ, Mɔsɛ akasha ɔlɔmbɛdi+ Eleazara kɛnɛ kakahombe Jehowa nongola, oko wakadjangɛ Jehowa Mɔsɛ.

42 Oma lo etenyi kaki ase Isariyɛlɛ kakaakahanya Mɔsɛ vɔ la apami wakatshu lo ta, 43 etenyi kakɔ kaki la ɛkɔkɔ la mbudi nunu nkama shato l’akumi asato l’esambele la nkama tshanu (337 500), 44 ngɔmbɛ nunu akumi asato la samalo (36 000), 45 mponda nunu akumi asato la nkama tshanu (30 500), 46 ndo anto* nunu dikumi la samalo (16 000). 47 Ko Mɔsɛ akɔshi onto 1 lo anto 50 ndo nyama 1 lo nyama 50 oma lo etenyi kakandasha ase Isariyɛlɛ ko akasha ase Lɛwi+ wanɛ wakotsha ɔkɛndɛ wendana la tabɛrnaklɛ+ ka Jehowa, oko wakadjangɛ Jehowa Mɔsɛ.

48 Oma laasɔ, ɛnɔmbɔdi wa nunu nunu di’asɔlayi,+ ewandji wa nunu nunu ndo ewandji wa nkama nkama wakaye le Mɔsɛ, 49 ko wakayotɛ Mɔsɛ vate: “Ekambi ayɛ wambadia andɔshi w’ata wele lo ɛlɔmbwɛlɔ kaso+ ko ndooko 1 lakashishɔ. 50 Ɔnkɔnɛ, etawɔ dia onto l’onto l’atei aso nkimɔ kɛnɛ kakandakondja oko olambo wa Jehowa, mbuta ate diangɔ dia paonyi, ɛkɔma wa l’ekolo, ɛkɔma, mpɛtɛ y’ohomɔ, azama ndo dɛngalɛnga dikina dia nkomba pɛkato yaso* la ntondo ka Jehowa.”

51 Ko Mɔsɛ nde l’ɔlɔmbɛdi Eleazara wakalongola paonyi ndo dɛngalɛnga tshɛ oma le wɔ. 52 Paonyi tshɛ ya woshasha w’oma le ewandji wa nunu nunu ndo ewandji wa nkama nkama yakawela le Jehowa aki tɔshɛkɛlɛ* nunu dikumi la samalo la nkama esambele l’akumi atanu (16 750). 53 Oma laasɔ, pami tshɛ kakatshu lo ta akɔshi diangɔ dia dimbo dikambo diande. 54 Ɔnkɔnɛ, Mɔsɛ nde l’ɔlɔmbɛdi Eleazara wakalongola paonyi y’oma le ewandji wa nunu nunu ndo ewandji wa nkama nkama, ko wakatshu la yɔ lo luudu la dipɛma l’esanganelo oko diohwelo* dikambo di’ase Isariyɛlɛ la ntondo ka Jehowa.

32 Ana wa Rubɛna+ ndo ana wa Ngada+ waki la dongalonga efula ka mamba, ko vɔ wakɛnyi dia nkɛtɛ ya Jazɛrɛ+ ndo ya Ngiliyadɛ aki ɛtshi ka nkɛtɛ ka dimɛna ka nonga dongalonga. 2 Ko ana wa Ngada la ana wa Rubɛna wakaye le Mɔsɛ nde l’ɔlɔmbɛdi Eleazara la ewandji w’olui w’otondo ko wakate vate: 3 “Ɛtshi ka nkɛtɛ ka Atarɔta, Dibɔna, Jazɛrɛ, Nimira, Hɛshibɔna,+ Elealɛ, Sebama, Nɛbɔ+ ndo Beɔna,+ 4 ɛtshi ka nkɛtɛ kakalɛndja Jehowa la ntondo k’olui w’ase Isariyɛlɛ+ ekɔ ɛtshi ka nkɛtɛ ka dimɛna ka nonga dongalonga, ndo ekambi ayɛ wekɔ la dongalonga+ efula.” 5 Vɔ wakakotsha vate: “Naka tambohomɔ lokolo l’ɔlɔ lo washo ayɛ, sha ekambi ayɛ ɛtshi ka nkɛtɛ kɛsɔ. Tototehoyake Jɔrdana.”

6 Ko Mɔsɛ akatɛ ana wa Ngada la ana wa Rubɛna ate: “Onde anangɛnyu wayanga ntshɔ lo ta ko nyu ntshikala lanɛ? 7 Lande na kalanganyu nkɔmɔla ase Isariyɛlɛ diaha vɔ ntehɔ otsha lo wodja wele Jehowa ayowashawɔ ndooko onyake? 8 Kɛsɔ mbakasale washɛnyu etena kakamaatome oma la Kadɛshɛ-Baranea dia tenda wodja.+ 9 Etena kakawatshu otsha l’Okidi wa Eshikɔlɛ+ ndo kakawɛnyi wodja akɔ, vɔ wakakɔmɔla ase Isariyɛlɛ diaha vɔ ntshɔ otsha lo wodja wakahombe Jehowa mbasha.+ 10 Jehowa akomala efula lushi lɔsɔ, diakɔ diakandatshibe+ ate: 11 ‘Apami tshɛ wakatombe oma l’Edjibito wele la ɛnɔnyi oma lo 20 otsha la diko hawotɛna wodja+ wakamatshibɛ Abrahama, Isaka la Jakɔbɔ,+ nɛ dia vɔ kondjelami l’otema ɔtɔi, 12 onyake Kalɛba+ ɔna Jefune ose Kenizi la Jashua+ ɔna Nuna, nɛ dia vɔ wakayele Jehowa l’otema ɔtɔi.’+ 13 Ɔnkɔnɛ, Jehowa akomalɛ ase Isariyɛlɛ ndo akasale dia vɔ mbekekɔ l’oswe wa shɛnga ɛnɔnyi 40+ polo lam’akashile+ lɔlɔnga la wanɛ tshɛ wakasalaka kɛnɛ kele kɔlɔ lo washo wa Jehowa. 14 Woho wakasale washɛnyu pɛkato kakakonya Jehowa dia ndeka momalɛ ase Isariyɛlɛ mbonyosala ndo nyu lawɔ. 15 Naka nyu ntshika mboyela, kete ndooko onyake nde ayowatshika nto l’oswe wa shɛnga, ko nyayela elanyelo le anto anɛ tshɛ.”

16 L’ɔkɔngɔ diko, vɔ wakasukana le nde ndo wakate vate: “Ototshike lanɛ toke nkoto y’ave dikambo dia dongalonga diaso ndo esomba dikambo di’anaso. 17 Koko tayotetemala monga suke dia ntshɔ lo ta+ ndo tayetaka la ntondo k’ase Isariyɛlɛ polo ndo tambaatshika lo ahole awɔ, koko anaso wayodjasɛka lo esomba wodingami la mpele dia vɔ kokamɛ oma le anto wodjashi lo wodja. 18 Hatotokalola lo mvudu yaso paka ose Isariyɛlɛ tshɛ ambolongola ɛtshi kande ka nkɛtɛ oko etenyi k’okitɔ.+ 19 Nɛ dia sho hatotolongola etenyi k’okitɔ kaamɛ la wɔ la wedi wa Jɔrdana kana ndekana, dikambo sho tambolongola etenyi kaso k’okitɔ lo ɛstɛ ka Jɔrdana.”+

20 Mɔsɛ akaakadimola ate: “Naka nyayosala ngasɔ, kete nyɔshi dihomɔ dia ta+ la ntondo ka Jehowa, 21 ndo naka nyu tshɛ nyayɔsa dihomɔ dia ta ndo nyayotehɔ Jɔrdana la ntondo ka Jehowa lam’ayondotshanya atunyi ande oma la ntondo kande,+ 22 polo ndo wodja wambɔlɛndjama mɛtɛ la ntondo ka Jehowa,+ l’ɔkɔngɔ wa laasɔ mbayonyokoka nkalola+ ndo mbahanyatonga la onongo la ntondo ka Jehowa ndo k’Isariyɛlɛ. Oma laasɔ, mbayoyonga wodja ɔnɛ wanyu la ntondo ka Jehowa.+ 23 Ko naka hanyosadi ngasɔ, kete nyayosala pɛkato la ntondo ka Jehowa ndo nyeye dia nyayolongola dilanya l’ɔtɛ wa pɛkato kanyu. 24 Ɔnkɔnɛ, nyu mbeyaka mbika esomba dikambo di’ananyu ndo nkoto y’ave dikambo dia dongalonga+ dianyu, koko nyu pombaka nkotsha kɛnɛ kamonyolaka.”

25 Ana wa Ngada la ana wa Rubɛna wakatɛ Mɔsɛ vate: “Ekambi ayɛ wayosala paka oko wotshi nkumɛso. 26 Anaso, wadiɛso, dongalonga diaso ndo nyama yaso tshɛ yayotshikala lanɛ lo esomba wa la Ngiliyadɛ,+ 27 koko ekambi ayɛ wayotehɔ, onto l’onto ele la dihomɔ dia ta dia tɔlɔsha la ntondo ka Jehowa+ oko wata nkumɛso.”

28 Ko Mɔsɛ akadjangɛ ɔlɔmbɛdi Eleazara, Jashua ɔna Nuna ndo ewandji wa nkumbo wa waoho w’Isariyɛlɛ lo dikambo diawɔ. 29 Mɔsɛ akawatɛ ate: “Naka ana wa Ngada la ana wa Rubɛna wambotehɔ Jɔrdana kaamɛ la nyu, onto l’onto ele la dihomɔ dia ta dia tɔlɔsha la ntondo ka Jehowa, ko nyambɔlɛndja wodja, kanyowasha+ ɛtshi ka nkɛtɛ ka Ngiliyadɛ. 30 Ko naka vɔ hawɔshi dihomɔ dia ta ndo hawotehwe kaamɛ la nyu, kete kawodjasɛ kaamɛ la nyu lo wodja wa Kanana.”

31 Ko ana wa Ngada la ana wa Rubɛna wakate vate: “Kɛnɛ kakatɛ Jehowa ekambi ande mbayotosala. 32 Sho tayɔsa dihomɔ dia ta ndo tayotehɔ la ntondo ka Jehowa lo wodja wa Kanana,+ koko etenyi kaso k’okitɔ kayonga lo wedi ɔnɛ wa Jɔrdana.” 33 Ko Mɔsɛ akasha ana wa Ngada, ana wa Rubɛna+ ndo k’ahende ɔtɔi ka dioho dia Manase+ ɔna Yɔsɛfu diolelo dia Sihɔna,+ nkumekanga k’ase Amɔra ndo diolelo dia Onga,+ nkumekanga ka Bashana, wodja wakanga esomba wele lo bɛtshi dia nkɛtɛ sɔ ndo esomba wodingi wodja akɔ.

34 Ana wa Ngada wakake* Dibɔna,+ Atarɔta,+ Aroɛrɛ,+ 35 Atarɔta-Shɔfana, Jazɛrɛ,+ Jɔngɛbɛha,+ 36 Bɛtɛ-Nimira+ ndo Bɛtɛ-Harana,+ esomba wodingami la mpele ndo wakake nkoto y’ave dikambo dia dongalonga. 37 Ana wa Rubɛna wakake Hɛshibɔna,+ Elealɛ,+ Kiriatayima,+ 38 Nɛbɔ+ ndo Baala-Meɔna+ (nkombo yawɔ yakatshikitanyema) ndo Sibima. Vɔ wakayɔlɛ esomba wakawayoka nto nkombo nkina.

39 Ana wa Makiri+ ɔna Manase wakatshu tɔlɔsha Ngiliyadɛ ko wakakiɔshi ndo wakatshanya ase Amɔra wakadjasɛka lɔkɔ. 40 Ɔnkɔnɛ, Mɔsɛ akasha Makiri ɔna Manase Ngiliyadɛ, ko nde akadjasɛ lɔkɔ.+ 41 Ndo Jayira ɔna Manase akatshu taalɔsha ko akɔshi tongelongelo tawɔ takahikama la mvudu y’apɛma ndo akatiɔlɛ ɔnɛ Havotɛ-Jayira.*+ 42 Nɔba akatshu dia tɔlɔsha ndo akɔshi Kenatɛ la tosombasomba tendɛ le tɔ,* ko nde akakiɔlɛ ɔnɛ Nɔba, lokombo lande ndamɛ.

33 Nganɛ mbakatahangaka ase Isariyɛlɛ lo lɔkɛndɔ lawɔ lam’akawatombe oma lo wodja w’Edjibito+ lo ndjela elui*+ awɔ lo ɛlɔmbwɛlɔ ka Mɔsɛ nde l’Arɔna.+ 2 Mɔsɛ akatafundaka ahole wakawatahangaka ndo ahole wakawonɛɛka lo lɔkɛndɔ lawɔ lo ndjela didjango dia Jehowa. Ahole wakawatahangaka oma lam’akawonɛɛka+ vɔ anɛ: 3 Vɔ wakonɛɛ oma la Ramɛsɛ+ lo ngɔndɔ+ ka ntondo nshi 15. La wedi a pindju wa lushi l’Elekanelo,+ ase Isariyɛlɛ wakatombe lo washo w’ase Edjibito tshɛ, wele la eshikikelo tshɛ.* 4 L’etena kɛsɔ, ase Edjibito wakakundɛka anawɔ wa nondo tshɛ wanɛ wele Jehowa akaadiake,+ nɛ dia Jehowa akela elombwelo kande le tozambizambi tawɔ.+

5 Ɔnkɔnɛ, ase Isariyɛlɛ wakonɛɛ oma la Ramɛsɛ ko wakatohanga la Sukɔta.+ 6 Oma laasɔ, vɔ wakonɛɛ oma la Sukɔta ko wakatohanga la Etama+ wele l’omamu w’oswe wa shɛnga. 7 Ko vɔ wakonɛɛ oma la Etama ko wakɛlɛ otsha la Pihahirɔtɛ kɛlane la Baala-Zefɔna+ ndo wakatohanga la ntondo ka Mingidɔlɛ.+ 8 L’ɔkɔngɔ wa laasɔ, vɔ wakonɛɛ oma la Pihahirɔtɛ ko wakatenyanya ndjale+ ndo wakatshu otsha l’oswe wa shɛnga+ ndo wakatetemala la lɔkɛndɔ la nshi 3 l’oswe wa Etama+ ko wakatohanga la Mara.+

9 Ko vɔ wakonɛɛ oma la Mara ko wakatokoma la Elimɛ. Vɔ wakatane tɛkɔ 12 di’ashi ndo atoko 70 la Elimɛ, ko vɔ wakahange laawɔ.+ 10 Oma laasɔ, vɔ wakonɛɛ oma la Elimɛ ko wakatohanga suke la Ndjale ka Beela. 11 L’ɔkɔngɔ wa laasɔ, vɔ wakonɛɛ oma lo Ndjale ka Beela ko wakatohanga l’oswe wa Sinɛ.+ 12 Ko vɔ wakonɛɛ oma l’oswe wa Sinɛ ko wakatohanga la Dɔfɛka. 13 L’ɔkɔngɔ wa laasɔ, vɔ wakonɛɛ oma la Dɔfɛka ko wakatohanga la Alushi. 14 Oma laasɔ, vɔ wakonɛɛ oma la Alushi ko wakatohanga la Rɛfidimɛ,+ lɛnɛ aki komonga ashi w’anto nnɔ. 15 Ko vɔ wakonɛɛ oma la Rɛfidimɛ ko wakatohanga l’oswe wa Sinayi.+

16 Vɔ wakonɛɛ oma l’oswe wa Sinayi ko wakatohanga la Kibɛrɔtɛ-Hatava.+ 17 Oma laasɔ, vɔ wakonɛɛ oma la Kibɛrɔtɛ-Hatava ko wakatohanga la Hazerɔtɛ.+ 18 Ko vɔ wakonɛɛ oma la Hazerɔtɛ ko wakatohanga la Ritima. 19 Oma laasɔ, vɔ wakonɛɛ oma la Ritima ko wakatohanga la Rimɔna-Pɛrɛzɛ. 20 Ko vɔ wakonɛɛ oma la Rimɔna-Pɛrɛzɛ ko wakatohanga la Libina. 21 Vɔ wakonɛɛ oma la Libina ko wakatohanga la Risa. 22 Oma laasɔ, vɔ wakonɛɛ oma la Risa ko wakatohanga la Kɛhɛlata. 23 Ko vɔ wakonɛɛ oma la Kɛhɛlata ko wakatohanga lo dikona dia Shefɛrɛ.

24 L’ɔkɔngɔ wa laasɔ, vɔ wakonɛɛ oma lo dikona dia Shefɛrɛ ko wakatohanga la Harada. 25 Oma laasɔ, vɔ wakonɛɛ oma la Harada ko wakatohanga la Makɛlɔtɛ. 26 Ko vɔ wakonɛɛ+ oma la Makɛlɔtɛ ko wakatohanga la Tahata. 27 L’ɔkɔngɔ wa laasɔ, vɔ wakonɛɛ oma la Tahata ko wakatohanga la Tɛra. 28 Oma laasɔ, vɔ wakonɛɛ oma la Tɛra ko wakatohanga la Mitika. 29 Ko vɔ wakonɛɛ oma la Mitika ko wakatohanga la Hashimɔna. 30 Oma laasɔ, vɔ wakonɛɛ oma la Hashimɔna ko wakatohanga la Mɔsɛrɔtɛ. 31 Ko vɔ wakonɛɛ oma la Mɔsɛrɔtɛ ko wakatohanga la Bɛnɛ-Jaakana.+ 32 Vɔ wakonɛɛ oma la Bɛnɛ-Jaakana ko wakatohanga la Hɔrɔ-Hangidɛngadɛ. 33 Oma laasɔ, vɔ wakonɛɛ oma la Hɔrɔ-Hangidɛngadɛ ko wakatohanga la Jɔtibata.+ 34 Ko vɔ wakonɛɛ oma la Jɔtibata ko wakatohanga la Abɔrɔna. 35 Oma laasɔ, vɔ wakonɛɛ oma la Abɔrɔna ko wakatohanga la Eziɔna-Ngɛbɛrɛ.+ 36 L’ɔkɔngɔ wa laasɔ, vɔ wakonɛɛ oma la Eziɔna-Ngɛbɛrɛ ko wakatohanga l’oswe wa Zinɛ,+ mbuta ate Kadɛshɛ.

37 Oma laasɔ, vɔ wakonɛɛ oma la Kadɛshɛ ko wakatohanga lo dikona dia Hɔra,+ l’olelo wa wodja w’Ɛdɔmɛ. 38 Ko ɔlɔmbɛdi Arɔna akadɛ lo dikona dia Hɔra lo ndjela didjango dia Jehowa ko nde akatovɔ lɛkɔ lo ngɔndɔ+ ka 5 lushi 1 l’ɔnɔnyi wa 40 l’ɔkɔngɔ w’ase Isariyɛlɛ ntomba oma lo wodja w’Edjibito. 39 Arɔna aki la ɛnɔnyi 123 lam’akandavu lo dikona dia Hɔra.

40 Oma laasɔ, nkumekanga ka Arada+ k’ose Kanana, ɔnɛ lakadjasɛka la Nɛngɛbɛ lo wodja wa Kanana akoke dia ase Isariyɛlɛ wekɔ lo ndjaye.

41 L’ɔkɔngɔ wa laasɔ, vɔ wakonɛɛ oma lo dikona dia Hɔra+ ko wakatohanga la Zalɔmɔna. 42 Oma laasɔ, vɔ wakonɛɛ oma la Zalɔmɔna ko wakatohanga la Punɔna. 43 L’ɔkɔngɔ wa laasɔ, vɔ wakonɛɛ oma la Punɔna ko wakatohanga la Obota.+ 44 Ko vɔ wakonɛɛ oma la Obota ko wakatohanga la Iyɛ-Abarima l’olelo wa Mɔaba.+ 45 L’ɔkɔngɔ wa laasɔ, vɔ wakonɛɛ oma la Iyimɛ ko wakatohanga la Dibɔna-Ngada.+ 46 Oma laasɔ, vɔ wakonɛɛ oma la Dibɔna-Ngada ko wakatohanga la Alamɔna-Dibalatayima. 47 Ko vɔ wakonɛɛ oma la Alamɔna-Dibalatayima ko wakatohanga lo akona wa Abarimɛ+ la ntondo ka Nɛbɔ.+ 48 L’ekomelo, vɔ wakonɛɛ oma lo akona wa Abarimɛ ko wakatohanga lo laandja l’oswe wa Mɔaba, l’omamu wa Jɔrdana suke la Jeriko.+ 49 Vɔ wakatetemala mpanga l’omamu wa Jɔrdana, oma la Bɛtɛ-Jeshimɔta polo la Abɛlɛ-Shitimɛ+ lo laandja l’oswe wa Mɔaba.

50 Jehowa akatɛ Mɔsɛ lo laandja l’oswe wa Mɔaba l’omamu wa Jɔrdana suke la Jeriko ate: 51 “Sawola l’ase Isariyɛlɛ kele tɛwɔ wate: ‘Nyayanga ntehɔ Jɔrdana ko mbɔtɔ lo wodja wa Kanana.+ 52 Nyu pombaka mbitshanya anto tshɛ wodjashi lo wodja akɔ la ntondo kanyu ndo nyu pombaka ndanya ave+ awɔ wa lɔkɔlɔnga tshɛ ndo mpingu yawɔ tshɛ ya mbolo+ ndo nyu pombaka ndanya ahole awɔ tshɛ w’ɔtɛmwɛlɔ.+ 53 Ko nyayɔsa wodja akɔ ndo nyayodjasɛ lɔkɔ, nɛ dia ndooko onyake dimi layonyosha wodja akɔ dia vɔ monga wanyu.+ 54 Nyu pombaka nkahana bɛtshi dia nkɛtɛ lo eokelo k’owale+ lo ndjela nkumbo yanyu. Wanɛ wele efula, nyu pombaka mbafudiɛ etenyi kawɔ k’okitɔ ndo wanɛ wele yema tshitshɛ, nyu pombaka mbakitshɛkitshɛ etenyi kawɔ k’okitɔ.+ Onto tshɛ ayokondja etenyi kande k’okitɔ lɛnɛ akɔ owale ande. Nyayolongola tenyi dianyu di’okitɔ lo ndjela waoho wa washɛnyu.+

55 “‘Ko naka hanyotshanyisha anto wodjashi lo wodja akɔ oma la ntondo kanyu,+ wanɛ wayonyotshika dia vɔ mbidjasɛ kaamɛ la nyu wayonga oko afumbu lo washo anyu ndo oko atɛndɛ lo mpandju yanyu ndo vɔ wayonyɔhɛnyahɛnyaka lo wodja wayonyodjasɛ.+ 56 Ko dimi layonyosalɛ kɛnɛ kotomasalɛ.’”+

34 Jehowa akatɛ Mɔsɛ nto ate: 2 “Tɛ ase Isariyɛlɛ wate: ‘Lam’ayanganyu mbɔtɔ lo wodja wa Kanana,+ ɔnɛ kele wodja wayɔkɔ lo anya anyu oko etenyi kanyu k’okitɔ, wodja wa Kanana lo ndjela elelo awɔ.+

3 “‘Olelo anyu wa lo sidɛ wayonga oma l’oswe wa Zinɛ l’omamu wa Ɛdɔmɛ ndo olelo anyu wa lo sidɛ otsha lo ɛstɛ oma l’omamu wa Ndjale ka Lɛɛhɔ.*+ 4 Olelo anyu wayokadimɔ ndo wayeta otsha lo sidɛ ka wodelo wa Akarabima+ ndo wayeta otsha la Zinɛ ko wayotokomɛ lo sidɛ ka Kadɛshɛ-Baranea.+ Oma laasɔ, vɔ wayotshɔ polo la Hazara-Adara+ ndo wayotetemala polo la Azimɔna. 5 Olelo akɔ wayosekesɔ oma la Azimɔna ko wayotshɔ otsha l’Okidi w’ashi* wa l’Edjibito ndo wayotokomɛ lo Ndjale.*+

6 “‘Olelo anyu wa lo owɛstɛ wayonga lo Ndjale ka woke* la omamu atɔ. Ɔsɔ kayonga olelo+ anyu wa lo owɛstɛ.

7 “‘Olelo anyu wa lo nɔrdɛ wayonga nganɛ: Nyayodja olelo anyu oma lo Ndjale ka woke polo lo dikona dia Hɔra. 8 Oma lo dikona dia Hɔra, nyayodja olelo anyu otsha la Lɛbɔ-Hamatɛ*+ ndo olelo akɔ wayokomɛ la Zedada.+ 9 Olelo akɔ wayeta otsha la Zifurɔna ko wayotokomɛ la Hazara-Ɛnana.+ Ɔsɔ mbayonga olelo anyu wa lo nɔrdɛ.

10 “‘Oma laasɔ, kanyodje olelo anyu wa lo ɛstɛ oma la Hazara-Ɛnana polo la Shefama. 11 Olelo akɔ wayeta oma la Shefama polo la Ribila lo ɛstɛ ka Ainɛ ndo olelo akɔ wayoholɔ ko wayeta l’oholola wa lo ɛstɛ ka Ndjale ka Kinɛrɛtɛ.*+ 12 Olelo akɔ wayeta otsha la Jɔrdana ndo wayotokomɛ lo Ndjale ka Lɛɛhɔ.+ Ɔsɔ mbayonga wodja anyu+ ndo elelo awɔ lo wedi akɔ tshɛ.’”

13 Ko Mɔsɛ akatɛ ase Isariyɛlɛ ate: “Ɔnɛ ele wodja wayonyokahana lo eokelo k’owale,+ oko wakadjanga Jehowa dia mbisha waoho divwa la etenyi. 14 Nɛ dia dioho di’aseka Rubɛna lo ndjela luudu la shɛwɔ ndo dioho di’aseka Ngada lo ndjela luudu la shɛwɔ la k’ahende ɔtɔi ka dioho dia Manase wamboshilaka nongola etenyi kawɔ k’okitɔ.+ 15 Waoho ahende la etenyi wamboshilaka nongola etenyi kawɔ k’okitɔ lo ɛstɛ k’ɛtshi ka nkɛtɛ ka Jɔrdana suke la Jeriko, otsha lɛnɛ atomba wonya.”+

16 Jehowa akatɛ Mɔsɛ nto ate: 17 “Nkombo y’apami wayonyokahɛ wodja yɔ nyɛ: Ɔlɔmbɛdi Eleazara+ nde la Jashua+ ɔna Nuna. 18 Kanyɔshi owandji 1 oma lo dioho la dioho dia nyatɛ wodja oko tenyi di’okitɔ.+ 19 Nkombo y’apami akɔ yɔ nyɛ: Oma lo dioho dia Juda,+ Kalɛba+ ɔna Jefune. 20 Oma lo dioho di’ana wa Simɛyɔna,+ Shemuɛlɛ ɔna Amihudɛ. 21 Oma lo dioho dia Bɛnjamina,+ Elidadɛ ɔna Kisilɔna. 22 Oma lo dioho di’ana wa Danɛ,+ owandji 1, Buki ɔna Jongili. 23 Oma le ana wa Yɔsɛfu,+ oma lo dioho di’ana wa Manase,+ owandji 1, Haniyɛlɛ ɔna Efodɛ. 24 Oma lo dioho di’ana w’Efrayimɛ,+ owandji 1, Kɛmuɛlɛ ɔna Shifɛtana. 25 Oma lo dioho di’ana wa Zebuluna,+ owandji 1, Elizafana ɔna Paranaka. 26 Oma lo dioho di’ana w’Isakara,+ owandji 1, Palatiyɛlɛ ɔna Azana. 27 Oma lo dioho di’ana w’Ashɛrɛ,+ owandji 1, Ahihudɛ ɔna Shelɔmi. 28 Oma lo dioho di’ana wa Nafɛtali,+ owandji 1, Pedahɛlɛ ɔna Amihudɛ.” 29 Wasɔ mbele wanɛ wakalongola didjango oma le Jehowa dia kahɛ ase Isariyɛlɛ bɛtshi dia nkɛtɛ lo wodja wa Kanana.+

35 Jehowa akatɛ Mɔsɛ lo laandja l’oswe wa Mɔaba l’omamu wa Jɔrdana+ suke la Jeriko ate: 2 “Tɛ ase Isariyɛlɛ dia vɔ pombaka mbisha ase Lɛwi esomba ɛmɔtshi dia vɔ mbidjasɛ+ lɔkɔ oma lo etenyi kawɔ k’okitɔ ndo vɔ pombaka mbisha ase Lɛwi ahole wa ndeshaka dongalonga wodingi esomba akɔ.+ 3 Vɔ wayodjasɛ lo esomba akɔ ndo ahole wa ndeshaka dongalonga wayonga dikambo dia dongalonga diawɔ, diangɔ diawɔ ndo nyama yawɔ nkina tshɛ. 4 Ahole wa ndeshaka dongalonga wa l’esomba wayonyosha ase Lɛwi wayonga la woke wa kubita* kinunu (1 000) oma lo ehele k’osomba l’otshimbedi awɔ tshɛ. 5 Nyu pombaka mbɛdika kubita nunu pende (2 000) l’andja w’osomba lo ɛstɛ, kubita nunu pende (2 000) lo sidɛ, kubita nunu pende (2 000) lo owɛstɛ ndo kubita nunu pende (2 000) lo nɔrdɛ, ko osomba monga l’atei atei. Ngasɔ mbayonga ahole wa ndeshaka dongalonga lo esomba awɔ.

6 “Esomba wayonyosha ase Lɛwi wayonga esomba 6 w’eshamelo+ wayonyokimɔ dia ondjakanyi ndawɔka lɛkɔ+ kaamɛ ndo esomba ekina 42. 7 Kanyosha ase Lɛwi esomba tshɛ tshɛ 48 kaamɛ l’ahole awɔ wa ndeshaka dongalonga.+ 8 Esomba wayonyowasha wayonga w’oma le ase Isariyɛlɛ.+ Kanyɔshi efula oma le wanɛ wele efula ndo kanyɔshi yema tshitshɛ+ oma le wanɛ wele yema tshitshɛ. Olui la olui wayosha ase Lɛwi esomba ɛmɔtshi oma l’etenyi k’okitɔ kakawalongola.”

9 Jehowa akatetemala mbutɛ Mɔsɛ ate: 10 “Sawola l’ase Isariyɛlɛ kele tɛwɔ wate: ‘Nyayanga ntehɔ Jɔrdana dia ntshɔ otsha lo wodja wa Kanana.+ 11 Kanyɔsɔnɛ esomba wele amɛna le nyu dia vɔ monga esomba w’eshamelo, kele naka onto ɔmɔtshi ambodiaka onto* ɔmɔtshi aha la okonda ko nde ndawɔ lɛkɔ.+ 12 Esomba ɛsɔ wayonga eshamelo le nyu dia nyu ndawɔka ɔsɔmbɔyishi+ wa dikila diaha ondjakanyi mvɔ la ntondo ka nde nsamba lo kilombo la ntondo k’olui w’anto.+ 13 Ɔsɔ mbayonga oyango w’esomba 6 w’eshamelo wayonyokimɔ. 14 Nyayokimɔ esomba 3 lo wedi ɔnɛ wa Jɔrdana+ ndo esomba 3 lo wodja wa Kanana+ dia vɔ monga esomba w’eshamelo. 15 Esomba 6 ɛsɔ wayonga eshamelo dikambo di’ase Isariyɛlɛ, dikambo dia angɛndangɛnda+ ndo dikambo di’ambetshi a mboka wele l’atei awɔ, dia onto tshɛ layodiaka onto* ɔmɔtshi+ aha la okonda ndawɔ lɛkɔ.

16 “‘Ko naka nde akakɔmɔla onto akɔ lowolo lɔmɔtshi, ko onto akɔ ambovɔ, kete nde ekɔ ondjakanyi. Ondjakanyi ɔsɔ pombaka ndjakema ndooko onyake.+ 17 Naka nde akɔɔkɔmɔla dive diakoka ndjaka onto, ko onto akɔ ambovɔ, kete nde ekɔ ondjakanyi. Ondjakanyi ɔsɔ pombaka ndjakema ndooko onyake. 18 Naka nde akɔɔkɔmɔla etenyi k’osongo kakoka ndjaka onto, ko onto akɔ ambovɔ, kete nde ekɔ ondjakanyi. Ondjakanyi ɔsɔ pombaka ndjakema ndooko onyake.

19 “‘Ɔsɔmbɔyishi wa dikila kayodiaka ondjakanyi ɔsɔ. Lam’ayondohomana la nde, ndamɛ ayowodiaka. 20 Naka onto akɔ akavu l’ɔkɔngɔ wa nde mbosokola la esehe tshɛ kana l’ɔkɔngɔ wa nde mbɔtɛta ɛngɔ kɛmɔtshi la kanyi ya kɔlɔ,*+ 21 kana naka nde akɔɔkɔmɔla la lonya lande la esehe tshɛ ko onto akɔ ambovɔ, kete onto lakɔɔkɔmɔla ɔsɔ ayodiakema ndooko onyake. Nde ekɔ ondjakanyi. Ɔsɔmbɔyishi wa dikila ayodiaka ondjakanyi ɔsɔ lam’ayondohomana la nde.

22 “‘Ko naka aha la okonda ndo aha la esehe kakandoosokola kana kakandɔɔtɛtɛ ɛngɔ kɛmɔtshi aha la monga la kanyi ya kɔlɔ,*+ 23 kana naka nde kombɛna ndo nde kombooka dive ndo nde komonga otunyi ande kana konyangaka dia mbosalɛ kɔlɔ, ko onto akɔ ambovɔ, 24 kete olui w’anto pombaka nsambola lam’asa ɔnɛ lakɔɔkɔmɔla la ɔsɔmbɔyishi wa dikila lo yoho yɔtɔnɛ l’ɛlɛmbɛ ɛsɔ.+ 25 Oma laasɔ, olui w’anto pombaka nshimbɛ ondjakanyi oma l’anya w’ɔsɔmbɔyishi wa dikila ko vɔ mbokaloya l’osomba ande w’eshamelo wakandalawɔ ndo nde pombaka ntshikala lɛkɔ polo lam’ayovɔ ɔlɔmbɛdi a laadiko wakakitama esɔ k’ekila.+

26 “‘Ko naka ondjakanyi ambolekana olelo w’osomba ande w’eshamelo wakandalawɔ, 27 ko ɔsɔmbɔyishi wa dikila ambowɛna l’andja w’osomba w’eshamelo ndo nde ambodiaka ondjakanyi akɔ, kete nde bu la onongo wa dikila. 28 Nɛ dia nde pombaka mbidjasɛ l’osomba ande w’eshamelo polo lam’ayovɔ ɔlɔmbɛdi a laadiko. Koko l’ɔkɔngɔ wa nyɔi k’ɔlɔmbɛdi a laadiko, ondjakanyi mbeyaka nkalola lo nkɛtɛ yande hita.+ 29 Akambo asɔ wayonga le nyu oko ɛlɛmbɛ wayonyokambaka la wɔ lo kilombo lo nɔnga yanyu tshɛ lo ahole tshɛ wadjasɛnyu.

30 “‘Onto tshɛ ladiaka onto* pombaka ndjakema oko ondjakanyi+ naka ɛmɛnyi wamboshikikɛ* dikambo diakɔ. Koko ndooko onto* layodiakema naka ɔmɛnyi+ 1 oto mbashikikɛ. 31 Hanyohombe nongola oshinga w’etshungwelo dia ntshungola lɔsɛnɔ* l’ondjakanyi wahomba mvɔ, nɛ dia nde pombaka ndjakema ndooko onyake.+ 32 Ndo hanyohombe nongola oshinga w’etshungwelo dia ntshungola onto lakalawɔ l’osomba w’eshamelo lo mbosha lotshungɔ la nde nkalola lo nkɛtɛ yande la ntondo ka nyɔi k’ɔlɔmbɛdi a laadiko.

33 “‘Tanyodjake wodja wodjashinyu mindo, nɛ dia dikila mbidjaka wodja+ mindo ndo mbeyaka monga ko ndooko kɛnɛ kakoka nkomba pɛkato l’ɔtɛ wa dikila diambotshulɔma la nkɛtɛ onyake dikila dia ɔnɛ loditshodi.+ 34 Tanyodjake wodja wodjashinyu mindo, wodja wodjashimi ndo dimi, nɛ dia dimi Jehowa mbidjasɛ l’atei w’ase Isariyɛlɛ.’”+

36 Ɛtɛ wa nkumbo wa tokanula ta Ngiliyadɛ ɔna Makiri+ ɔna Manase wa lo nkumbo y’ana wa Yɔsɛfu wakaye ndjɔtɛkɛta la ntondo ka Mɔsɛ ndo k’ewandji, ɛtɛ wa nkumbo y’ase Isariyɛlɛ. 2 Vɔ wakate vate: “Jehowa akakodjangɛ, wɛ nkumɛmi, dia nkahɛ ase Isariyɛlɛ bɛtshi dia nkɛtɛ oko etenyi k’okitɔ lo eokelo k’owale.+ Ndo Jehowa akakodjangɛ, wɛ nkumɛmi, dia nkimɔ etenyi k’okitɔ ka Zelɔfɛhadɛ k’ɔnangɛso le anande wa wamato.+ 3 Naka vɔ ntshukama le apami wa lo waoho akina w’Isariyɛlɛ, kete etenyi k’okitɔ ka wamato asɔ kayomɔ oma lo etenyi k’okitɔ ka washɛso, ko kayokotshama lo etenyi k’okitɔ ka dioho diayowonga ndo tɔ kayonyɛma oma lo etenyi kaso k’okitɔ kakatalongola oma lo eokelo k’owale. 4 Ko lam’ayokoka Ɔnɔnyi w’ɔngɛnɔngɛnɔ+ le ase Isariyɛlɛ, etenyi k’okitɔ ka wamato asɔ kayokotshama l’etenyi k’okitɔ ka dioho diayowonga l’etena kɛsɔ, nɛ dia etenyi kawɔ k’okitɔ kayonyɛma oma lo etenyi k’okitɔ ka dioho dia washɛso.”

5 Ko Mɔsɛ akadjangɛ ase Isariyɛlɛ lo ndjela didjango dia Jehowa ate: “Kɛnɛ kata dioho di’ana wa Yɔsɛfu kekɔ mɛtɛ. 6 Jehowa ambodjanga lo dikambo di’ana wa wamato wa Zelɔfɛhadɛ ate: ‘Vɔ mbeyaka ntshukama le onto tshɛ lalangawɔ. Koko vɔ pombaka ntshukama paka le onto ɔmɔtshi la lo nkumbo ka lo dioho dia shɛwɔ. 7 Ndooko etenyi k’okitɔ k’ase Isariyɛlɛ kahomba mimɔ oma lo dioho nɛ otsha lo dioho dikina, nɛ dia ase Isariyɛlɛ pombaka nama etenyi k’okitɔ ka dioho dia watshɛwɔ. 8 Ndo ɔna womoto tshɛ lele la etenyi k’okitɔ l’atei wa waoho w’Isariyɛlɛ pombaka ntshukama le kanula ya lo dioho dia she,+ dia ase Isariyɛlɛ ntshikala la etenyi k’okitɔ ka watshɛwɔ. 9 Ndooko etenyi k’okitɔ kahomba mimɔ oma lo dioho nɛ otsha lo dioho dikina, nɛ dia waoho w’ase Isariyɛlɛ pombaka ntshikala la etenyi kawɔ k’okitɔ hita.’”

10 Ko ana wa wamato wa Zelɔfɛhadɛ wakasale kɛnɛ kakadjangɛ Jehowa Mɔsɛ.+ 11 Diakɔ diele Mahala, Tiriza, Hɔngɛla, Milika ndo Nɔa, ana wa wamato wa Zelɔfɛhadɛ+ wakatshukama le ana wa anango shɛwɔ. 12 Vɔ wakatshukama le apami wa lo nkumbo ka Manase ɔna Yɔsɛfu dia etenyi kawɔ k’okitɔ ntshikala lo dioho dia nkumbo ka shɛwɔ.

13 Ɔsɔ mbele wadjango la tɛdikɔ ta dombo takasha Jehowa ase Isariyɛlɛ lo tshimbo ya Mɔsɛ lo laandja l’oswe wa Mɔaba l’omamu wa Jɔrdana suke la Jeriko.+