A O A Gakologelwa?

A o ile wa itumelela go bala ditokololo tsa bosheng tsa Tora ya Tebelo? Fa go le jalo, bona gore a o ka kgona go araba dipotso tse di latelang:

▫ Ditshiamelo tse di okeditsweng tsa tirelo tseo di neng tsa newa Banethinima le barwa ba batlhanka ba ga Solomone fa ba ne ba boa kwa botshwarong kwa Babelona, di ka nna tsa bo di tshwantshetsa eng?

Gompieno, jaaka masalela a Iseraela wa semoya a a mo lefatsheng a ntse a tswelela go fokotsega, dinku di sele di ntse di a oketsega. Bangwe ba bano ba sekadinku, jaaka Banethinima le barwa ba batlhanka ba ga Solomone, ba ile ba newa maikarabelo a a botlhokwa thata ba kaelwa ke masalela. (Isaia 61:5)—4/15. ditsebe 16-17.

▫ Moperofeti Sefania o ne a kaya eng fa a ne a bolela jaana: “E ka tla ea re goñwe loa shuywa mo letsatsiñ ya bogale yoa ga Yehofa”? (Sefania 2:2, 3)

E le gore motho ope fela a sirelediwe mo ‘sepitleng se segolo’ se se tlang, ga se kgang ya gore fa o kile wa bolokiwa o boloketswe ruri. (Mathaio 24:13, 21) Go sirelediwa mo letsatsing leo go tla ikaega ka gore motho a tswelele a dira dilo tse tharo tseno: O tshwanetse go batla Jehofa, go batla tshiamo, le go batla kgobalalo.—5/1, ditsebe 15-16.

▫ Mikaele o “èma” ka tlhaloganyo efe mo “motlheñ oa bokhutlō”? (Daniele 12:1, 4)

Mikaele o sale a ntse a emetse batho ba Modimo fa a sale a tlhongwa jaaka Kgosi ka 1914. Mme go ise go e kae Mikaele o tla “èma” ka mokgwa mongwe o o kgethegileng—jaaka Moemedi wa Modimo go tlosa boikepo jotlhe mo lefatsheng le jaaka Mogolodi wa batho ba Modimo.—5/1, tsebe 17.

▫ Boitumelo jwa boammaaruri bo ikaegile ka eng?

Boitumelo jwa boammaaruri bo ikaegile ka kamano ya rona e e botlhokwa thata le Jehofa, go amogelwa ke ene, le go segofadiwa ke ene. (Diane 10:22) Ka gone, motho a ka se ka a bona boitumelo jwa boammaaruri fa a sa reetse Jehofa le fa a sa ineele ka boitumelo go dira go rata ga gagwe. (Luke 11:28)—5/15, ditsebe 16, 19.

▫ Fa Jesu a ne a dira dikgakgamatso tsa gagwe tsa go fodisa, a motho yo a neng a mo fodisa o ne a tlhoka go nna le tumelo?

Batho ba bantsi ba ne ba tlhoka go nna le tumelo gore ba kgone go tla kwa go Jesu gore a ba fodise. (Mathaio 8:13) Lefa go ntse jalo, ba ne ba sa tlhoke gore ba ipolele mo go Jesu gore ba na le tumelo gore a tle a kgone go dira dikgakgamatso tsa gagwe, jaaka fa a ne a fodisa monna yo o neng a tshwerwe ke seemera yo a neng a sa itse le gore Jesu e ne e le mang. (Yohane 5:5-13) Jesu o ne a fodisa le tsebe e e neng e kgaotswe ya motlhanka wa moperesiti yo mogolo, yoo a neng a le mo setlhopheng sa baba ba ga Jesu. (Luke 22:50, 51) Dikgakgamatso tseno di ne tsa dirwa ka maatla a moya wa Modimo o o boitshepo, eseng ka ntlha ya tumelo ya motho yo o lwalang.—6/1, tsebe 3.

▫ Ke eng se se emelwang ke “lotloa” loo go buiwang ka lone mo setshwantshong sa ga Jesu se se mo go Mathaio 13:47-50?

“Lotloa” lo emela sedirisiwa sa mo lefatsheng seo se ipitsang phuthego ya Modimo seo se phuthang “ditlhapi.” Se ile sa akaretsa Labokeresete mmogo le phuthego ya Bakeresete ba ba tloditsweng, mme bano ba ba umakiwang morago ba ile ba phutha ‘ditlhapi tse di monate,’ ba kaelwa ke baengele go dumalana le Mathaio 13:49.—6/15, tsebe 20.

▫ Ke melaometheo efe eo baatlhodi ba kwa Iseraele ba neng ba tshwanela go e dirisa fa ba dira ditiro tsa bone?

Ba ne ba tshwanetse go direla bahumi le bahumanegi tshiamo ka go tshwana, ba se ka ba ya ka gore motho ke mang, ebile ba se ka ba amogela pipamolomo. (Lefitiko 19:15; Duteronome 16:19)—7/1, tsebe 13.

▫ Ke eng seo bagolwane ba tshwanetseng go leka go se fitlhelela ka dikokoano tsa katlholelo?

Boikaelelo jo bongwe ke go itse dintlha kaga kgetsi, ba dira jalo ka lorato. Fa tseno di itsiwe, bagolwane ba tshwanetse go dira sepe fela se se tlhokegang go sireletsa phuthego le go boloka melao e e kwa godimo ya ga Jehofa le moya wa ga Modimo o tsamaya ka tshosologo. Kokoano eno gape ke go leka go boloka moleofi yo o mo kotsing yono fa go kgonega. (Bapisa Luke 15:8-10.)—7/1, ditsebe 18-19.

▫ Ke ka ntlha yang fa go ijesa dijo tsa ditoro ka go tlhakanela dikobo o sa tshwanela go le kotsi jaana?

Go ya ka mafoko a ga Jesu mo go Mathaio 5:27, 28, botlhe bao ba ganelelang mo go ijeseng dijo tsa ditoro ka go tlhakanela dikobo ba sa tshwanela ba na le molato wa go akafala mo dipelong tsa bone. Gape go na le kotsi ya mmatota ya gore go ijesa dijo tsa ditoro ka tsela eo go ka dira motho gore a wele mo boitsholong jo bo maswe.—7/15, tsebe 15.

▫ Ke ka ditsela dife Jehofa a ka re thusang go leba diteko sentle mme ka jalo ra di itshokela?

Re ka thusiwa ke fa badumedi ba bangwe ba re gakolola Dikwalo kana fa re ntse re ithuta Bibela. Ditiragalo tseo di kaelwang ke Modimo di ka kgona go re thusa go bona seo re ka se etsang. Baengele ba ka re kaela, kana re ka kaelwa ka moya o o boitshepo. (Bahebera 1:14)—7/15, tsebe 21.

▫ A Lekgotla la Nicaea le ne la tlhoma kana la dumelela thuto ya Tharonngwe ka 325 C.E.?

Nnyaa, Lekgotla la Nicaea le ne la bolela fela gore Morwa le Rara ‘ba bangwe fela.’ Ntlha ya gore sengwe le sengwe sa tseno eleng Rara, Morwa, le moya o o boitshepo ke Modimo wa boammaaruri—boraro mo Modimong o le mongwe fela—e ne ya se ka ya tlhamiwa ke lekgotla leo kana ke ope fela wa Borara ba Kereke.—8/1, tsebe 20.

▫ A Jobe e ne e le ene motho fela yoo a neng a ikanyega mo go Jehofa mo metlheng e a neng a tshela mo go yone? (Yobe 1:8)

Nnyaa, buka ya Yobe ka boyone e supa gore Modimo o ne o amogela Elihu. Gape, ka nako ya fa Jobe a tshela, go ne go na le Baiseraele ba bantsi ba ba neng ba nna kwa Egepeto, mme ka gone ga go na lebaka la go akanya gore botlhe ba ne ba sa ikanyege le gore Modimo o ne o sa ba amogele.—8/1, tsebe 31.