Ngaahi Fehuʻi mei he Kau Lautohí

ʻOku totonu ke fēfē ʻa e vakai ʻa e Kalisitiané ki he toutaí mo e tulimanú?

ʻOku ʻikai fakahalaiaʻi ʻe he Tohi Tapú ʻa e tulimanú pe toutaí. (Teutalonome 14:​4, 5, 9, 20; Mātiu 17:​27; Sione 21:6) Neongo ia, ko e kau Kalisitiane ʻoku tulimanú pe toutaí ʻoku fiemaʻu ke nau fakakaukau ki ha ngaahi tefitoʻi moʻoni Fakatohitapu.

Naʻe fakangofua ʻe he ʻOtuá ʻa Noa mo hono hakó ke tāmateʻi mo kai ʻa e fanga manu totoló, kae pau ke fakatafe ʻa e totó ki muʻa pea toki kai. (Senesi 9:​3, 4) Ko e fekau ko ʻení ʻoku fakamamafaʻi ai ʻa e totonu ke ʻapasia ki he moʻui ʻa e fanga manu totoló he ko e fakatupu ʻe he ʻOtuá. Ko ia, ʻoku ʻikai ke tāmateʻi ʻe he kau Kalisitiané ʻa e fanga manu totoló ko ha sipoti pe vaʻinga ʻo ʻai noaʻia ʻa e moʻuí.—Palovepi 12:10.

ʻOku ʻi ai mo e meʻa ke tānaki atu ki heʻetau fakakaukaú. Ko e kau ʻapositoló ko e kau toutai pea ʻoku pau pē naʻa nau hōhōʻia ʻi hano maʻu lahi e iká. Ka, ʻoku ʻikai ke hā naʻa nau futaʻaki ʻenau malava ʻi he toutaí pe tulimanú pe ko ʻenau ʻalu ʻo toutai pe tulimanu ke feʻauhi mo ha niʻihi, ke fie tangata ʻaki, pe ko e ʻai pē ke maʻu ai ʻa e fiefiá, ʻi hono tuli pe ko hono tāmateʻi ʻo e manu totoló.—Sāme 11:5; Kaletia 5:26.

Ko ia, te tau ʻeke nai kia kitautolu: ‘Ko e faʻifaʻitakiʻanga au ʻi hono fakahā ʻa e ʻapasia ki he vakai ʻa Sihova ki he moʻuí? ʻOku hanga ʻe he tulimanú pe toutaí ʻo puleʻi ʻeku fakakaukaú mo ʻeku talanoá? ʻOku hā ʻi heʻeku founga moʻuí ʻa e mālieʻia pē ʻi he tulimanú pe ʻoku fakahā ai au ko e faifekau ʻa e ʻOtuá? ʻOku ʻai au ʻe he tulimanú pe toutaí ke u feohi vāofi ai mo e kau taʻetuí pe fakatupunga ai ke u liʻekina hoku fāmilí?’—Luke 6:45.

Ko e faʻahinga ʻoku tulimanu pe toutai ke maʻu ha meʻakaí ʻoku nau ongoʻi fiemālie pē ke toloi atu ʻa e ngaahi meʻa fakalaumālié ʻi he faʻahitaʻu tulimanú mo e toutaí. Ka neongo ia, ʻoku tau fakahā ʻa e tui mo e falala ki he ʻOtuá ʻi he ʻikai te tau toe fakamuʻomuʻa ha meʻa ʻi heʻene ngaahi meʻa mahuʻingá. (Mātiu 6:33) ʻIkai ko ia pē, ko e Kalisitiané ʻoku talangofua ki he lao kotoa ʻa “Sisa” ki he tulimanú mo e toutaí, tatau ai pē pe ʻoku fakamālohiʻi ia ʻe he kau maʻu mafaí pe ʻikai.—Mātiu 22:21; Loma 13:1.

Ke muimui ki he anga ʻo e vakai ʻa Sihova ki he tulimanú mo e toutaí, ʻe fiemaʻu ki ha niʻihi ke fakatonutonu ʻenau fakakaukau ʻo fekauʻaki mo ʻene ngaahi tuʻungá. (Efeso 4:​22-24) ʻI he tafaʻaki ʻe tahá, ʻoku fiemaʻu ke tau tokaʻi ʻa e fili ʻosi fakapapauʻi ʻa e niʻihi. ʻOku feʻunga ʻa e meʻá ni mo e akonaki ʻa e ʻapositolo ko Paulá: “Koia ke oua naa tau kei fefakamāuaki akitautolu: kae fakamāu muʻa eni, koeuhi ke oua naa ai e ha taha ha tūkiaaga be ha mea ke fakahiga aki a hono tokoua.” (Loma 14:​13, PM) Ko hono fakahā ʻa e ʻofa taʻesiokita mo e tokaʻi peheé ʻoku ʻai ai ke ʻi ai ʻa e melino ʻi he fakatahaʻangá pea hōifua ai hotau Tokotaha-Ngaohí, ko e Tupuʻanga ʻo e moʻui kotoa.​—1 Kolinito 8:13.a

[Fakamatala ʻi lalo]