Lebokoso la Dipotso

◼ Ke eng se re tshwanetseng go se gakologelwa fa re kwalela beng ba matlo ba re sa kgonang go ba fitlhela kwa gae makwalo?

Ka ntlha ya mabaka a a farologaneng, re fitlhela go le thata go fitlhela batho kwa matlong a bone fa re ba etela. Baboledi bangwe ba fitlhetse gore go kwala makwalo ke tsela e nngwe e e thusang ya go ba fitlhelela. Lefa seno se ka nna le matswela a a molemo, go tlhokega gore re tlhatlhobe dikgakololo dingwe tse di ka re thusang go tila mathata mangwe:

O se ka wa dirisa aterese ya Mokgatlho. Seno se bontsha ka mo go sa tshwanelang gore lekwalo leo le tswa kwa diofising tsa rona, se baka mathata a a sa tlhokegeng e bile ka dinako tse dingwe se bake ditshenyegelo tse dintsi.

Tlhomamisa gore o kwadile aterese e e siameng le gore o tsentse setempe sa madi a a lekaneng.

O se ka wa kwala gore le ya kwa go “Moagi”; dirisa leina la motho yoo ka tlhamalalo.

O se ke wa tlogela makwalo fa mojako fa go sena ope mo tlung.

Go molemo go kwala makwalo a makhutshwane. Tsenya pampitshana kana makasine go na le go leka go kwala molaetsa o mo teleletelele.

Makwalo a a kwadilweng ka motšhini a balega motlhofo mme a kgatlhegelwa thata.

Makwalo ga a balwe e le maeto a go boela ntle le fa o kile wa neela motho yono bosupi mo nakong e e fetileng.

Fa o kwalela motho yo o kileng a bontsha kgatlhego, o tshwanetse go mo naya aterese kana nomoro ya gago ya founo gore a kgone go ikgolaganya le wena. Tlhalosa thulaganyo ya rona ya go ithuta Baebele.

Mo laletse kwa dipokanong tsa phuthego ya lona. Mo neye aterese le dinako tsa dipokano.

Fa o setse o sa tlhole o dira tshimo eo, o se ka wa tlhola o kwalela batho ba o sa ba fitlhelang mo gae makwalo; mmoledi yo o dirang tshimo eo ka nako eo ke ene yo o ikarabelelang go e bereka.