Kabbokesi Kamubuzyo
◼ Nkaambo nzi ncotweelede kufwambaana kucita lipooti yamulimo wesu wamumuunda?
Toonse tulakondwa ciindi notumvwa makani aazintu zibotu zili mukucitika mukukambauka mulumbe wa Bwami. (Amubone Tusimpi 25:25.) Incito 2:41 iluula kuti Petro naakamana kwaamba mulumbe wakwe uukulwaizya mubuzuba bwa Pentekoste, “bakayungililwa bantu bati kabe myaanda iili makumi otatwe.” Nokwakainda buyo kaindi-indi, ooyo mweelwe ikukomena “wati kabe makumi osanwe emyaanda.” (Incito 4:4) Aawo mwati nkukondwa Ibanakristo bamumwaanda wamyaka wakusaanguna! Aswebo mbotucita ciindi notulwiidwa zintu zikulwaizya sunu. Tulanoneezegwa ikumvwa zyakuzwidilila kwabakwesu mukukambauka makani mabotu nyika yoonse mbwiizulwa.
Mbokunga kubelesegwa ciindi cinji mukuyobolola malipooti aaya, kulayandika kuti woonse sikumwaya makani aa Bwami agwasye. Sena muli bantu basinizizye kukufwambaana kupa lipooti yenu mwezi amwezi?
Malipooti aajatikizya kuyungizigwa alatupa kukondwa kapati. Kunze lyaboobo, malipooti alagwasya Sosaiti kuti kayeebelela bweende bwamilimo nyika yoonse mbwiizulwa. Kweelede kusala kuti naa nkukuli lugwasyo nkolweelede naa musyobo wamabbuku amweelwe uuyelede kubambwa. Baalu mumbungano imwi aimwi balabelesya malipooti aamulimo wamumuunda ikubona kooko ikukonzya kuba lusumpuko. Malipooti mabotu alayaka, alatukulwaizya toonse kuti tulilingule mulimo wesu kubona mukonzeka kusumpuka.
Boonse basikumwaya beelede kuzumina mukuli wabo wakufwambaana kupa lipooti yamulimo mwezi amwezi. Beendelezi ba Ciiyo Cabbuku Cambungano mbabali muciimo mobanga bayeezya basikumwaya mukuli wabo, mbokunga kumwi balipakamene kuti bape lugwasyo lugaminide baabo banga banoojene buyumuyumu mukutola lubazu mumulimo wamumuunda lyoonse mwezi amwezi. Eeci ciyeezyo cilakonzya kucitwa kuciiyo cabbuku camamanino mwezi amwezi antela kuciindi cimbi cili kabotu. Kuti kakutakwe ciindi cakupa lipooti yamulimo wamumuunda ku Ŋanda ya Bwami, imweendelezi wa Ciiyo Cabbuku Cambungano ulakonzya kwaayobolola akubona kuti apegwa kumulembi kakucili ciindi cakuti abikkilizigwe mulipooti yambungano yalyoonse iiya ku Sosaiti.
Busungu bwesu kukufwambaana kucita lipooti yamulimo wesu wamumuunda cakusyomeka bulawuubya-ubya mukuli kulibaabo ibalanganya buponi bwesu bwakumuuya.