Onde wɛ âkohɔ?

Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

• Nzambi ondjelo akɔna wakandatome la ntondo ka wodja w’Isariyɛlɛ etena kakandâtondja oma l’Edjibito? (Etum. 23:20, 21)

Sho kokaka mbuta dia ondjelo waki la ‘lokombo la Jehowa’ ɔsɔ aki Ɔna Nzambi l’enondo lakayelamɛka l’ɔkɔngɔ ɔnɛ Yeso.—9/15, lɛkɛ 21.

• Naa ɛkɔkɔ ɛmɔtshi wa weke watshutshuya anto dia nsala akambo wa kɔlɔ?

L’atei w’ɛkɔkɔ ɛmɔtshi wa weke wâtshutshuya dia nsala akambo asɔ mbele ndo lonyangu lendana la woho wadiɛnɛwɔ, ngandji ka falanga, woho wahashidiyama awui wa kɔlɔ esadi ndo woho wele vɔ kɔka l’ehemba. (Und. 7:7; 8:11; 1 Tim. 6:10; Jak. 1:14)—10/1, lɛkɛ 4.

• Lande na ekɔ ɔlɔlɔ mpokamɛ ɔngɛnyi aso wele la hemɔ dimɛna ndo la kɛtshi tshɛ?

Ɔngɛnyi aso wele la hemɔ mbeyaka monga l’ohomba aha w’onto mbokadimola lo ambola ande, koko w’onto mbohokamɛ la yambalo tshɛ ndo l’otema ɔtɔi. Mbeyaka monga ko nde ekɔ tsho l’ohomba wa mbutɛ onto ɔmɔtshi awui wele la nde aha la nde mboka wɔma w’ɔnɛ nde ayɔnywama. (Und. 3:1, 7; Jak. 1:19)—10/1, lɛkɛ 10, 11.

• Lande na kele wadi l’omi pombaka mbeka dia mumbwanaka tokanyi?

Jehowa Nzambi mbɔsaka atshukanyi oko “dimba otoi.” (Mat. 19:3-6) Ɔnkɔnɛ, dia dimama diawɔ mongaka nshi tshɛ nge, ekɔ ohomba vɔ sawolaka dimɛna.—10/1, lɛkɛ 15.

• Naa alako amɔtshi wakoka kokimanyiya dia ndeka nkondja wahɔ oma lo wadielo wa Bible?

Adia l’oyango wa dimɛna. (Jak. 1:23-25) Sɔna ekadimwelo ka Bible ka dimɛna. Lɔmba ekimanyielo ka Jehowa. (Osam. 119:18) Adiaka lushi la lushi. (Jas. 1:8) Kamba la toho totshikitanyi ndo kanaka yimba la kɛnɛ kadiayɛ. (Osam. 119:97) Yanga ekimanyielo dia nshihodia Bible. (2 Pet. 3:16)—10/1, lɛkɛ 21-23.

• Ngande wakoka ambutshi mbisha anawɔ ‘ɛnyɛlɔ’ dia vɔ ndjokoma ana weya mɛmba ɛkɛndɛ? (Joa. 13:15)

L’ɛnyɛlɔ kaki Yeso, ambutshi pombaka nembetshiya ndo mɛnya anawɔ oma lo ɛnyɛlɔ kawɔ kɛnɛ kalembetshiya monga onto leya mɛmba ɛkɛndɛ.—10/1, lɛkɛ 19.

• Lo kɛnɛ kendana la ɔtɛmwɛlɔ wa mɛtɛ, naa tɛkɛ nɛndɛ tahetawɔma le Nzambi?

‘Ekɔ wolo efula. Handolange. Lekɔ l’akambo efula wa nsala. Dimi kema l’akoka wahombama. Onto ɔmɔtshi akanyangiya.’ Ɔsɔ kema tɛkɛ nɛndɛ t’amɛna tahomba toshimba dia nkitanyiya wadjango waki Nzambi.—10/15, lɛkɛ 12-15.

• Naa awui amɔtshi wakokaso nsala dia nsanganya y’Akristo monga kiɔkɔ y’ekeketshelo le so ndo le anto akina?

Tayalɔngɔsɔdi la ntondo. Mbɔtɔka mbala la mbala. Komaka la wonya. Tshɔka la dihomɔ tshɛ diahombama. Mbewɔ akambo wekola yimba. Mbishaka kɔmatɛrɛ. Mbishaka kɔmatɛrɛ ya lo tshena pe. Mbishaka asawo aso dimɛna. Mandolaka anto wakasha asawo kana kɔmatɛrɛ. Sawolaka l’anto la ntondo ndo l’ɔkɔngɔ wa nsanganya.—10/15, lɛkɛ 22.

• Wetshelo akɔna wakokaso nkondja oma lo woho waketawɔ Arɔna dia sɛngiyama oma le asekande?

Etena kaki Mɔsɛ komonga lawɔ, ase Isariyɛlɛ wakatɛ Arɔna dia mbasalɛ jambizambi. Nde aketawɔ ndo akasale dikambo sɔ. Dui sɔ mɛnyaka diaha ɛlɔngɔlɔngɔ l’esekaseka eto mbasɛngiyama oma le asekawɔ. Kânga epalanga walanga nsala kɛnɛ kele ɔlɔlɔ kokaka sɛngiyama. Sho pombaka nshika tanga la ntondo ka tɔsɛngiya ta kɔlɔ t’oma le angɛnyi.—11/15, lɛkɛ 8.