Thusa ba Bangwe go Solegelwa Molemo ke Thekololo

Segopotso sa Loso Lwa ga Keresete se se Tla Ketekwang ka April 12

1. Tsela nngwe e batho ba Modimo ba bontshang ka yone gore ba anaanela thekololo ke efe?

¹ “A re lebogeng Modimo ka ntlha ya mpho ya gagwe ya mahala e e ka se kang ya tlhalosiwa.” (2 Bakor. 9:15) Mafoko ano a tlhalosa sentle kafa re ikutlwang ka gone ka molemo le bopelonomi jwa lorato jo Modimo a bo bontshang batho ba gagwe ka Morwawe, e bong Jesu Keresete. Re tla bontsha sentle gore re leboga Modimo jalo fa re kokoane mmogo ka April 12 go keteka Segopotso sa loso lwa ga Keresete.

2. Ke bomang ba ba kopanelang le batlhanka ba ga Jehofa kwa Segopotsong, mme ba tshwanetse go dira eng gore ba solegelwe molemo ke thekololo?

² Batho bangwe ba ba ka nnang dimilione di le lesome ba kopanela le batlhanka ba ga Jehofa mo Segopotsong ngwaga le ngwaga. Ka go dira jalo, ba bontsha gore ba anaanela setlhabelo sa ga Keresete. Le fa go ntse jalo, gore ba solegelwe molemo ke thekololo, ba tshwanetse go dumela mo go yone. (Joh. 3:16, 36) Re ka ba thusa jang gore ba nne le tumelo eo? Ka paka eno ya Segopotso, re ka ba kgothaletsa go nna le thuto ya Baebele le go nna gone kwa dipokanong tsa phuthego beke le beke. Akanya ka dikakantsho tse di latelang.

3. Re ka simolola jang thuto ya Baebele le batho ba re ba laletsang go tla Segopotsong?

³ Dithuto Tsa Baebele: Fa o laletsa batho ba ba kgatlhegang gore ba tle Segopotsong, ke eng fa o sa leke go simolola thuto ya Baebele le bone ka buka ya Baebele e Ruta Eng? Leka go tlhalosetsa motho yoo ka Segopotso ka go bula tsebe 206-8 mme o tlotle le ene ka setlhogo se se reng “Sejo sa Morena sa Maitseboa—Tiragalo e e Ketekwang go Tlotla Modimo.” O ka nna wa kgona go tlotla ka tshedimosetso eo mo loetong lo le longwe kgotsa a mabedi, gongwe o tshwere thuto ya Baebele o le fa kgorong. Fa o feditse go tlotla le ene ka setlhogo seo, a ka nna a rata gore go tlotlwe le ene ka kgaolo 5, “Thekololo—Mpho ya Modimo e e Botlhokwatlhokwa.” Fa o setse o simolotse thuto ya Baebele le ene, tlotlang ka dikgaolo tse nnè tse di simololang tsa buka.

4. Re ka simolola thuto ya Baebele le bomang mo pakeng eno ya Segopotso?

⁴ Re ka simolola thuto ya Baebele le bomang re dirisa mokgwa ono? Gongwe batho bangwe ba o berekang le bone, ba o tsenang sekolo le bone kgotsa baagelani ba gago ba ka dumela gore o tlotle le bone. Bakaulengwe ba ka nna ba buisana le banna ba ba sa dumeleng ba bokgaitsadi ba ba mo phuthegong. Mme o se ka wa lebala le ba losika lwa gago ba e seng Basupi. Mo godimo ga moo, re batla go leka ka natla go laletsa botlhe ba ba kileng ba kopanela le phuthego gore ba nne teng kwa Segopotsong. (Luke 15:3-7) E kete re ka leka go thusa batho botlhe bano go solegelwa molemo ke thekololo.

5. Re ka kgothatsa diithuti tsa Baebele le batho ba bangwe ba ba kgatlhegang jang gore ba nne gone kwa dipokanong tsa phuthego tsa beke le beke?

⁵ Dipokano Tsa Phuthego: Segopotso ke pokano ya ntlha e diithuti tsa Baebele di le dintsi le batho ba bangwe ba ba kgatlhegang ba yang kwa go yone. Le fa go ntse jalo, re ka ba kgothatsa jang go solegelwa molemo ke dipokano tse dingwe tsa rona tsa phuthego? Tirelo ya Rona ya Bogosi ya April 2005, tsebe 8, e ne ya akantsha jaana: “Mmolelele setlhogo sa puo ya phatlalatsa. Mmontshe dintlha tse go tla bong go tlotlwa ka tsone kwa Thutong ya Tora ya Tebelo le kwa Thutong ya Buka ya Phuthego. Mo tlhalosetse ka Sekolo sa Bodiredi sa Puso ya Modimo le ka Pokano ya Tirelo. Fa o na le kabelo kwa sekolong, gongwe o ka nna wa tlotla le ene ka yone. Tlotla le ene ka dintlha dingwe tse di kgatlhang tse go neng go tlotlwa ka tsone kwa dipokanong. Dirisa ditshwantsho tse di mo dikgatisong tsa rona go mo thusa go bona se se diregang mo go tsone. Lekgetlho la ntlha fela fa o simolola go ithuta le ene, mo laletse gore a tle dipokanong.”

6. Re ka thusa batho ba ba peloephepa ka ditsela dife tse pedi gore ba solegelwe molemo ke thekololo?

⁶ Fa batho ba ba peloephepa ba tshwarelwa thuto ya Baebele ka metlha e bile ba nna gone kwa dipokanong tsa phuthego ka metlha, gantsi ba gatela pele semoyeng ka bonako. Ka jalo, e kete re ka kgothatsa ba bangwe go solegelwa molemo ke dithulaganyo tsa semoya le mpho e kgolo ya Modimo—e bong thekololo.