Amukambauke Makani Mabotu Koonse-Koonse
1 Banakristo bakusaanguna bakakambauka makani mabotu koonse-koonse. Bakasungwaala cakuti mumyaka iili buyo 30 kuzwa naakabusyigwa Jesu Kristo, makani aa Bwami “akakambaukilwa bantu boonse baansi ano.”—Kol. 1:23.
2 Babelesi ba Jehova basungu sunu balaa makanze ngoona ayo—aakusisya makani mabotu aa Bwami kumuntu woonse uukonzyeka. Ncinzi cinga catugwasya kuzuzikizya makanze aayo? Bayaabuvwula bantu ibabeleka milimo yaciindi coonse eelyo tabajaniki mumaanda ciindi notuswaya. Ciindi nobatabeleki, ambweni bali mukweenda, mukuula-ula kumantoolo, naa kuyoosobana munzila imwi. Mbuti aabo beelede akati kabo mbobasisyilwa mulumbe wa Bwami?—Mt. 10:11.
3 Bamwi balasikilwa kumasena nkobabelekela. Naaba madolopo masyoonto inga ajisi busena bumwi bwamakwebo kwalo bantu banji nkobabede kwacibeela cipati cabuzuba. Mumadolopo mapati, bantu babeleka mumafekitali, mumaopesi aamujulu alimwi abaabo bakkala mumaanda aamidadaada aakwabilidwe balacitilwa bukamboni—bunji bwabo nceciindi cakusaanguna. Kumamanino aansondo, bamwi balikujanika kabalyookezya mumapaaki, mumabuwa aakusobanina, kuzilabba zyabasikweendeenda, mumaanda naa ibalindilila mumasena musiigwa myootokala naa mumantoolo bajanika kuba bantu baakkomanina makani mabotu.
4 Uyabukomena mweelwe wabasikumwaya ibalisunka kukucita bumboni mumasena aabuleya, kufwumbwa nkobanga bajanika bantu. Kusaanguna aba Bakamboni bakali kweenkeenka akulibilika akaambo kakutazibila kukambauka mumasena aamilimo mbuli mbobacita kuŋandaa ŋanda. Ino balimvwa buti lino?
5 “Ma! Ino candisungwaazya kaka alimwi mumulimo!” mbwaakakankamuka umwi mukwesu. Uumbi ulayungizya kuti: “Cindipa kubikkila maanu kumulimo.” Umwi painiya mupati wakaamba kuti: “Candikulwaizya kumizeezo, kumubili, akumuuya, . . . alimwi ndicisumpuka.” Sikumwaya umwi wakaamba kuti lino usikila bantu banji batana buzuba baambaula a Bakamboni ba Jehova. Abalo bakubusi balautolelezya muuya oyu wakubeleka mulimo uukondelezya. Mukubusi umwi waamba kuti: “Cilanoneezya nkaambo inga waambaula abantu banji loko.” Aumbi musankwa ulaamba ategwa: “Ndiyaabusiya mabbuku manji kwiinda lyoonse!” Zyoonse ezi zili mukucitika mumasena aabeelekwa ciindaa ciindi.
6 Balangizi Beendeenda Balasololela: Mbobabwene kuti “ziyanza zyaansi ano zili mukwiindilila,” iba Sosaiti ino-ino bakakulwaizya balangizi beendeenda kuti bacince nzila njobabeleka mumuunda insondo ansondo kutegwa bantu basisyilwa makani mabotu bavwule mbuli mbokunga kwakonzeka. (1 Kor. 7:31) Kwamyaka iili mbwiibede, balangizi bamabbazu balikubikka buzuba bumwi mukati kansondo mwalo mafwumofwumo mubali kubeleka kuŋandaa ŋanda, kumane calo ciindi cakumazuba cali kubikkilwa kupilukila akucita ziiyo zya Bbaibbele. Mumasena mumwi eyi nzila ilakonzya kiicibeleka. Pele mumbi mumasena taakwe cipati cicitika kwiinda mukubeleka kuŋandaa ŋanda mukati kansondo mafwumofwumo. Mumasena aali boobu, balangizi beendeenda balakonzya kusala kuti inga cabota mafwumofwumo ikuyoobelekela kucintoolo acintoolo naa kubelekela mumigwagwa. Antela ulakonzya kumvwana abasimbungano kuti tubunga-bunga tukakambauke mumaanda aamaopesi aamujulu, kumantoolo, mumasena musiigwa myootokala, alimwi amumasena ambi aabuleya. Kwiinda mukucibelesya kabotu ciindi ciliwo camulimo wamumuunda, basikumwaya bayoosikila bantu banji.
7 Kuluulwa kuti kucinca oku kwatambulwa kabotu loko abalangizi beendeenda alimwi abasikumwaya. Tubunga twabaalu tuli mbotubede twali kwiita mulangizi wabbazu kuzooyiisya basikumwaya bamwi mbazu zyamulimo iziyandika mumasena omo. Cali cintu cigwasya kuli basikumwaya aba ikweenda limwi amulangizi wabbazu nayaabucita milimo eeyi. Abalo bamana balikukonzya kuyiisya bambi. (2 Tim. 2:2) Aboobo bantu banji bali mukusikilwa makani mabotu.
8 Aino, tamuyandiki kulindila biya kuti mane asike mulangizi wabbazu kuti musoleke nzila ezi zimbi zyakukambauka. Njeeyi imwi mizeezo yiindene-indene yalo iinga yamubonekela kugwasya mulubazu lwenu:
9 Kukambauka Kwamumigwagwa: Zimwi ziindi notuswaya munzi uumwaikidwe ciindi camafwumofwumo mukati kansondo inga tulalibuzya kuti: ‘Ino bayayi bantu boonse?’ Bamwi bajanika kuti kuli nkobaakucita tulimo-limo naa kumantoolo. Sena kuli nomwakasolede kubasikila kwiinda mukukambauka mumigwagwa? Ciindi niicitwa kabotu eyi mbazu yamulimo ilakonzya kugwasya kapati. Muciindi cakwiide kwiima amamagazini abusena bomwe, cilainda kugwasya kubagama biya bantu akutalika mubandi mubotu. Takuyandiki biya kukambaukila sikwiinda woonse. Amubandike abaabo batabindide, mbuli baide kusondaila mumpulungwido, aabo bakkede mumyootokala yiimvwi, naa bantu balindila zyeendela buleya. Mulakonzya kusaanguna buyo kwaanzya akulindila kwiingulwa. Kuti muntu oyo kayandide kwaambaula, amumubuzye mbwayeeya kumakani amwi nywebo ngomubwene kuti inga amukonda.
10 Umwi mulangizi weendeenda wakaita basikumwaya bali cisambomwi kuti bakabeleke limwi anguwe amukaintu wakwe kukukambauka mumigwagwa. Ncinzi cakatobela? Ulaluula ategwa: “Bwakatubotela loko buzuba obo! Kwakanyina kulyuuma bbi. Kwakasiigwa mamagazini aali 80 amatrakiti. Twakacita mibandi iinoneezya. Umwi sikumwaya, walo cakali nceciindi cakusaanguna kubeleka mumigwagwa, wakakankamuka kuti: ‘Ma! Yoonse eyi myaka ndali mukasimpe pele kunyina akuzyiba kuti oku ndaindwa.’ Kuyoosika kumamanino aansondo, mamagazini aakalundene mumbungano akamanizigwa.”
11 Naakali kubeleka kumbungano yakatobela, nguwena oyu mulangizi weendeenda bumwi buzuba wakamvwa kuti basikumwaya bali mbobabede bazwa kukukambauka mumigwagwa mafwumofwumo pele teebakazwidilila loko. Umwi mucizyi wakabandikide biyo abantu bobile coonse eco ciindi cakukambauka, nkaambo boonse bambi mbaakaswaana bakali kwiide kubindaanina kumilimo. Mulangizi weendeenda wakabakulwaizya boonse kuti bapiluke nkukonya kumugwagwa oyo kaciindide-indide eco ciindi mafwumofwumo. Bakacita obo akuzumanana kusikila acilangankumo. Ooyo mucizyi wakaambaude biyo abantu bobile mafwumofwumo wakainda loko awo ciindi naakapilukila. Wakasiya mamagazini aali 31 amabroshuwa aali 15, wakalemba mazina amakkeyala aabantu bali ciloba, akutalika ziiyo zya Bbaibbele zyobile! Ibambi munkamu eyo abalo bakacita mulimo uukulwaizya.
12 Ciindi nomujana muntu uuyandide, amusole kulemba zina lyakwe, kkeyala, alimwi anamba yaluwaile. Muciindi cakugama biya kubuzya twaambo otu, mulakonzya kwaamba kuti: “Imubandi wesu oyu wandibotela. Sena taakwe mbotunga twaakuzumanana kuciindi cimbi?” Antela inga mwabuzya kuti: “Sena kuli mbwenga ndazoosika kwenu?” Ibanji babandikwa limwi munzila eyi balazumina kupilukilwa.
13 Kuti kamwaambaula amuntu uuyandide uukkala mulubazu lupedwe kumbungano imbi, mweelede kusisya makani aya kubakwesu bakkala nkuko kutegwa bakonzye kuzumanana anguwe. Sena kukambauka mumigwagwa ninzila yakumwaya makani mabotu iinga yabeleka oko kulindinywe? Kuti kakuli boobo, amulange-lange cibalo camutwe wakuti: “Kupeza Okondwerera Kupyolera mu Umboni wa m’Kwalala Wogwira M’tima” mu Uthumiki Wathu wa Ufumu wa July 1994. Mpoona amulibambile kuyoobeleka mukukambauka kwamumigwagwa kuciindi cabuzuba iceelela kuti musikile bantu banji mbuli mbokunga kwakonzeka.
14 Kucita Bukamboni Muzyeendela Zyabuleya: Bumwi buzuba mafwumofwumo bapainiya bali mbobabede bakasala kuti bakambaukile bantu balindila bbaasi kumbalaa cikolo cipati cimwi. Nokuba kuti bakabandika mibandi mibotu, kwakali penzi limwi. Bakajana kuti alya mubandi mpuwakondela, alyalo bbaasi lisika buya, akukosokezya mubandi oyo. Aabo bapainiya ipenzi elyo bakalimana kwiinda mukulitanta bbaasi elyo akuzumanana kuyaabukambaukila basikutanta abo nobayaabweenda mudolopo. Baakusika oko nkoligolela bbaasi, alimwi nkupiluka andilyo, kumwi bayaabukambauka. Bamane kupilauka boobo kwaziindi zili mbozibede, bakalingula mulimo ngubakacita: Nkujana mamagazini a inda ku 200 aakasiigwa alimwi aziiyo zya Bbaibbele izili cisambomwi zyakatalikwa. Bamwi basilweendo bakalisungula kupa makkeyala abo amanamba aaluwaile kutegwa bakakonzye kuswaigwa ikwabo. Nsondo yakatobela, aabo bapainiya bakapiluka kucitisyini ca bbaasi akubelesya nzila njiyonya eyo. Bakasiya mamagazini aali 164 akutalika cimbi ciiyo ca Bbaibbele comwe. Amwi acitisyini kwakatanta silweendo iwakazookkala acuuno celikke icakasyeede—icakabambene acapainiya. Wakamulanga mukwesu oyo akumwaambila cakumwetamweta ategwa: “Ndilizi wandiletela Ngazi Yamulindizi.”
15 Banji basikumwaya balapa bukamboni bugwasya ciindi nobeenda amabbaasi, acitima, naa andeke. Ino inga mwatalika buti mubandi asilweendonyoko ngomubambene limwi kukkala? Umwi sikumwaya wamyaka iili 12 wakaide kutalika kubala magazini ya Awake! mubbaasi, kutegwa ambweni mooye ngubakabambene limwi kukkala inga ulayanda kubuzya. Imuzeezo oyo wakabeleka. Musimbi oyo wakamubuzya ncabala, elyo mukubusi oyo wakaingula kuti ubbala nzila yakumana mapenzi ngobaswaana bantu bakubusi. Wakayungizya akwaamba kuti cibalo eco cakamugwasya kapati akuti awalo inga camugwasya. Wakaazumina mamagazini ayo cakukondwa. Mubandi wabo wakamvwigwa abakubusi bambi bobile ibakaayanda mamagazini ayo. Abone boobo, namutekenya nkwiimika bbaasi akutalika kubuzya ncaayandilwa boobu mamagazini ayo. Naakazyiba, awalo wakazumina kubaa makkopi. Aino, zyoonse ezi taakwe mbuzyakali kunookonzeka kuti sikumwaya oyu mukubusi naatakajisi mamagazini aakumwaya kuli baabo bayanda!
16 Kukambauka Mumapaaki Amumasena Musiigwa Myootokala: Ikukambauka mumapaaki amumasena musiigwa myootokala ninzila mbotu loko yakusikila bantu. Sena kuli nomwakasolede kukambauka mubusena musiigwa myootokala kumbalaa mantoolo amwi? Lyoonse kamunga kwakaindi-indi amubulange-lange busena obo mbobubede. Amusole kujana muntu uutabindide naa uulindila mumootokala wiimvwi akusola kutalika mubandi mubotu. Kuti mubandi wazumanana, amuunjizye-njizye mulumbe wa Bwami. Amusole kwaandaana kubeleka asikumwaya umbi mubusena mbubonya. Mutabwezi bbeeke lipati lizwide, naa mutautondezyi munzila zimbi mulimo ngomucita. Kamucejela. Inga cagwasya kuti mwakkala buyo kaindi kasyoonto mubusena musiigwa myootokala bomwe-bomwe akulongela kumbi. Kuti umwi muntu katayandi kubandika andinywe, amumusiye cabulemu muzumanane ikuyaabuyandaula bamwi bakusoleka. Kabelesya nzila ezi, umwi mukwesu wakasiya mamagazini aali 90 mumwezi omwe buyo kayaabukambauka mumasena musiigwa myootokala.
17 Bamwi bantu kupaaki baunka kuyoolyookezya; bamwi baunkila kuyoosobana cisobano, naa kuyooenzeenzya bana babo. Kakutakwe kunyonganya nzyobacita munzila yabuyamba, amulangisye mubone ciindi cinga ceelela kubakambaukila. Umwi mukwesu wakatalika mubandi asikubamba paaki akujana kuti wakali kulibilika misamu iikola mboinga yajatikizya buumi bwabana bakwe kumbele. Kwakatalikwa ciiyo ca Bbaibbele calo cakali kucitwa lyoonse mupaaki.
18 Kukambauka Kwamukwiizya Kumantoolo: Nokuba kuti talili lyoonse nocikonzyeka kukambauka munzila yamilimo kumilyango yacintoolo acintoolo akaambo kakukasyigwa kwamicito ili boobo ikunga kwacitwa kubusena oko, bamwi basikumwaya balabamba ciindi ncobanga bakambaukila nkukonya munzila yakwiizya buyo. Balakkala abbenci akutalika mubandi abantu basika mpawo kuzoolyookezya. Naa muntu wayanda, balasoleka kusiya trakiti naa magazini cakutalitondezya kubuleya akusoleka kumvwana kuti bakapilukile. Bamana kutola maminiti aali mbwaabede kabakambauka alubazu lumwi, balongela kulubazu lumbi akuyoobandika aaumbi muntu. Aino kweelede kucenjela kuti utabonwi mabonwa-bonwa ciindi nokambauka munzila eyi yakwiizya.
19 Ciindi mwaanzya muntu, amuutalike mubandi munzila yabulongwe. Kuti muswiilizi waingula kabotu, amubuuzye mubuzyo, mpoona muswiilile kabotu naambaula. Amuyandisye ncobeni kumvwa ncaamba. Amutondezye kuti mulailemeka mizeezo yakwe. Awo mpocikonzeka, amumuzuminizye.
20 Umwi mucizi wakabandika mubandi uukondelezya amucembele umwi kwiinda mukwaamba mbubwayuma bukkale. Mucembele oyo taakawayawaya kumuzuminizya, elyo kwakatalika musalo mubotu. Mucizi wakakonzya kuzyiba zina lyamucembele oyo alimwi akkeyala, elyo wakamupilukila nsondo njiyonya eyo.
21 Kubeleka Kucintoolo Acintoolo: Imbungano zimwi mulubazu lwazyo muli masena aamakwebo. Imukwesu uulanganya zyalubazu ulakonzya kubamba maapu mbotu iyamasena aya aagwitide loko kumakwebo. Kufwumbwa maapu yankomponi iijatikizya abusena bwamakwebo yeelede kutondezya kabotu-kabotu kuti aya taayeelede kubelekwa mbuli cibeela calubazu. Mumabazu ambi, masena aamakwebo alakonzya kubelekwa antoomwe ankomponi. Baalu balakonzya kulomba basikumwaya beelede ikunoobeleka masena aamakwebo lyoonse kutegwa mulimo wakucintoolo acintoolo utayambaalilwi.
22 Kuti mwalombwa kutola lubazu mumulimo oyu kakuli tamunaucitide, inzila imwi ‘yakubaa camba’ njakusaanguna kubeleka mutuntoolo tusyoonto-syoonto; nkokuya mubeleke zipati-pati mbomuyaabuzibila. (1 Tes. 2:2) Ciindi nomubeleka kucintoolo acintoolo, amusame mbuli mbomunga mwasama kuti kamuya ku Ŋanda ya Bwami. Kuti kacikonzeka, amucinjile cintoolo ciindi nokutakwe balindila kuti baule. Amulombe kwaambaula ameninjala naa akapitao. Mube bantu balaa cilongwe, alimwi cipati kwiinda ncakuti amukosaule kwaamba. Taakwe kaambo kakulyeetezya-etezya pe. Basimakwebo banji balabalemeka basikuula aboobo balizyibide kucubilwa.
23 Mwamana kumwaanzya sicintoolo, mulakonzya kwaamba kuti: “Basimakwebo bajisi bubi bwakuti kanjikanji tatubajani pe kumaandaabo, aboobo twazoomuswaila kokuno nkomucitila makwebo kutegwa tumusiile cibalo cimwi cinga camupa kuyeeya kapati.” Mpoona amupandulule kaambo komwe naa tobile tuli mumagazini mpya.
24 Antela inga mwayanda kusola nzila eyi ciindi nomusikila meninjala: “Tujana kuti basimakwebo banji balasoleka kujana luzibo lunji. Ngazi Yamulindizi (naa Awake!) impya ijisi cibalo icitujatikizya toonse kutugama.” Amucipandulule mpoona mumanizye amajwi aakuti: “Twasyoma ciyoomubotela kucibala.”
25 Kuti kakuli babelesi, alimwi kaceelela kucita boobu, mulakonzya kuyungizya akuti: “Sena inga mwandizumizya kupa mulumbe nguwenya oyu mufwaafwi akubabelesi benu?” Kuti mwazumizigwa, kamuyeeyede kuti mwasyomezya kukosaula kwaamba, meninjala uyooyanda kuti mucite mbumwaamba. Kuti babelesi bamwi bayanda kulampya mubandi, inga cainda kugwasya ikuyoobasikila kwabo.
26 Ino-ino basikumwaya bali mbobabede ibamukadolopo kasyoonto bakasindikila mulangizi wabbazu mumulimo wakucintoolo acintoolo. Bamwi basikumwaya bakali kulibilika kusaanguna, nkaambo teebakalina belekede mulimo oyo; pele teelyakalampa yakabakkala myoyo batalika kubotelwa mulinguwo. Talina akukkwana woola lyomwe, bakaambaula abantu bali 37 akusiya mamagazini aali 24 amabroshuwa aali 4. Umwi mukwesu wakaamba kuti lyoonse inga tabacikonzi kusikila bantu banji mumwezi ngobabelekela kuŋandaa ŋanda mbuli mbobakasikila mukubelekela kucintoolo acintoolo muciindi eco cisyoonto.
27 Kubamba Ciindi Cakukambauka: Jesu taakali kwiide kukambauka munzila yamumulimo. Wakaamwaya makani mabotu kufwumbwa aciindi ceelela. (Mt. 9:9; Lk. 19:1-10; Joh. 4:6-15) Amumvwe basikumwaya bamwi mbobabamba ciindi cakukambauka.
28 Bamwi balalizyibizya kukambaukila bazyali balindilila bana babo kumanjililo aalubuwa lwacikolo. Mbokunga bazyali banji balasika kakucili maminiti aasika ku 20, inga kuli ciindi cakubandika ambabo mumubandi uujatikizya Magwalo.
29 Bapainiya banji baliyeeyede mbokuyandika kusikila bantu bayandide kubandika makani amwi kwaagama alo aapandululwa mumamagazini esu. Mucikozyanyo, umwi mucizi wakatambulwa kabotu naakaswaya zikolo zili cisambomwi izili mulubazu lwambungano yakwe kajisi Awake! yamu December 22, 1995, yalo yakajisi mulongo wazibalo zijatikiza mutwe wakuti “Schools in Crisis.” Alimwi wakaswaya mbunga zilanga bukkale mbwamikwasyi kajisi mamagazini aajatikizya buumi bwamumukwasyi alimwi akupenzya kwabana elyo bakamvwana kuti kanoopilukila lyoonse kutola mamagazini aaza kumbele aanoojatikizya makani aali mbuli bayaaya. Kutambulwa nkwaakaakutambulwa kuopesi lilanga bamalovwa nkwaakatolede Awake! ya March 8, 1996, iyakalaa makani aabumalovwa wakakupandulula kuti “kwakamulamya.”
30 Umwi mulangizi wacooko uluula kuti walo amukaintu wakwe lyoonse balakambauka munzila yakwiizya ciindi nobaya kuyooula kumantoolo. Balaula aciindi cintoolo nocitazwide bantu, iciindi basikuula nobaliibide kuyaabweendeenda akati kamashelufwu. Baluula kuti balaba amibandi minji mibotu.
31 Mumwi mumadolopo basikumwaya banji balaluula mbocigwasya kapati nobakambaukila bantu mumasena aakusanzizya zisani aabuleya. Tabaide kusiya buyo mamagazini ciindi nokutakwe uliwo. Makanze abo ngakusisya makani mabotu kubantu, aboobo balasoleka kwaambaula lwabo beni abantu babelesya busena obo.
32 Mumwi mumasena, basikumwaya basalidwe balizumizidwe kukambauka kumabbuwa aandeke. Zimwi ziindi balakondwa kukambaukila bamuzwakule beendeenda balo bakkala mumasi omo bantu ba Jehova mobali basyoonto kumweelwe. Kuti bajanika kuti baliyandide, inga basiilwa trakiti niiba magazini.
33 Kuti lwabo kabatazumizidwe kukambauka kubantu bakkala muŋanda yamidadaada iikwabikidwe kapati iili mulubazu lwambungano eyo, bamwi balalizibizya kukambauka kabotu-kabotu kuli bamalonda balaa mulimo naa kuli bameninjala ibali mumaopesi aakutelela maanda ayo. Njiyonya eyo nzila ilabelesyegwa kumasena maanda nsini-nsini nkwaalibedelede aimwi mulukwakwa. Umwi mulangizi wabbazu alimwi abasikumwaya basyoonto bakaswaya maanda aamidadaada aali ciloba munzila eyi. Ali imwi aimwi bakaambila meninjala kuti nokuba kuti tabazumizidwe kuswaya kuŋanda eyo munzila njetucita lyoonse, walo teebakali kumuyanzya kuti aindwe makani aali mumamagazini mapya. Bameninjala bakumasena oonse ayo aali ciloba bakazunina mamagazini akulomba kuletelwa aatobela! Mpoona basimaanda ayo balakonzya kusikilwa kwiinda mukubaumina luwaile.
34 Amusoleke Kukambauka Koonse-Koonse: Kuzuzikizya kulyaaba kwesu kujatikizya kulimvwa kuti mulimo wesu wakukambauka mulumbe wa Bwami ulibindide. Kutegwa tusikile bantu aciindi nobatajisi bubi balo, tweelede kuliimya zimwi nzyotuyanda kutegwa “[tu]kasinizye kufutula bamwi.” Boonse babelesi ba Jehova balyaabide bayanda kuti bakonzye kwaamba bwakaamba Paulo kuti: “Zyoonse nzincita, nkaambo ka-Makani Mabotu nkinzicitila, kuti nkabe mwaabilanwa abo mulingao.”—1 Kor. 9:22, 23.
35 Paulo wakazumanana akulemba kuti: “Aboobo ndalikankaizizya makompami aangu cakukondwa, kuti inguzu zya-Kristo zindipopele. . . . Ikuti ciindi ncinkompeme nciconya ncindi singuzu.” (2 Kor. 12:9, 10) Ikucaamba bumbi, taakwe umwi wesu uunga waukonzya mulimo oyu munguzu zyakwe mwini. Tuleelede kulomba muuya uusalala wanguzu kuli Jehova. Kuti twalomba nguzu kuli Leza, tulakonzya kusyoma kuti uyootwiingula mipailo yesu. Eelyo luyando lwesu lwabantu luyootukulwaizya kulangaula ziindi zyakubakambaukila makani mabotu, kufwumbwa nkobanga bajanika. Mbuti kusola nzila zimwi nzyomukulwaizigwa mupepa lyamukati eli munsondo eyi iiboola?