Mo Mungapharazgiya Mwakugwiriskiya Nchitu Kathebulu Pamwenga Kashelufu

Viwoneka kuti kupharazga mwakugwiriskiya nchitu kathebulu pamwenga kashelufu kutovya kuti ŵanthu anandi a mtima wamampha asambiri uneneska. (Yoh. 6:44) Mwaviyo, ŵara achiskika kuti ajalikiski nthowa yakupharazgiya m’malu ngo musanirika ŵanthu anandi m’chigaŵa cha mpingu wawu. Kanandi paŵavi chifukwa chakupemphe kwa arara a boma chifukwa timathebulu ndi timashelufu teniti nthakwenda natu. Kumbi mbayani wo mbakwenere kugwiriskiya nchitu nthowa iyi? Mbapharazgi wosi wo achita vinthu mwazeru, mwaulemu ndipuso aziŵa kukambiskana umampha ndi ŵanthu. Tiyeni tiwoni vo apharazgi angachita ndipuso vo atenere cha kuchita.

Vo Mukhumbika Kuchita:

Muchitengi vinthu mwaubwezi ndipuso muŵawovyengi ŵanthu wo atuza pakathebulu. Apharazgi anyaki amwemwete ndipu atiŵatawuzga mwaulemu ŵanthu wo atuza pafupi ndi timathebulu. Asani munthu walereska ukongwa pakathebulu wachijumpha, mungamukambiya kuti, “Mungatopu cho mungayanja.”
Mungamanga pafupi pamwenga patali ukongwa cha ndi kathebulu. M’vigaŵa vinyaki, apharazgi awona kuti vija umampha asani ama pafupi ndi kathebulu pamwenga kashelufu. Kweni m’vigaŵa vinyaki apharazgi atuma pataliku chifukwa ŵanthu achita soni kuti ami. Kweni apharazgi andere kufupi asani paza munthu. Asani munthu waza pakathebulu, mungamufumba kuti, “Kumbi mukujifumbapu fumbu lenili?”
Mugwiriskiyengi nchitu Bayibolo asani nkwamachitika.
Asani munthu wato buku lo tigwiriskiya nchitu pakusambira ndi ŵanthu nge lakuti, Bayibolo Lisambizanji? mungamukonkhoske mo tisambiriya Bayibolo ndi ŵanthu. Mungamulongo so kavidiyo kakuti, Nchifukwa Wuli Tikhumbika Kusambira Bayibolo?
Asani munthu wakhumba kuziŵa vinandi, mufumbeni ko waja. Asani waja muchigaŵa cha mpingu winu cha, mungalemba fomu ya Kaonaneni ndi Wachidwi Uyu (S-43) ndi kuchiyipereka kwa mlembi wa mpingu winu mwaliŵi.

Vo Mukhumbika Cha Kuchita:

Mutenere cha kuchita vinthu mwaukali, kuchichizga ŵanthu pamwenga kuma pafupi ukongwa ndi kathebulu nge kuti ndimwi alonda.
Mutenere cha kuwona kuti kugwiriskiya nchitu kathebulu pamwenga kashelufu ndi nthowa yakugaŵiya ŵaka mabuku. Asani te mu uteŵeti, tija ndi chilatu chakuti tiyambisi masambiru nga Bayibolo. Titenere so kuchita venivi asani tigwiriskiya nchitu timathebulu.
Mungajalizganga kathebulu cha pamwenga kusuŵiliya ŵaka kucheza ndi mupharazgi munyinu. Asani mupenja kumba pamwenga kumuka foni, mungachita umampha kundere patali ndi kathebulu pamwenga kashelufu.
Mutenere cha kulimbana ndi ŵanthu akususka. Asani munthu wakususka wayamba kuŵereŵeta mwaukali, mungachita umapha kutuwapu ndi kuluta pamalu nganyaki.