Taimi-Tēpile ki he Fakataha Ngāué
FAKATOKANGA: ʻE fakataimi-tēpileʻi ʻi he ʻEtau Ngāue Fakafaifekau ʻo e Puleʻanga ha Fakataha Ngāue ki he uike taki taha he lolotonga ʻo e ngaahi māhina siʻi ka hoko maí tuku kehe ha uike ke ʻatā ki hono maʻu ʻa e Fakataha-Lahi Fakavahe “Kau Fai ki he Folofola ʻa e ʻOtuá.” ʻI he uike ʻe ua ki he fā ka hoko mai hili ʻa e fakataha-lahí, ko ha fakamanatu miniti ʻe 30 ʻo e ngaahi meʻa mahuʻinga ʻo e polokalamá ʻe fakataimitēpileʻi atu ia ʻi he Fakataha Ngāué. Ke fai ʻení ʻe fai nai ʻe he ngaahi fakatahaʻangá ha ngaahi feʻunuʻaki ʻoku fiemaʻu. ʻI he taimi ko iá, ʻe teuteu ʻa e tokotaha taki taha ke pole ke ne fai ha fakamatala nounou ʻi he taimi ʻoku fai mai ai ʻa e fakaafe ke fai peheé ʻe he fanga tokoua taau ʻe toko tolu kuo vaheʻi ke nau fai ʻa e konga ko ʻení. Ko e ngaahi fakamatala peheé ʻe fakahaaʻi nai ai ʻa e founga ʻo hono ngāueʻaki ʻa e meʻa naʻe ako ʻi he fakataha-lahí ʻi heʻete moʻuí tonu pea ʻi heʻete ngāue fakamalangá. ʻE lave nai ai ki ha taha pe ua ʻo ha meʻa naʻe hokosia nounou kuo ʻosi fili. Ko e kī ki hono ʻai ʻa e konga ko ʻeni ʻo e Fakataha Ngāué ke fakatou mahuʻinga mo fakatupu-ʻiló, ko e teuteu lelei ʻa e tokotaha kotoa pē.
Uike Kamata Siulai 10
Hiva 27
12 min: Ngaahi fanongonongo fakalotofonua. Fanongonongo kuo filifili mei he ʻEtau Ngāue Fakafaifekau ʻo e Puleʻanga. Fakamatala ki he līpooti ngāue fakamalanga ʻo ʻEpelelí ki he fonuá pea mo e fakatahaʻanga fakalotofonuá. Fakahanga ʻa e tokangá ki he puha “Sio ki he Peesi Fakamuimuí,” pea fakahāhaaʻi ha taha ʻo e ngaahi tuʻuaki kuo fokotuʻu mai aí ʻa ia ʻe ola lelei ʻi he feituʻu fakalotofonuá.
15 min: “ʻE ʻIkai Te Ma Faʻa Tuku ʻEma Lea.” Fakangatangata ʻa e fakamatala talateú ke siʻi hifo ʻi he miniti ʻe tahá, pea hoko atu ʻaki ha fetalanoaʻaki ʻi he fehuʻi mo e tali. Fakamamafaʻi ʻa e ngaahi ʻuhinga ʻoku tau mātuʻaki fai fakamātoato ai ʻetau vāhenga-ngāue fakamalangá. Fakakau atu mo e ngaahi poini ʻoku kau ki ai mei he Taua Leʻo ʻo Fepueli 1, 1997, peesi 16-17.
18 min: “Ke Fai Kotoa Pe ke Ai ha Langa Hake.” Fetalanoaʻaki ʻa e ongo mātuʻa ʻe toko ua ʻi he kupú. Lau ʻa e palakalafi taki taha pea mo e ngaahi konga Tohitapu ʻoku hiki maí. Fakaeʻa ʻa e ngaahi tefitoʻi moʻoni ʻoku kau ki aí. ʻOkú na fakamamafaʻi ʻa e fiemaʻu ke ʻiloʻilo ʻi he taimi ʻoku fai ai ha ngaahi meʻa fakapisinisí pe ko hono fai ha ngaahi ʻinivesí. Fakamanatu ʻa e akonaki ʻi he Taua Leʻo ʻo ʻEpeleli 1, 1997, peesi 18-19, 22.
Hiva 222 mo e lotu tuku.
Uike Kamata Siulai 17
Hiva 14
10 min: Ngaahi fanongonongo fakalotofonua. Fakamatala paʻangá.
15 min: Fakaongoongoleleiʻi Kitautolu ʻi he Tuʻunga ko e Kau Faifekau ʻa e ʻOtuá. Fetalanoaʻaki ʻa ha sevāniti fakafaifekau ʻe toko ua ʻi he akonaki Fakatohitapu naʻe ʻomai ʻi he Taua Leʻo ʻo Tīsema 15, 1998, peesi 19-20. ʻOkú na mahinoʻi ʻa e fiemaʻu ke na hoko ʻo taau ʻi ha founga lelei ko e ongo sevāniti fakafaifekau pea fakamanatu ʻa e meʻa te na malava fakafoʻituitui ke fai ke fakahaaʻi ai ʻokú na fakahoko ʻena ngaahi ngāué. ʻOkú na sio ki he mahuʻinga ʻo e hoko ko e ongo faʻifaʻitakiʻanga lelei ʻi he ngāue fakamalangá pea fetalanoaʻaki ki he ngaahi founga te na malava ai ke tokoni ki he kau mātuʻá ʻi hono fai ha tokoni fakafoʻituitui ki he niʻihi kehé. ʻOkú na loto-tatau ʻokú na fiemaʻu ke fai ʻa e meʻa kotoa pē te na malavá ke tokoniʻi ai ʻa e fakatahaʻangá ke nau mahinoʻi ʻa e fakavavevave ʻo e taimí mo e tupú pea mo e lakalakaimonū fakalaumālié.
20 min: Ko Hai ʻOku Totonu ke Hoko ko Ho Tokotaha Faʻifaʻitakiʻangá? Ko ha tamai ʻokú ne fai haʻane ako fakafāmili mo ha fānau taʻu hongofulu tupu ʻe toko taha pe toko ua. Kuó ne fakatokangaʻi ki muí ni mai ko ʻena ngaahi fetalanoaʻakí naʻe faʻa fakatuʻunga pē ia ʻi he kau tangata helo ʻi he sipotí, kau sitā faivá, kau tuʻu-ki-muʻa he TV, mo e kau faʻu mūsiká. ʻOkú ne fakahāhā ʻa e hohaʻa koeʻuhi he ko e faʻahinga manako ko ʻení ko hano fakahaaʻi ia ʻo e laumālie ʻo e māmaní. ʻOku nau fetalanoaʻaki ʻi he Awake! ʻo Mē 22, 1998, peesi 12-14. ʻOku ʻiloʻi ʻe he toʻutupú ʻoku ʻi ai ʻa e fakatuʻutāmaki ʻo hono ʻaitoliʻaki ʻo e faʻahinga fakaemāmaní pea nau loto-tatau ko e tuʻu-ki-muʻa fakamāmaní ʻoku ʻikai haʻane ʻaonga ki he kau Kalisitiané. ʻOku nau lāulea ki he ngaahi ʻaonga ʻo e vakai ki he ngaahi mātuʻá, kau mātuʻá, faʻahinga alafaʻifaʻitakiʻanga kehe ʻi he fakatahaʻangá—pea tautautefito kia Sīsū Kalaisi—ʻi hono tuʻunga ko honau tokotaha faʻifaʻitakiʻangá.
Hiva 51 mo e lotu tuku.
Uike Kamata Siulai 24
Hiva 212
5 min: Ngaahi fanongonongo fakalotofonua. Fakamanatu ki he tokotaha kotoa pē ke ʻomai ʻenau ngaahi līpooti ngāue fakamalanga ki Siulaí ki muʻa ke nau ʻalu ki he fakataha-lahi fakavahé.
8 min: “Polokalama ʻAsemipilī Fakafeituʻu Foʻou.” Fehuʻi mo e tali. Fanongonongo ʻa e ʻaho ʻo e ʻasemipilī fakafeituʻu hono hokó, pea fakaʻaiʻai ʻa e tokotaha kotoa pē ke ne kau ki he ongo ʻahó fakatouʻosi. Fakalototoʻaʻi ʻa e tokotaha kotoa pē ke nau fai ha feinga makehe ke fakaafeʻi ʻa e kau ako Tohitapú. Ko hono maʻu ʻa e ʻasemipilií te ne fakavaveʻi nai ai ʻenau holi ke feohi maʻu pē mo e fakatahaʻangá.
16 min: “Tokanga ki he Ngaahi Foʻi Folofola Toputapú.” Fehuʻi mo e tali. Fakamamafaʻi ʻa e ngaahi ʻuhinga ki he ʻuhinga ʻoku totonu ai kiate kitautolu kotoa ke tau ʻi hotau ngaahi nofoʻangá ʻi he kamata ʻo e konga taki taha. Fakaʻaiʻai ʻa e tokotaha kotoa pē ke nau vaheʻi ha ngaahi miniti siʻi ke nau sio ai ki he polokalama kuo ʻosi pulusí ki muʻa ʻi he kamata ʻo e konga pongipongi mo e efiafi taki taha pea fakakaukau ki muʻa ki he meʻa ʻe fai nai ʻa e lāulea ki aí. ʻE ʻai ai heni ke faingofua ange ke fakahanga ʻa e tokangá ki he polokalamá pea hiki ha ngaahi nouti nounou kae mohu ʻuhinga.
16 min: “Tauhi Maʻu ʻa e ʻUlungaanga Lelei ʻOkú Ne Fakalāngilangiʻi ʻa e ʻOtuá.” Ko ha tokotaha mātuʻa ʻokú ne lāulea ki he kupú mo ha kulupu ʻo ha fāmili. ʻOku nau fakamanatu ʻa e meʻa ʻoku nau fiemaʻu ke fai ke tauhi maʻu ai ʻa e maau, ngaahi tōʻonga lelei, maʻa, mo e fōtunga pea mo e ʻulungaanga alafaʻifaʻitakiʻanga ʻi he ngaahi feituʻu kakaí.
Hiva 98 mo e lotu tuku.
Uike Kamata Siulai 31
ʻE ʻikai ke fai ha Fakataha Ngāue ʻi he uike ko ʻení koeʻuhí he ko e ngaahi fakatahaʻangá te nau kau ki he Fakataha-Lahi Fakavahe “Kau Fai ki he Folofola ʻa e ʻOtuá.”
Uike Kamata ʻAokosi 7
Hiva 212
10 min: Ngaahi fanongonongo fakalotofonua.
17 min: “Ko ha Tokotaha Mā Koe?” Fehuʻi mo e tali. Lave ki ha meʻa fakalototoʻa naʻe hokosia mei he 1997 Yearbook, peesi 43-44.
18 min: “ʻOkú Ke Houngaʻia ʻi he Faʻa Kātaki ʻa Sihová?” Fehuʻi mo e tali. Fakakau atu ki ai mo e ngaahi fakamatala fekauʻaki mo e kātaki fuoloa ʻa Sihová.—Sio ki he Insight, Voliume 2, peesi 263-264.
Hiva 163 mo e lotu tuku.