‘Nka Dira Eng?’
1 ‘Nka dira eng?’ Ga go belaetse gore potso eo e ne e akantswe ke maloko a setlhotshwana se se ithutang Baebele se se neng se rulagantswe ke Charles Taze Russell mo dingwageng tsa bo1870. Fa baithuti bao ba Baebele ba bogologolo ba ntse ba tswelela pele ba tlhaloganya se thato ya Modimo e leng sone, ba tshwanetse ba bo ba ne ba ipotsa gore ke eng se ba neng ba ka se dira go thusa ba bangwe go ithuta ka boikaelelo jwa Modimo. Tota e ne e le namane e tona ya tiro go fitlhelela lefatshe lotlhe ka kitso ya Baebele e ba neng ba nna le yone.
2 Se se re itumedisang ke gore ba ile ba fenya kgwetlho eo. Jang? Mongwe le mongwe wa bone o ne a dira seabe sa gagwe se sennye, mo e leng gore gompieno, Basupi ba ga Jehofa ba itsiwe mo lefatsheng lotlhe—e le phuthego ya baboledi ba Bogosi ba ba ka nnang dimilione tse thataro mo diphuthegong tse di ka nnang 90 000 mo dinageng le ditlhaketlhake tsa lewatle di le 234!—Isa. 60:22.
3 E Eme Nokeng ka Botlalo: Go botlhokwa gore mongwe le mongwe wa rona a nne le seabe mo tirong eno e kgolo e Jesu a neng a bolelela pele ka yone gore e ne e tla dirwa mo malatsing ano a bofelo. (Mar. 13:10) Tota tiro eno e ka se tlogelelwe gore e dirwe ke palo e nnye fela ya bagolwane; le gone tiro ya go rera ga se boikarabelo jwa babulatsela fela. Totatota, Mokeresete mongwe le mongwe yo o ineetseng o na le seabe se se botlhokwa se a tshwanetseng go se dira. Rotlhe re ka dira mofuta mongwe wa tiro ya go rera. (1 Tim. 1:12) Tiro eno e solegela rona le batho ba bangwe molemo go ikaegile ka gore re nna le seabe go le kana kang.—1 Tim. 4:16.
4 Gape mongwe le mongwe a ka tshegetsa ka botlalo bokaulengwe jwa rona ka ditsela tse dingwe tse di botlhokwa. Re ka tshegetsa dipokano tsa phuthego ka go nna gone ka metlha le ka go nna le seabe ka matlhagatlhaga. (Pes. 122:1, 8, 9) Re ka dira seabe sa rona ka go boloka phuthego e le phepa mo boitsholong. Re ka tshegetsa tiro ya lefatshe lotlhe ka madi, go ya ka fa re kgonang ka gone. Re ka nna le seabe fa re phepafatsa Holo ya Bogosi. Mongwe le mongwe a ka bontsha moya wa lorato le kutlwano mo phuthegong ka go thusa batho ba ba sa tswang go kopanela, basha le batho ba ba godileng.—Bakol. 3:12, 14.
5 Ka jalo o ka nna wa botsa gore, ‘Nka dira eng?’ Le mororo maiteko a gago a ka lebega e se a sepe, ka go dira seabe sa gago, o dira gore phuthego e nonofe, e nne matlhagatlhaga le go itekanela. Ka gone rotlhe re na le seabe se se botlhokwa go tlotla leina la ga Jehofa!