Muswaangano wa Cooko wa Bakamboni ba Jehova wa 1997 wa “Lusyomo mu Jwi lya Leza”
1 “Buzuba bomwe buyo bwamucikalilo cako mbubotu kwiinda mazuba aali cuulu aakumbi.” (Int. 84:10) Ciindi sitembauzyo naakali kukomba kutempele lya Jehova, wakali kumvwa kuti Leza singuzuzyoonse nkwali. Icisi nocakali kuswaangana kukusekelela kwamwaka amwaka ibakombi bakasimpe nobakali kuzula mu Jerusalemu, ibana Israyeli bakali kuba akuyanzana kubotu ciindi nobakali kuswaangana mucikkalilo catempele. Bakali kuyeekezyegwa lukamantano lwabo lwamucisi kuti mbabantu balikke anyika balo Jehova mbaakapa zilongezyo. Mwaka amwaka tulijisi coolwe cakutola lubazu mukulimvwa kukamantana akukkomana antoomwe azyuulu zya bakwesu abacizi. Mazubaano imiswaangano yacooko yaamwaka njimwi yanzila Jehova njaletela bantu bakwe antoomwe kuti balaililwe alimwi akuyanzana.
2 Ikulanganya myeelwe mipati yabantu ba Jehova bakakkede mu Jerusalemu alimwi amunsi-munsi ciindi cakusekelela, kwakali kuyandika bweendelezi. Kulalangilwa kuti kutegwa zintu zyeende mumulawo alimwi aluumuno kwakali kuyandika kupa malailile kujatikizya aakukkala, ciindi camiswaangaano alimwi abubambe bumwi. Akaambo kakuti twaambo otu twakali kujatikizya bukombi bwakasimpe, ibana Israyeli bakali kwaatobela malailile aaya cakukkomana.—Int. 42:4; 122:1.
3 Mbuli mbokuyaabuyaambele kulibambila kwesu kwa Muswaangano wa Cooko wa 1997 wa “Lusyomo mu Jwi lya Leza” tulijisi twaambo ituyandika kuti mutubikkile maanu alimwi akutulanga-langa cakusinizya. Ikubeleka kwanu antoomwe kuyootondezya kulumba kwanu kububambe boonse mbomucitilwa. Nokuba kuti twaambo tumwi twakabandikwa kale musule omu, kulayandika kapati kuti umwi aumwi wesu abone kabotu-kabotu mukuli ngotujisi kuli Jehova mukugwasilizya bubambe bwa miswaangano.
4 Bubambe Bwamasena Aakoona: Kanjikanji bakwesu balaakulibambila beni kwakukkala kubasazinyina naa kubeenzinyina bali mumadolopo kucitilwa miswaangano. Muminzi bakwesu balayaka zidumba naa koona muzilabba zipati ziyakwa abasikulisungula baamuswaangano. Mumiswaangano mumwi babelesya maanda aakoona aazikolo kutegwa bajane aakukkala basimuswaangano bamwi. Notupegwa aakoona kubakwesu naa basazima, tacili cibotu kuti basimuswaangano bakutolela mumbi kusamausya kwabakwesu kwiinda mukulangila kuti balazumizigwa kukkala kwamazuba aaindilila kutegwa balyookezye wamana muswaangano. Aaya maanda ngaciindi buyo camuswaangano. Aabo bapegwa aakoona munzila eyi beelede kubona kuti balo abana babo balilemeka kubalaaŋanda alimwi akutajaya cili coonse naa kulanga-langa mumpasya naa mumasena aatasikwi-sikwi muŋanda. Kuti naa uulaaŋanda wabaa buyumuyumu buyeeme kumakani aaya, kufwambaana-fwambaana weelede kuzibisya Cibeela Cilanga Aakoona kubusena bucitilwa muswaangano elyo bakwesu ooko bayookkomana kugwasya.
5 Iziyandika Zyaalubazu: Obu bubambe mbwabasikumwaya baimvwi kabotu balikke kubikkilizya abaabo balaa bana balilemeka kabotu ibazuminidwe a Kkomitii ya Mulimo ya Mbungano. Aabo bayandika zyaalubazu mbakwesu abacizi alimwi tuyanda kuti tubagwasye.—Jak. 2:15-17; 1 Joh. 3:17, 18.
6 Ibacembeede, ibalema, aabo bali mumulimo waciindi coonse naa bamwi buyo balakonzya kuyandika lugwasyo kutegwa bajanike kumuswaangano. Ibanamukwasyi, baalu alimwi abamwi mumbungano banga kababuzyi bukkale bwabo bulibedelede balakonzya kucita bubambe buyandika kuleka kulonzya mukuli oyu wamukwasyi naa mbungano kubweendelezi bwamuswaangano. (Amweezyanisye 1 Timoteo 5:4.) Kamutana ilemba foomu Yakulomba Aakoona (Room Request form), amubale kabotu-kabotu makani aalembedwe kunsi afoomu. Aaya mapepa ayelede kutuminwa cakufwambaana ku Cibeela Cilanga Aakoona.
7 Aabo balaa nzyobayandika zyaalubazu TABEELEDE kuunka kumuswaangano akuyoolomba akoona basika nkaambo ba Cibeela Cilanga Aakoona beelede kuti bakaambilwa kale masimpe a Kkomitii ya Mulimo ya Mbungano.
8 Basimuswaangano Bazwa kumbi: Iziindi zinji, busena mbomwaambilwa kujanika mbuboobo buli munsi-munsi ambungano yanu. Bubambe bwakubaa busena bwakukkala bupati, mabbuku, aakoona azimwi-zimwi ziyeeme abusena ooko basikumwaya banji nkobayoocitila muswaangano kwalo mbungano yabo nkoiyoojanika. Nokuba boobo, kuti naa kuli kaambo kalimvwisya ncomuyoojanikila kumuswaangano kumbi kuleka kooko nkomweelede elyo muyandika aakoona, mulembi wambungano ulakonzya kooda foomu Yakulombela Aakoona kuzwa ku Sosaiti (Room Request form) yalo njomweelede kulemba akusaina. Mpoonya amwiitume ku opesi pati lyamuswaangano nkomuyooswaanganina.
9 Kubelekela Antoomwe Kwanu Kulayandika: Ikuzwidilila kwa bubambe obu bwa masena aakoona kuyeeme akubelekela antoomwe kwabaabo boonse bajatikizidwe.—Amweezyanisye a Ba-Hebrayo 13:17.
10 Kwiinda mukujatikizigwa mumiswaangano yabantu ba Jehova, tulayumizigwa kucita kuyanda kwa Jehova alimwi tulakwabililwa kuzwa kukuyunga kwanyika kwalo kunga kwatola aansi lusyomo lwesu lwa Bunakristo. Toonse tulakonzya kulumba kuti Jehova wapa ciindi cakukatalukwa kwakumuuya kubantu bakwe balyaabide muciindi eci cakumamanino.
11 Kukwabilila Mililo Antenda Zimwi: Cakutadooneka, iciletelezya mililo kumiswaangano takuli kujikila munsi aazilabba pe, pele nkuteendelezya bana basobana naa basosela mililo. Aboobo, kutegwa mukwabililwe nywebo alimwi abanyoko, mutalekeli bana banu kweendeenda kakunyina uubalanga; mutalekeli bana kulanga meenda aawalauka amulilo naa munzila imwi kulekela bana kusosela mulilo. Balakonzya kabacizi kucita zintu ezi kabotu-kabotu kumunzi, pele kumuswaangano mbusena bumbi alimwi kweelede kucenjelwa kapati kutegwa tutantamune ntenda. Bantu banji balayanda kukkala antoomwe alimwi bana balayanda kucita zisobano nobali aabananyina. Balafwambaana koongwa alimwi tababoni kuti inga kwaba ntenda elyo akaambo kaboobo tatweelede kubasiila nkendulu, manchisi amalampi. Penzi limwi liboola ciindi bazyali nobaunka kumiswaangano cifwumofwumo akumazuba bamana basiya bana basyoonto kakunyina aubalanga kuzilabba. Ibana beelede bakkale antoomwe abazyali babo ciindi camaprogilamu. Kuti bagwasilizi babona kuti bana baide kweendeenda mubusena bwamuswaangano kakunyina aubalanga, balakonzya kujola bana kubazyali babo. Nobazyali twakomba amubelekela antoomwe ababelesi bamuswaangano elyo munzila eeyi muyootondezya kuti ‘mulabayanda babunyina.’—1 Pet. 2:17.
12 Imbunga ya Jehova ilatuyeezya caluyando aciindi ceelede kujatikizya miswaangano. Cilausisya kujana kuti mumiswaangano iilimbwiibede myaka yamusule, basimiswaangano bamwi bakasowekelwa mpasya zyabo kwiinda mumililo yalo yakali kunga yatantamukwa. Aabo bakwesu bajatikizidwe kumiswaangano kapati bazyali balombwa kubikkila maanu kapati ku twaambo otu tuyandika loko kutegwa miswaangano yesu ikabe kuyanzana kuyaka alimwi kukkomanisya, ikutali yamapenzi abuumba akaambo kabuyamba bwalo buleta ntenda.
13 Cilasalala kulindiswe toonse kuti Jehova ulagwasilizya mububambe boonse bwa miswaangano yamwaka amwaka. Mbwaanga otu twaambo tujatikizya bukombi bwesu bwakasimpe, tweelede kutobela malailile aapedwe cakukondwa. Akaambo kakutondezya kuti ‘tulisyomekede muciniini’ citubikka amulongo wakutambula zilongezyo zipati zyalo zilindila baabo Jehova mbayanda.—Lk. 16:10.
14 Ibbuku lya Isaya 33:20 lyaamba kuti: “Pe! Langa Zioni munzi wamapobwe esu.” Tulakonzya kuyeeya makamu makamu aakakkomene aakali kuzula mu Jerusalemu alimwi aakali kumvwida malailile aa Jehova cakulisungula aakuti “muyoosekelela buyo.” (Dt. 16:15) Miswaangano yesu yacooko yamwaka amwaka itupa coolwe cipati cakwiiya malailile aa Leza alimwi akukkomanina bulongwe bubotu bwa bakwesu abacizi. Jehova aleleke kusoleka kwanu mukulibambila kuyakujanika kumulongo wamiswaangano yacooko ya “Lusyomo mu Jwi lya Leza” ya 1997!