Go Bontsha Kafa O Ikanyang Jehofa ka Gone ka go Bula Tsela
1 Gore re beye dikgatlhego tsa Bogosi kwa pele go batlega gore re ikanye Jehofa. (Pes. 56:11; Dia. 3:5; Math. 6:33) Re tshwanelwa ke gore re tlose mogopolo wa rona mo go seo lefatshe le se tsayang jaaka sa botlhokwa mme re tlhome megopolo mo dilong tsa botlhokwa tsa semoya. Le mororo lefatshe le ikuela mo go eletseng ga rona dilo tse di bonalang, Jehofa o re kopa gore re kgotsofalele dilo tseo e leng tsa botlhokwa eleruri.—1 Tim. 6:8; Bafil. 1:10.
2 Seno ke kgwetlho segolo-bogolo mo basheng ba Bakeresete bao ba batlang go tsaya ditaelo tsa ga Jehofa ka masisi. Ba ka nna ba gatelelwa ke barutabana ba bone le ke dithaka tsa bone kwa sekolong bao ba tsayang thutego e e kwa godimo jaaka selo se se botlhokwa gore o bone katlego mo botshelong. Le mororo basha ba Bakeresete ba itse gore go na le dilo tse di bonalang tseo ba di tlhokang, bontsi jwa bone ba ganana le kgatelelo e e ntseng jalo mme ba ikgethela bodihedi jwa nako e e tletseng jaaka tiro ya bone ya botshelo jotlhe. E re ka ba ikanya ditsholofetso tsa ga Jehofa, ba lebelela kwa go ene gore a ba fe dilo tse ba di tlhokang.—Pes. 62:2; 68:19; 1 Tim. 5:8; 6:9,10.
TLHATLHOBA MAEMO A GAGO KA NAMANA
3 Tora ya Tebelo ya June 1,1983, e ne ya kgothaletsa mongwe le mongwe wa rona gore a ipotse jaana: “A tota nka neela Jehofa lebaka le le utlwalang la gore ke ka ntlhayang fa ke se mmulatsela?” Kafa go bonalang ka gone, ba le bantsi ba ne ba ise ba nne mo boemong jwa go ka bula tsela ka nako eo. Mme le fa go ntse jalo, ba ile ba se ka ba kgobega marapo, e re ka ba ne ba itse gore Jehofa o amogela selekanyo lefa e ka nna se se kana kang sa tirelo e e dirwang ka pelo yotlhe. (Mika 6:8; 2 Bakor. 8:12) Morago ga moo, fa maemo a bone ka namana a ne a fetoga, e ne ya re fa bangwe ba ne ba akanya ka setlhogo seo sa Tora ya Tebelo ya 1983 ka masisi seo sa ba kgonisa gore ba nne gare ga diketekete tsa batho bao ba ileng ba tsaya tirelo ya bobulatsela jwa ka metlha bosheng jaana.
4 Fa e le gore o ne o thibelwa ke maemo a botho go ka tsenela tirelo ya bobulatsela ka nako ya fa go ne go gatisiwa polelo e e fa godimo ka 1983, a maemo a gago a fetogile jaanong? Mo Afrika Borwa, dikopo tsa bobulatsela di feta 550 di ile tsa arabiwa ngogola! Kwantle ga pelaelo bontsi jwa badirakopo bano ba ne ba ile ba batla go nna babulatsela pelenyana ga moo mme ba ne ba tshwanelwa ke gore ba lete go fitlhela maemo a bone a fetoga.
5 Mo makgetlong mangwe, phetogo ya botlhokwa e ka nna ya amana le tsela e motho a lebang tirelo ya bobulatsela ka yone mo mogopolong wa gagwe. Kana gongwe e ka nna ya akareletsa fela gore o dire thulaganyo e e molemo ya tirelo. Ka dinako tse dingwe go tlhokafala gore o dire phetogo mo maikarabelong a gago ka namana gore o ke o bulele tirelo ya bobulatsela phatlha. Ka gone, go molemo gore re rapele Jehofa ka seno ka metlha le gore re itlhatlhobe ka namana mmogo le maemo a rona. Ba le bantsi ba ile ba dira jalo mme jaanong ba ipelela masego a tirelo ya bobulatsela.
6 Fa e ka re o sena go tlhatlhoba maemo a gago ka botlalo o bo o bona gore o ka nna mongwe wa bao ba ka simololang go bula tsela mo bogautshwaneng, ke ka ntlhayang fa o sa simolole tirelo ya bobulatsela jo bo thusang ka metlha gone jaanong? Mo dikgweding di se kae, go ka diragala gore o bo o na le maeto a go boela mmogo le dithuto tsa Bibela. Seno se ka go thusa gore o tsene mo tirelong ya bobulatsela jwa ka metlha bonolo fela, gongwe pele ga ngwaga e ntšha ya tirelo e simologa.
7 Jehofa o dira dilo tse dikgolo mo metlheng eno ya bofelo ya tsamaiso eno e e boikepo. Jaanong ke nako ya gore rotlhe re mo atamele le gore re bake leina la gagwe “malatsi otlhe.” (Pes. 145:2; Yak. 4:8) Fa maemo a gago a go letla gore o dire jalo mme o tshwanelega, dira gore tirelo ya bobulatsela e nne bosupi jo bongwe jwa kafa o ikanyang Jehofa ka gone.—Pes. 94:18.